Gyemisi 4

1Woŋ na moona yoo na kalese nombia kↄŋ ya nsana? Na lookum keŋ doo ɛ man te ke dana ŋon kɛɛ wↄŋee gyu kↄŋ nɛ, na moona yoo na kalese nombia kↄŋ ya nsana yee? 2Ɛ sia ne yɛɛ keŋ ɛ ne gyae abↄↄ mↄna ɛ bee nyiŋ ŋa ya. Mena dↄↄ ɛ na koe balaŋ te ɛ sia ne yɛɛ balaŋ abↄↄ dↄↄ mↄna ɛ bee nyiŋ kpene keŋ ɛ ne gyae ya. Ɛ ne kale te ɛ ne yoo na dↄŋa mↄna ɛ bee nyiŋ abↄↄ ŋan ɛ ne gyae ya, nawolo nyi ɛ bɛɛ sola Wurubuarɛ ya. 3Akpaa ɛ sola Wurubuarɛ koraŋ na ɛ bee nyiŋ ŋa ya, nawolo nyi ɛ bɛɛ mo agyueŋ kpaakpaa sola ya. Ɛ na sola e abↄↄ ŋan bo na ɛmɛɛ gbagba ka mo di ɛ kegyaebii man. Mena dↄↄ te ɛ bee nyiŋ ŋa ya nɛ. 4Ɛ yɛɛ yaa ŋgba ala baŋ bↄↄ lee be baala wↄle nɛ, nawolo nyi ɛ bee di anokoare fa Wurubuarɛ ya. Ɛ ba gyeŋ nyi akpaa ŋolo de yeli tɛɛle kei dↄↄ abↄↄ kegyae de di ↄ nyee na, nawolo baa nyi ↄ ne kↄla Wurubuarɛ yee? Mena dↄↄ nyi akpaa ŋolo de yeli tɛɛle kei dↄↄ abↄↄ de di ↄ nyee na, na ↄ ta bese Wurubuarɛ kↄlare. 5Ɛ te wolee nyi Wurubuarɛ nombia aŋmaraseŋ see ŋan yakowↄ yenaŋ daale nyi, "Wurubuarɛ feliŋ ŋon ↄ ba mo do de man nɛ ↄ ne yoo daaworo?" Yaa ɛ gyeŋ nyi ↄ yako mena nombia ŋenaŋ bo yakaa? 6Wurubuarɛ ta mo ↄ bɛrɛɛ boele daa nideli. Mena dↄↄ te ↄ nombia aŋmaraseŋ see ŋan besewↄ yako yenaŋ daale bela nyiaa, "Wurubuarɛ ne bɛɛ balaŋ baŋ bɛɛ wola ba wose nɛ, mↄna ↄ na mo ↄ bɛrɛɛ boele baŋ bɛɛ yↄkↄse ba wose nɛ." 7Mena dↄↄ ɛ yↄkↄse ɛ wose fa Wurubuarɛ. Ɛ seŋ tia ↄbↄnsam, na waa yeu lee ɛ gyaŋ. 8Ɛ tuu benaa Wurubuarɛ, na ŋon mↄ ke tuu benaa ŋon. Ɛmɛɛ nombiakumɛɛyɛɛra, ɛ lese ɛ nyiŋmaase lee ɛ nombiakumɛɛ man. Ɛmɛɛ baŋ ya agyueŋse ne yɛɛ ŋon ala ala nɛ, ɛ lese nombiakumɛɛ lee ɛ konↄↄse man na ɛ ke nyiŋ konↄↄse kpaakpaa. 9Ɛ nyii weeleŋ nideli lee ɛ nombiakumɛɛ dↄↄ, na dokpokpo ke kyaŋ ŋon na ɛ ke wii. Ɛ yela ɛ boŋɛɛse ka bese kewii, na ɛ gyoŋ kedi keŋ ka bese ŋan. 10Ɛ yↄkↄse ɛ wose fa de Gbeŋgyoo Wurubuarɛ, na waa gyina ŋon siaman. 11Me tebia, ɛ na tɛɛ wↄlɛɛ dↄŋa ya. Nyi akpaa ŋolo de kolosi nombiikum gyakaa ↄ dↄↄ ŋolo dↄↄ yaa ↄ bu ↄ e fↄↄ na, kenaŋ na nawolo baa nyi ↄ ne kolosi nombiakumɛɛ tia Wurubuarɛ mmaraa te ↄ ne bu ke fↄↄ mↄ baa. Na ↄ bɛɛ tekaa di mmaraa kenaŋ dↄↄ baa ya, te ↄ ne kɛɛ ↄ wose nyi ↄ dei kela mmaraa keŋ. 12Wurubuarɛ waageŋ yɛna walaŋ ŋon ↄ ne fa mmaraa te ↄ ne di balaŋ nombia. Ŋon waageŋ ne gyaela waa tale lɛɛ balaŋ nyee, te ŋon ne gyaela waa tale wↄlɛɛ ba woya mↄ kekpaakekpaa. Te nɛnɛɛ nyaŋ yɛna amↄte ŋon nyaŋ ne di n dↄↄ nombia bu e fↄↄ? 13Ɛmɛɛ baŋ ɛ koro na ɛ ne gyↄ ɛ konↄↄ yako nyi "Gyɛŋ yaa kyoo dɛɛ koro gyu donↄↄ kei yaa donↄↄ daale man, na de kaa kyaa botↄↄ kulutoo na dee di kebu gyae kↄba" nɛ, ɛ tei me maŋ nideli. 14Ɛ ne yako mena, mↄna ɛ ba gyeŋ kpene keŋ gyae ke kↄŋ ɛ dↄↄ kyoo gba ya. Ɛ gyeŋ ɛ nyeedoŋ kedoobii? Ɛ yɛɛ ŋgba debuŋta nɛ, kↄↄ ne kyare ya na ka te ŋaalaa. 15Kpene keŋ kaboena nyi yaa yako yɛna nyiaa, "Akpaa Wurubuarɛ de sɛɛ te de kyaa nyeedoŋ man na, dɛɛ yɛɛ kpene kei yaa kedↄↄ kei." 16Mↄna ɛ ne gyina ɛ wose adido te ɛ na wola ɛ wose. Mena wose kawola kenaŋ yɛɛ dukum ke. 17Mena dↄↄ nyi walaŋ kamasɛ ŋon ↄ gyeŋ nombii kpaakpaa keŋ kaboena nyi waa yɛɛ, te ↄ te yɛɛ ke ya na ↄ te yɛɛ dukum.

will be added

X\