Gyemisi 2

1Me tebia, ɛ yɛɛ balaŋ baŋ ɛ be lɛɛ de Gbeŋgyoo Yesu Kristo ŋon ↄ yɛɛ gyoorobiiri gbeŋgyoo e nɛ di. Mena dↄↄ ɛ na kɛɛ walaŋ siaman pɛna ɛ ke yɛɛ kolo ya. 2Ɛ yela dɛɛ mo ke nyi ɛ te gyaŋee na balaŋ bala baale te kↄŋ kaa lee botↄↄ. Ŋolo doona kegbase kpaakpaa nyiŋan na kↄba kↄlabii ↄ nyiŋmaa man, na ŋolo mↄ yɛɛ diyemte e te ↄ doo kegbase ayimɛɛ ayimɛɛ atiriisa ŋaale kↄŋ botↄↄ. 3Te akpaa ɛ mo obuo nideli fa walaŋ ŋon ↄ doona abↄↄ kpaakpaa nyiŋan te ɛ yako e nyiaa, "Nyaŋ kaa kyaa gbeli kpaakpaate kei dↄↄ kɛbo," te ɛ yako diyemte ŋon mↄ nyi "Nyaŋ seŋ botↄↄ yaa tisi kyaa tɛɛle man kɛbo." 4Akpaa ɛ yɛɛ mena na ŋgba ɛ ne kɛɛ balaŋ siaman baa pɛte ɛ ne yɛɛ kolo, yaa ŋgba ɛ na mo ya agyueŋ kumɛɛ baa di balaŋ nombia? 5Me tebia ɛ tei maŋ nideli. Balaŋ baŋ balaŋ ne kɛɛ wↄ nyi be yɛɛ ayematenawↄ tɛɛle kei dↄↄ nɛ, baŋ te Wurubuarɛ lesewↄ nyi baa lɛɛ Yesu Kristo di. Mena balaŋ benaŋ te Wurubuarɛ lesewↄ nyi baŋ ne gyae la baa nyiŋ gbɛɛ gyoo ↄ gyoori keŋ ↄ be wulaa yako see nyi waa mo fa balaŋ baŋ bɛɛ gyae e nɛ. Wurubuarɛ siaman na mena balaŋ kɛwↄ yɛna balaŋ baŋ be dana ba wose. 6Mↄna ɛmɛɛ dↄↄ ɛ bɛɛ mo ayematena yɛɛ kolo ya. Na balaŋ baŋ be dana ba wose nɛ ne naase na ŋon diyem yee? Na baŋ ke ne wↄŋee na ŋon gyu nombia dedii man yee? 7Na mena balaŋ benaŋ ke ne kolosina nombia nkaraŋkaraŋ tia ɛ Gbeŋgyoo Yesu Kristo gyoorobiiri yele keŋ yee? 8Wurubuarɛ nombia aŋmaraseŋ see yakowↄ yenaŋ daale nyiaa, "Gyae n dↄↄ ŋgba nyaŋ gbagba n wose nɛ." Nyi akpaa ɛ kɛɛ te ɛ di mena mmaraa kei dↄↄ nideli na, kenaŋ na ɛ ne yɛɛ nombia kpaakpaa baa. 9Mↄna nyi akpaa ɛ kɛɛ balaŋ siaman pɛte ɛ yɛɛ kolo na ɛ te yɛɛ dukum, keŋ nawolo nyi ɛ te yala Wurubuarɛ mmaraa keŋ dↄↄ. 10Nawolo nyi walaŋ kamasɛ ŋon ↄ di Wurubuarɛ mmaraase ŋan pou dↄↄ te ↄ yala ŋe man dokoloŋ dↄↄ na, Wurubuarɛ siaman na nawolo baa nyi ↄ te yala mmaraase ŋan pou dↄↄ. 11Wurubuarɛ ŋon ↄ be yako nyi "Na lee n wɛɛle yaa n baale wↄle ya" nɛ, ŋon ke yakola nyi "Na ko walaŋ ya" Mena dↄↄ nyi akpaa n ta lee n wɛɛle yaa n baale wↄle ya te n ko walaŋ na, kenaŋ na n yala mmaraa keŋ dↄↄ baa. 12Ɛ tↄↄse nyi wee daale Wurubuarɛ waa di ɛ nombia mo lee mena keŋ ɛ ba mo di ↄ mmaraase ŋan na lese balaŋ lee dukum man nɛ dↄↄ. Mena dↄↄ ɛ kɛɛ ɛ kekolosi na ɛ nombia ayɛɛsa man nideli. 