Luka 19

1Yesu ke gyu ka gyoo Gyeriko donↄↄ man ↄ ne lam nɛ, 2na balee ŋolo kyaa botↄↄ keŋ ↄ yele yɛna Sakio. Ↄ yɛɛ lempoolɛɛra kegyia e te ↄ dana kↄba mↄ nideli. 3Sakio kei gyaewↄ nyi waa naa Yesu mↄna ↄ yɛɛ walaŋ duguŋte e dↄↄ ↄ te tale naa e ya, nawolo nyi balaŋ baŋ boe. 4Mena dↄↄ ↄ kyaŋa gbɛɛ gyu siaman ka gyeŋ daŋ daale, na waa nyiŋ naa e nawolo nyi botↄↄ te Yesu waa kaa mo. 5Yesu kelii daŋ keŋ tɛɛ nɛ ↄ gyinaa ↄ sia kɛɛ adido te ↄ naa Sakio te ↄ baake e nyiaa, "Sakio tisi kↄŋ bileŋ, nawolo nyi gyɛŋ n dɛɛ te maa soo." 6Mena dↄↄ Sakio mↄ tisiwↄ bileŋ kↄŋ te ↄ lɛɛ Yesu gyoŋ man. 7Balaŋ baŋ pou bↄↄ naa nɛ fiasɛɛ bɛɛ ŋorokotee nyi, "Balee kei ne gyu ↄ kaa soo nombiakumɛɛyɛɛre kei." 8Be ke gyu ka gyoo Sakio dɛɛ nɛ, ↄ korowↄ kaa seŋ balaŋ baŋ siaman te ↄ yako Yesu nyiaa, "De Gbeŋgyoo kɛɛ, maa kpase ma abↄↄ ŋan pou me dana nɛ yaale fa ayematena. Te akpaa me te sisii ŋolo na maa tↄ e betabonaara kpu" 9Keŋte Yesu yako Sakio nyiaa, "Gyɛŋ Wurubuarɛ te lɛɛ ɛmɛɛ na n dekpaŋalaŋmantena pou nyee, nawolo nyi nyaŋ mↄ n yɛɛ Aberaham ↄ naanabii e. 10Nawolo nyi maŋ Deniwalaŋ Bu kↄŋae me kaa kɛo na maa lɛɛ baŋ bↄↄ yoo nɛ nyee." 11Balaŋ baŋ kee tei mena nombia kɛŋa nɛ, Yesu besewↄ gyↄ dudu fa wↄ nawolo nyi bɛɛ benaa Gyerusalɛm donↄↄ man, na balaŋ gyeŋ nyi Wurubuarɛ gyoori keŋ gyae ke bɛɛ lee debokenaŋ man. 12Mena dↄↄ Yesu yakowↄ nyiaa, "Balee ŋolo kyaawↄ keŋ ↄ yɛɛ gyooro bu e, te ↄ korowↄ gyu tɛɛle daale dↄↄ lemlem ↄ kaa di gyoori na waa bese kↄŋ. 13Debaŋ keŋ ↄ ne gyae waa gyu nɛ ↄ baake ↄ tewulɛɛ kufu baale te ↄ faa wↄ kↄba kyɛɛkyɛɛ te ↄ yako wↄ nyiaa, 'Ɛ mo kↄba kei besena ɛ wose kelii debaŋ keŋ maa bese kↄŋ.' 14Mↄna ↄ dɛɛtena baŋ bɛɛ gyae ↄ nombia ya, mena dↄↄ be kpila balaŋ gyu keyako donↄↄ keŋ man ↄ ne gyu nɛ kegyiise nyiaa, 'De bɛɛ gyae balee kei kaa bese de gyoo ya.' 15Mↄna kegyiise baŋ see balee ŋon gyoo te ↄ besewↄ kↄŋ ↄ dɛɛ. Ↄ ka bese kↄŋ nɛ ↄ kpilawↄ baake ↄ tewulɛɛ baŋ ↄ be fa wↄ kↄba nɛ nyi baa kↄŋ, na waa kɛɛ kpene keŋ bↄↄ nyim gyakaa be kↄbase ŋan dↄↄ. 16Ↄ tobaale gyaŋgbate ŋon kↄŋawↄ kaa yako e nyiaa, 'Me gbeŋgyoo, kↄba keŋ n ba mo fa maŋ nɛ ta lola kufu kpu na bene keŋ.' 17Keŋte ↄ gbeŋgyoo ŋon yako e nyiaa, 'Nyaŋ na keyɛɛ, n yɛɛ tobaale kpaakpaate e! Mena keŋ n be di anokoare abↄↄ peperee kɛŋa man dↄↄ nɛ, maa yela n ke kɛɛ donↄↄse kufu dↄↄ fa maŋ.' 18Ↄ tobaale balate ŋon mↄ kↄŋawↄ kaa yako e nyiaa, 'Me gbeŋgyoo, n kↄba keŋ n ba mo fa maŋ nɛ ta lola anoŋ kpu na bene keŋ.' " 19Botↄↄ te ↄ yako e nyiaa, "Nyaŋ mↄ n ke kɛɛ donↄↄse anoŋ dↄↄ fa maŋ." 20Keŋte ↄ tobaale ŋolo mↄ kↄŋawↄ kaa yako e nyiaa, "Me gbeŋgyoo, n kↄba keŋ n ba mo fa maŋ nɛ yaa, ma moo ke kpaŋ na kakyeŋgbelaa ka weese. 21Nawolo nyi na mee yee neŋ nyi n nombia dana doŋ. N na mo kpene keŋ te yɛɛ n wui ya, te n ne kↄ abↄↄ ŋan n te duu ya nɛ mↄ." 22Keŋte ↄ gbeŋgyoo ŋon yako e nyiaa, "N yɛɛ tobaale kum e, nyaŋ gbagba n nↄↄwoya te maa mo bu neŋ fↄↄ. N gyeŋ nyi me nombia dana doŋ te mɛɛ mo kpene keŋ te yɛɛ me wui ya, te mɛɛ kↄ abↄↄ ŋan me te duu ya na, 23woŋ dↄↄ te n ta mo me kↄba keŋ ka do kↄba dɛɛsee man na me kↄŋ na, me kaa lɛɛ keŋ na ka loŋ keŋ ya?" 24Botↄↄ te be gbeŋgyoo ŋon yako baŋ ba seŋɛɛ botↄↄ nɛ nyiaa, "Ɛ lɛo kↄba keŋ lee ↄ gyaŋ na ɛ ka mo fa walaŋ ŋon ↄ kↄba ba lola kufu kpu nɛ." 25Keŋte ↄ tewulɛɛ baŋ yako e nyiaa, "De gbeŋgyoo, ŋgba ŋon wulaa ↄ dana kↄba burum?" 26Botↄↄ te be gbeŋgyoo ŋon tiranↄↄ fa wↄ nyiaa, "Mɛɛ yako ŋon ɛ ke nyii nyi walaŋ kamasɛ ŋon ↄ wulaa ↄ dana abↄↄ burum nɛ baa mo ŋaale kpu e bela. Te walaŋ kamasɛ ŋon ↄ betaŋ ya nɛ, kyomii keŋ gba ↄ dana koraŋ nɛ baa lɛo ke lee ↄ nyiŋmaa man. 27Te me kↄlala baŋ ba te gyae nyi maa di gyoori be dↄↄ ya nɛ, ɛ mo wↄ kↄŋ na ɛ kaa koe wↄ me siaman kɛbo." 28Yesu keyako nombia kɛŋa taŋ nɛ, ↄ tɛɛwↄ balaŋ baŋ siaman te ba moo ba nyee baŋ bee gyu Gyerusalɛm donↄↄ man. 29Ↄ kɛɛ benaa Bɛtifagi na Bɛtani donↄↄse ŋan kyaa oliifi bula keŋ teŋa man nɛ, ↄ kpila ↄ kaseela baŋ man balaŋ bala 30nyiaa, "Ɛ gyu akuraa keŋ kyaa ɛ siaman nɛ man. Ɛ betaa ɛ na gyoo ke man pɛ nɛ, ɛ kena afurum bu ŋolo kpaŋɛɛ keŋ walaŋ na walaŋ te kyaa ta ↄ dↄↄ see ya. Ɛ booli e na ɛ ka mo e kↄna maŋ kɛbo. 31Akpaa ŋolo de bↄↄse ŋon nyi, 'Weera dↄↄ te ɛ ne booli e?' na 'Ɛ yako e nyi de Gbeŋgyoo Yesu ne gyae na e.' " 32Keŋte baŋ Yesu be kpili nɛ gyuuwↄ kena afurum bu ŋon kpaŋɛɛ ŋgba mena keŋ ↄ be yako wↄ nɛ. 33Be kee booli afurum bu ŋon nɛ ↄ gbeŋgyoo bↄↄse wↄ nyiaa, "Weera dↄↄ te ɛ ne booli ma afurum bu ŋon?" 34Keŋte be tiranↄↄ fa e nyiaa, "De Gbeŋgyoo Yesu ne gyae na e." 35Te ba moo afurum bu ŋon kↄna Yesu. Botↄↄ te ↄ kaseela baŋ moo be kanyaŋse gyakaa afurum bu ŋon dↄↄ te be gate Yesu gyakaa ↄ dↄↄ. 36Yesu kekyaa ↄ dↄↄ ↄ ne gyuu nɛ, baale fɛlɛɛ be kanyaŋse lↄ gbɛɛnaa man fa e. 37Yesu kɛɛ gyoo Gyerusalɛm donↄↄ man, te ↄ ka benaa na botↄↄ keŋ gbɛɛ keŋ be tisi lee oliifi bula keŋ nyee man ne kↄŋ ka teŋa man nɛ, ↄ silala burum baŋ pou sia gyeewↄ te be fiasɛɛ bɛɛ fae yeesa lese Wurubuarɛ yele gyoŋ man lee nombia dinaana na gyakoloŋ nombia ŋan bↄↄ naa nɛ dↄↄ. 38Be fae yeesa yako nyiaa, "Ɛ fa dɛɛ lese gyoo ŋon ↄ ne kↄŋ de Gbeŋgyoo Wurubuarɛ yele man nɛ yele. Wosefɛɛreŋ dɛɛ kyaa adido, te Wurubuarɛ ŋon ↄ kyaa adido mↄ nɛ gyoorobiiri dɛɛ kaboena e." 39Na Farasiitena baale kpuɛ na balaŋ baŋ be silana e nɛ te be yako Yesu nyiaa, "De Gbeŋgyoo, tↄ n silala baŋ nyi baa wu be nↄↄ." 40Keŋte Yesu yako wↄ nyiaa, "Akpaa balaŋ kɛwↄ de wu be nↄↄ koraŋ nɛ, boya gyae ke fae yeesa lese Wurubuarɛ yele." 41Yesu ka benaa Gyerusalɛm donↄↄ te ↄ kena ke nɛ, ↄ wiiwↄ fa ke, 42keŋte ↄ yakowↄ nyiaa, "Nafↄ akpaa ɛmɛɛ Gyerusalɛmtena deŋ gyeŋ kpene keŋ gyae ke fa ŋon wosefɛɛreŋ gyɛŋ wee kei nɛ, nafↄ na dei. Mↄna ɛ ba gyeŋ ke ya! 43Te weeya ŋaale gyae kekↄŋ keŋ ɛ kↄlala baa kilisi ŋon, na baa tↄ ŋon do lee yenaŋ kamasɛ. 44Na baa wↄlɛɛ ɛmɛɛ na ɛ donↄↄ keŋ pou keŋ nyi boe na boe be gyae ke gyakaa ke dↄↄ dↄↄ ya, nawolo nyi debaŋ keŋ Wurubuarɛ be kↄŋ nyi ↄ kaa lɛɛ ŋon nɛ ɛ bɛɛ e bo." 45Keŋte Yesu gyuuwↄ ka gyoo Wurubuarɛ ↄsom deni dinaa keŋ dekpaŋalaŋ man. Na balaŋ ne yↄↄ abↄↄ botↄↄ te ↄ gegi wↄ, 46te ↄ yako wↄ nyiaa, "Wurubuarɛ nombia aŋmaraseŋ see ne yako nyi Wurubuarɛ kpa, 'Me deni dinaa keŋ gyae ke yɛɛ botↄↄ keŋ baa fane. Mↄna ɛmɛɛ ta besena ke yɛɛ ŋmɛɛlatena dɛɛgyaŋee!' " 47Wee na wee na Yesu ne kyaa wola balaŋ Wurubuarɛ nombia Wurubuarɛ ↄsom deni dinaa keŋ man. Te saese kegyiise na Gyudatena mmaraa wolala na donↄↄ kegyiise baŋ gyae gbɛɛ nyi baa ko e. 48Mↄna be ta gyeŋ gbɛɛ keŋ baa mo kyaŋ e ya, nawolo nyi na balaŋ baŋ pou ne tei ↄ nombia ŋan ↄ na wolo nɛ nideli keŋ bↄↄ ne gyae ŋa ke laŋ wↄ ya.

will be added

X\