Hiburutena 3

1Lee mena dↄↄ ɛmɛɛ me tebia Kristotena baŋ mↄ ɛ be lɛɛ Wurubuarɛ di nɛ, ɛ mo ya agyueŋ pou gyakaa Yesu dↄↄ. Ŋon yɛna Wurubuarɛ kpilale na Wurubuarɛ sae kegyia ŋon dↄↄ lɛɛ e di nɛ. 2Ↄ moo ↄ konↄↄ pou fa Wurubuarɛ ŋon ↄ ba lese e nɛ, ŋgba mena keŋ Mosesi mↄ ba mo ↄ konↄↄ pou fa Wurubuarɛ ŋon ↄ ba lese e nyi ↄ kaa kɛɛ ↄ balaŋ dↄↄ nɛ. 3Da gyeŋ nyi walaŋ de baŋ deni na, ŋon ne nyiŋa na yele kela deni keŋ ↄ be bam nɛ. Mena mↄ te Yesu dana yele kela Mosesi. 4Walaŋ ne baŋa na deni, mↄna Wurubuarɛ yɛɛna walaŋ na kpene kamasɛ. 5Mosesi moo ↄ konↄↄ pou yɛɛ tom Wurubuarɛ balaŋ man ŋgba Wurubuarɛ tobaale nɛ, te ↄ taŋgbɛɛwↄ kolosi nombia ŋan Wurubuarɛ waa kaa kolosi wee daale nɛ. 6Mↄna Kristo dↄↄ ŋon yɛɛ Wurubuarɛ bu e, te ↄ lese ↄ konↄↄ pou kɛɛ Wurubuarɛ balaŋ dↄↄ. Mena dↄↄ akpaa de nyiŋ konↄↄ te da mo de sia gyakaa abↄↄ ŋan ↄ be yako see nyi waa fa daa nɛ dↄↄ na, keŋ ne gyae la ke yela dɛɛ tale bese ↄ balaŋ. 7Lee mena dↄↄ Wurubuarɛ feliŋ ŋon yakowↄ nyiaa, "Gyɛŋ kei akpaa nyaŋ ŋon n nyii Wurubuarɛ nombia ŋan na, 8na yɛɛ deŋele doŋ ŋgba mena keŋ ɛ naanaↄ be yɛɛ te bↄↄ koro seŋ tia Wurubuarɛ depampaa dinaa keŋ man, te bↄↄ teese ↄ nↄↄman nɛ ya. 9Ɛ naanaↄ naa kpene keŋ Wurubuarɛ be yɛɛ kulutooneŋ sↄŋola ŋan man, mↄ kenaŋ wↄle na ba teese ↄ nↄↄman kɛɛse e kɛɛ. 10Mena dↄↄ Wurubuarɛ gyeŋa baŋ ↄ balaŋ benaŋ dↄↄ te ↄ yakowↄ nyiaa, 'Debaŋ kamasɛ na bɛɛ yo gbɛɛ nawolo nyi bↄↄ ne sila me nↄↄwoya ya.' 11Keŋte ma gyeŋa baŋ kaŋ ntam nyiaa, 'Bↄↄ gyae baa nyiŋ gbɛɛ gyoo botↄↄ keŋ mↄↄ desina see wↄ nyi be kaa kyaa na baa fɛɛfo nɛ korakora ya.' " 12Mena dↄↄ me tebia, ɛ kɛɛ nideli nyi ɛ man ŋolo be nyiŋ agyueŋ kum na waa lɛɛ aŋmaareŋ na waa lee Wurubuarɛ ŋon ↄ kyaa kekpaakekpaa nɛ wↄle ya. 13Mena dↄↄ ɛ nyiŋaa ɛ kyaa na ɛ sia nɛ, ɛ kolosi do dↄŋa kakyeŋ wee na wee. Na nombiakumɛɛ ba beo ɛ man ŋolo na waa yɛɛ deŋele doŋ ya. 14Akpaa de kyaŋ da kelɛɛdi keŋ dↄↄ taŋgbɛɛ lɛɛ Kristo di nɛ man keŋkeŋ kelii da yeŋ wee na, na daa na Kristo yɛɛ dokoloŋ baa. 15Wurubuarɛ nombia aŋmaraseŋ see ŋan yakowↄ nyiaa, "Gyɛŋ akpaa nyaŋ ŋon n nyii Wurubuarɛ nombia ŋan na, na yɛɛ deŋele doŋ ŋgba mena keŋ ɛ naanaↄ be yɛɛ deŋele doŋ tia Wurubuarɛ nɛ ya." 16Balaŋ bomↄ nyiina Wurubuarɛ nombia ŋan te ba korowↄ seŋ tia e? Na baŋ yɛna balaŋ baŋ Mosesi be tɛɛ be siaman mo wↄ lee Igyipite tɛɛle man nɛ yee? 17Balaŋ bomↄ te Wurubuarɛ gyeŋa baŋ do kulutooneŋ sↄŋola ŋan man? Na baŋ yɛna balaŋ baŋ bↄↄ yɛɛ nombiakumɛɛ, te ↄ be yeli bↄↄ yekee depampaa dinaa keŋ man nɛ yee? 18Balaŋ bomↄ te Wurubuarɛ gyeŋa baŋ kaŋ ntam do nyi bↄↄ gyae baa gyoo botↄↄ keŋ ↄ be desina see wↄ nyi be kaa fɛɛfo nɛ ya? Na baŋ yɛna balaŋ baŋ bↄↄ yɛɛ deŋele doŋ te ba te lɛɛ e di nɛ yee? 19Mena dↄↄ da te naa nyi keŋ ba te lɛɛ Wurubuarɛ di dↄↄ ya, te ba te tale ka gyoo botↄↄ keŋ ↄ be desina see wↄ nyi be kaa kyaa fɛɛfo nɛ ya.

will be added

X\