Luka 2

1Debaŋ kenaŋ man te Roman gyoo dinaa ŋon bɛɛ baake e Agustuse nɛ, faa mmaraa nyi baa kala balaŋ baŋ pou be kyaa ↄ tɛɛle man nɛ. 2Kei yɛna balaŋ kekala gyaŋgbate, debaŋ keŋ Kireniuse kyaa Romantena gyoo dinaa nawↄↄ man Siria tɛɛle man nɛ. 3Lee mmaraa keŋ gyoo ŋon be faa dↄↄ, walaŋ kamasɛ gyuu ↄ dɛɛ ↄ kaa ŋmarase ↄ yele. 4Keŋte Gyosɛfo mↄ lee Nasarɛte keŋ kyaa Galelia tɛɛle man nɛ, gyu Bɛtelɛhɛm keŋ ke kyaa Gyudia tɛɛle man nɛ. Bɛtelɛhɛm donↄↄ kei man te ba lola gyoo Defidi. Gyosɛfo gyuu botↄↄ nawolo nyi ↄ lee gyoo Defidi duuluŋ man. 5Ŋon na Mɛɛre ŋon, ŋon na e be yako see nyi baa yala dↄŋa nɛ, gyuu la be kaa ŋmarase ba yela. Debaŋ kenaŋ man na Mɛɛre dana fulu. 6Ba kekyaa Bɛtelɛhɛm botↄↄ nɛ te kadoŋee kyaŋa Mɛɛre. 7Keŋ be te nyiŋ deni ŋↄↄla dasoe keŋ man ya dↄↄ, be gyue ka gyoo wonembia dedoi man. Botↄↄ te ↄ lola ↄ bu baale gyaŋgbate te ↄ mo kakyeŋgbelaase milii e mo e doosi adakaa keŋ wonembia ne dii ke man nɛ man. 8Debaŋ kenaŋ man na, namensekɛɛlera baale kyaa ŋale man benaa na botↄↄ yenaŋ bee gyee be namense nelim kenaŋ. 9Botↄↄ te de Gbeŋgyoo Wurubuarɛ kpilale ŋolo kaa bɛɛwↄ lee be dↄↄ te de Gbeŋgyoo Wurubuarɛ gyoorobiiri keŋ ŋalakeewↄ kilisi wↄ, keŋte gyakoloŋ gyoo wↄ. 10Keŋte Wurubuarɛ kpilale ŋon yako wↄ nyiaa, "Ɛ naa yee ya! Ɛ kɛɛ! Me ta mo nombia kpaakpaa ŋaale mɛɛ kↄna ŋon. Nombia kɛŋa gyae ke yɛɛ balaŋ pou gyoŋ. 11Nawolo nyi gyɛŋ wee kei nɛ, be ta lola ɛ nyeelɛɛre fa ŋon gyoo Defidi donↄↄ Bɛtelɛhɛm man. Ŋon yɛna de Gbeŋgyoo Kristo, (walaŋ ŋon Wurubuarɛ be yako see nyi waa kaa lɛɛ ↄ balaŋ nyee nɛ). 12Kpene keŋ gyae kawola nyi nombia ŋan mɛɛ yako nɛ yɛɛ ampaŋ yɛna nyi, ɛ kena kyokyoo ŋon doo adakaa keŋ wonembia ne dii ke man nɛ man, na be ta mo kakyeŋgbelaase milii e." 13Debokenaŋ man te Wurubuarɛ kpilala burum baale kↄŋawↄ kaa kpu na kpilale gyaŋgbate ŋon, te be kpee nↄↄneŋ lese Wurubuarɛ yele nyiaa, 14"Wurubuarɛ ŋon n kyaa adido, n gyoorobiiri kaboena neŋ. N wosefɛɛreŋ dɛɛkↄŋ balaŋ baŋ bɛɛ gyoo n sia tɛɛle kei dↄↄ nɛ man." 15Wurubuarɛ kpilala baŋ ka bese lee be gyaŋ gyu adido nɛ, namensekɛɛlera baŋ yako dↄŋa nyiaa, "Ɛ fa dee gyu Bɛtelɛhɛm, na de kaa kɛɛ kpene keŋ be kↄŋ te de Gbeŋgyoo Wurubuarɛ ba lese wola daa nɛ." 16Mena dↄↄ be yɛɛwↄ bileŋ te be gyuuwↄ te ba ke naa Mɛɛre na Gyosɛfo na kyokyoo ŋon, na ↄ doo adakaa keŋ wonembia ne dii ke man nɛ man. 17Namensekɛɛlera baŋ kena kyokyoo ŋon nɛ, be yako wↄ mena keŋ Wurubuarɛ kpilale ŋon be kolosi kyokyoo ŋon wose man nombia fa wↄ nɛ. 18Nombia ŋan namensekɛɛlera baŋ be yako nɛ, yela balaŋ baŋ pou bↄↄ nyii ŋa nɛ wose gbirisi wↄ. 19Mↄna Mɛɛre kyaŋa nombia kɛŋa pou do ↄ konↄↄ man, na ↄ na gyueŋ ŋe man nideli. 