Gyuudi 1

1Tↄne kei lee maŋ Gyuudi ŋon me yɛɛ Yesu Kristo tobaale e, te me kegyia yɛna Gyemisi nɛ gyaŋ. Mɛɛ ŋmarase ke mee yelee Kristotena baŋ pou de kya Wurubuarɛ ne gyae wↄ te ↄ be baake wↄ te Yesu Kristo ne kɛɛ be dↄↄ nɛ. 2Mɛɛ fane nyi Wurubuarɛ waa wii ɛ waraŋase na waa fa ŋon wosefɛɛreŋ, na waa yela balaŋ kegyae ke doo ɛ man nideli. 3Me gyoona kpaakpaa, nafↄ me gyaewↄ nideli nyi maa ŋmarase ŋon lee nyeedoŋ keŋ daa na ŋon be nyim nɛ wose man. Mↄna me naawↄ nyi kaboena nyi maa ŋmarase sola ŋon nyi yaa yɛɛ kakyeŋ seŋ keŋkeŋ ɛ kelɛɛdi keŋ man, na balaŋ kena nyi nombia ŋan dↄↄ yako ŋon nɛ yɛɛ ampaŋ. Wurubuarɛ ta mo mena nombia kɛŋa do ↄ balaŋ nyiŋmaa man karatetee dokoloŋ kekpaakekpaa. 4Nombiakumɛɛyɛɛra baale te nyiŋ gbɛɛ wɛɛlee kaa gyoo ɛ man. Be dↄŋɛɛ bee tulii Wurubuarɛ nyeedoŋ nombia ŋan ↄ ba mo boele daa nɛ, na baa nyiŋ gbɛɛ yɛɛ kewↄlɛɛ nombia. Ba te bɛɛ de Gbeŋgyoo Yesu Kristo dokoloŋ kooŋ ŋon, ŋon waageŋ yɛna de gyoo na de Gbeŋgyoo nɛ. Wurubuarɛ nombia aŋmaraseŋ see ŋan wulaa kolosiwↄ lee deŋele kewↄŋ keŋ doo daa na wↄ nɛ wose man. 5Ma gyeŋ nyi ɛ wulaa ɛ gyeŋ nombia kɛŋa man mↄna mɛɛ gyae maa tↄↄse ŋon nyiaa, de Gbeŋgyoo Wurubuarɛ lese ↄ balaŋ lee Igyipite tɛɛle man, mↄna wↄle wↄle na ↄ koe baŋ pou ba te lɛɛ e di ya nɛ. 6Mɛɛ gyae maa tↄↄse ŋon bela nyiaa, debaŋ keŋ Wurubuarɛ kpilala baŋ be kyaa adido nɛ te tale kyaŋ be kegyiiri na be daseŋae keŋ Wurubuarɛ ba mo fa wↄ nɛ man nideli ya te bↄↄ lee ke wↄle nɛ, Wurubuarɛ doo wↄ agbaraagbaraase man kekpaakekpaa, nyi baa doo ditiŋtɛɛ keŋ te yɛɛ nsendee ya nɛ man. Botↄↄ te baa doo kelii wee keŋ Wurubuarɛ waa di be nombia nɛ. 7Mena ke te Sodom na Gomora na donↄↄse ŋan pou be kilisi ŋa gyaŋee nɛ man balaŋ naa diyem boalaŋ man. Nawolo nyi ba moo ba wose do kafoŋ na nombia nkaraŋkaraŋ ŋan ŋe taŋ keyako ya nɛ keyɛɛ man. Wurubuarɛ moo kei baa fee daa kyↄↄla na dɛɛ gyeŋ nyi, baŋ pou baa yɛɛ mena nombiakumɛɛ kɛŋa dinↄↄ nɛ, baa naa diyem nideli boalaŋ keŋ ke bɛɛ yem ya nɛ man. 8Mena te mena balaŋ kumɛɛ baŋ bↄↄ nyiŋ gbɛɛ wɛɛlee kaa gyoo ɛ man nɛ doo. Bɛɛ beo doosi dosɛɛ ŋan ne fa wↄ doŋ nyi baa yɛɛ nombia nkaraŋkaraŋ mo do ba wose ayimɛɛ nɛ, te bↄↄ ne kɛɛ nyi Wurubuarɛ dana doŋ be dↄↄ ya. Mena ke te bee kolosi nombiakumɛɛ gyakaa Wurubuarɛ kpilala baŋ be dana gyoorobiiri nɛ dↄↄ. 9Mↄna Wurubuarɛ kpilale kegyia ŋon bɛɛ baake e nyi Maekɛle nɛ gba te yɛɛ mena ya. Nawolo nyi debaŋ keŋ ŋon na ↄbↄnsam ne wↄŋee Mosesi woo dↄↄ koraŋ nɛ, ↄ te tale gyↄ ↄ konↄↄ yako nombiikum daale tia ↄbↄnsam ya, mↄna ↄ yako e bo nyi "De Gbeŋgyoo Wurubuarɛ waa wↄŋ n deŋele." 10Mↄna mena balaŋ kɛwↄ dↄↄ nombia ŋan bↄↄ gyeŋ ŋe man ya na, bɛɛ yako bo nyi ŋa be dana tↄnↄↄ ya te bɛɛ yɛɛ be nombia mↄ bo ŋgba wonembia nɛ keŋ nyansa be doo ke man ya. Kpene keŋ de kↄŋ ba nyee man na keŋ te bɛɛ yɛɛ. Mena nombia kɛŋa ne wↄlɛɛ na wↄ. 11Mena balaŋ benaŋ baa laako. Nawolo nyi be ta mo balee ŋon bɛɛ baake e nyi Kani nɛ gbɛɛneŋ kumɛɛ nawↄↄ, te kↄba dↄↄ be ta mo ba wose do gbɛɛneŋ kumɛɛ man ŋgba mena keŋ balee ŋon bɛɛ baake e nyi Baalam be yɛɛ nɛ. Be ta koro seŋ tia Wurubuarɛ ŋgba mena keŋ balee ŋon bɛɛ baake nyi Kora be yɛɛ nɛ. Mena dↄↄ baŋ mↄ baa yekee ŋgba Kora ŋonaŋ nɛ. 12Akpaa ɛ gyaŋee te ɛ yɛɛ nↄↄdokoloŋ ɛ ne di weenɛɛ te mena balaŋ benaŋ kpuɛ ɛ man na, be yɛɛ ŋgba abↄↄ kumɛɛ ŋan kyakalɛɛ ɛ man te ŋɛɛ wↄlɛɛ ŋon nɛ. Bɛɛ gyueŋ baŋ baageŋ wui bo te bɛɛ ŋmaa weenɛɛ keŋ bɛɛ yɛɛ wↄ desɛŋ ya. Be yɛɛ ŋgba ŋↄma ŋan feliŋ dana ŋa ne kyeŋgbeŋ te ŋↄↄ na mo ↄga kↄŋ ya nɛ. Be yɛɛ ŋgba daase ŋan ŋe bɛɛ see bia debaŋ keŋ kaboena nyi ŋe dɛɛ se ya, te bↄↄ kulu ŋan na ŋa lila te ŋↄↄ yem kekpaakekpaa nɛ. 13Be yɛɛ ŋgba ɛpo loŋ keŋ feliŋ ne gyↄↄ gyu bese gyↄ kↄŋ nɛ. Ba desɛŋ nombia ŋan bɛɛ yɛɛ nɛ, yɛɛ ŋgba afofo na ayimɛɛ ŋan ɛpo ne gyↄↄ lese ŋa see dekeŋkeŋ dↄↄ nɛ. Be yɛɛ ŋgba kyolobii keŋ kↄↄ na sem debodokoloŋ ya nɛ, te ba dekyae yɛna ditiŋtɛɛ tuum keŋ Wurubuarɛ be desina see wↄ kekpaakekpaa nɛ man. 14Mena balaŋ kumɛɛ kɛwↄ wose man nombia te Wurubuarɛ tɛɛwↄ Enↄke ŋon ↄ gyakaa Adam dↄↄ kalola kegyakaare man nyetoorote nɛ dↄↄ yako see nyiaa, "Ɛ kɛɛ de Gbeŋgyoo Wurubuarɛ ne kↄŋ. Ŋon na balaŋ kakpoŋ kakpoŋse baŋ ↄ be baake wↄ te ↄ be desina wↄ see fa ↄ wose, keŋ ŋolo be tale kala wↄ ya nɛ ne kↄŋala. 