Luka 10

1Kei wↄle nɛ de Gbeŋgyoo lese baala sↄŋotooro na kufu bala (72) te ↄ kpila wↄ bala bala nyi, baa kyaŋ gbɛɛ gyu donↄↄse na yenaase ŋan pou man ŋon gbagba ne gyae waa gyu nɛ. 2Keŋte Yesu yako wↄ nyiaa, "Wↄↄman weenɛɛ ŋan boe na ke tekerii, mↄna balaŋ baŋ baa tekerii nɛ ta boo ya. Mena dↄↄ ɛ waase wↄↄte ŋon na waa kpila balaŋ burum kↄŋ wↄↄ keŋ man na be kaa tekerii. 3Ɛ ta! Mee kpila ŋon baa ŋgba namensebia ne gyuula gbougbouse man nɛ. 4Ɛ ne gyu na ɛ na mo kↄba yaa akpo yaa nkyokota ya. Te ɛ na wↄlɛɛ debaŋ na balaŋ nↄↄ kado gbɛɛnaa man ya. 5Dekpaŋalaŋ kamasɛ keŋ man ɛ gyoo na, ɛ taŋgbɛɛ yako dekpaŋalaŋmantena baŋ nyi, 'Wosefɛɛreŋ dɛɛkↄŋ dekpaŋalaŋ kei man.' 6Akpaa walaŋ ŋon ↄ ne gyae wosefɛɛreŋ kyaa dekpaŋalaŋ kenaŋ man na, ɛ wosefɛɛreŋ gyae ke kyaa na e. Te akpaa walaŋ ŋon ↄ ne gyae wosefɛɛreŋ be kyaa botↄↄ ya na, ɛ wosefɛɛreŋ keŋ gyae ka bese kↄŋ ɛ gyaŋ. 7Nyi be lɛɛ ŋon na ɛ kyaa dekpaŋalaŋ kenaŋ man na ɛ ke di na ɛ ke nyↄↄ kpene kamasɛ keŋ baa fa ŋon nɛ, nawolo nyi kaboena nyi baa tↄ tomyɛɛre kamasɛ kom. Ɛ na tɛɛ na akpaŋalaŋ yakaa yakaa ya. 8Akpaa ɛ gyu donↄↄ daale man te be lɛɛ ŋon atuu na, ɛ di kpene kamasɛ keŋ balaŋ baŋ baa fa ŋon nɛ. 9Ɛ kyↄ kaweesetena kawee donↄↄ kenaŋ man, na ɛ keyako donↄↄsetena benaŋ nyi, 'Wurubuarɛ gyoori keŋ ta benaa ŋon taŋ.' 10Mↄna donↄↄ keŋ man ɛ gyu te ba te lɛɛ ŋon ya nɛ, ɛ gyu ka abↄnterese ŋan man na ɛ ke yako nyiaa, 11'Ɛ donↄↄ aŋasa ŋan be mataa de nawↄↄ koraŋ nɛ, de te kpiisi ŋa woli ɛ nyeeya nsana. Mↄna ɛ tↄↄse nyi Wurubuarɛ gyoori keŋ ta benaa taŋ.' 12Mɛɛ yako ŋon na ɛ ke nyii nyi wee keŋ Wurubuarɛ waa kↄŋ kaa di balaŋ nombia nɛ, waa wii Sodomtena waraŋase koraŋ kela mena donↄↄ kenaŋ man balaŋ." 13"Korasin na Bɛtesaida donↄↄsetena! Mɛɛ fa ŋon laako. Nawolo nyi gyakoloŋ nombia ŋan Wurubuarɛ be yɛɛ ɛ gyaŋ nɛ, nyi akpaa beŋ yɛɛ ŋa Tae na Sidↄn donↄↄse man nɛ nafↄ beŋ te wulaa do titere abↄↄ kyaa mo tↄŋ buraa ba wose, na kawola nyi ba te kyɛɛkee ba agyueŋ lee be gbɛɛneŋ kumɛɛ man kↄŋ Wurubuarɛ gyaŋ. 14Mↄna wee keŋ Wurubuarɛ waa kaa di balaŋ nombia nɛ, waa wii Taetena na Sidↄntena waraŋase kela ŋon. 15Te nɛnɛɛ ɛmɛɛ Kapanumtena! Ɛ gyeŋ nyi baa gyina ŋon adido gyu Wurubuarɛ gyaŋ? Koa, baa tisina ŋon ateta ateta kↄŋ botↄↄ keŋ ɛ kena diyem kekpaakekpaa." 