Gyↄn 11

1Balee ŋolo kyaawↄ Bɛtani donↄↄ man keŋ bɛɛ baake e nyi Lasarose. Bɛtani donↄↄ kenaŋ man te Mɛɛre na ↄ kↄↄ Maata leewↄ. 2Mɛɛre kei yɛna walaŋ ŋon ↄ be toosi nuŋ ofoŋofoŋ woli Yesu nawↄↄ, te ↄ ba mo ↄ nyeenyↄↄse feefo ŋa nɛ. Ↄ ŋmɛɛtee yɛna Lasarose ŋon ↄ na wee nɛ. 3Mena dↄↄ Mɛɛre na Maata doo Yesu tiila nyiaa, "De Gbeŋgyoo, n gyoo ŋon loŋ bɛɛ lam ɛmɛɛ na e nsana ya nɛ na wee." 4Yesu kenyii tiila keŋ nɛ ↄ yakowↄ nyiaa, "Kawee kei te yɛɛ kawee keŋ gyae ka ko Lasarose ya. Mↄna ke gyae ke yela balaŋ kena Wurubuarɛ gyoorobiiri na ka ke yela baa lese maŋ Wurubuarɛ bu ŋon mↄ yele." 5Na Yesu ne gyae Maata na ↄ naabu Mɛɛre na Lasarose nombia. 6Mↄna ↄ kenyii nyi Lasarose na wee nɛ, ↄ besewↄ di weeya ala botↄↄ keŋ ↄ kyaa nɛ. 7Kenaŋ wↄle nɛ ↄ yako ↄ kaseela baŋ nyiaa, "Ɛ fa dɛɛ bese gyu Gyudia tɛɛle man bela." 8Botↄↄ te ↄ kaseela baŋ yako e nyiaa, "De Gbeŋgyoo, weeya akalansɛɛ ŋaale yaa ŋgba Gyudatena be yele baa fuŋii neŋ boya nɛ. Woŋ dↄↄ te n ne gyae n ka bese gyu botↄↄ bela?" 9Keŋte Yesu tiranↄↄ fa wↄ nyiaa, "Wee kamasɛ dana ke nelim na ka weese. Akpaa ŋolo dↄŋɛɛ weeseteŋteŋ nɛ, ↄ bɛɛ gyↄ ↄ nae ya nawolo nyi weese kyaa. 10Mↄna nyi akpaa ↄ dↄŋɛɛ ditiŋtɛɛ man na ↄ ne gyↄ ↄ nae, nawolo nyi keŋmaŋee be kyaa na waa naa ya." 11Kei wↄle na Yesu besewↄ yako wↄ nyiaa, "De gyoo Lasarose te doo dosoroŋ mↄna maa gyu na me kaa gyuusu e." 12Botↄↄ te ↄ kaseela baŋ tiranↄↄ nyiaa, "De Gbeŋgyoo, akpaa ↄ doe na ↄ kawee keŋ gyae ke taŋ." 13Na Lasarose yeŋ nombia yaa Yesu ne yako, mↄna ↄ kaseela baŋ na gyueŋ bo nyi dosoroŋ gbagba yaa Lasarose doowↄ. 14Botↄↄ te Yesu torowↄ yako wↄ nyiaa, "Lasarose ta yem, 15mↄna lee ɛmɛɛ dↄↄ dana maŋ gyoŋ nyi mↄↄ kyaa botↄↄ pɛte ↄ yeŋawↄ ya, na ɛ kenyiŋ lɛɛ maŋ di. Ɛ fa dee gyu ↄ gyaŋ." 16Mena dↄↄ ↄ kaseela baŋ man ŋolo ŋon bɛɛ baake e Tomase yaa Ata nɛ yako ↄ tebia kaseela akaŋ baŋ nyiaa, "Ɛ fa de popou ke sila da wolale ŋon gyu. Nyi yɛɛ yeŋ ke na, de popou ka yeŋ kpu na e." 17Yesu ke gyu ka gyoo Bɛtani donↄↄ man nɛ, be yako e nyiaa be kewuu Lasarose weeya anaarate kenaŋ. 18Bɛtani yɛɛ donↄↄ keŋ ka benaa na Gyerusalɛm donↄↄ. Ke lem gyae ke yɛɛ ŋgba gbɛɛkemaase atooro nɛ. 19Na Gyudatena burum te kↄŋ Maata na Mɛɛre gyaŋ be kaa gyam wↄ lee be ŋmɛɛtee ŋon yeŋ man. 20Maata ke nyii nyi Yesu ne kↄŋ nɛ, ↄ leewↄ gyu ke gyaŋee na e. Na Mɛɛre dↄↄ ŋon kyaa dekpaŋalaŋ man. 21Maata ke gyu ke tuŋ Yesu nɛ ↄ yako e nyiaa, "Me Gbeŋgyoo, nyi akpaa nyeŋ kyaa kɛbo na nafↄ me ŋmɛɛtee deŋ ta yem ya! 22Mↄna ma gyeŋ nyi debokeiman koraŋ nɛ, kpene kamasɛ keŋ n bↄↄse Wurubuarɛ na waa yɛɛ fa neŋ." 23Keŋte Yesu yako e nyiaa, "N ŋmɛɛtee ŋon waa bese foŋ na waa nyiŋ nyeedoŋ bela." 24Te Maata yako e nyiaa, "Ayi ma gyeŋ nyi wee ↄtomante keŋ woya pou baa foŋ lee yeŋ man nɛ, ŋon mↄ waa foŋ." 25Keŋte Yesu yako e bela nyiaa, "Maŋ yɛna walaŋ ↄ ne gyuusu balaŋ lee yeŋ man te be nyiŋ nyeedoŋ. Walaŋ kamasɛ ŋon waa lɛɛ maŋ di na, nyi ↄ yem koraŋ na waa bese nyiŋ nyeedoŋ, 26te walaŋ kamasɛ ŋon ↄ kyaa te ↄ lɛɛ maŋ di na, ↄ be gyae wa yeŋ leki ya." Keŋte Yesu bↄↄse Maata nyiaa, "N ne lɛɛ nombia kɛŋa di?" 27Te Maata sɛɛ e nyiaa, "Ayi me Gbeŋgyoo, mɛɛ lɛɛ di nyi nyaŋ yɛna nyeelɛɛre, Wurubuarɛ bu ŋon dɛɛ daa nyi waa kↄŋ tɛɛle kei dↄↄ nɛ." 28Maata kekolosi nombia kɛŋa taŋ nɛ, ↄ besewↄ gyu dekpaŋalaŋ man ke baake ↄ naabu Mɛɛre lee yenaŋ te ↄ yako e nyiaa, "De Gbeŋgyoo ŋon te kↄŋ te ↄ kpa nya kↄŋ." 29Mɛɛre kenyii mena nɛ, ↄ korowↄ bileŋ gyu ke gyaŋee na e. 30Debaŋ kenaŋ na Yesu ta gyoo ta donↄↄ keŋ man ya. Na ↄ sɛɛ ↄ kyaa botↄↄ keŋ Maata be gyu ke tuŋ e nɛ. 31Debaŋ kenaŋ mↄ na, Gyudatena te kↄŋ dekpaŋalaŋ keŋ man bee kolosi do Mɛɛre. Ba kena ŋgba Mɛɛre ba koro karatetee dokoloŋ lee ↄ ne gyu nɛ, na baŋ gyeŋ nyi ↄ ne gyu baa ↄ ŋmɛɛtee Lasarose yebↄↄ keŋ tɛɛ ↄ kaa wii. Mena dↄↄ baŋ mↄ korowↄ sila e. 32Mɛɛre ke gyu kelii botↄↄ keŋ Yesu kyaa nɛ te ↄ tisiwↄ buŋ Yesu nawↄↄ tɛɛ te ↄ yako e nyiaa, "Me Gbeŋgyoo, nyeŋ kyaa kɛbo na nafↄ me ŋmɛɛtee deŋ ta yem ya." 33Yesu kena mena keŋ Mɛɛre na Gyudatena baŋ be silana e ne wii nɛ, takaa e te dekↄkↄrↄkↄↄ kyaŋa e. 34Keŋte ↄ bↄↄse wↄ nyiaa, "Aleŋ te ɛ wuu e?" Te be yako e nyiaa, "De Gbeŋgyoo, kↄŋ na n kaa kɛɛ." 35Keŋte Yesu wiiwↄ. 36Keŋte Gyudatena baŋ yakowↄ nyiaa, "Ɛ kɛɛ mena keŋ ↄ ne gyae Lasarose nombia." 37Mↄna balaŋ baale yakowↄ nyiaa, "Na Yesu kei gyuusuna siayɛlɛɛsate ŋon sia yee? Nafↄ ŋgba ŋon talewↄ lɛɛ Lasarose na ↄ ba yem ya?" 38Dekↄkↄrↄkↄↄ kyaŋa Yesu bela te ↄ gyuu botↄↄ keŋ bↄↄ wuu Lasarose nɛ. Na be wuu e bo boe bↄↄ daale maŋ, te be biliŋi boe dinaa daale tↄ ke nↄↄ. 39Keŋte Yesu yako wↄ nyiaa, "Ɛ biliŋi boe keŋ lee yebↄↄ keŋ nↄↄman." Te yere ŋon ↄ deesi Maata yako Yesu nyiaa, "De Gbeŋgyoo, debaŋ kei dↄↄ ↄ ne wↄlɛɛ. Nawolo nyi gyɛŋ yɛna weeya anaara yaa ŋgba bↄↄ wuu e nɛ." 40Te Yesu yako e nyiaa, "Ma te yako neŋ nyi akpaa n lɛɛ maŋ di na nyaŋ kena Wurubuarɛ gyoorobiiri keŋ yee?" 41Mena dↄↄ be biliŋi boe keŋ lee yebↄↄ keŋ nↄↄman. Botↄↄ te Yesu gyinaa ↄ nyee kɛɛ adido te ↄ fanewↄ fa Wurubuarɛ nyiaa, "Taata, mɛɛ fa neŋ karaŋ ŋgba n ne nyii maŋ nɛ. 42Maŋ dↄↄ ma gyeŋ nyi n ne nyii maŋ debaŋ kamasɛ, mↄna balaŋ baŋ ba seŋɛɛ kɛbo dↄↄ te mɛɛ yako mena na baa nyiŋ gyeŋ nyi nyaŋ kpila na maŋ." 43Yesu ke yako mena taŋ nɛ, te ↄ fae yeesa keŋkeŋ baake Lasarose nyiaa, "Lasarose, lee kↄŋ!" 44Keŋte Lasarose ŋon ↄ ba yem nɛ leewↄ kↄŋ, na kewuu abↄↄ ŋan bↄↄ mo bake ↄ nyiŋmaase na ↄ nawↄↄ, na kanyaŋ keŋ bↄↄ mo bake ↄ sia gbɛɛ nɛ doo mena. Te Yesu yako wↄ nyiaa "Ɛ booli e, na waa ta." 45Gyudatena burum baŋ bↄↄ kↄŋ Mɛɛre gyaŋ te bↄↄ naa kpene keŋ Yesu be yɛɛ nɛ lɛɛ e di. 46Mↄna be man baale besewↄ gyu Farasiitena baŋ gyaŋ gyu ke yako wↄ kpene keŋ Yesu be yɛɛ nɛ. 47Keŋte Wurubuarɛ saese kegyiise na Farasiitena baake donↄↄ kegyiise gyaŋee. Te be bↄↄse dↄŋa nyiaa "Sena yaa dɛɛ yɛɛ? Nawolo nyi balee kei ne yɛɛ gyakoloŋ nombia burum. 48Akpaa de tina e yela te ↄ gyakaa ↄ ne yɛɛ mena tom kei na, balaŋ baŋ pou baa lɛɛ e di na ke yela Romantena kaa yɛlɛɛ de Wurubuarɛ ↄsom deni dinaa keŋ na baa lɛo de tɛɛle pou." 49Te balaŋ baŋ man ŋolo ŋon bɛɛ baake e nyi Kaifase ŋon ↄ be yɛɛ saese kegyia kulutoo kenaŋ man nɛ yakowↄ nyiaa, "Ɛmɛɛ dↄↄ ɛ ba gyeŋ daale ya. 50Ɛ ba gyeŋ nyi dei nyi walaŋ dokoloŋ waa yeŋ fa balaŋ baŋ pou kela keŋ nyi tɛɛle pou balaŋ kewↄlɛɛ yee?" 51Te yɛɛ Kaifase gbagba agyueŋ yaa ↄ moowↄ yako nombia kɛŋa ya, mↄna keŋ ↄ be yɛɛ Wurubuarɛ sae kegyia kulutoo kenaŋ man dↄↄ te Wurubuarɛ yela ↄ yako mena nombia ŋenaŋ see nyi, kaboena nyi Yesu waa yeŋ fa Gyudatena pou. 52Te yɛɛ nyi Gyudatena baageŋ te Yesu waa yeŋ fa ya, mↄna waa yeŋ bo fa Wurubuarɛ bia baŋ pou bↄↄ yaasee nɛ na waa nyiŋ mo wↄ kaa yilaa. 53Leenaŋ wee kenaŋ keŋ kegyiise baŋ be gyaŋee nɛ, te be fiasɛɛ bɛɛ gyae gbɛɛ keŋ baa mo ko Yesu. 54Lee mena dↄↄ na Yesu bɛɛ tekaa lese ↄ wose debↄↄ Gyudia tɛɛle man bela ya. Mↄna ↄ leewↄ botↄↄ gyu donↄↄ keŋ bɛɛ baake ke nyi Eferam te ka benaa na depampaa dinaa daale nɛ. Botↄↄ te ŋon na ↄ kaseela baŋ gyuuwↄ ke kyaa. 55Na Gyudatena nyeekelɛɛwee kedi keŋ ta benaa, mena dↄↄ balaŋ burum lee donↄↄse ŋan man gyu Gyerusalɛm be kaa gyoraa ba wose pɛna nyeekelɛɛwee kedi keŋ kelii. 56Debaŋ kenaŋ man pou na bɛɛ kɛo Yesu. Be ka seŋ Wurubuarɛ ↄsom deni dinaa keŋ man nɛ be bↄↄse dↄŋa nyiaa, "Sena yɛna ya gyueŋ? Doona ↄ be gyae waa kↄŋ nyeekelɛɛwee kedi kei man ya?" 57Na Wurubuarɛ saese kegyiise na Farasiitena baŋ te yako wↄ nyiaa, walaŋ kamasɛ ŋon ↄ gyeŋ Yesu dekyae na ↄ kaa yako wↄ na be kaa kyaŋ e.

will be added

X\