Hiburutena 7

1Na Mɛkesɛdɛke kei yɛɛ donↄↄ keŋ bɛɛ baake ke nyi Saalɛm nɛ gyoo e, te ↄ besewↄ ↄ yɛɛ Wurubuarɛ dekpatakpere ŋon sae e. Debaŋ keŋ de naana Aberaham be gyu ke yoo gyooneŋ baale di be dↄↄ bese ↄ ne kↄŋ nɛ, ↄ kaa gyaŋeewↄ na gyoo Mɛkesɛdɛke kei. Botↄↄ te Mɛkesɛdɛke hiraa ŋon de naana Aberaham. 2Keŋte de naana Aberaham kpase abↄↄ ŋan pou ↄ be nyim lee yoo keŋ man nɛ akpeŋ kufu, te ↄ moo dekpeŋ daale fa Mɛkesɛdɛke ŋonaŋ. Mɛkesɛdɛke yele kei asɛɛ yɛna nyi "Gyoo ŋon ↄ gbɛɛneŋ tenɛɛ Wurubuarɛ siaman," te Saalɛm gyoo mↄ nawolo nyi "Wosefɛɛreŋ gyoo." 3Ŋolo ba gyeŋ Mɛkesɛdɛke kei ↄ kya yaa ↄ naa yaa ↄ duuluŋ man dalee ya. Ba te yako kolo mↄ lee ↄ kalola yaa ↄ yeŋ wose man ya. Ↄ yɛɛ Wurubuarɛ sae e kekpaakekpaa ŋgba Wurubuarɛ bu ŋon nɛ. 4Ɛmɛɛ gbagba ɛ kɛɛ na, ɛ kena nyi ↄ yɛɛ walaŋ dinaa e te ↄ dana yele mↄ. De naana Aberaham ŋon ↄ dana yele Wurubuarɛ siaman koraŋ nɛ kpase abↄↄ ŋan ↄ be nyim lee yoo man nɛ akpeŋ kufu, te ↄ moo ŋe man dekpeŋ fa Mɛkesɛdɛke ŋonaŋ. 5Mosesi mmaraase ŋan nawolo nyiaa, kaboena nyi Gyudatena baŋ be yɛɛ de naana Aberaham ↄ naanasewↄ nɛ, baa kpala ba abↄↄ ŋan be dana nɛ akpeŋ kufu na baa mo ŋe man dekpeŋ dokoloŋ fa Lewitena baŋ be yɛɛ saesewↄ nɛ. Da gyeŋ nyi Lewitena kɛwↄ mↄ yɛɛ de naana Aberaham ↄ naanasewↄ, mↄna Wurubuarɛ faa Gyudatena mena mmaraase ŋenaŋ nyi baa tↄ mena abↄↄ ŋenaŋ fa baŋ gbagba be tebia Lewitena baŋ. 6Mɛkesɛdɛke kei ta lee Lewi duuluŋ man gba ya, mↄna ↄ talewↄ lɛɛ abↄↄ kekpase kufu man dekpeŋ dokoloŋ kei lee de naana Aberaham ŋon Wurubuarɛ be yako see nyi waa yɛɛ kolo fa e nɛ gyaŋ te ↄ hiraa e. 7Walaŋ kamasɛ taŋ gyeŋ nyi kegyia ne hiraa na kemaasa keŋ aŋmaareŋ be doo ke man ya. 8Lewitena baŋ bɛɛ lɛɛ abↄↄ kekpala kufu man dekpeŋ kei nɛ be yɛɛ balaŋ baŋ bɛɛ yem, mↄna Mɛkesɛdɛke ŋon de naana Aberaham be tↄ abↄↄ kɛŋa fa nɛ dↄↄ, ↄ ta yem ya ŋgba mena keŋ Wurubuarɛ nombia be yako nɛ. 9Dɛɛ tale yako nyi Lewi mↄ tɛɛwↄ de naana Aberaham dↄↄ tↄ abↄↄ kufu man dekpeŋ kei fa Mɛkesɛdɛke. 