Gyↄn 12

1Keka weeya looro na Gyudatena kedi ba nyeekelɛɛwee dinaa keŋ nɛ, Yesu gyuu Bɛtani donↄↄ man. Mena donↄↄ kenaŋ man te Lasarose ŋon Yesu be gyuusu e lee yeŋ man nɛ leewↄ. 2Be lↄↄ yele saa weenɛɛ fa Yesu. Maata mↄ kpuɛ baŋ bɛɛ kpɛlɛɛ weenɛɛ ŋan nɛ man. Na Lasarose mↄ kpuɛ na baŋ be kyaa bee dii nɛ. 3Keŋte Mɛɛre moo nuŋ ofoŋofoŋte keŋ ke dana koyadoŋ nɛ porontia tↄↄ, te ↄ kaa toosi ke woli Yesu nawↄↄ te ↄ moo ↄ nyeenyↄↄse feefo ↄ nawↄↄ ŋan. Te nuŋ keŋ ofoŋ lɛɛ dekpaŋalaŋ keŋ pou. Daŋ keŋ bɛɛ baake ke nyi Naade nɛ te ba moowↄ yɛɛ nuŋ kenaŋ 4Te Yesu kaseela baŋ man ŋolo ŋon bɛɛ baake e nyi Gyudase Isekarↄte, ŋon waa kaa lese Yesu fa na baa ko nɛ yakowↄ nyiaa, 5"Woŋ dↄↄ te ba te yↄↄ mena nuŋ ofoŋofoŋ kei na baa mo ke kↄba keŋ fa ayematena ya." Nyi beŋ yↄↄ ke na nafↄ baa nyiŋ tomyɛɛre kulutoo dokoloŋ kↄba lee ke man. 6Gyudase keyako nombia kɛŋa nɛ, na ayematena wose man yaa ↄ na gyueŋ ya, mↄna ↄ yɛɛ ŋmɛɛlate e. Ŋon na see na be kↄba, te ↄ ne kyaa mo ŋaale desina ↄ wose. 7Keŋte Yesu yako e nyiaa, "Ɛ tina alo ŋon yela! Ↄ yɛɛ kei baa mo daa me kewuu. 8Ayematena dↄↄ be kyaa ɛ gyaŋ debaŋ kamasɛ, mↄna maŋ dↄↄ mↄↄ gyae maa kyaa ɛ gyaŋ kekpaa ya." 9Gyudatena burum kenyii nyi Yesu kyaa Bɛtani donↄↄ man nɛ, be gyuuwↄ botↄↄ. Na Yesu waageŋ dↄↄ te be gyuuwↄ botↄↄ ya, mↄna bɛɛ gyae baa naa Lasarose ŋon Yesu be gyuusu e lee yeŋ man nɛ mↄ. 10Mena dↄↄ saese kegyiise baŋ mↄ gyae gbɛɛ baa ko Lasarose mↄ, 11nawolo nyi Yesu ke gyuusu e lee yeŋ man dↄↄ Gyudatena burum te bɛɛ wↄ te ba ke lɛɛ Yesu di. 12Tɛɛ kena nɛ, balaŋ burum baŋ bↄↄ kↄŋ nyeekelɛɛwee kedi keŋ man nyiiwↄ nyi Yesu dↄŋ gbɛɛ ↄ ne kↄŋ Gyerusalɛm donↄↄ man. 13Mena dↄↄ be gyae bakɛɛna faareŋse gyu be kaa gyaŋee na e na bɛɛ fae yeesa nyiaa, "Lɛɛ daa. De Gbeŋgyoo Wurubuarɛ waa hiraa walaŋ ŋon ↄ ne kↄŋ ↄ yele man nɛ, na waa hiraa Iseraetena gyoo ŋon mↄ." 14Yesu gyae afurum te ↄ kyaawↄ ↄ dↄↄ, ŋgba mena keŋ Wurubuarɛ nombia aŋmaraseŋ see be yako nɛ. Nombia ŋenaŋ yɛna nyiaa, 15"Ɛmɛɛ Gyerusalɛmtena, ɛ na yela ɛ wↄe ke lↄ ŋon ya. Ɛ kɛɛ, ɛ gyoo ne kↄŋ, ↄ kyaa afurum bu dↄↄ ↄ ne kↄŋ." 16Kewalaŋ keŋ nɛ, ↄ kaseela baŋ te nyii nombia kɛŋa man ya. Mↄna kenaŋ wↄle Wurubuarɛ ka lese Yesu gyoorobiiri wola nɛ te be tↄↄsewↄ nyiaa, nombia ŋan Wurubuarɛ nombia aŋmaraseŋ see be yako lee ↄ wose man nɛ kↄŋala mena nɛ. 17Keŋte balaŋ burum baŋ be kpuɛ na Yesu, debaŋ keŋ ↄ be baake Lasarose lee yebↄↄ man te ↄ be gyuusu e lee yeŋ man nɛ, yaasee nombia kɛŋa. 18Keŋ dↄↄ te balaŋ burum leewↄ donↄↄ man kↄŋ kaa gyaŋee na e nɛ, nawolo