Luka 23

1Keŋte balaŋ baŋ bↄↄ gyaŋee botↄↄ nɛ pou korowↄ mo Yesu gyu Pilato ŋon ↄ seŋɛɛ Romantena gyoo dinaa nawↄↄ man nɛ gyaŋ, 2te be fiasɛɛ bɛɛ mo nombia gyakaa ↄ dↄↄ nyiaa, "De naa balee kei dↄŋ de balaŋ siaman ↄ na wola wↄ nombiakumɛɛ keyɛɛ. Ↄ ne bɛɛ nyi be na tↄ lempoo fa gyoo dinaa Kaesa ya, te ↄ ne gyↄ ↄ konↄↄ yako nyi ŋon yɛna nyeelɛɛre ŋon Wurubuarɛ be yako see nyi waa kↄŋ nɛ, te ↄ yɛɛ gyoo mↄ e." 3Botↄↄ te Pilato bↄↄse Yesu nyiaa, "Nyaŋ yɛna Gyudatena gyoo ŋon?" Te Yesu tiranↄↄ nyi, "Mena yaa n yakowↄ nɛ." 4Keŋte Pilato yako saese kegyiise baŋ na balaŋ dikpii keŋ nyiaa, "Ma te naa nombiikum keŋ balee kei be yɛɛ keŋ kaboena nyi maa bu e fↄↄ ya." 5Mↄna nɛnɛɛ gba te ba seŋɛɛ be nↄↄwoya dↄↄ keŋkeŋ nyi, "Ↄ ta mo ↄ kawola keŋ wↄlɛɛ balaŋ agyueŋ Gyudia tɛɛle kei dↄↄ pou. Ↄ fiasɛɛ lee Galelia tɛɛle dↄↄ te nɛnɛɛ ↄ te kaa lii de gyaŋ kɛbo." 6Pilato ke nyii nombia kɛŋa nɛ ↄ bↄↄsewↄ nyiaa, "Balee kei yɛɛ Galelia baale e?" 7Pilato ka gyeŋ nyi Yesu lee gyoo Herode tɛɛle man nɛ, ↄ yela ba mo e gyu gyoo Herode gyaŋ. Debaŋ kenaŋ na gyoo Herode mↄ kyaa Gyerusalɛm donↄↄ man botↄↄ. 8Gyoo Herode kena Yesu nɛ yɛɛ e gyoŋ nideli, nawolo nyi ↄ wulaa nyii Yesu wose man nombia te ↄ ne gyae e mↄ waa naa. Lee mena keŋ ↄ be nyii Yesu wose man nombia dↄↄ nɛ, wa agyueŋ yɛna nyi waa yɛɛ gyakoloŋ nombia wola e. 9Mena dↄↄ gyoo Herode bↄↄse Yesu nombia burum, mↄna ↄ te tira ŋe man dokoloŋ nↄↄ ya. 10Botↄↄ na saese kegyiise na Gyudatena mmaraa wolala baŋ seŋɛɛ keŋkeŋ bɛɛ kɛrɛɛ nombia dinaana gyakaa Yesu dↄↄ. 11Keŋte gyoo Herode na ↄ yoonↄↄtena baŋ kulu Yesu te ba do e desɛŋ. Ba doo e gyooro kegba te ↄ yela ba besena e gyina Pilato. 12Lee wee kenaŋ te gyoo Herode na Pilato nsana besewↄ de, nafↄ na bↄↄ na gyoo ya. 13Botↄↄ te Pilato baake saese kegyiise baŋ na donↄↄ kegyiise na balaŋ baŋ pou gyaŋee, 14te ↄ yako wↄ nyiaa, "Ɛmɛɛ moona balee kei kↄŋ me gyaŋ te ɛ kpa ↄ na beo balaŋ baŋ. Maŋ gyoo ke man ɛ siaman kɛbo mↄna ma te naa nombiakumɛɛ ŋan ↄ be yɛɛ te ɛ ne kara ↄ nↄↄ ya. 15Gyoo Herode mↄ te naa nombiikum lee ↄ wose man ya, te ↄ yela ba besena e kↄna daa. N kɛɛ paa na balee kei te yɛɛ kolo kum keŋ kaboena nyi baa ko e ya. 16Mena dↄↄ maa yela baa tuku e na baa tina e yela." 17Na ke yɛɛ ba mmaraa ke nyi ba nyeekelɛɛwee kedi kamasɛ na, kaboena nyi Pilato waa tina balaŋ baŋ bↄↄ kyam tↄ deni man nɛ, be man ŋolo ŋon baŋ Gyudatena ne gyae nɛ yela fa wↄ. 18Botↄↄ te balaŋ dikpii keŋ pou fae yeesa nedoŋ nyiaa, "Ko balee kei na n ke tina Barabase yela fa daa." 19Keŋ dↄↄ bↄↄ kyaŋ Barabase tↄ deni yɛna nyi, ŋon tɛɛ la balaŋ siaman te ba korowↄ seŋ tia kegyiise te ↄ koo walaŋ nombia ŋenaŋ man. 20Keŋ Pilato ne gyae waa tina Yesu yela dↄↄ nɛ, ↄ besewↄ kolosi fa balaŋ baŋ. 21Mↄna balaŋ baŋ gyakaa bɛɛ fae yeesa nyiaa, "Yela baa gyↄ e sakaa ↄpaŋdaŋ dↄↄ" 22Keŋte Pilato besewↄ kolosi fa wↄ betabotoorote nyiaa, "Woŋ nombiikum yaa balee kei yɛɛwↄ? Maŋ te naa kpene keŋ ↄ be yɛɛ keŋ kaboena nyi baa ko e ya. Mena dↄↄ maa yela baa tuku e na maa tina e yela." 23Mↄna balaŋ baŋ seŋɛɛ keŋkeŋ bɛɛ fae yeesa nedoŋ nyi baa gyↄ e sakaa ↄpaŋdaŋ dↄↄ, te be yeesa ŋan kela Pilato. 24Mena dↄↄ Pilato yɛɛ wa agyueŋ nyi waa yɛɛ balaŋ baŋ kegyaebii fa wↄ. 25Keŋte Pilato tinaa Barabase ŋon bↄↄ kyam tↄ deni nɛ yela fa wↄ. Barabase kei tɛɛ la balaŋ baale siaman te ba korowↄ seŋ tia kegyiise te ↄ koo walaŋ mↄ. Ŋon yɛna walaŋ ŋon balaŋ baŋ be yako nyi waa tina e yela fa wↄ nɛ. Te ↄ moo Yesu fa wↄ nyi baa gyu ke yɛɛ e ba kegyaebii. 26Be ka mo Yesu lee Pilato gyaŋ bee gyuu nɛ, be gyaŋee na balee ŋolo ŋon bɛɛ baake e nyi Simↄn ŋon ↄ ba lee Kirene donↄↄ man nɛ, na ↄ ta lee akuraa ↄ ne kↄŋ Gyerusalɛm donↄↄ man. Keŋte be kyaŋa e te ba ŋere e mo ↄpaŋdaŋ keŋ seele e na ↄ silana Yesu wↄle wↄle. 27Na balaŋ burum silana Yesu, mo kpu na ala baŋ bee wii te be tↄↄse ne kyoŋii wↄ fa e nɛ. 28Keŋte Yesu besenawↄ kɛɛ wↄ te ↄ yako wↄ nyiaa, "Gyerusalɛm ala, ɛ na wii fa maŋ ya. Mↄna ɛ wii fa ɛ wose na ɛ bia. 29Nawolo nyi debaŋ daale ne kↄŋ keŋ ɛ ke yako nyiaa, 'Ↄlamanbose, ɛmɛɛ baŋ bia te doo ɛ tↄↄman see ya te bia te ŋmase ya ade ya nɛ, ɛmɛɛ na nyeebam.' 30Debaŋ kenaŋ te balaŋ baa yako bulase nyiaa, 'Ɛ kaa ŋere daa,' na baa yako bulasebia mↄ nyiaa, 'Ɛ kaa wuu de dↄↄ!' 31Akpaa daŋ laŋte ne kpaa la nnɛ na, sena te daŋ dowolo gyae ke yɛɛ?" 32Keŋte ba moo nombiakumɛɛyɛɛra bala baale mↄ kaa kpu na Yesu na be kaa ko wↄ. 33Be kelii botↄↄ keŋ bɛɛ baake ke nyi "Nyeepookoo dɛɛ" nɛ, be gyↄↄ Yesu sakaa ↄpaŋdaŋ dↄↄ. Keŋte be gyↄↄ nombiakumɛɛyɛɛra bala baŋ mↄ sakaa ↄpaŋdaase kpu na e. Ŋolo sakaa ↄ dunoluŋ dↄↄ te ŋolo mↄ sakaa ↄ demena dↄↄ. 34Keŋte Yesu yakowↄ nyiaa, "Taata! Mo balaŋ kɛwↄ nombiakumɛɛ kyɛɛ wↄ, nawolo nyi bↄↄ gyeŋ kpene keŋ bɛɛ yɛɛ nɛ ya." Keŋte be lↄↄ boe mo kpala Yesu kegbase. 