Luka 14

1Gyudatena kefɛɛfowee daale nɛ, Yesu gyuu Farasiitena siamante ŋolo dɛɛ ↄ kaa di. Ↄ ke kyaa botↄↄ keŋ na, Farasiitena baŋ na deke e baa kɛɛ nyi baa nyiŋ kolo yako lee ↄ wose man. 2Keŋte balee ŋolo ŋon ↄ ba bokee nɛ kↄŋawↄ Yesu gyaŋ, 3te Yesu bↄↄse Gyudatena mmaraa wolala baŋ na Farasiitena baŋ nyiaa, "Da mmaraa ne fa gbɛɛ nyi dɛɛ kyↄ walaŋ kawee kefɛɛfowee yaa bɛɛ fa daa gbɛɛ ya?" 4Mↄna be man ŋolo te gyuusu ↄ nↄↄ ya. Keŋte Yesu kyaŋa kaweete ŋon nyiŋmaa man te ↄ kyↄↄ e kawee te ↄ lↄↄ e gbɛɛ. 5Botↄↄ te Yesu bↄↄse wↄ nyiaa, "Akpaa ɛ man ŋolo dana bu baale bii yaa wonembu te ↄ yale ditiribuŋ man kefɛɛfowee na, ↄ be gyae waa lese e debokenaŋ man yee?" 6Mↄna ba te tale tiranↄↄ fa e ya. 7Yesu kena mena keŋ balaŋ baŋ bↄↄ baake wↄ kↄŋ weenɛɛ ŋan tɛɛ kɛɛ tↄↄsee akyaese kpaakpaa nyiŋan nɛ, ↄ gyↄↄ dudu kei fa wↄ nyiaa, 8"Akpaa ŋolo de baake neŋ alowↄlere weenɛɛ tɛɛ nɛ na peree dekyae kpaakpaate ya. Nawolo nyi gyae ke tale kↄŋ nyi ↄ te baake walaŋ ŋolo ŋon ↄ kela neŋ nɛ mↄ kↄŋ botↄↄ. 9Akpaa de kↄŋ mena na walaŋ ŋon ↄ be baake ɛ bala nɛ, waa kↄŋ kaa yako neŋ nyiaa 'Koro mo n dekyae fa balee kei.' Botↄↄ na desɛŋ gyae ke kyaŋ neŋ, na n ke gyu ke kyaa botↄↄ keŋ be taŋ obuo ya nɛ. 10Mↄna nyi akpaa ŋolo de baake neŋ gyu ↄ dɛɛ nɛ, gyu ke kyaa botↄↄ keŋ be taŋ obuo ya nɛ te akpaa walaŋ ŋon ↄ be baake neŋ de kↄŋ nɛ waa yako neŋ nyiaa, 'Me gyoo koro ke kyaa dekyae kpaakpaate man.' Kei gyae ke fa neŋ obuo balaŋ baŋ bↄↄ baake wↄ nɛ pou siaman. 11Nawolo nyi walaŋ kamasɛ ŋon ↄ gyina ↄ wose na Wurubuarɛ waa yↄkↄse e, te walaŋ kamasɛ ŋon ↄ yↄkↄse ↄ wose na Wurubuarɛ waa gyina e adido." 12Botↄↄ te Yesu yako walaŋ ŋon ↄ be baake e gyu ↄ dɛɛ nɛ nyiaa, "Akpaa n do kesaa te n ne gyae n ke baake balaŋ kaa di be nↄↄ nɛ, na baake n gyoona yaa n naabia yaa n loŋtona yaa n tebia baŋ be dana kↄba nɛ ya. Nawolo nyi n yɛɛ mena na baŋ mↄ baa kaa baake neŋ wee daale tↄ kom. 13Mena dↄↄ nyi akpaa n do kesaa na, baake ayematena na ↄtakasese na abafaŋse na siayɛlɛɛsatena. 14N yɛɛ mena na Wurubuarɛ waa hiraa neŋ. Nawolo nyi baŋ be gyae baa tale yɛɛ mena tↄ neŋ kom ya, mↄna Wurubuarɛ ne gyae la waa tↄ neŋ kom wee keŋ waa gyuusu balaŋ baŋ be gbɛɛneŋ tenɛɛ ↄ siaman lee yeŋ man nɛ." 15Balaŋ baŋ baŋ na wↄ kyaa bee di weenɛɛ ŋan man ŋolo kenyii nombia kɛŋa nɛ ↄ yako Yesu nyiaa, "Walaŋ ŋon waa di weenɛɛ Wurubuarɛ gyoori keŋ man nɛ, ŋon na nyeebam!" 16Keŋte Yesu tiranↄↄ fa e nyiaa, "Balee ŋolo kyaawↄ te wee daale ↄ doo kesaa, te ↄ baake balaŋ burum nyi be kaa di. 17Debaŋ keŋ weenɛɛ ŋan kedi be lii nɛ, ↄ kpila ↄ tobaale nyi waa ta baake balaŋ baŋ ↄ be lↄ yele baake wↄ nɛ nyiaa, 'Ɛ kↄŋ, ba te taŋ kpene kamasɛ.' 