nyi be nyiiwↄ nyi ↄ yɛɛ mena gyakoloŋ nombii kei. 19Botↄↄ te Farasiitena baŋ yako dↄŋa nyiaa, "Ŋgba ɛ ne naa nyi da te tale yɛɛ kolo ya na? Ɛ kɛɛ! Balaŋ pou silana e." 20Na Girikitena baale mↄ kpuɛ na balaŋ baŋ bↄↄ gyu Gyerusalɛm be kaa som Wurubuarɛ Gyudatena nyeekelɛɛwee kedi keŋ man nɛ. 21Be gyuuwↄ Filipo ŋon ↄ ba lee Bɛtesaida keŋ ke kyaa Galelia tɛɛle man nɛ gyaŋ ke yako e nyiaa, "Kegyia, dɛɛ gyae dɛɛ naa Yesu." 22Keŋte Filipo mↄ gyuuwↄ ke yako Anderiase. Te be balaŋ bala gyuuwↄ keyako Yesu. 23Botↄↄ te Yesu tira nombia kɛŋa nↄↄ fa wↄ nyiaa, "Debaŋ keŋ te lii nyi baa lese maŋ Deniwalaŋ Bu ŋon gyoorobiiri keŋ wola. 24Ampaŋ yaa mɛɛ yako ŋon ɛ ke nyii nyiaa, nyi akpaa be ta mo wambelebii do bↄↄ man na ke ka yeŋ ya nɛ, na ke sɛɛ ke yɛɛ bii dokoloŋ. Mↄna nyi akpaa ba mo ke do bↄↄ man te ke da yem te ke de tuu na te kɛɛ see bia burum. 25Walaŋ kamasɛ ŋon ↄ ne gyae ŋon gbagba nyeedoŋ kela Wurubuarɛ nɛ, waa yeŋ leki. Mↄna walaŋ kamasɛ ŋon lee Wurubuarɛ nombia dↄↄ ↄ be famenɛ na ŋon gbagba nyeedoŋ ya nɛ, Wurubuarɛ waa fa e nyeedoŋ kekpaa." 26Keŋte Yesu besewↄ yako nyiaa, "Walaŋ kamasɛ ŋon ↄ ne gyae nyi waa som maŋ nɛ, kaboena nyi waa sila maŋ. Na botↄↄ keŋ me kyaa na, ŋon mↄ ke nyiŋ kpu na maŋ. Walaŋ kamasɛ ŋon ↄ na som maŋ na, me kya mↄ waa lese ↄ yele." 27Te Yesu besewↄ yako nyiaa, "Nɛnɛɛ dekↄkↄrↄkↄↄ te kyaŋ maŋ nideli, te sena yaa maa yako? 'Maa yako nyi me kya, lese maŋ lee mena kaale dinaa kei man?' Mↄna mena kaale kei dↄↄ te me kↄŋawↄ tɛɛle kei dↄↄ." 28Keŋte Yesu fanewↄ nyiaa, "Me kya, lese n gyoorobiiri wola." Te be nyii woya ŋaale kolosiwↄ lee adido nyiaa, "Me te wulaa lese me gyoorobiiri wola, te maa bese lese ke wola." 29Balaŋ burum baŋ ba seŋɛɛ botↄↄ te bↄↄ nyii woya ŋan nɛ, be man baale yakowↄ nyiaa, "Ↄga faela" te baale mↄ yakowↄ nyi, "Wurubuarɛ kpilale ŋolo kolosi la na e lee adido." 30Keŋte Yesu yako wↄ nyiaa, "Ɛmɛɛ dↄↄ te mena nↄↄwoya kɛŋa kↄŋawↄ, na maŋ dↄↄ ya. 31Nɛnɛɛ yɛna debaŋ keŋ Wurubuarɛ waa di balaŋ nombia tɛɛle kei dↄↄ. Nɛnɛɛ te Wurubuarɛ waa gegi ↄbↄnsam ŋon ↄ ne di gyoori tɛɛle kei dↄↄ nɛ lee ↄ gbeli keŋ dↄↄ. 32Mↄna maŋ dↄↄ nyi akpaa be gyina maŋ adido lee tɛɛle kei dↄↄ nɛ, maa wↄŋ walaŋ kamasɛ benaa ma wose." 33Ↄ kekolosi kei na wola yeŋ keŋ waa kaa yeŋ nɛ baa. 34Botↄↄ te balaŋ burum baŋ tiranↄↄ fa e nyiaa, "De kalawↄ lee da mmaraa tↄne man nyiaa, Nyeelɛɛre ŋon waa kyaa keŋ ↄ be gyae waa yeŋ ya. Te sena yaa n ne yako nyi kaboena nyi baa gyina Deniwalaŋ Bu ŋon adido? Amↄte yɛna Deniwalaŋ Bu kei?" 35Te Yesu tiranↄↄ fa wↄ nyiaa, "Keŋmaŋee keŋ nyiŋa ke kyaa ɛ gyaŋ nɛ ɛ ta ke man na ditiŋtɛɛ be nyiŋ futaa ŋon ya. Nawolo nyi walaŋ ŋon ↄ dↄŋɛɛ ditiŋtɛɛ man nɛ, ↄ ba gyeŋ botↄↄ keŋ ↄ ne gyu ya. 36Walaŋ ŋon ↄ ne fa keŋmaŋee nyiŋa ↄ kyaa ɛ gyaŋ nɛ, ɛ lɛɛ e di na ɛ kenyiŋ bese balaŋ baŋ be doo keŋmaŋee man." Yesu kekolosi nombia kɛŋa taŋ nɛ, ↄ wↄŋa ↄ wose kekyaa yenaŋ daale keŋ bↄↄ ne naa e ya. 37Yesu yɛɛ gyakoloŋ nombia burum be siaman, mↄna kɛŋa pou wↄle na be bɛe ba te lɛɛ e di ya. 38Kei yela nombia ŋan Wurubuarɛ dekpeŋkpeŋgyↄↄre Yesaya be yako nɛ kↄŋawↄ ampaŋ. Yesaya yakowↄ nyiaa, "De Gbeŋgyoo, amↄte lɛɛ na nombia ŋan dↄↄ yako nɛ di? Amↄte te de Gbeŋgyoo lese ↄ wↄↄle wola?" 39Lee mena dↄↄ bↄↄ ne tale baa lɛɛ Wurubuarɛ nombia di ya ŋgba mena keŋ Yesaya be yako nɛ. 40Ↄ besewↄ yako nyiaa, "Wurubuarɛ te yɛlɛɛ be sia na bↄↄ nyiŋ naa ya, te ↄ tↄↄ ba agyueŋse na bↄↄ tale nyii kolo man ya. Na mena ya na nafↄ baa kyɛɛkee lee be gbɛɛneŋ kumɛɛ man na baa kↄŋ me gyaŋ na maa kyↄ wↄ." 41Yesaya te kolosi nombia kɛŋa yakaa ya, mↄna ↄ wulaa naa Yesu gyoorobiiri keŋ dinↄↄ keŋ dↄↄ te ↄ kolosiwↄ lee ↄ wose man. 42Nombia kɛŋa wↄle nɛ Gyudatena kegyiise burum lɛɛ Yesu di, mↄna Farasiitena baŋ dↄↄ ba te tale lese ba kelɛɛdi keŋ debↄↄ ya, nawolo nyi be yeewↄ nyi Farasiitena baŋ baa tↄↄ wↄ gbɛɛ nyi be na kↄŋ bↄ ↄsom deni man bela ya. 43Be ta lese ba kelɛɛdi keŋ debↄↄ ya nawolo nyi bɛɛ gyae bo nyi balaŋ ka lese ba yele kela Wurubuarɛ ka lese ba yele. 44Keŋte Yesu gyinaa ↄ nↄↄ kolosi nyiaa, "Nyaŋ ŋon n lɛɛ maŋ di nɛ, na maageŋ te n lɛɛwↄ di ya mↄna ŋon ↄ be kpila maŋ nɛ mↄ yaa n lɛɛwↄ di. 45Nyaŋ walaŋ ŋon n naa maŋ na, n te naa walaŋ ŋon ↄ be kpila maŋ nɛ. 46Me kↄŋae tɛɛle kei dↄↄ ŋgba keŋmaŋee nɛ na maa ŋmaŋee fa balaŋ. Nyaŋ ŋon n lɛɛ maŋ di na n be gyae n ke dↄↄ ditiŋtɛɛ man ya. 47Walaŋ ŋon ↄ nyii me nombia te ↄ te lɛɛ ŋa do ya na, mↄↄ gyae maa di ↄ nombia ya. Nawolo nyi ma te kↄŋ me kaa di balaŋ nombia tɛɛle kei dↄↄ na maa bu wↄ fↄↄ ya, mↄna me kↄŋae me kaa lɛɛ ba nyee. 48Nyaŋ ŋon n bɛɛ maŋ te n te lɛɛ me nombia ya na, nombiadiiri ŋolo kyaa keŋ waa di n nombia. Nↄↄwoya ŋan mↄↄ kolosi nɛ, ŋan te baa mo di n nombia wee ↄtomante keŋ man na baa bu neŋ fↄↄ. 49Nawolo nyi ma te kolosi maŋ gbagba me doŋ man ya, mↄna me kya ŋon ↄ be kpila maŋ nɛ, ŋon yako na maŋ kpene keŋ maa yako na mena keŋ maa yako ke. 50Te maŋ gyeŋ mↄ nyi kpene keŋ ↄ be yako daa nyi dɛɛ yɛɛ nɛ, keŋ ne faa na nyeedoŋ kekpaa keŋ. Mena dↄↄ kpene keŋ mɛɛ yako nɛ, yɛɛ keŋ me kya be yako maŋ nyi maa yako."

will be added

X\