16Keŋte Yesu yako ↄ kaseela baŋ nyiaa, "Walaŋ ŋon ↄ nyii ŋon na maŋ yaa ↄ nyiiwↄ, te ŋon ↄ bɛɛ ŋon na maŋ yaa ↄ bɛɛwↄ. Te ŋon ↄ bɛɛ maŋ na ↄ te bɛɛ ŋon ↄ be kpila maŋ nɛ." 17Te kyare ya te balaŋ sↄŋotooro na kufu bala baŋ Yesu be kpila wↄ nɛ besewↄ kↄŋ. Na te yɛɛ wↄ gyoŋ nideli te be yako e nyiaa, "De Gbeŋgyoo, lee n yele man dↄↄ feliŋkumɛɛ gba ne nyii daa." 18Keŋte Yesu tiranↄↄ fa wↄ nyiaa, "Me naa ↄbↄnsam lee adido kaa yala ŋgba ↄga ŋmaalela nɛ. 19Ɛ nyii, ma te fa ŋon doŋ nyi yaa mo sakatee doma na kanase dↄↄ na ɛ ke di ɛ kↄlare ŋon doŋ dↄↄ, te kolo be gyae ke tale yɛɛ ŋon ya. 20Ɛ na yela keyɛɛ ŋon gyoŋ nyi feliŋkumɛɛ ne nyii ŋon ya, mↄna ɛ yela keyɛɛ ŋon gyoŋ nyi ba te ŋmarase ɛ yela adido." 21Debaŋ kenaŋ man te Wurubuarɛ feliŋ ŋon yela gyoŋ kaa gyoowↄ Yesu man nideli te ↄ yakowↄ nyiaa, "Me kya adido na ateta pou Gbeŋgyoo! Mɛɛ fa neŋ karaŋ nawolo nyi n ta mo abↄↄ kɛŋa weese nyansatena na baŋ ba gyeŋ nombia nɛ, te n lese ŋa wola baŋ be dinↄↄ yɛɛ ŋgba bia nɛ. Taata, ma gyeŋ nyi kei yɛna nyaŋ gbagba n kegyaebii." 22Botↄↄ te Yesu yako balaŋ baŋ nyiaa, "Me kya ta mo kpene kamasɛ do maŋ me nyiŋmaa man. Ŋolo ba gyeŋ maŋ ↄ Bu ŋon ya, me kya waageŋ kooŋ gyeŋa na maŋ. Ŋolo mↄ ba gyeŋ kya ŋon ya, maŋ ↄ Bu ŋon na baŋ maa lese me kya ŋon wola wↄ nɛ daageŋ ne gyae la dɛɛ gyeŋ e." 23Keŋte Yesu besenawↄ kɛɛ ↄ kaseela baŋ te ↄ yako wↄ nyiaa, "Ɛ te yɛɛ nyeebam ŋgba ɛ ne naa mena abↄↄ ŋan ɛ ne naa nɛ! 24Mɛɛ yako ŋon ɛ ke nyii nyiaa, Wurubuarɛ akpeŋkpeŋgyↄↄra na gyooneŋ gyaewↄ baa naa kpene keŋ ɛ ne naa nɛ mↄna ba te naa ya, te be gyaewↄ baa nyii kpene keŋ ɛ ne nyii nɛ mↄna be te nyii ya." 25Wee daale nɛ Gyudatena mmaraa wolale ŋolo kↄŋawↄ ↄ kaa teese Yesu nↄↄman te ↄ bↄↄse e nyiaa, "De Gbeŋgyoo, woŋ te maa yɛɛ na maa nyiŋ nyeedoŋ kekpaa keŋ?" 26Botↄↄ te Yesu bↄↄse e nyi, "Woŋ te be ŋmarasewↄ do Wurubuarɛ mmaraa tↄne keŋ man? Sena te ɛ ne nyii mmaraase ŋan man?" 27Keŋte balee ŋon tiranↄↄ nyiaa, "Be ŋmarasewↄ nyi mo n konↄↄ pou na n wose pou na n doŋ pou na nya agyueŋ pou gyae n Gbeŋgyoo Wurubuarɛ, na n ke gyae n dↄↄ ŋgba nyaŋ gbagba n wose nɛ." 28Keŋte Yesu yako e nyiaa, "N tiranↄↄ nideli, yɛɛ ŋgba mena keŋ n be yako nɛ na n ke nyiŋ nyeedoŋ kekpaa keŋ." 29Mↄna keŋ mmaraa wolale ŋon ne gyae waa wola nyi ↄ gbɛɛneŋ tenɛɛ Wurubuarɛ siaman dↄↄ nɛ, ↄ bↄↄse Yesu nyi, "Amↄte yɛna me dↄↄ?" 30Botↄↄ te Yesu gyↄↄ dudu daale tiranↄↄ fa e nyiaa, "Wee daale balee ŋolo lee Gyerusalɛm donↄↄ man tisi ↄ ne gyu Gyeriko donↄↄ man. Keŋte ↄ gyuuwↄ kegyaŋee na ŋmɛɛlatena, te be lɛo ↄ kpene kamasɛ te be tuku e yeŋ yeŋ, te be tinaa e yela diteŋteli. 31Te kↄŋawↄ nyi Wurubuarɛ Sae ŋolo tisiwↄ mo gbɛɛ kenaŋ ↄ ne gyu. Ↄ kena balee ŋon doo nɛ ↄ kpasewↄ mo yenaŋ laŋ. 32Mena mↄ te Lewi baale ŋolo mↄ kↄŋawↄ kaa mo botↄↄ te ↄ kena balee ŋon doo nɛ, ŋon mↄ kpasewↄ mo yenaŋ laŋ. 33Mↄna Samaria baale ŋolo ŋon ↄ ne gyu ↄ gbɛɛ nɛ, kaa leewↄ balee ŋon dↄↄ. Ↄ kena e keŋ nɛ ↄ tↄↄ nyakee e, te waraŋase kyaŋa e fa balee ŋon. 34Ↄ tuuwↄ benaa e te ↄ doo e tee ↄ gyamɛɛ ŋan man te ↄ bake ŋa. Botↄↄ te ↄ moo balee ŋon gyakaa ŋon gbagba ↄ wonembu ŋon ↄ kyaa nɛ dↄↄ, te ↄ moo e gyu ŋↄↄla dɛɛsoe keŋ man nyi baa kɛɛ ↄ dↄↄ fa e. 35Tɛɛ kena nɛ, ↄ lese kↄba fa kegyia ŋon ↄ ne kɛɛ ŋↄↄla dɛɛsoe keŋ dↄↄ nɛ te ↄ yako e nyiaa, 'Kɛɛ balee kei dↄↄ fa maŋ. Ma bese kↄŋ na me kaa tↄ neŋ kom kamasɛ keŋ n be wↄlɛɛ ↄ dↄↄ nɛ kpu.' " 36Keŋte Yesu bↄↄse balee ŋon nyiaa, "Nya agyueŋ man na, balaŋ batooro kɛwↄ man woŋti yɛna balee ŋon ŋmɛɛlatena be tuku e nɛ ↄ dↄↄ?" 37Keŋte mmaraa wolale ŋon tiranↄↄ nyiaa, "Walaŋ ŋon ↄ be wii ↄ waraŋase nɛ." Botↄↄ te Yesu yako e nyiaa, "Nyaŋ mↄ gyu na n kaa yɛɛ wↄe mena." 38Yesu na ↄ kaseela kegyakaa be gbɛɛ dↄↄ bee gyu nɛ, ↄ keliiwↄ akuraa daale man te alo ŋon bɛɛ baake e nyi Maata nɛ moo e gyu ↄ dɛɛ. 39Na Maata dana naabu ŋolo ŋon bɛɛ baake e nyi Mɛɛre. Keŋte Mɛɛre kↄŋawↄ kaa kyaa de Gbeŋgyoo Yesu gyaŋ ↄ ne nyii Wurubuarɛ nombia. 40Maata kɛɛ ka ↄ wose na ŋↄↄla baŋ kedi man nɛ, ↄ kↄŋawↄ kaa bↄↄse Yesu nyiaa, "De Gbeŋgyoo, n be famenɛ ŋgba me naabu be tina maŋ yela maageŋ yee? Yako e nyi waa kↄŋ kaa kyↄ maŋ." 41Keŋte de Gbeŋgyoo Yesu tiranↄↄ fa e nyiaa, "Maata, Maata, n ne naase n wose diyem abↄↄ burum dↄↄ, 42mↄna kolo dokoloŋ ne hia la keŋ kaboena nyi nya yɛɛ. Mena kolo kpaakpaa kenaŋ yaa Mɛɛre moowↄ, te bↄↄ gyae baa lɛo ke lee ↄ nyiŋmaa man ya."

will be added

X\