10Nawolo nyi debaŋ keŋ de naana Aberaham be gyaŋee na Mɛkesɛdɛke nɛ, na be ta lola ta Lewi ya. Debaŋ kenaŋ na ↄ sɛɛ ↄ doo ↄ naana Aberaham teŋa man. 11Debaŋ keŋ Wurubuarɛ be tɛɛ de naana Mosesi dↄↄ mo mmaraase ŋan fa Gyudatena nɛ, ↄ lese balaŋ lee Lewitena man nyi baa di saere. Nyi Lewitena saere tom keŋ bↄↄ yɛɛ nɛ deŋ talewↄ yela balaŋ gbɛɛneŋ ka tenee Wurubuarɛ siaman na, nafↄ bɛɛ tekaa hia nyi Wurubuarɛ waa bese lese sae ŋolo ke kↄŋ ŋgba Mɛkesɛdɛke nɛ ya. Te nɛnɛɛ dↄↄ, Wurubuarɛ te kpila ŋolo nyi ↄ kaa di saere ŋgba Mɛkesɛdɛke nɛ. Mↄna ↄ ta lee Aarↄn ŋon ↄ yɛɛ Lewi baale e nɛ duuluŋ man ya. 12Nyi walaŋ ŋon ↄ te yɛɛ Lewi baale e ya nɛ de kaa di Wurubuarɛ saere na, na kaboena nyi baa kyɛɛkee mmaraa keŋ, nawolo nyi Lewitena baageŋ te kaboena nyi baa di Wurubuarɛ saere. 13Mena nombia kɛŋa dɛɛ yako nɛ, na Yesu Kristo wose man nombia yaa dɛɛ yako nɛ. Nawolo nyi ↄ ta lee Lewi dekpaŋalaŋ man ya te ↄ kaa dii Wurubuarɛ saere. Ↄ lee dekpaŋalaŋ kpoo daale man, te ŋolo mↄ te dii ta Wurubuarɛ saere lee mena dekpaŋalaŋ kenaŋ man see ya. 14De popou gyeŋ nyi de Gbeŋgyoo Yesu lee Gyuda dekpaŋalaŋ man, te de naana Mosesi mↄ te yako kolo lee Gyuda dekpaŋalaŋmantena benaŋ saere kedi wose man ya. 15Nɛnɛɛ dↄↄ nombii kei man kenyii be dana baŋ bela ya. Nawolo nyi walaŋ wↄle kpoo kↄŋala kaa di Wurubuarɛ saere ŋgba Mɛkesɛdɛke nɛ. 16Ↄ saere keŋ ↄ be kaa dii nɛ, te yɛɛ tɛɛle kei dↄↄ mmaraase yaa dekpaŋalaŋ keŋ man ↄ ba lee nɛ dↄↄ te ↄ dii ke ya. Mↄna ↄ dii saere kenaŋ bo lee ↄ doŋ keŋ ↄ dana, keŋ yeŋ be tale di ↄ dↄↄ ya nɛ dↄↄ. 17Nawolo nyi Wurubuarɛ nombia aŋmaraseŋ see yakowↄ nyi, Wurubuarɛ yako Kristo nyiaa, "N yɛɛ Wurubuarɛ sae e kekpaakekpaa, ŋgba mena keŋ Mɛkesɛdɛke mↄ be di Wurubuarɛ saere kekpaakekpaa nɛ." 18Mena dↄↄ lee gbɛɛ daale man na, dɛɛ tale yako nyi Wurubuarɛ ta mo Mosesi mmaraase benɛɛ ŋan see yenaŋ. Nawolo nyi ŋↄↄ dana tↄnↄↄ ya, te ŋↄↄ dana nↄↄdoŋ mↄ ya. 19Mosesi mmaraase ŋan te tale yela de gbɛɛneŋ ka tenee ŋgba mena keŋ Wurubuarɛ ne gyae nɛ ya. Mena dↄↄ Wurubuarɛ te fa daa lookegyakaa kpaakpaate keŋ ka kela bene keŋ. Lee mena dↄↄ nɛnɛɛ dɛɛ tale tuu benaa Wurubuarɛ. 