20Namensekɛɛlera baŋ besewↄ laŋ, na bee kpee nↄↄneŋ lese Wurubuarɛ yele lee ŋan pou bↄↄ nyii te bↄↄ naa nɛ dↄↄ, nawolo nyi nombia ŋan pou bↄↄ nyii te bↄↄ naa nɛ, kyaawↄ na ŋan Wurubuarɛ kpilale ŋon be yako wↄ nɛ. 21Weeya gyanaarate keŋ kelii nyi baa kara bu ŋon baala wose nɛ, ba doo e yele nyi Yesu. Mena yele kei te Wurubuarɛ kpilale ŋon yakowↄ nyi baa baake e pɛte Mɛɛre kyaŋa ↄ fulu. 22Debaŋ keŋ ba ayimɛɛ kegberaa weeya ŋan be gyaŋee ŋgba mena keŋ Wurubuarɛ mmaraase ŋan ↄ be yeli Mosesi be ŋmarase see nawolo nɛ, Gyosɛfo na Mɛɛre moo Yesu gyu Gyerusalɛm donↄↄ man be kaa do de Gbeŋgyoo Wurubuarɛ nyiŋmaa man, 23nawolo nyi de Gbeŋgyoo Wurubuarɛ mmaraase ŋan ↄ be yeli Mosesi be ŋmarase see nɛ ne yako nyiaa, "Bu baale kamasɛ ŋon ↄ naa waa taŋgbɛɛ lola na, baa mo e ka do de Gbeŋgyoo Wurubuarɛ nyiŋmaa man." 24Keŋte Gyosɛfo na Mɛɛre gyuuwↄ ke deesi fa Wurubuarɛ ŋgba mena keŋ Wurubuarɛ mmaraase ŋan ↄ be yeli Mosesi be ŋmarase see ne yako nɛ nyiaa, "Baa mo donↄↄ man yaa ŋale man awuluŋna bala deesi nɛ." 25Debaŋ kenaŋ na balee ŋolo kyaa Gyerusalɛm donↄↄ man keŋ ↄ yele yɛna Simeↄn. Ↄ yɛɛ walaŋ ŋon ↄ gbɛɛneŋ tenɛɛ Wurubuarɛ siaman te ↄ ne yee Wurubuarɛ. Wurubuarɛ feliŋ doo ↄ man te ↄ ne daa wee keŋ Wurubuarɛ waa kaa lɛɛ Iseraetena nyee nɛ. 26Wurubuarɛ feliŋ ŋon lese la wola e nyi, waa naa nyeelɛɛre ŋon de Gbeŋgyoo Wurubuarɛ be yako see nyi waa kↄŋ nɛ pɛna ŋon Simeↄn ka yeŋ. 27Wurubuarɛ feliŋ ŋon yela Simeↄn gyuu Wurubuarɛ ↄsom deni dinaa keŋ man. Gyosɛfo na Mɛɛre ka mo be bu Yesu ŋon kↄŋ be kaa do de Gbeŋgyoo Wurubuarɛ nyiŋmaa man, ŋgba mena keŋ Wurubuarɛ mmaraase ŋan ne yako nɛ, 28te Simeↄn tee ↄ nyiŋmaase lɛɛ bu ŋon te ↄ lese Wurubuarɛ yele nyiaa, 29"De Gbeŋgyoo Wurubuarɛ, nombii keŋ n be yako see nɛ n te di ke dↄↄ. Mena dↄↄ nyaŋ ke tale lↄ n tobaale gbɛɛ wosefɛɛreŋ man. 30Nawolo nyi maŋ gbagba ta mo me sibii naa nyeelɛɛre ŋon n be kpili nɛ, 31n kpila e nyi waa kↄŋ na balaŋ pou kena e. 32Ŋon yɛna keŋmaŋee keŋ gyae ke yela baŋ bↄↄ yɛɛ Iseraetenawↄ ya nɛ, kena n gbɛɛneŋ na baa lese n balaŋ Iseraetena yele." 33Simeↄn nↄↄwoya ŋan ↄ be yako lee be bu ŋon wose man nɛ, doo bu ŋon ↄ kya na ↄ naa nↄↄ. 34Keŋte Simeↄn fanewↄ fa wↄ nyi Wurubuarɛ waa hiraa wↄ te ↄ yako bu ŋon ↄ naa Mɛɛre nyiaa, "Wurubuarɛ lese na bu kei. Iseraetena burum baŋ baa bɛɛ e na baa naa diyem, te baŋ mↄ baa lɛɛ e di na baa nyiŋ nyeedoŋ. Bu kei waa yɛɛ Wurubuarɛ gbagba tobaale, mↄna balaŋ baa koro seŋ tia e, 35na ka lese ŋan balaŋ burum na gyueŋ nɛ pou debↄↄ. Te nyaŋ Mɛɛre n kena diyem ŋgba sila te ba moowↄ sↄↄ neŋ n konↄↄ man nɛ." 36Alo kegyia ŋolo kyaawↄ ŋon bɛɛ baake e nyi Ana. Ↄ yɛɛ Wurubuarɛ dekpeŋkpeŋgyↄↄre e te ↄ kya yele yɛna Fanuwɛli. Fanuwɛli kei lee Asa dekpaŋalaŋ man. Ana kei yalawↄ te ŋon na ↄ baale kyaawↄ kulutooneŋ nyetooro, te ↄ baale yeŋawↄ yela e. 37Te ↄ kyaawↄ lialo man kulutooneŋ sↄŋonaara na anaara (84). Nelim na ka weese pou na ↄ kyae Wurubuarɛ ↄsom deni dinaa keŋ man ↄ ne bake ↄ nↄↄ fane. 38Simeↄn kɛɛ kolosi nɛ, te ŋon Ana mↄ kↄŋawↄ. Ↄ fanewↄ fa Wurubuarɛ karaŋ, te ↄ kolosiwↄ lee bu ŋon wose man fa balaŋ baŋ bɛɛ daa nyeelɛɛre ŋon waa kↄŋ kaa lese Gyerusalɛmtena lee ba diyem man nɛ. 39Gyosɛfo na Mɛɛre keyɛɛ kpene kamasɛ taŋ ŋgba mena keŋ de Gbeŋgyoo Wurubuarɛ mmaraase ŋan nawolo nɛ, ba besewↄ gyu be dɛɛ Nasarɛte keŋ kyaa Galelia tɛɛle man nɛ. 40Bu ŋon beewↄ yɛɛ doŋ te ↄ sia karawↄ nideli, te Wurubuarɛ moo ↄ bɛrɛɛ boele e. 41Kulutoo kamasɛ nɛ, Yesu ↄ kya na ↄ naa ne gyu Gyerusalɛm ke di ba nyeekelɛɛwee dinaa keŋ. 42Yesu ke di kulutooneŋ kufu ala nɛ, be gyuu Gyerusalɛm be kaa di ba nyeekelɛɛwee dinaa kei ŋgba mena keŋ bɛɛ taŋ gyu nɛ. 43Be ke di wee keŋ taŋ bese bee gyu nɛ, Yesu dↄↄwↄ Gyerusalɛm botↄↄ mↄna ↄ kya na ↄ naa ta gyem ya. 44Na baŋ gyeŋ nyi ↄ kpuɛ na be balaŋ dikpii keŋ mena dↄↄ be tɛɛwↄ wee debiliŋ pou, pɛte ba gyoo e kekɛo be tebia na ba loŋtona man. 45Keŋ ba te naa e ya dↄↄ, ba besewↄ gyu Gyerusalɛm donↄↄ man be kaa kɛo e. 46Ka weeya atoorote te ba ke naa e Wurubuarɛ ↄsom deni dinaa keŋ man na ŋon na Gyudatena mmaraa wolala baŋ kyaa la. Ↄ ne tei be nombia, na ŋon mↄ ne bↄↄse wↄ nombia. 47Mena keŋ ↄ ne nyii nombia ŋan asɛɛ na mena keŋ ↄ ne tira ŋe nↄↄ fa wↄ nɛ, doo baŋ pou be tei nɛ nↄↄ. 48Ↄ kya na ↄ naa ke gyu kena e botↄↄ nɛ, ba wose gbirisi wↄ. Keŋte ↄ naa bↄↄse e nyiaa, "Me bu, weera te n yɛɛ daa mena? Kɛɛ, daa na n kya sia te yɛɛ, de dↄŋɛɛ dɛɛ kɛo neŋ." 49Botↄↄ te Yesu bↄↄse wↄ nyiaa, "Weera dↄↄ te ɛ ne kɛo maŋ? Ɛ ba gyeŋ nyi kaboena nyi maa kyaa me kya dɛɛ yee?" 50Mↄna ↄ kya na ↄ naa te nyii kpene keŋ ↄ be yako wↄ nɛ asɛɛ ya. 51Botↄↄ te Yesu korowↄ sila wↄ gyu Nasarɛte donↄↄ man, te ↄ nyii ↄ kya na ↄ naa dei. Ↄ naa moo nombia kɛŋa pou do ↄ konↄↄ man, na ↄ na gyueŋ ŋe man nideli. 52Yesu beewↄ nideli te ↄ sia karawↄ kpu, te ↄ gyoo Wurubuarɛ na balaŋ pou sia.

will be added

X\