Luka 20

1Wee daale Yesu ke kyaa Wurubuarɛ ↄsom deni dinaa keŋ man ↄ na wola balaŋ nombia te ↄ ne kolosi Wurubuarɛ nombia kpaakpaa ŋan fa wↄ nɛ, saese kegyiise na Gyudatena mmaraa wolala na donↄↄ kegyiise kↄŋawↄ ↄ gyaŋ 2kaa bↄↄse e nyiaa, "Yako daa, doŋ woŋti yaa n dana n ne yɛɛ mena abↄↄ kɛŋa pou? Amↄte faa na neŋ mena doŋ kenaŋ?" 3Botↄↄ te Yesu tiranↄↄ fa wↄ nyiaa, "Maŋ mↄ ne gyae maa bↄↄse ŋon nombii dokoloŋ. 4Gyↄn Wurubuarɛ loŋkesↄ keŋ ↄ be sↄ balaŋ nɛ, lee Wurubuarɛ gyaŋ yaa balaŋ gyaŋ?" 5Botↄↄ te be lɛɛ aŋmaareŋ na dↄŋa nyiaa, "Woŋ te dɛɛ yako? Akpaa de yako nyi ka lee Wurubuarɛ gyaŋ na, waa bↄↄse daa nyi woŋ dↄↄ te da te lɛɛ Gyↄn nombia ŋan di ya? 6Te akpaa de yako nyi ka lee balaŋ gyaŋ na, balaŋ dikpii kɛwↄ pou baa fuŋii daa boya. Nawolo nyi bɛɛ lɛɛ di nideli nyi Gyↄn yɛɛ Wurubuarɛ dekpeŋkpeŋgyↄↄre e." 7Mena dↄↄ be tiranↄↄ fa Yesu nyiaa "Dↄↄ gyeŋ botↄↄ keŋ kↄↄ lee ya." 8Keŋte Yesu mↄ yako wↄ nyiaa, "Akpaa mena na, maŋ mↄ ba wola ŋon me doŋ keŋ da lee ya." 9Botↄↄ te Yesu gyↄↄ dudu kei fa balaŋ baŋ nyiaa, "Wↄↄfarale ŋolo fara wↄↄ te ↄ duu daasebia ŋaale ŋan ŋe yɛɛ ŋgba akutuse te bɛɛ baake ŋa nyi gerepo nɛ, te ↄ moo ŋa do paasetena baale nyiŋmaa man nyi baa kɛɛ ŋe dↄↄ, te ↄ korowↄ gyu tɛɛle wↄle daale man lemlem ke kyaa botↄↄ kyare. 10Debaŋ kelii nyi bɛɛ kↄ daasebia ŋan nɛ, ↄ kpila ↄ tobaale ŋolo gyu paasetena baŋ gyaŋ nyi baa fa e ↄ wui nↄↄ. Botↄↄ te paasetena baŋ tuku tobaale ŋon, te be tina e yela ↄ laŋawↄ nawↄↄ kufu nyiŋmaase kufu. 11Wↄↄte ŋon besewↄ kpila tobaale wↄle bela, mↄna be tuku ŋon mↄ do e desɛŋ te be yela e ↄ laŋawↄ nawↄↄ kufu nyiŋmaase kufu. 12Botↄↄ te ↄ besewↄ kpila tobaale batoorote, mↄna be tuku ŋon mↄ do e gyamɛɛ te be gegi e lee wↄↄ keŋ man." 13Keŋte wↄↄte ŋon yakowↄ nyiaa, "Woŋ te maa yɛɛ? Maa kpila maŋ gbagba me tↄↄman lolo bu, mberem ŋon na baa bu e." 14Mↄna paasetena baŋ kena bu ŋon nɛ be yako dↄŋa nyiaa, "Kei yɛna bu ŋon waa di ↄ kya abↄↄ ŋan. Ɛ yela dɛɛ ko e na wa abↄↄ ŋan ka bese de wui." 15Mena dↄↄ be wↄŋee e lee wↄↄ keŋ man ka ko. Keŋte Yesu bↄↄse wↄ nyiaa, "Woŋ te ɛ ne lɛɛdi nyi wↄↄte ŋon waa yɛɛ paasetena baŋ?" 16"Waa kↄŋ na ↄ kaa ko paasetena benaŋ, na waa mo wↄↄ keŋ do balaŋ wↄlɛɛ nyiŋmaa man." Debaŋ keŋ balaŋ baŋ be nyii nombia kɛŋa nɛ be yakowↄ nyiaa, "Wurubuarɛ na yeli kekↄŋ mena ya." 17Keŋte Yesu kɛɛ wↄ te ↄ bↄↄse wↄ nyiaa, "Nyi akpaa mena na, sena te ɛ ne nyii Wurubuarɛ nombia kɛŋa asɛɛ? 