20Wurubuarɛ kaŋa ntam pɛte ↄ see Yesu saere kekpaakekpaa, mↄna saese akaŋ baŋ dↄↄ ↄ bɛɛ kaŋ ntam pɛte bɛɛ see wↄ saere ya. 21Wurubuarɛ nombia aŋmaraseŋ ne yako nyi, pɛ Wurubuarɛ ka see Yesu saere na ↄ kaŋa ntam nyiaa, "Maŋ Wurubuarɛ te kaŋ ntam te mↄↄ gyae maa kyɛɛkee ma agyueŋ ya. 'Nyaŋ ke di me saere kekpaakekpaa.' " 22Wurubuarɛ ntam keŋ ↄ be kam nɛ, keŋ yele la te Yesu kaa bese walaŋ ŋon ↄ seŋɛɛ ntam kenaŋ wↄle, na ka wola nyi nↄↄkebakesee wↄle kei dei kela bene keŋ. 23Gyaŋgba keŋ na Wurubuarɛ saese baŋ boe, nawolo nyi yeŋ bee yeli baa yɛɛ be saere tom keŋ kelii ↄto ya. 24Mↄna Yesu dↄↄ ↄ saere kedi keŋ be gyae ka lee ↄ gyaŋ gyu ŋolo gyaŋ ya, nawolo nyi ŋon kyaa kekpaakekpaa. 25Lee mena dↄↄ waa tale lɛɛ balaŋ baŋ pou bɛɛ tɛɛ ↄ dↄↄ kↄŋ Wurubuarɛ gyaŋ nɛ nyee, nawolo nyi ↄ kyaa kekpaakekpaa te ↄ ne fane fa Wurubuarɛ lee be dↄↄ. 26Yesu Kristo yɛna Wurubuarɛ sae kegyia ŋon ↄ ne tale yɛɛ kpene keŋ dɛɛ gyae nɛ fa daa. Nawolo nyi ↄ gbɛɛneŋ tenɛɛ Wurubuarɛ siaman, te nombiikum kamasɛ na ayimɛɛ kamasɛ mↄ be doo ↄ man ya. Wurubuarɛ lese e lee nombiakumɛɛyɛɛra man te ↄ gyinaa e adido kela walaŋ kamasɛ. 27Yesu be doo ŋgba Wurubuarɛ saese kegyiise baŋ bↄↄ kyaa kaalaŋ nɛ ya. Baŋ na wee na wee na kaboena nyi baa deesi gberaa ba wose ayimɛɛ, pɛna be kaa deesi gberaa be balaŋ mↄ wui ayimɛɛ na Wurubuarɛ ka mo be nombiakumɛɛ kyɛɛ wↄ. Mↄna Yesu dↄↄ tekaboena nyi waa yɛɛ mena ya, ↄ kedeesa keŋ yɛɛ dokoloŋ kooŋ. Debaŋ keŋ ↄ ba yem ↄpaŋdaŋ dↄↄ nɛ, te ↄ moo ↄ wose fa ŋgba kedeesa kolo nɛ lee balaŋ nombiakumɛɛ dↄↄ, na Wurubuarɛ ka mo be nombiakumɛɛ kyɛɛ wↄ. 28Balaŋ baŋ bↄↄ tɛɛ Mosesi mmaraase ŋan dↄↄ lese wↄ nyi baa yɛɛ Wurubuarɛ saese kegyiise nɛ, ba te yɛɛ balaŋ baŋ be gbɛɛneŋ tenɛɛ Wurubuarɛ siaman kelii ↄto ya. Mↄna mmaraase ŋan wↄle na Wurubuarɛ kaŋa ntam kpu na nombii keŋ ↄ be yako see nɛ, te ↄ lese ↄ bu Yesu Kristo ŋon dukum kamasɛ be doo ↄ man ya nɛ nyi waa bese ↄ sae kegyia kekpaakekpaa.

will be added

X\