13Akpaa ŋolo te wii ↄ dↄↄ waraŋase ya na, Wurubuarɛ mↄ waa di walaŋ ŋonaŋ nombia keŋ ↄ be gyae waa wii ↄ waraŋase ya. Nawolo nyi walaŋ ŋon ↄ ne wii ↄ dↄↄ waraŋase na ↄ bee yee Wurubuarɛ nombia kedi ya. 14Me tebia, nyi akpaa ŋolo de yako nyi ↄ te lɛɛ Wurubuarɛ nombia di, mↄna ↄ bɛɛ yɛɛ Wurubuarɛ kegyaebii ya na, woŋ tↄnↄↄ yaa ↄ kelɛɛdi kenaŋ dana? Mena kelɛɛdi kenaŋ gyae ke tale lɛɛ ↄ nyee? 15Ɛ yela dɛɛ mo ke nyi Kristo walaŋ ŋolo kyaa keŋ ↄ be dana kegbase yaa weenɛɛ ŋan waa di ya, 16te akpaa walaŋ ŋonaŋ de kaa sola neŋ kolo te n yako e nyi, "Wurubuarɛ waa seŋ n wↄle na n ke kyaa nideli," te n te fa walaŋ ŋonaŋ kpene keŋ ne hia e ya na woŋ tↄnↄↄ doo la ke man? 17Mena ke yaa kelɛɛdi mↄ doo. Nyi akpaa ŋolo ta mo ↄ kelɛɛdi yɛɛ tom Wurubuarɛ kegyaebii man ya na, na ↄ kelɛɛdi kenaŋ be dana tↄnↄↄ ya. 18Walaŋ ŋolo waa tale yako nyiaa, "Baale na baŋ ne lɛɛ Wurubuarɛ di bo te baale mↄ na baŋ ne yɛɛ nombia kpaakpaa bo." Sena yaa nyaŋ ke tale yako nyi n te lɛɛ Wurubuarɛ di lee debaŋ keŋ n bɛɛ yɛɛ kolo kpaakpaa na ke kyaa na Wurubuarɛ kegyaebii ya? Maŋ dↄↄ me nombia kpaakpaa ŋan mɛɛ yɛɛ te ŋe kyaa na Wurubuarɛ kegyaebii nɛ, ŋan te mɛɛ mo wola nyi ma te lɛɛ Wurubuarɛ di. 19N ne lɛɛdi nyi Wurubuarɛ dokoloŋ kyaa la. Akpaa n ne lɛɛdi mena na dei, mↄna tↄↄse nyi feliŋkumɛɛ mↄ ne lɛɛdi nyi Wurubuarɛ dokoloŋ kyaa la, te ne yeli bee ŋeŋii. 20Nyaŋ diyiŋte! N ne gyae baa lese wola neŋ nyi akpaa ŋolo bɛɛ mo ↄ kelɛɛdi yɛɛ kolo kpaakpaa ya na, ↄ kelɛɛdi kenaŋ be dana tↄnↄↄ yee? 21Ɛ tↄↄse de naana Aberaham, woŋ kↄŋala te Wurubuarɛ lɛɛ e do nyi ↄ gbɛɛneŋ tenɛɛ ŋon Wurubuarɛ siaman? Ŋgba keŋ ↄ be sɛɛ mo ↄ bu Asiki gyu nyi waa mo ke deesi fa ŋon Wurubuarɛ dↄↄ? 22Ŋgba n naawↄ nyi ↄ kelɛɛdi na ↄ nombia ayɛɛsa pou kyaawↄ kyɛɛkyɛɛ? Ↄ nombia ayɛɛsa yele la te ↄ kelɛɛdi keŋ seŋawↄ nideli. 23Ↄ nombia ayɛɛsa ŋenaŋ yele la Wurubuarɛ nombia ŋan bↄↄ ŋmarase see yenaŋ daale nɛ kↄŋawↄ ampaŋ nyiaa, "Aberaham lɛɛ Wurubuarɛ di, mena dↄↄ Wurubuarɛ lɛɛ e do nyi ↄ nombia tenɛɛ ↄ siaman." Mena dↄↄ te balaŋ baake Aberaham nyi Wurubuarɛ ↄ gyoo. 24Ŋgba ɛ naawↄ? Wurubuarɛ ne tɛɛ bo walaŋ nombia kpaakpaa ŋan ↄ ne yɛɛ nɛ dↄↄ te ↄ ne lɛɛ e do nyi ↄ gbɛɛneŋ tenɛɛ, na ↄtenate kelɛɛdi kaageŋ dↄↄ ya. 25Mena ke te futooli alo ŋon bɛɛ baake e nyi Rahabo nɛ, ↄ nombia ayɛɛsa yele la te Wurubuarɛ lɛɛ e do nyi ↄ gbɛɛneŋ tenɛɛ ŋon Wurubuarɛ siaman. Nawolo nyi Rahabo lɛɛ balaŋ baŋ Iseraetena be kyaa kpila nyi baa gyu ka deke kɛɛ Gyeriko donↄↄ keŋ dinↄↄ nɛ ŋↄↄlale, te ↄ wola wↄ gbɛɛ wↄle daale te be yeuwↄ lee Gyeriko donↄↄ kenaŋ man keŋ be te nyiŋ wↄ kyaŋ ya. 26Mena keŋ akpaa weesɛɛ be doo walaŋ man ya na ↄ yɛɛ walaŋ deyeŋe e nɛ, mena ke te akpaa ŋolo dana kelɛɛdi te ↄ bɛɛ mo ke yɛɛ tom ya na, na ↄ kelɛɛdi kenaŋ mↄ ta yem.

will be added

X\