'Boe keŋ deni maara baŋ be bɛɛ nɛ, ta bese mokↄↄ kasee boe keŋ ne yeli deni keŋ ne yɛɛ doŋ.' 18Walaŋ kamasɛ ŋon ↄ yale boe kei dↄↄ na, ke gyae ke keretii e kpetekpetekpete. Te nyaŋ walaŋ kamasɛ ŋon mↄ boe keŋ de yale n dↄↄ na, nyaŋ ke pɛtɛɛ." 19Botↄↄ na saese kegyiise na Gyudatena mmaraa wolala baŋ gyae gbɛɛ baa kyaŋ Yesu debokenaŋ man. Nawolo nyi ba gyeŋ nyi baŋ yaa ↄ gyↄↄ dudu keŋ, mↄna na bee yee balaŋ baŋ. 20Keŋ dↄↄ ba moo be sia gyakaa ↄ dↄↄ. Botↄↄ te kegyiise baŋ gyae kↄba fa balaŋ te be kpila wↄ nyi baa yɛɛ ba wose ŋgba be yɛɛ balaŋ kpaakpaawↄ nɛ na baa deke Yesu, na be kaa teese ↄ nↄↄman na baa nyiŋ lese e fa gyoo dinaa ŋon ↄ ne di be dↄↄ nɛ. 21Keŋte balaŋ baŋ gyuuwↄ ke bↄↄse e nyiaa, "De Gbeŋgyoo, da gyeŋ nyi kpene keŋ n ne yako te n na wolo mↄ nɛ yɛɛ ampaŋ. Da gyeŋ nyi n bɛɛ kɛɛ walaŋ siaman ya, mↄna n na wola balaŋ Wurubuarɛ gbɛɛneŋ kpaakpaa ŋan bo na anokoare. 22Dei nyi dɛɛ tↄ lempoo fa Romantena gyoo dinaa ŋon yaa de na tↄↄ ya?" 23Yesu kena ba adao ŋan bee dii nɛ ↄ yako wↄ nyiaa, 24"Ɛ mo kↄbabii keŋ daale kↄŋ maa kɛɛ. Amↄte nyee na ↄ yele gyakaa la ke dↄↄ?" Botↄↄ te be tiranↄↄ nyi "Romantena gyoo dinaa ŋon." 25Mena dↄↄ Yesu yako wↄ nyiaa, "Mena na kpene keŋ yɛɛ Gyoo dinaa ŋon wui na ɛ mo fa e, te kpene keŋ yɛɛ Wurubuarɛ mↄ wui na ɛ mo fa e." 26Kpene keŋ ↄ be yako nɛ dↄↄ ba te tale mo ↄ nↄↄwoya ŋan kyaŋ e balaŋ baŋ siaman ya. Mena dↄↄ ↄ nↄↄwoya yɛɛ wↄ gyakoloŋ te be wuu be nↄↄse. 27Keŋte Sadukiitena baŋ bɛɛ yako nyi yeŋ wↄle kefoŋ be kyaa ya nɛ man baale kↄŋawↄ Yesu gyaŋ kaa bↄↄse e nyiaa, 28"De Gbeŋgyoo, de naana Mosesi ŋmarase mmaraa kei fa daa nyi, 'Akpaa walaŋ ŋolo ↄ kegyia yaa ↄ naabu da yem tina ↄ wɛɛle yela te be ta lola bia ya na, kaboena nyi ŋon ↄ kyaa nɛ waa mo lialo ŋon yala na baa lola bia yere ŋon yele man.' 29Kↄŋawↄ nyi baala nyetooro baale kyaawↄ te be kegyia ŋon yala alo te ↄ yeŋawↄ keŋ ↄ ta lola bia ya. 30Botↄↄ te balate ŋon mↄ yala alo ŋon, 31te batoorote ŋon mↄ mena. Balaŋ nyetooro kɛwↄ pou yala alo kei te ba yekeewↄ, mↄna be man ŋolo na alo ŋon ta lolo ya. 32Kenaŋ wↄle na te alo ŋon mↄ yeŋawↄ. 