Luka 17

1Keŋte Yesu yako ↄ kaseela baŋ nyiaa, "Abↄↄ ŋan ne yeli balaŋ ne yɛɛ dukum nɛ gyae ke kↄŋ, mↄna nyaŋ ŋon ŋe gyae ke ta n dↄↄ kↄŋ nɛ nya laako! 2Akpaa nyi ba mo boe dinaa dinaa kpaŋ n wↄŋe man te be fuŋ neŋ do ɛpo man nɛ, dei fa neŋ kela nyi n ke yela bia buruburu kɛwↄ man ŋolo keyɛɛ dukum. 3Mena dↄↄ ɛ kɛɛ ɛ wose nideli. Akpaa n dↄↄ de yɛɛ neŋ dukum na lese si e, te akpaa ↄ nyii ↄ wose asɛɛ te ↄ kyɛɛkee na mo kyɛɛ e. 4Akpaa ↄ yɛɛ nombiikum tia neŋ betabonyetooro wee dokoloŋ, te ↄ bese kↄŋ n gyaŋ betabonyetooro wee dokoloŋ kenaŋ kaa doo neŋ teree na mo kyɛɛ e." 5Keŋte Yesu kpilala kufu bala baŋ yako e nyiaa, "De Gbeŋgyoo, yela da kelɛɛdi ka bo kpu." 6Keŋte de Gbeŋgyoo Yesu yako wↄ nyiaa, "Akpaa ɛ kelɛɛdi yɛɛ peperee ŋgba kefaabii koraŋ nɛ, ɛ ke tale yako daŋ nyi 'Kulu na n lila pou na n kaa seŋ ɛpo man, te gyae ke kↄŋ mena.' 7Dɛɛ mo ke nyi ɛ man ŋolo dana tobaale ŋon ↄ ne fare fa e yaa ↄ ne kɛɛ ↄ namense dↄↄ. Akpaa tobaale ŋon da lee ŋale man kↄŋ nɛ, ↄ gbeŋgyoo ŋon bɛɛ yako e nyi tisi kyaa bileŋ na n kedi ya. 8Mↄna ↄ ne yako e bo nyi, 'Desina n wose na n ke saa me balinↄↄ weenɛɛ fa maŋ na n ke kyaa daa maŋ maa di na maa nyↄↄ, me taŋ na pɛna nyaŋ mↄ n kaa di na n ke nyↄↄ.' 9Kaboena nyi balee ŋon waa do ↄ tobaale ŋon nↄↄ nyi ↄ te yɛɛ kpene keŋ ↄ be yako e nyi waa yɛɛ dↄↄ? Koa. 10Mena te doo fa ɛmɛɛ mↄ, nyi akpaa ɛ yɛɛ kpene kamasɛ keŋ mↄↄ yako ŋon nyi yaa yɛɛ nɛ, kaboena yaa yako nyi de taŋ yɛɛ n tewulɛɛwↄ, tom keŋ kaboena nyi dɛɛ yɛɛ nɛ te de yɛɛwↄ." 11Yesu ka mo ↄ nyee baŋ ↄ ne gyu Gyerusalɛm donↄↄ man nɛ, ↄ tɛɛwↄ Samaria na Galelia tɛɛlese wulu man. 12Debaŋ keŋ ↄ na gyoo akuraa daale man nɛ, balaŋ kufu baale baŋ bɛɛ wee kawee yayam nɛ kↄŋawↄ be kaa gyaŋee na e te be dↄↄwↄ seŋ lemlem, 13keŋte be gyinaa be nↄↄ nyiaa, "De Gbeŋgyoo Yesu! Waaseda wii de waraŋase!" 14Yesu kena wↄ keŋ nɛ, ↄ yako wↄ nyiaa "Ɛ mo ɛ wose kawola Wurubuarɛ saese baŋ." Be kee gyuu nɛ te be kaweese ŋan taŋawↄ. 15Be man ŋolo kena nyi ↄ kawee te taŋ nɛ, ↄ besewↄ kↄŋ Yesu gyaŋ na ↄ ne fae yeesa lese Wurubuarɛ yele. 16Keŋte ↄ kaa buŋawↄ Yesu nawↄↄtɛɛ do e nↄↄ. Na mena balee kei yɛɛ Samaria baale e. 17Botↄↄ te Yesu bↄↄsewↄ nyiaa, "Na balaŋ kufu te me kyↄↄwↄ yee? Te nde balaŋ kadaale akaŋ baŋ? 18Weera dↄↄ te ŋↄↄle kei waageŋ yɛna walaŋ ŋon ↄ ba bese kↄŋ ↄ kaa fa Wurubuarɛ karaŋ?" 19Botↄↄ te Yesu yako e nyiaa, "Koro na n ke ta, n kelɛɛdi dↄↄ te n nyiŋa kawee kekyↄ." 