Gyemisi 5

1Nɛnɛɛ ɛ tei maŋ ɛmɛɛ baŋ ɛ dana ɛ wose nɛ. Ɛ wii na ɛ ke di walaŋsa nideli, nawolo nyi kayeyɛɛ dinaa daale gyae ke kↄŋ ɛ dↄↄ. 2Ɛ kↄba ŋan ɛ dana nɛ pou te wↄlɛɛ, te paapaase mↄ te wↄlɛɛ ya abↄↄ ŋan pou ɛ dana nɛ. 3Ɛ kↄba yayam na ɛ kↄba wolom abↄↄ ŋan ɛ ba mo weese nɛ pou te doo kandorↄse. Kei ne gyae la kawola nyi ampaŋ ɛ te yɛɛ dukum Wurubuarɛ siaman. Mena keŋ kandorↄse ŋan be wↄlɛɛ abↄↄ ŋan nɛ, mena ke te ɛ wosenaane mↄ gyae ke wↄlɛɛ ŋgba mena keŋ boalaŋ ne wↄlɛɛ abↄↄ nɛ. Nɛnɛɛ keŋ tɛɛle kei ne gyu kↄ ↄto keŋ Wurubuarɛ waa di walaŋ kamasɛ nombia na, keŋte ɛ ne yilaa abↄↄ see fa ɛ wose? 4Balaŋ yɛɛ tom ɛ wↄↄse man fa ŋon mↄna ɛ bɛe ɛ te tↄ wↄ kom ya. Ɛ nyii mena keŋ bee mutii. Balaŋ baŋ bↄↄ kyↄ ŋon te ɛ be kɛrɛɛ ɛ wↄↄse man weenɛɛ nɛ, be kewii te lii de Gbeŋgyoo Wurubuarɛ doŋ pou nyee ŋon gyaŋ. 5Debaŋ keŋ ɛ kyaa tɛɛle kei dↄↄ nɛ, ɛ wose te fɛɛ ŋon te ɛmɛɛ gbagba kegyaebii mↄ te ɛ ne yɛɛ. Ɛ te di weenɛɛ kpaakpaa nyiŋan doo nuŋ ɛ ne daa Wurubuarɛ nombia kedi wee keŋ, ŋgba wonembu ne dii doo nuŋ daa wee keŋ baa ko e nɛ. 6Ɛ buu balaŋ baŋ be nombia tenɛɛ Wurubuarɛ siaman nɛ fↄↄ te ɛ koe wↄ. Mↄna ba te yɛɛ nombiikum kamasɛ ya te be ta koro seŋ tia ŋon lee gbɛɛ kamasɛ man gba nyi ɛ na yɛɛ ɛ kegyaebii ya. 7Mena dↄↄ me tebia, ɛ nyiŋ konↄↄ kelii wee keŋ de Gbeŋgyoo Yesu waa bese kↄŋ nɛ. Ɛ kɛɛ mena keŋ wↄↄfarale ne nyiŋ konↄↄ gyeki kelii debaŋ keŋ waa nyiŋ abↄↄ kpaakpaa lee ↄ wↄↄman nɛ. Ↄ ne nyiŋ konↄↄ gyeki ↄga gyaŋgbate na ↄga ↄtomante ke ŋɛɛ do ↄ weenɛɛ, te ↄ ne nyiŋ konↄↄ gyeki kelii debaŋ keŋ ↄ weenɛɛ ŋan na bee. 8Lee mena dↄↄ ɛmɛɛ mↄ ɛ nyiŋ konↄↄ na ɛ ka seŋ keŋkeŋ, nawolo nyi de Gbeŋgyoo Yesu ka bese kↄŋ keŋ ta benaa. 9Me tebia, ɛ na toroŋ na dↄŋa ya, na mena ya na Wurubuarɛ waa di ɛ nombia na waa bu ŋon fↄↄ. Ɛ kɛɛ, walaŋ ŋon waa di de nombia nɛ, ↄ kekↄŋ ta benaa. 10Me tebia, ɛ tↄↄse Wurubuarɛ akpeŋkpeŋgyↄↄra baŋ bↄↄ naa diyem, lee mena keŋ bↄↄ kolosi de Gbeŋgyoo Wurubuarɛ nombia ŋan dↄↄ nɛ. Na ɛ ke kasee mena keŋ bↄↄ nyiŋ konↄↄ seŋ keŋkeŋ be kayeyɛɛ man. 11Balaŋ baŋ bↄↄ nyiŋ konↄↄ seŋ keŋkeŋ naa diyem kelii ↄto nɛ, baŋ na nyeebam. Ɛ yela dɛɛ mo nombia kɛŋa maa na balee ŋon bɛɛ baake e nyi Gyↄbo nɛ. Ɛ nyii mena keŋ ↄ be nyiŋ konↄↄ seŋ keŋkeŋ debaŋ keŋ ↄ doo kayeyɛɛ man nɛ. Ŋgba ɛ naa mena keŋ de Gbeŋgyoo Wurubuarɛ be tↄ e kom kpaakpaate te ↄ be yeli be yɛɛ e gyoŋ ↄ kaale keŋ ↄto na? Kei nawolo baa nyi de Gbeŋgyoo Wurubuarɛ dana wↄe te ↄ ne wii balaŋ waraŋase. 12Me tebia, nombii keŋ mɛɛ gyae ɛ ka gyeŋ nideli yɛna nyiaa, ɛ na kaŋ ntam ya. Ɛ na kaŋ adido yaa tɛɛle yaa kolo daale ntam ya. Nyi nombii kaboena nyi ya sɛɛ nyi "Ayi" na, ɛ sɛɛ nyi Ayi, te akpaa ke kaboena nyi ya bɛɛ nyi "Koa" na, ɛ bɛɛ nyi Koa. Ɛ yɛɛ mena na wee keŋ Wurubuarɛ waa di balaŋ nombia na ↄ be gyae waa bu ŋon fↄↄ ya. 13Akpaa ɛ man ŋolo ne naa diyem na waa fane fa Wurubuarɛ. Akpaa ɛ man ŋolo wose de fɛɛ e na waa kpee nↄↄneŋ lese Wurubuarɛ yele. 14Akpaa ɛ man ŋolo na wee na waa baake Kristotena kegyiise na be kaa fane fa e, na baa tiu e nuŋ de Gbeŋgyoo Yesu yele man. 15Nyi akpaa ba mo kelɛɛdi fane na, kaweete ŋon waa nyiŋ kawee kekyↄ. De Gbeŋgyoo Yesu waa kyↄ e kawee na ↄ wose ke yɛɛ e doŋ. Nyi akpaa ↄ yɛɛ nombiikum daale bo koraŋ na, waa mo ke kyɛɛ e. 16Mena dↄↄ ɛ lese ɛ nombiakumɛɛ ŋan ɛ ne yɛɛ tia dↄŋa nɛ yako dↄŋa, na ɛ ke fane fa dↄŋa na Wurubuarɛ ke nyiŋ kyↄ ŋon ɛ kaweese. Walaŋ ŋon ↄ gbɛɛneŋ tenɛɛ Wurubuarɛ siaman nɛ, ↄ kefane dana nↄↄdoŋ te kɛɛ yɛɛ tom mↄ nideli. 17Ɛ yela dɛɛ mo nombii kei maa na Wurubuarɛ dekpeŋkpeŋgyↄↄre ŋon bɛɛ baake e nyi Elaegya nɛ. Ↄ yɛɛ deniwalaŋ e ŋgba daa nɛ. Ↄ fanewↄ nideli lee ↄ konↄↄ man nyi ↄga na ŋɛɛ ya, te ampaŋ ↄga seŋawↄ tɛɛle kenaŋ dↄↄ kulutooneŋ atooro na yale. 18Keŋte ↄ besewↄ fane bela te ↄga ŋon torowↄ, te tɛɛle kenaŋ besewↄ dee weenɛɛ bela. 19Me tebia, gyae ke tale kↄŋ nyi ɛ man ŋolo waa yo gbɛɛ lee Wurubuarɛ gbɛɛ keŋ ka tenɛɛ nɛ man, na ŋolo ka besena e kↄŋ gbɛɛ kenaŋ man. 20Ɛ tↄↄse nyiaa, nyi akpaa ŋolo da besena walaŋkum lee ↄ gbɛɛ kum man na, na mena walaŋ ŋonaŋ te lɛɛ walaŋkum ŋon nyee lee yeŋ kekpaakekpaa keŋ man. Kei gyae ke yela Wurubuarɛ ka mo nombiakumɛɛ burum ŋan ↄtenate be yɛɛ nɛ kyɛɛ e.

will be added

X\