35Na balaŋ burum seŋɛɛ botↄↄ bɛɛ kɛɛ te Gyudatena kegyiise baŋ mↄ kulu e nyiaa, "Ↄ ne lɛɛ balaŋ nyee, ɛ yela waa lɛɛ ↄ wose na dɛɛ kɛɛ. Ŋgba ŋon kpa ŋon yɛna nyeelɛɛre ŋon Wurubuarɛ be yako see nyi waa kↄŋ nɛ." 36Keŋte yoonↄↄtena baŋ mↄ kulu e te be faa e soloŋ keŋ kↄↄ nyaŋe nɛ, 37te be yakowↄ nyiaa, "Akpaa nyaŋ yɛna Gyudatena gyoo ŋon na, kenaŋ na lɛɛ n wose!" 38Te be ŋmarase nombia kɛŋa see ↄ nyee adido nyiaa, "KEI YƐNA GYUDATENA GYOO ŊON." 39Botↄↄ te nombiakumɛɛyɛɛra bala baŋ be sakaa ↄpaŋdaase dↄↄ nɛ man ŋolo tee Yesu nyiaa, "Na nyaŋ yɛna nyeelɛɛre ŋon yee? Lɛɛ n wose na n ke lɛɛ daa mↄ." 40Keŋte ↄ balate ŋon gyↄↄ ↄ nↄↄ dↄↄ nyiaa, "N bee yee Wurubuarɛ ŋgba de popou doo deŋele kewↄŋ dokoloŋ man yee? 41De nombiakumɛɛ ŋan dↄↄ yɛɛ nɛ, ŋa deŋele kewↄŋ yaa de nyiŋawↄ nɛ. Mↄna balee kei dↄↄ ↄ te yɛɛ nombiikum daale ya." 42Botↄↄ te ↄ yako Yesu nyi "Yesu, n kↄŋ n gyoori keŋ man na, na wolee maŋ ya." 43Keŋte Yesu yako e nyiaa, "Ampaŋ yaa mɛɛ yako neŋ nyiaa, gyɛŋ nyaŋ ke kyaa me gyaŋ Wurubuarɛ man." 44Weese ka seŋ dɛɛ nɛ, weese tinaa kegyↄ yela te ditiŋtɛɛ lɛɛ tɛɛle keŋ dↄↄ pou kelii debaŋ keŋ weese be gɛɛse nɛ. 45Botↄↄ te kanyaŋ keŋ kpaŋɛɛ Wurubuarɛ ↄsom deni dinaa keŋ man nɛ bɛɛsewↄ kyɛɛkyɛɛ ala. 46Keŋte Yesu fae yeesa keŋkeŋ nyiaa, "Taata, me ta mo ma woo do n nyiŋmaa man." Ↄ ka betaa yako mena pɛ te ↄ kara weesi. 47Yoonↄↄtena kegyia ŋon kena kpene keŋ be kↄŋ nɛ, ↄ lese Wurubuarɛ yele yako nyiaa "Ampaŋ, balee kei gbɛɛneŋ tenɛɛ Wurubuarɛ siaman!" 48Balaŋ baŋ pou bↄↄ gyaŋee botↄↄ bɛɛ kɛɛ nɛ naa kpene keŋ be kↄŋ, te ba besewↄ gyu donↄↄ man na ba nyiŋmaase gyakaa ba nyeeya dↄↄ waraŋase man. 49Mↄna baŋ pou ba gyeŋ Yesu na ala baŋ bↄↄ sila e lee Galelia donↄↄ man nɛ, seŋawↄ lemlem bɛɛ kɛɛ nombia kɛŋa. 50Balee ŋolo kyaawↄ na bɛɛ baake e nyi Gyosɛfo. Ↄ lee Gyudatena donↄↄ keŋ bɛɛ baake ke nyi Arimatia nɛ man. Na ↄ gbɛɛneŋ tenɛɛ Wurubuarɛ siaman te bee bu e mↄ nideli. Ↄ yɛɛ walaŋ ŋon ↄ ne kɛɛ Wurubuarɛ gyoori keŋ siaman te ŋon mↄ kpuɛ Gyudatena kegyiise baŋ man, mↄna ↄ te lɛɛ kpene keŋ bↄↄ bake na kpene keŋ bↄↄ yɛɛ nɛ do ya. 52Mena balee kei gyuuwↄ Pilato gyaŋ ka sola gbɛɛ nyi waa mo Yesu woo ŋon ke wuu. 53Keŋte ↄ ka lese woo ŋon lee ↄpaŋdaŋ keŋ dↄↄ te ↄ moo akaralɛɛ milii e te ↄ moo e ke wuu yebↄↄ keŋ bↄↄ kare boe man te be te wuu ta walaŋ na walaŋ ke man see ya nɛ man. 54Wee kenaŋ yɛɛ wee keŋ Gyudatena na mo desina ba wose fa ba kefɛɛfowee keŋ kedi. 55Ala baŋ bↄↄ sila Yesu lee Galelia kↄŋ nɛ, sila Gyosɛfo gyu te ba ke naa yebↄↄ keŋ na mena keŋ ↄ be wuu Yesu. 56Keŋte ba besewↄ gyu ba akpaŋalaŋse man be kaa gyae teeneŋ ofoŋofoŋ ŋan bɛɛ mo desina woo nɛ, na baa mo kaa buraa woo ŋon na ↄ be nyiŋ wↄlɛɛ bileŋ ya. Mↄna be fɛɛfowↄ Gyudatena kefɛɛfowee keŋ ŋgba mena keŋ Mosesi mmaraase ŋan na wolo nɛ.

will be added

X\