1 Keŋte Yesu gyↄↄ dudu fa ↄ kaseela baŋ wola wↄ nyiaa, kaboena nyi baa fane wee kamasɛ keŋ ba wose na yↄkↄse wↄ ya. 2 Ↄ yako wↄ nyiaa "Donↄↄ daale man nɛ nombiadiiri ŋolo kyaawↄ keŋ ↄ bee yee Wurubuarɛ ya, te ↄ be famenɛ na walaŋ mↄ ya. 3 Na lialo ŋolo mↄ kyaa donↄↄ kenaŋ man. Ↄ ne kyaa kↄŋ nombiadiiri ŋon gyaŋ kaa waase e wee kamasɛ nyiaa, 'Kɛɛ na n ke di daa na me walaŋ ŋon daa na e be nyim nɛ nombia ŋan nideli fa maŋ.' 4 Nafↄ nombiadiiri ŋon bɛɛwↄ kelii debaŋ daale, mↄna wↄle wↄle nɛ ↄ yako ↄ wose nyiaa, 'Yɛɛ ampaŋ nyi mↄↄ ne yee Wurubuarɛ ya te mↄↄ famenɛ na walaŋ mↄ ya. 5 Mↄna alo kei nombia te poro maŋ mena dↄↄ maa kɛɛ na maa di ↄ nombia ŋan nideli fa e, na ↄ be nyiŋ gyem tisi me dↄↄ naase maŋ diyem bela ya.' " 6 Botↄↄ te Yesu yakowↄ nyiaa, "Ɛ nyii kpene keŋ nombiadiiri kum kei be yako. 7 Akpaa mena na Wurubuarɛ be gyae waa di nombia anokoare man fa ↄ balaŋ baŋ bee wii baake e nelim na ka weese nɛ yee? Ɛ ne lɛɛdi nyi waa wↄŋee ↄ wose nyi ↄ be kyↄ wↄ yee? 8 Mɛɛ yako ŋon ɛ ke nyii nyiaa, Wurubuarɛ waa di nombia ŋan anokoare man fa wↄ bileŋ na waa yela baa di deŋele. Te nyi akpaa maŋ Deniwalaŋ Bu ŋon ma bese kↄŋ na, balaŋ baa kyaa tɛɛle kei dↄↄ keŋ baa lɛɛ maŋ di?" 9 Yesu besewↄ gyↄ dudu kei fa balaŋ baŋ bɛɛ kɛɛ ba wose gyↄ konↄↄ nyi be gbɛɛneŋ tenɛɛ Wurubuarɛ siaman, te bↄↄ na mo walaŋ kamasɛ yɛɛ kolo ya nɛ nyiaa! 10 "Baala bala baale gyuu Wurubuarɛ ↄsom deni dinaa keŋ man be kaa fane. Ŋolo yɛɛ Farasii baale e te ŋolo mↄ yɛɛ lempoolɛɛre e. 11 Farasii baale ŋon korowↄ seŋ te ↄ fanewↄ kɛlɛɛ ↄ wose nyiaa, 'Wurubuarɛ mɛɛ fa neŋ karaŋ nyi ma te yɛɛ nombiakumɛɛyɛɛre e ŋgba balaŋ akaŋ baŋ nɛ ya. Mↄↄ yɛɛ ŋgba ŋmɛɛlatena na balaŋ kumɛɛ na kafoŋtena yaa ŋgba lempoolɛɛre kei nɛ ya. 12 Mɛɛ bake me nↄↄ betabola weeya nyetooro kamasɛ man, te mɛɛ kpase ma kpene kamasɛ keŋ mee nyim nɛ akpeŋ kufu na me ta mo dekpeŋ dokoloŋ fa nyaŋ Wurubuarɛ.' 