33Mena dↄↄ wee keŋ Wurubuarɛ waa gyuusu balaŋ baŋ pou bↄↄ yem nɛ lee yeŋ man na, baala nyetooro kɛwↄ baŋ bↄↄ yala alo kei gyaŋee nɛ, be man woŋti te alo ŋon waa yɛɛ ↄ wɛɛle?" 34Botↄↄ te Yesu tiranↄↄ fa wↄ nyiaa, "Bɛɛ mo ala baŋ be kyaa tɛɛle kei dↄↄ nɛ fa yale te baala baŋ mↄ be kyaa tɛɛle kei dↄↄ nɛ ne yala ala, 35mↄna balaŋ baŋ be kaboena nyi Wurubuarɛ waa gyuusu wↄ lee yeŋ man na baa kyaa kekpaakekpaa nɛ, baala be gyae baa yala ya te bↄↄ gyae baa mo ala mↄ fa yale debaŋ wↄle kenaŋ man ya. 36Yeŋ be tale ko wↄ bela ya nawolo nyi be yɛɛ ŋgba Wurubuarɛ kpilala nɛ. Be yɛɛ Wurubuarɛ biawↄ, nawolo nyi ba te fom lee yeŋ man. 37Mosesi mↄ torowↄ yako nyiaa, balaŋ ayeŋaŋ baa foŋ lee yeŋ man. Nawolo nyi debaŋ keŋ ↄ be naa depoŋfa keŋ ne kpaa nɛ ↄ yakowↄ nyiaa, de Gbeŋgyoo Wurubuarɛ yɛna Aberaham na Asiki na Gyekↄpo Wurubuarɛ. 38Kei nawolo baa nyiaa, ↄ yɛɛ balaŋ baŋ be kyaa na be sia nɛ Wurubuarɛ e. Ↄ te yɛɛ woya Wurubuarɛ e ya, nawolo nyi Wurubuarɛ siaman na ↄ balaŋ pou delena." 39Botↄↄ te Gyudatena mmaraa wolala baŋ baale yakowↄ nyiaa, "De Gbeŋgyoo, n tiranↄↄ nideli." 40Mena dↄↄ ŋolo te tale gyↄ ↄ konↄↄ bↄↄse e nombii bela ya. 41Keŋte Yesu bↄↄse wↄ nyiaa, "Sena te baa tale yako nyi nyeelɛɛre ŋon Wurubuarɛ be yako see nyi waa kↄŋ nɛ yɛɛ gyoo Defidi ↄ naanabii e? 42Nawolo nyi gyoo Defidi gbagba yakowↄ nↄↄneŋ tↄne keŋ man nyiaa, 'De Gbeŋgyoo Wurubuarɛ ŋon yako me Gbeŋgyoo nyi "Tisi kyaa me dunoluŋ dↄↄ, 43kelii debaŋ keŋ maa mo n kↄlala baŋ do n tɛɛ." ' 44Gyoo Defidi baake nyeelɛɛre ŋonaŋ nyi ↄ Gbeŋgyoo. Akpaa mena na, sena te nyeelɛɛre ŋonaŋ waa bese gyoo Defidi ↄ naanabii?" 45Balaŋ baŋ pou kee tei Yesu nɛ ↄ yako ↄ kaseela baŋ nyiaa, 46"Ɛ kɛɛ ɛ wose nideli na Gyudatena mmaraa wolala baŋ. Bɛɛ gyae kegbase dↄↄloŋ nyiŋan keta do kila, te bɛɛ gyae balaŋ ke buŋii do wↄ nↄↄ balaŋ dɛɛgyaŋee man, te bɛɛ gyae akyaese kpaakpaa Gyudatena ↄsom denɛɛ na be dɛɛgyaŋee di gyoŋ man. 47Bɛɛ beo liala lɛo ba abↄↄ ŋan be dana nɛ. Bɛɛ fane kyare na baa mo beo balaŋ nyi be yɛɛ balaŋ kpaakpaawↄ." Wurubuarɛ waa wↄŋ mena balaŋ kɛwↄ dinↄↄ deŋela nideli kela walaŋ kamasɛ.

will be added

X\