18Mↄna be popou wↄŋee ba wose lee wↄle dokoloŋ dokoloŋ. Walaŋ gyaŋgbate ŋon tobaale ŋon be gyu ↄ gyaŋ nɛ yakowↄ nyiaa, 'Ma ke lɛɛ tɛɛle daale yaa te mee gyu me kaa kɛɛ ke mena dↄↄ mɛɛ waase neŋ bo mↄↄ gyae maa tale kↄŋ ya.' 19Ŋolo mↄ yako e nyiaa, 'Ma te lɛɛ nunkyuese baala kufu baŋ baa yɛɛ tom fa maŋ te mee gyu me kaa mo wↄ fara kɛɛ be doŋ man, mena dↄↄ mɛɛ waase neŋ bo mↄↄ gyae maa tale kↄŋ ya.' 20Keŋte ŋolo mↄ yakowↄ nyiaa, 'Ma ke yala alo yaa, mena dↄↄ mↄↄ gyae maa tale kↄŋ ya.' 21Mena dↄↄ tobaale ŋon besewↄ gyu ke yako ↄ gbeŋgyoo ŋon nombia ŋan bↄↄ yako e nɛ. Ↄ gbeŋgyoo ŋon ke nyii nombia kɛŋa nɛ ↄ gyeŋa baŋ nideli te ↄ yako ↄ tobaale ŋon nyiaa, 'Bese gyu donↄↄ keŋ abↄnterese na ŋe gbɛɛneŋ nↄↄman, na n kaa baake ayematena na ↄtakasese na siayɛlɛɛsatena na abafaŋse nyi be popou baa kↄŋ.' 22Te kyare ya nɛ tobaale ŋon besewↄ kↄŋ kaa yako ↄ gbeŋgyoo ŋon nyiaa, 'Me gbeŋgyoo, kpene keŋ n be kpila maŋ nyi maa yɛɛ nɛ, ma te yɛɛ mↄna akyaese sɛɛ doo burum.' 23Keŋte balee ŋon yako ↄ tobaale ŋon nyiaa, 'Gyu donↄↄ keŋ denɛɛ wↄla na ke gbɛɛneŋ pou man, na n kaa mo balaŋ kↄŋ na ma dekpaŋalaŋ keŋ kenyiŋ wulu.' 24Mɛɛ yako ŋon ɛ ke nyii nyiaa, 'Balaŋ baŋ mↄↄ lↄ yele baake wↄ nɛ, be man ŋolo na ŋolo nↄↄ be gyae ke daa me weenɛɛ kɛŋa ya.' " 25Wee daale balaŋ burum baale kesila Yesu bee gyuu nɛ, ↄ besena ↄ sia tee wↄ te ↄ yako wↄ nyiaa, 26"Akpaa ŋolo ne kↄŋ me gyaŋ ↄ kaa sila maŋ te ↄ te gyae maŋ kela ↄ kya na ↄ naa na ↄ wɛɛle na ↄ bia na ↄ kegyiise na ↄ naabia na ↄ deesina na ŋon gbagba ↄ wose koraŋ ya nɛ, ↄ be gyae waa tale bese me kaseele ya. 27Te walaŋ kamasɛ ŋon ↄ ta mo ↄ ↄpaŋdaŋ keŋ ka seŋɛɛ fa kaale na yeŋ na waa sila maŋ ya nɛ, ↄ be gyae waa tale bese me kaseele ya. 28Akpaa ɛ man ŋolo ne gyae waa baŋ deni dinaa na, ↄ bɛɛ kyaa na waa bu deni keŋ abↄↄ koya kɛɛ nyi kↄba keŋ ↄ dana nɛ gyae ka yee deni kenaŋ kebaŋ yee? 29Nawolo nyi akpaa ↄ see deni keŋ mokↄↄ te ↄ te tale taŋ ke ya na, baŋ pou baa naa ke nɛ baa boŋo e, 30nyiaa 'Balee kei korowↄ nyi ↄ ne baŋ deni mↄna ↄ nyiŋmaa te gyaŋee ya.' 31Keŋte Yesu besewↄ yako nyiaa, akpaa gyoo ŋolo dana yoonↄↄtena kakpoŋse kufu (10,000) te ↄ ne gyu ↄ kaa yoo na ↄ dↄↄ gyoo ŋon ↄ dana yoonↄↄtena kakpoŋse sao (20,000) na, ↄ be gyae waa kyaa na waa gyueŋ kɛɛ nyi waa tale mo ↄ wui yoonↄↄtena kakpoŋse kufu (10,000) baŋ ke yoo na ↄ dↄↄ ŋon wui yoonↄↄtena kakpoŋse sao (20,000 ) baŋ yee? 32Nyi akpaa ↄ kɛɛ nyi ↄ be tale yoo na e ya nɛ, debaŋ keŋ ↄ ta benaa ta e ya na waa kpila teree gyu ke doo e nyi waa yela baa desina ba nsana na baa kyaa wosefɛɛreŋ man. 33Mena mↄ te ɛ man walaŋ kamasɛ ŋon ↄ be gyae waa tale tina kpene kamasɛ keŋ ↄ dana yela ya nɛ, ↄ be gyae waa tale bese me kaseele ya." 34Keŋte Yesu besewↄ yako nyiaa, "Yabia dei mↄna akpaa ka gyoŋ keŋ da lee ke man nɛ, n be gyae n ke tale yela ka ke yɛɛ gyoŋ bela ya. 35De kↄŋ mena na, yabia kenaŋ be dei fa kolo na kolo keyɛɛ bela ya, bee fuŋ ke bo leki. Walaŋ kamasɛ ŋon ↄ dana deŋela anenyiiŋ dei na, waa tei nombia ŋan mɛɛ yako nɛ."

will be added

X\