Gyemisi 3

1Me tebia, ɛ na yeli ɛ man balaŋ burum sia keyɛɛ nyi ɛ ka bese Wurubuarɛ nombia wolala ya. Nawolo nyi ɛ gyeŋ nyi debaŋ keŋ Wurubuarɛ waa di de nombia na, daa wolala baŋ wui nombia kedi gyae ke yɛɛ doŋ kela balaŋ akaŋ baŋ. 2De popou ne yale gbɛɛneŋ burum man agbaatee agbaatee. Nyi akpaa ŋolo kyaa keŋ ↄ te yɛɛ ta nombiikum daale lee ↄ kekolosi man see ya na, kenaŋ na walaŋ ŋonaŋ nombia doo na ke gbɛɛ te dukum be doo ↄ man ya. Kenaŋ na nawolo baa nyi walaŋ ŋonaŋ ne tale tela ↄ wose nideli. 3Ɛ yela dɛɛ mo nombii keŋ dɛɛ wolo nɛ mo maa na dɛɛkyↄŋ. Nyi akpaa ŋolo ne gyae nyi dɛɛkyↄŋ ke nyii ↄ dei na, ↄ na mo ŋmeleŋ do e ↄ nↄↄman. Kei ne yeli ↄ ne tale wↄŋee e gyu botↄↄ keŋ ↄ ne gyae. 4Yaa ɛ yela dɛɛ bese mo ke maa na degbele dinaa keŋ ke gyakaa loŋ dↄↄ nɛ. Keŋ na mena keŋ ka keerɛɛ te feliŋ dinaa ne tɛɛse na ke koraŋ nɛ, kolobii peperee daale te saare ŋon na mo kikii ke gyu botↄↄ keŋ ↄ ne gyae. 5Mena ke te deniwalaŋ laakem mↄ doo. Ke yɛɛ kolobii peperee ke deniwalaŋ wose man, mↄna ke dana nↄↄdoŋ. Ɛ kɛɛ mena keŋ boalaŋbii peperee ne tale yela laa dinaa dinaa ne kpaa pou. 6Deniwalaŋ laakem mↄ yɛɛ ŋgba boalaŋ nɛ. Ke yɛɛ deniwalaŋ wosenaane yenaŋ daale ke mↄna tɛɛle kei dↄↄ nombiakumɛɛ pou doe ke man. Ke gyae ke tale yela deniwalaŋ kekyaabii man pou kewↄlɛɛ. Ke gyae ke tale yela deniwalaŋ wose ke yoi e ŋgba ↄ doe boalaŋ man nɛ. Mena boalaŋ kei lee ↄbↄnsam gyaŋ. 7Balaŋ ne tale yↄkↄse wonembia burum ŋgba gyebuse, na wonembia baŋ bee tuu be tↄↄse dↄↄ, na loŋ man wonembia pou nɛ. Bee yeli be dinↄↄ ne kyɛɛkee na baa tale kyaa denibalaŋ man. 8Mↄna laakem dↄↄ ŋolo bɛɛ tale yↄkↄse ke ya. Kↄ dana kekyaŋ ya te ke yɛɛ ŋgba tee kum nɛ. 9De nↄↄ te dɛɛ mo lese de Gbeŋgyoo na de kya Wurubuarɛ yele. Mↄna keŋ ke te dɛɛ mo falaa de tebia denibalaŋ baŋ Wurubuarɛ be yɛɛ wↄ ŋgba ŋon gbagba dinↄↄ nɛ. 10Mena nↄↄdokoloŋ kenaŋ ke man te akelegyi na kefaala pou na lee. Me tebia, tekaboena nyi dɛɛkↄŋ mena ya. 11Loŋ kpaakpaate na loŋ kum be gyae ke tale lee ditiribuŋ dokoloŋ man ya. 12Me tebia, mango daŋ be gyae ke tale se paya bia ya, te dukutu daŋ mↄ be gyae ke tale se mango bia ya. Mena mↄ te ditiribuŋ dokoloŋ be gyae ke tale fa loŋ kpaakpaa na loŋ kum ya. 13Amↄte danaana nyansa ɛ man te ↄ gyeŋ nombia? Kaboena nyi mena walaŋ ŋonaŋ waa lese ↄ dinↄↄ kpaakpaate wola. Akpaa ↄtenate de yↄkↄse ↄ wose lee ↄ nombia kpaakpaa keyɛɛ man na, gyae kawola nyi ↄ dana nyansa ampaŋ. 14Mↄna nyi akpaa ɛ dana sibiikum te ɛ bɛɛ gyae nyi ŋolo ke dee kpu na ŋon ya na, kenaŋ na tekaboena nyi ya wola ɛ wose nyi ɛ dana nyansa ya. Nyi n dana mena dinↄↄ kei te n sɛɛ n na wola n wose na, na nawolo baa nyi n te bɛɛ anokoare keŋ. 15Mena nyansa kenaŋ ta lee Wurubuarɛ gyaŋ ya. Ke yɛɛ tɛɛle kei dↄↄ nyansa ke te ka lee deniwalaŋ agyueŋ kum man. Mena nyansa kenaŋ yɛɛ ↄbↄnsam nyansa ke. 16Nawolo nyi akpaa balaŋ sia ne yɛɛ be tebia abↄↄ dↄↄ te bɛɛ gyae mↄ bo nyi baageŋ wui ke de na, kenaŋ na aŋmaareŋ na nombiakumɛɛ kamasɛ gyae ke doo be man debaŋ kamasɛ. 17Mↄna nyansa keŋ ba lee Wurubuarɛ gyaŋ nɛ dↄↄ, ayimɛɛ be doo ke man ya. Mena nyansa kenaŋ ne fa wosefɛɛreŋ te kee yeli walaŋ ne yↄkↄse ↄ wose te ↄ ne yɛɛ wↄe fa balaŋ. Kee yeli ŋolo ne wii ↄ dↄↄ waraŋase debaŋ kamasɛ, te ↄ ne yɛɛ nombia kpaakpaa mↄ. Mena nyansa kenaŋ bee yeli ŋolo ke kɛɛ walaŋ siaman ya, te ne yeli ↄ ne di anokoare mↄ. 18Balaŋ baŋ bɛɛ gyae wosefɛɛreŋ gbɛɛ nɛ, debaŋ kamasɛ na bɛɛ kyↄ be tebia na baa ta wosefɛɛreŋ man. Be yɛɛ mena na bɛɛ naa nyi deeli na lee kpene keŋ bɛɛ yɛɛ nɛ man. Na yɛɛ yaa ŋgba be duu kolobii daale baa balaŋ benaŋ konↄↄse man nɛ. Kenaŋ wↄle na bɛɛ naa nyi kpene keŋ bↄↄ duu nɛ, kolo kpaakpaa ta lee balaŋ baŋ dinↄↄ man kↄŋ ŋgba deeli keyɛɛ nɛ.

will be added

X\