13 Mↄna lempoolɛɛre ŋon dↄↄ, ŋon gyuuwↄ ka seŋ yenaŋ keŋ nyi ↄ te gyina ↄ sia kɛɛ adido gba ya te ↄ moo ↄ nyiŋmaase gyakaa ↄ konↄↄ dↄↄ waraŋase man yako nyiaa, 'Wurubuarɛ, wii maŋ nombiakumɛɛyɛɛre kei waraŋase.' " 14 Keŋte Yesu yakowↄ nyiaa, "Mɛɛ yako ŋon ɛ ke nyii nyi ba ke fane taŋ nɛ, lempoolɛɛre ŋon te Wurubuarɛ lɛɛwↄ do nyi ↄ gbɛɛneŋ tenɛɛ ŋon Wurubuarɛ siaman. Nawolo nyi walaŋ kamasɛ ŋon ↄ gyina ↄ wose adido na Wurubuarɛ waa yↄkↄse e, te walaŋ kamasɛ ŋon ↄ yↄkↄse ↄ wose na Wurubuarɛ waa gyina e adido." 15 Wee daale balaŋ baale moo be bia kↄŋ nyi Yesu waa mo ↄ nyiŋmaa gyakaa be dↄↄ na waa hiraa wↄ. Ↄ kaseela baŋ kena mena nɛ, be ŋmanyaŋ balaŋ baŋ. 16 Keŋte Yesu baake bia baŋ kↄŋ ↄ gyaŋ te ↄ yakowↄ nyiaa, "Ɛ yela bia baŋ kekↄŋ me gyaŋ, ɛ na tↄ wↄ gbɛɛ ya. Nawolo nyi Wurubuarɛ gyoori keŋ yɛɛ balaŋ baŋ bɛɛ yↄkↄse ba wose ŋgba bia kɛwↄ dinↄↄ nɛ wui. 17 Ampaŋ yaa mɛɛ yako ŋon nyiaa, walaŋ kamasɛ ŋon ↄ te yↄkↄse ↄ wose do Wurubuarɛ tɛɛ ŋgba biikyaa e ya nɛ, ↄ be gyae waa gyoo Wurubuarɛ gyoori keŋ man korakora ya." 18 Wee daale nɛ Gyudatena siamante ŋolo kaa bↄↄse Yesu nyiaa "De Gbeŋgyoo kpaakpaa, woŋ te maa yɛɛ na maa nyiŋ nyeedoŋ kekpaa keŋ?" 19 Botↄↄ te Yesu bↄↄse e nyiaa, "Woŋ dↄↄ te n ne baake maŋ walaŋ kpaakpaa? Lee Wurubuarɛ wↄle nɛ walaŋ kamasɛ be kyaa keŋ ↄ yɛɛ walaŋ kpaakpaate e ya." 20 Ŋgba n gyeŋ Wurubuarɛ mmaraase ŋan ne yako nyi, "Na lee n baale yaa n wɛɛle wↄle ya, na ko walaŋ ya na ŋmɛɛle ya, na kara n dↄↄ nↄↄ ya. Bu n kya na n naa nɛ?" 21 Keŋte balee ŋon mↄ tiranↄↄ nyiaa "Me wulaa mee di mmaraase kɛŋa pou dↄↄ leenaŋ me biatɛɛ" 22 Yesu ke nyii ↄ nↄↄwoya ŋan nɛ ↄ yako e nyiaa, "Ta bese ka neŋ kolo dokoloŋ kooŋ n ke yɛɛ. Gyu ke yↄↄ nya abↄↄ ŋan pou n dana nɛ na n ka mo kↄba keŋ kpɛlɛɛ ayematena na n ke kↄŋ kaa sila maŋ. N yɛɛ mena na n ke nyiŋ abↄↄ kpaakpaa see n wose Wurubuarɛ gyaŋ adido." 23 Balee ŋon ke nyii nombia kɛŋa nɛ, takaa e nideli nawolo nyi ↄ dana abↄↄ burum. 24 Keŋte Yesu gɛɛsewↄ kɛɛ e te ↄ yakowↄ nyiaa, "Gyae ke yɛɛ doŋ fa baŋ be dana kↄba nɛ nyi baa gyoo Wurubuarɛ gyoori keŋ man. 25 Mɛɛ yako ŋon ɛ ke nyii nyiaa, gyae ke yɛɛ doŋ fa baŋ be dana kↄba nɛ nyi baa gyoo Wurubuarɛ gyoori keŋ man, kela nyi kurumↄↄ ka gyoo ŋarale bↄↄ man lee." 26 Balaŋ baŋ ke nyii nombia kɛŋa nɛ be bↄↄse e nyiaa, "Nyi nnɛ te doo na, amↄte ne gyae la waa nyiŋ nyeekelɛɛ baa?" 27 Keŋte Yesu tiranↄↄ nyiaa, "Kpene keŋ deniwalaŋ be gyae waa tale yɛɛ ya nɛ, Wurubuarɛ dↄↄ waa tale yɛɛ." 28 Botↄↄ te Pita yakowↄ nyiaa, "De gbeŋgyoo, daa dↄↄ de te tina kpene kamasɛ keŋ de dana nɛ yela, te de dↄŋɛɛ de silana neŋ." 29 Keŋte Yesu yako wↄ nyiaa, "Mɛɛ yako ŋon ɛ ke nyii nyiaa, walaŋ kamasɛ ŋon ↄ be tina ↄ dekpaŋalaŋ yaa ↄ wɛɛle yaa ↄ naabia yaa ↄ kya na ↄ naa yaa ↄ bia yela lee Wurubuarɛ gyoori keŋ dↄↄ nɛ, 30 waa bese nyiŋ ŋa burum kpu gyɛŋ weeya kɛŋa man, na waa bese nyiŋ nyeedoŋ kekpaa wee daale." 31 Wee daale nɛ Yesu baake ↄ kaseela kufu bala baŋ lee yenaŋ te ↄ yako wↄ nyiaa, "Dee gyu Gyerusalɛm donↄↄ man baa, te kpene kamasɛ keŋ Wurubuarɛ akpeŋkpeŋgyↄↄra be ŋmarase lee maŋ Deniwalaŋ Bu ŋon wose man nɛ, gyae ke kↄŋ mena. 32 Baa mo maŋ do balaŋ baŋ ba te yɛɛ Gyudatenawↄ ya nɛ nyiŋmaa man, na baa kulu maŋ na baa tee maŋ na baa tↄ nↄↄloŋ woli maŋ na baa tuku maŋ na baa ko maŋ. 33 Mↄna weeya atoorote keŋ nɛ, Wurubuarɛ waa gyuusu maŋ lee yeŋ man." 34 Yesu kaseela baŋ te nyii nombia kɛŋa man ya, nawolo nyi Wurubuarɛ ta lese ŋe man wola wↄ ya mena dↄↄ be te nyii ŋe man dokoloŋ man ya. 35 Yesu kɛɛ benaa Gyeriko donↄↄ man nɛ, na siayɛlɛɛsate ŋolo kyaa gbɛɛnaa man ↄ na solee abↄↄ. 36 Ↄ ke nyii balaŋ burum baŋ kɛɛ lam nɛ, ↄ bↄↄse wↄ nyi woŋ kↄŋala? 37 Keŋte balaŋ baŋ yako e nyiaa "Yesu Nasarɛte baale ŋon ne laŋa laa." 38 Botↄↄ te ↄ gyinaa ↄ nↄↄ baake nyiaa, "Yesu, Defidi ↄ naanabii! Wii me waraŋase!" 39 Balaŋ baŋ be dↄŋɛɛ siaman nɛ ŋmanyaŋ e nyi waa wu ↄ nↄↄ. Mↄna nɛnɛɛ gba te ↄ desinaa fae yeesa nedoŋ nyiaa, "Defidi ↄ naanabii! Wii me waraŋase." 40 Mena dↄↄ Yesu seŋawↄ te ↄ yakowↄ nyi baa mo siayɛlɛɛsate ŋon kↄŋ ↄ gyaŋ. Ↄ ka benaa e nɛ, Yesu bↄↄse e nyiaa, 41 "Woŋ te n ne gyae nyi maa yɛɛ fa neŋ?" Keŋte siayɛlɛɛsate ŋon tiranↄↄ nyiaa, "Me Gbeŋgyoo, mɛɛ gyae me sia ke gyuusu." 42 Keŋte Yesu yako e nyiaa, "N sia dee gyuusu na n kena. N ke lɛɛ maŋ di dↄↄ te n nyiŋa kawee kekyↄ." 43 Debokenaŋ man te ↄ sia gyuusuwↄ, te ↄ naawↄ te ↄ sila Yesu na ↄ na lese Wurubuarɛ yele. Balaŋ dikpii keŋ pou kena nɛ, baŋ mↄ lese Wurubuarɛ yele.
