Hiburutena 5

1Walaŋ kamasɛ ŋon ba lese e nyi waa yɛɛ Wurubuarɛ sae kegyia na, bɛɛ lese e bo lee ŋon gbagba ↄ balaŋ man na waa seŋ be nawↄↄ man lee be Wurubuarɛ ↄsom man. Na waa lɛɛ ba kedeesa abↄↄ mo gyu ke deesi fa Wurubuarɛ, na Wurubuarɛ ke nyiŋ mo be nombiakumɛɛ kyɛɛ wↄ. 2Ŋon gbagba mↄ yɛɛ deniwalaŋ e te ↄ ne tale yɛɛ kpene keŋ be dei ya, mena dↄↄ ↄ ne nyiŋ konↄↄ fa balaŋ baŋ bↄↄ gyeŋ ya te bɛɛ yɛɛ abↄↄ ŋan be dei ya te ne wↄŋee wↄ lee Wurubuarɛ gbɛɛneŋ man nɛ. 3Mena dↄↄ te kaboena nyi waa taŋgbɛɛ deesi fa Wurubuarɛ lee ŋon gbagba wui nombiakumɛɛ dↄↄ, pɛna waa tale deesi fa ↄ balaŋ baŋ mↄ wui nombiakumɛɛ ŋan bↄↄ yɛɛ nɛ. 4Akpaa Wurubuarɛ te baake ŋolo nyi ↄ kaa yɛɛ ↄ sae kegyia ŋgba mena keŋ ↄ be baake Aarↄn ya nɛ, walaŋ ŋonaŋ gbagba be tale see ↄ wose Wurubuarɛ sae kegyia ya. 5Mena te Kristo mↄ ta see ↄ wose Wurubuarɛ sae kegyia ya. Mↄna Wurubuarɛ lese na e te ↄ yako e nyiaa, "N yɛɛ me bu e, gyɛŋ me ta bese n kya." 6Wurubuarɛ besewↄ yako ↄ nombia aŋmaraseŋ see man yenaŋ daale bela nyiaa, "N yɛɛ Wurubuarɛ sae e kekpaakekpaa, ŋgba mena keŋ Mɛkesɛdɛke be di Wurubuarɛ saere kekpaakekpaa nɛ." 7Yesu ke kyaa tɛɛle dↄↄ nɛ, ↄ moo yeesa wii lese siasaraŋ fane fa Wurubuarɛ. Nawolo nyi ŋon waageŋ kooŋ ne gyae la waa tale lese e lee yeŋ man. Lee mena keŋ ↄ be yↄkↄse ↄ wose mo obuo fa Wurubuarɛ dↄↄ, Wurubuarɛ nyii ↄ kefane keŋ. 8Keŋ na keŋ Yesu yɛɛ Wurubuarɛ bu e koraŋ na, ↄ naa diyem nideli. Lee ↄ diyem kena kenaŋ man nɛ, ↄ kasee mena keŋ waa nyii ↄ kya dei. 9Yesu ke tei Wurubuarɛ yɛɛ kpene kamasɛ keŋ ↄ be yako e nyi waa yɛɛ taŋ nɛ, keŋ yele la te ↄ kaa bese nyeelɛɛre na waa yela baŋ pou bee nyii ↄ dei nɛ ke nyiŋ nyeekelɛɛ kekpaakekpaa. 10Mena dↄↄ Wurubuarɛ lese e nyi waa yɛɛ ↄ sae kegyia, ŋgba mena keŋ Mɛkesɛdɛke be yɛɛ ↄ sae kegyia nɛ. 11Nafↄ de dana nombia burum dɛɛ yako lee Mɛkesɛdɛke na Yesu saere kedi kei wose man, mↄna nombia ŋan man kalese dana baŋ nawolo nyi ɛ nombia man kenyii dana doŋ. 12Debaŋ kei nɛ nafↄ kaboena nyi ɛmɛɛ mↄ yaa bese Wurubuarɛ nombia ŋan wolala. Mↄna ɛ sɛɛ ɛ yɛɛ ŋgba bia baŋ be kaboena bo nyi ŋolo waa bese wola wↄ Yesu Kristo ↄsom nombia ŋan kewalaŋ nɛ. Ɛ yɛɛ yaa ŋgba bia baŋ be sɛɛ bɛɛ ŋmase dide nɛ. Ɛ ta bee ta na weenɛɛ doŋ nyiŋan kedi ya. 13Nawolo nyi walaŋ kamasɛ ŋon ↄ sɛɛ ↄ ne ŋmase dide nɛ, na ↄ yɛɛ bu e. Ↄ ta gyeŋa ta kpene keŋ yɛɛ dukum yaa debam ya. 14Mↄna kegyiise ne tale la di weenɛɛ doŋ nyiŋan. Nawolo nyi lee mena keŋ nombia be yala wↄ te bↄↄ gyoo ŋe man nideli te bↄↄ naa dↄↄ, ba gyeŋ kpene keŋ yɛɛ dukum na kpene keŋ yɛɛ debam.

will be added

X\