Hiburutena 4

1Wurubuarɛ keyako see keŋ ↄ be yako nyi ↄ te desina defɛɛfoe daale see fa ↄ balaŋ nɛ, ke sɛɛ ka seŋɛɛ mena. Mena dↄↄ ɛ yela dɛɛ kɛɛ nideli keŋ de man ŋolo be yɛɛ kolo kum daale, na ka ke tↄ e gbɛɛ keŋ ↄ be nyiŋ gyoo botↄↄ ya. 2Nawolo nyi nombia kpaakpaa ŋan bↄↄ kolosi fa de naanaↄ nɛ, ŋan ke te be kolosiwↄ fa daa mↄ. Mↄna nombia ŋan bↄↄ nyii nɛ te yɛɛ tↄnↄↄ fa wↄ ya, nawolo nyi ba te lɛɛ ŋa di ya. 3Mena dↄↄ daa baŋ dↄↄ lɛɛ ↄ nombia ŋan di nɛ, daa daageŋ ne gyae la dee nyiŋ gbɛɛ gyoo botↄↄ keŋ ↄ be desina see ↄ balaŋ nyi be kaa kyaa fɛɛfo nɛ. Nawolo nyi Wurubuarɛ yakowↄ nyiaa, "Me ta mo baŋ kaŋ ntam nyi, 'Bↄↄ gyae baa gyoo botↄↄ keŋ mↄↄ desina see me balaŋ nyi be kaa kyaa fɛɛfo nɛ korakora ya.' " Mↄna da gyeŋ nyi Wurubuarɛ wulaa bake ↄ nombia see leenaŋ debaŋ keŋ ↄ be yɛɛ kpene kamasɛ taŋ nɛ. 4Wurubuarɛ nombia aŋmaraseŋ see ŋan yakowↄ yenaŋ daale lee wee nyetoorote keŋ man nyiaa, "Weeya looro te Wurubuarɛ moowↄ yɛɛ kpene kamasɛ, te ↄ fɛɛfowↄ wee nyetoorote keŋ man." 5Wurubuarɛ besewↄ yako lee kefɛɛfo kei wose man bela nyiaa, "Bↄↄ gyae baa gyoo botↄↄ keŋ mↄↄ desina see me balaŋ nyi be kaa kyaa fɛɛfo nɛ ya." 6Balaŋ baŋ bↄↄ taŋgbɛɛ nyii Wurubuarɛ kefɛɛfo kei wose man nombia nɛ, lee ba deŋele doŋ dↄↄ Wurubuarɛ te fa wↄ gbɛɛ na baa gyoo botↄↄ keŋ ↄ be desina see wↄ nyi be kaa kyaa fɛɛfo nɛ ya. Kei nawolo baa nyi balaŋ wↄlɛɛ baale te Wurubuarɛ waa fa gbɛɛ na baa gyoo botↄↄ ke kyaa fɛɛfo. 7Mena dↄↄ Wurubuarɛ ta bese see wee daale keŋ ↄ ne baake ke nyi "Gyɛŋ," na ke yela balaŋ ke nyiŋ gbɛɛ gyoo ↄ defɛɛfoe keŋ man. Kulutooneŋ burum ŋaale wↄle nɛ, ↄ tɛɛwↄ gyoo Defidi dↄↄ bese kolosi lee wee kenaŋ wose man, ŋgba mena keŋ bↄↄ wulaa kolosi ka wose man nombia tↄne kei man nɛ nyiaa, "Gyɛŋ akpaa nyaŋ ŋon n nyii Wurubuarɛ nombia ŋan na, na yɛɛ deŋele doŋ ya." 8Debaŋ keŋ de naana Gyosua be tɛɛ Iseraetena siaman nɛ, ↄ te tale yela baa nyiŋ mena kefɛɛfo kei ya. Nyi ŋon talewↄ yela baa nyiŋ mena kefɛɛfo kei nɛ, nafↄ Wurubuarɛ be gyae waa kolosi kefɛɛfowee wↄle daale wose man nombia bela ya. 9Kei nawolo baa nyi wee daale kyaa keŋ Wurubuarɛ balaŋ baa fɛɛfo ŋgba mena keŋ Wurubuarɛ be fɛɛfo wee nyetoorote keŋ man nɛ. 10Walaŋ kamasɛ ŋon Wurubuarɛ waa yela waa gyoo ↄ defɛɛfoe keŋ man nɛ, nyi ↄtenate de yɛɛ ↄ tom taŋ na waa fɛɛfo ŋgba mena keŋ Wurubuarɛ mↄ be yɛɛ ↄ tom taŋ te ↄ be fɛɛfo nɛ. 11Gyaŋgba gyaŋgba balaŋ baŋ yɛɛ deŋele doŋ, mena dↄↄ be te nyiŋ gbɛɛ gyoo Wurubuarɛ defɛɛfoe keŋ man ya. Lee mena dↄↄ ɛ na yeli daa mↄ ke yɛɛ deŋele doŋ na dɛɛ yo gbɛɛ ya. Mↄna ɛ yela dɛɛ yɛɛ kakyeŋ na dɛɛ yɛɛ Wurubuarɛ kegyaebii, na dee nyiŋ gbɛɛ gyoo ↄ defɛɛfoe keŋ man. 12Wurubuarɛ nombii keŋ nↄↄ dana boalaŋ te kɛɛ fa nyeedoŋ kekpaa. Ke yɛɛ ŋgba sila sia na wↄlete nɛ, te ke dana beeleŋ kela sila sia na wↄlete kamasɛ. Kɛɛ tale kara gyoo deniwalaŋ yenaŋ kamasɛ, lese deniwalaŋ dinↄↄ na ↄ nyeeman na ↄ konↄↄ man nombia pou debↄↄ. 13Abↄↄ ŋan pou Wurubuarɛ be yɛɛ nɛ, ŋe man dokoloŋ be kyaa keŋ ka weesɛɛ ↄ siaman ya. Kpene kamasɛ doo ↄ siaman peŋteŋpereiŋ. Ŋon Wurubuarɛ siaman te de popou dɛɛ kaa seŋ tↄlɛɛ de nↄↄwoya wee daale. 14Mena dↄↄ ɛ yela dɛɛ kyaŋ da kelɛɛdi keŋ de dana nɛ man keŋkeŋ. Nawolo nyi de dana Wurubuarɛ sae kegyia kpaakpaate ŋolo. Ŋon yɛna Yesu, Wurubuarɛ bu ŋon ↄ be lam Wurubuarɛ gyaŋ adido nɛ. 15Wurubuarɛ sae kegyia ŋon de dana nɛ, ↄ yɛɛ walaŋ ŋon ↄ ne wii daa te ↄ ne yeli dɛɛ tale yɛɛ abↄↄ ŋan kaboena nyi dɛɛ yɛɛ te dↄↄ ne tale yɛɛ ya nɛ. Nawolo nyi ↄbↄnsam kɛɛse e kɛɛ lee gbɛɛ kamasɛ man ŋgba daa nɛ, mↄna ŋon dↄↄ ↄ te yɛɛ dukum ya. 16Mena dↄↄ ɛ na yeli dee yee Wurubuarɛ gyaŋ kegyu ya. Nawolo nyi da gyeŋ nyi waa wii de waraŋase na waa mo ↄ bɛrɛɛ boele daa, na waa kyↄ daa debaŋ kamasɛ keŋ da wose de kyaŋ daa na.

will be added

X\