15Waa kↄŋ kaa di balaŋ pou nombia na waa bu balaŋ kumɛɛ baŋ fↄↄ lee be nombiakumɛɛ ŋan pou bↄↄ yɛɛ, na nombiakumɛɛ ŋan bↄↄ kolosi tia ŋon Wurubuarɛ nɛ dↄↄ." 16Mena balaŋ kumɛɛ kɛwↄ yɛɛ balaŋ baŋ bɛɛ toroŋ debaŋ kamasɛ, te debaŋ kamasɛ mↄ na bɛɛ nyiŋ nombiikum lee balaŋ wose man. Nombia nkaraŋkaraŋ ŋan baŋ gbagba ne gyae nyi baa yɛɛ nɛ te bɛɛ yɛɛ. Bɛɛ wola ba wose te bɛɛ mo nↄↄwoya gyoŋ nyiŋan beo balaŋ na baa mo nyiŋ ba wose. 17Mↄna me gyoona kpaakpaa, ɛ tↄↄse kpene keŋ de Gbeŋgyoo Yesu Kristo kpilala baŋ be yako see kaalaŋ nɛ. 18Be yakowↄ nyiaa, "Tɛɛle kei da benaa kↄ ↄto na, balaŋ baale baa kↄŋ na be kaa mo Wurubuarɛ nombia ŋan kulu ŋon. Mena balaŋ benaŋ baa yɛɛ baŋ gbagba kegyaebii bo, na Wurubuarɛ kegyaebii te baa yɛɛ ya." 19Mena balaŋ kɛwↄ yɛna balaŋ baŋ bɛɛ wↄlɛɛ balaŋ nsana nɛ. Baŋ gbagba kegyaebii te bɛɛ yɛɛ te Wurubuarɛ feliŋ be doo be man ya. 20Mↄna me gyoona kpaakpaa, ɛmɛɛ dↄↄ ɛ mo Wurubuarɛ nombia kpaakpaa ŋan ɛ be lɛɛ di nɛ do dↄŋa kakyeŋ, na ɛ ke tale seŋ keŋkeŋ ɛ kelɛɛdi man. Ɛ fane lee Wurubuarɛ feliŋ ŋon doŋ man. 21Debaŋ keŋ ɛ kyaa ɛ ne daa wee keŋ de Gbeŋgyoo Yesu Kristo waa bese kↄŋ, na ↄ kaa wii de waraŋase na waa mo daa gyu de kaa kyaa ↄ gyaŋ kekpaakekpaa nɛ, ɛ mo Wurubuarɛ balaŋ kegyae keŋ kyaa na dↄŋa. 22Ɛ wii balaŋ baŋ bↄↄ gyeŋ be daseŋae Kristo man nideli ya nɛ waraŋase, na ɛ ka do wↄ kakyeŋ. 23Ɛ wↄŋ balaŋ baŋ bee gyu boalaŋ man lese na ɛ ke lɛɛ ba nyee. Balaŋ baale mↄ kyaa na, nombiakumɛɛ ŋan baŋ gbagba ne gyae nɛ te bɛɛ yɛɛ. Kaboena nyi yaa wii be waraŋase, mↄna ɛ kɛɛ ɛ wose dↄↄ nideli keŋ nyi bↄↄ mo be nombiakumɛɛ ŋan kyaŋee ŋon ya. 24Ɛ yela dɛɛ lese Wurubuarɛ yele nawolo nyi ŋon danaana doŋ keŋ waa tale kyↄ daa na dↄↄ yo gbɛɛ ya. Ŋon ne gyae la waa tale gberaa ayimɛɛ kamasɛ lee da wose man, na waa yela dɛɛ tale mo gyoŋ kaa seŋ ↄ siaman ↄ gyoorobiiri keŋ man. 25Ɛ yela dɛɛ ta de Gbeŋgyoo Yesu Kristo dↄↄ lese Wurubuarɛ yele, nawolo nyi ŋon waageŋ kooŋ yɛna Wurubuarɛ na da nyeelɛɛre. Ŋon waageŋ kooŋ yɛna gyoo te ŋon waageŋ kooŋ danaana doŋ kpene kamasɛ dↄↄ leenaŋ gyaŋgba gyaŋgba keŋ, na gyɛŋ wee kei na weeya akaŋ ŋan pou kekpaakekpaa. Amɛn.

will be added

X\