20Wee daale nɛ Farasiitena baale bↄↄse Yesu nyiaa, debaŋ woŋti te Wurubuarɛ gyoori keŋ gyae ke kↄŋ. Keŋte Yesu tiranↄↄ fa wↄ nyi, "Wurubuarɛ gyoori keŋ be gyae ke kↄŋ na ɛ kena ke na ɛ sia fonɛɛ nyi kɛɛ kↄŋ ya. 21Ŋolo be gyae waa yako ŋon nyiaa 'Ɛ kɛɛ, keŋ yaa kɛbo,' yaa ke kyaa yenaŋ daale ya! Nawolo nyi Wurubuarɛ gyoori keŋ kyaa ɛ man." 22Keŋte Yesu yako ↄ kaseela baŋ nyiaa, "Debaŋ daale gyae kekↄŋ keŋ ɛ ke gyae nyi ɛ ka bese naa maŋ Deniwalaŋ Bu ŋon kekyaa man wee dokoloŋ gba, mↄna ɛ be gyae ɛ kena ya." 23Balaŋ baa yako ŋon nyiaa, "Ↄ kyaa kɛbo, yaa ↄ kyaa yenaŋ daale! Mↄna ɛ na yekii sila wↄ ya. 24Nawolo nyi wee keŋ maŋ Deniwalaŋ Bu ŋon maa bese kↄŋ nɛ, walaŋ kamasɛ waa naa maŋ ŋgba mena keŋ ↄga ne ŋmaale adido te walaŋ kamasɛ ne naa ka keŋmaŋee keŋ nɛ. 25Mↄna kaboena nyi maa taŋgbɛɛ naa diyem nideli, na gyɛŋ wee kei balaŋ ke bɛɛ maŋ pɛ. 26Mena keŋ be kↄŋ Nowa kekyaa man nɛ, mena mↄ te gyae ke kↄŋ maŋ Deniwalaŋ Bu ŋon ka bese kↄŋ man. 27Mena Nowa weeya ŋenaŋ man nɛ, na balaŋ gyakaa bee dii na bɛɛ nyↄↄ, na ala na baala mↄ ne yala dↄŋa kelii debaŋ keŋ Nowa ba gyoo adakaa keŋ man te loŋ keŋ waalewↄ kaa koe balaŋ pou. 28Mena mↄ te yɛɛwↄ Lↄↄte kekyaa man. Balaŋ gyakaa bee dii na bɛɛ nyↄↄ, na baale ne yↄↄ abↄↄ na baale mↄ ne lɛɛ, na baale ne duu abↄↄ na baale mↄ ne ma denɛɛ. 29Mↄna wee keŋ Lↄↄte ba lee Sodom donↄↄ man nɛ, Wurubuarɛ yela boalaŋ na kpatakpela leewↄ adido kↄŋ kaa kpa Sodom donↄↄ pou. 30Mena mↄ te wee keŋ maŋ Deniwalaŋ Bu ŋon maa bɛɛ lee nɛ gyae ke futaa balaŋ. 31Mena wee kenaŋ nɛ walaŋ kamasɛ ŋon ↄ be kyaa ↄ deni man ya te wa abↄↄ doo ↄ deni man nɛ, ↄ na bese gyu ka lese ŋa ya. Mena mↄ te walaŋ ŋon ↄ kyaa wↄↄman nɛ ↄ na bese gyu dɛɛ nyi ↄ kaa mo ↄ kolo ya. 32Ɛ na wolee kpene keŋ be kↄŋ Lↄↄte wɛɛle dↄↄ nɛ ya. 33Walaŋ kamasɛ ŋon ↄ ne gyae nyi waa lɛɛ ŋon gbagba nyeedoŋ na ke gyae ka lee ↄ nyiŋmaa man, mↄna walaŋ ŋon ↄ nyeedoŋ da lee ↄ nyiŋmaa man lee maŋ dↄↄ nɛ waa bese nyiŋ ke. 34Mena dↄↄ mɛɛ yako ŋon ɛ ke nyii nyi mena wee kenaŋ nelim nɛ balaŋ bala baa doo dofoŋoŋ dokoloŋ dↄↄ, mↄna Wurubuarɛ waa mo ŋolo tina ŋolo yela. 35Ala bala baa seŋ debodokoloŋ bɛɛ naŋ abↄↄ, mↄna Wurubuarɛ waa mo ŋolo tina ŋolo yela. 36Mena mↄ te baala bala baa seŋ wↄↄman bɛɛ yɛɛ tom, mↄna Wurubuarɛ waa mo ŋolo tina ŋolo yela." 37Botↄↄ te ↄ kaseela baŋ bↄↄse e nyiaa, "De Gbeŋgyoo, aleŋ gbɛɛ te mena nombia kɛŋa pou gyae kekↄŋ?" Keŋte Yesu tiranↄↄ fa wↄ nyiaa, "Botↄↄ keŋ kolo punta doo nɛ, botↄↄ te bapɛtɛɛna ne yilaa."

will be added

X\