Hiburutena 12

1Mena balaŋ burum kɛwↄ baŋ bↄↄ lɛɛ Wurubuarɛ di nɛ, ne di adansɛɛ fa daa nyi Wurubuarɛ ne di ↄ nombia dↄↄ. Mena dↄↄ ɛ yela dee tina kpene kamasɛ keŋ ne tↄ daa gbɛɛ lee de Wurubuarɛ ↄsom man, na nombiakumɛɛ ŋan ne bake daa te ne yeli dɛɛ yale da kelɛɛdi man bileŋbileŋ nɛ yela, na dɛɛ yase de sia na dɛɛ kyaŋ dↄ ↄsom keŋ man nideli kelii ↄto ŋgba mena keŋ de Gbeŋgyoo ba wola daa nɛ. 2Lee mena dↄↄ ɛ yela dɛɛ mo de sia gyakaa Yesu waageŋ dↄↄ. Ŋon ne yele la te dɛɛ tale seŋ keŋkeŋ da kelɛɛdi man, nawolo nyi da kelɛɛdi pou gyakae ↄ dↄↄ lee ka kewalaŋ kelii ↄto. Lee gyoŋ keŋ ↄ loo gyakaa ke dↄↄ nɛ dↄↄ, ↄ te yeli ↄpaŋdaŋ dↄↄ yeŋ keŋ ke yɛɛ e desɛŋ ya. Mↄna ↄ nyiŋa konↄↄ seŋ keŋkeŋ yela be gyↄↄ e ↄpaŋdaŋ dↄↄ. Te nɛnɛɛ ↄ kyaa ↄ kya Wurubuarɛ dunoluŋ dↄↄ ↄ gyoori keŋ man. 3Ɛ tↄↄse mena keŋ Yesu be naa diyem nombiakumɛɛyɛɛra baŋ bↄↄ koro seŋ tia e nyiŋmaa man nɛ. Lee kɛŋa pou wↄle na ↄ nyiŋa konↄↄ seŋ keŋkeŋ. Lee mena dↄↄ ɛmɛɛ mↄ ɛ na yeli ɛ wose keyↄkↄse ŋon ya, mↄna ɛ yela kei ka do ŋon kakyeŋ na ɛ ka seŋ keŋkeŋ mena, na ɛ be nyiŋ lee ↄ wↄle ya. 4Nawolo nyi ɛ gyeŋ nyi debaŋ keŋ ɛ ne fiti nyi ɛ ka lese ɛ wose lee dukum man nɛ, ɛ man ŋolo te fiti ta kelii debaŋ keŋ kaboena nyi baa ko e lee ↄ kelɛɛdi dↄↄ ya. 5Yaa ɛ te wolee Wurubuarɛ nombia aŋmaraseŋ see ŋan ne yako mo do ɛ man walaŋ kamasɛ kakyeŋ lee keŋ ɛ yɛɛ ↄ biawↄ dↄↄ nɛ? Wurubuarɛ yakowↄ nyiaa, "Me bu, nyi akpaa maŋ n Gbeŋgyoo ne desina neŋ nɛ, see deŋele na n ke tei maŋ nideli. Akpaa ma lese nombia si neŋ nɛ, na yeli n wose ke yↄkↄse neŋ na n ka lee me wↄle ya 6Nawolo nyi walaŋ kamasɛ ŋon mɛɛ gyae ↄ nombia na te mɛɛ desina e. Mena mↄ te walaŋ kamasɛ ŋon me lɛɛ e do nyi ↄ yɛɛ me bu e na, ŋon te mɛɛ wↄŋ ↄ deŋele." 7Diyem keŋ ɛ ne naa nɛ, ɛ nyiŋ konↄↄ na ɛ ka mo ke nyi Wurubuarɛ ne wↄŋ ɛ deŋele baa. Nawolo nyi ↄ ta mo ŋon yɛɛ ↄ bia. Te biikyaa woŋti kyaa la keŋ ↄ kya bɛɛ wↄŋ ↄ deŋele ya? 8Nyi akpaa Wurubuarɛ te wↄŋ ɛ deŋele ŋgba mena keŋ ↄ ne wↄŋ ↄ bia pou deŋele ya nɛ, na nawolo baa nyi ɛ te yɛɛ ↄ bia gbagbawↄ ya. 9De popou dana kyaↄ tɛɛle kei dↄↄ, keŋ nyi akpaa de yɛɛ kolo na bɛɛ wↄŋ da deŋele te dee bu wↄ. Nyi akpaa mena te doo nɛ, kenaŋ na kaboena nyi dɛɛ yↄkↄse da wose fa de kya Wurubuarɛ ŋon ↄ kyaa adido nɛ, na dee nyiŋ nyeedoŋ kekpaakekpaa. 10De kyaↄ baŋ be kyaa tɛɛle kei dↄↄ nɛ, bɛɛ wↄŋ da deŋele bo baŋ gbagba kegyaebii man weeya akalansɛɛ ŋaale. Mↄna Wurubuarɛ dↄↄ, ŋon ne wↄŋ da deŋele bo lee daa gbagba de deeli dↄↄ na dee nyiŋ nyiŋ ↄ dinↄↄ kpaakpaa keŋ dukum be doo ke man ya nɛ. 11Nyi akpaa be wↄŋ ŋolo deŋele nɛ bɛɛ yɛɛ e gyoŋ ya. Ne takaa e nawolo nyi gbɛɛ keŋ man baa mo e ta nɛ dana doŋ. Mↄna wↄle wↄle nɛ baŋ pou bee nyiŋ konↄↄ di deŋele kewↄŋ keŋ dↄↄ nɛ, be gbɛɛneŋ na tenee Wurubuarɛ siaman te ba wose mↄ ne fɛɛ wↄ ba kekyaabii man. 12Mena dↄↄ ɛ na yeli ɛ wose ke yↄkↄse ŋon ya! Ɛ do ɛ wose kakyeŋ na ɛ ka seŋ nideli ɛ kelɛɛdi man. 13Anokoare gbɛɛ keŋ ɛ silana nɛ, ɛ kyaŋ ɛ wose na ɛ ke sila ke nideli kelii ↄto, na ɛ ke tale kyↄ ɛ tebia baŋ ba kelɛɛdi be dana doŋ ya nɛ, na baa tale seŋ keŋkeŋ ba kelɛɛdi man kelii ↄto. 14Ɛ yase ɛ sia na ɛ ke kyaa na walaŋ kamasɛ wosefɛɛreŋ man, na ɛ ke yase ɛ sia mo ɛ wose pou fa Wurubuarɛ keŋ ayimɛɛ kamasɛ be doo ɛ wose man ya. Nawolo nyi akpaa ayimɛɛ doo ŋolo man nɛ, ↄtenate be gyae waa naa de Gbeŋgyoo na ↄ sia wee daale ya. 15Ɛ kɛɛ ɛ wose man nideli keŋ nyi ɛ man ŋolo be yɛɛ kolo na Wurubuarɛ bɛrɛɛ keŋ ke bↄ e ya, te ɛ kɛɛ nideli mↄ nyi walaŋkum ŋolo na doo ɛ man na waa mo nombiikum kaa gyoo ɛ man na ke yela balaŋ burum ka yo gbɛɛ ya. 16Ɛ kɛɛ ɛ wose nideli keŋ nyi ɛ man ŋolo be yɛɛ kafoŋ nombia, yaa waa yɛɛ walaŋ ŋon ↄ bee yee Wurubuarɛ ya ŋgba Esawu ŋon weenɛɛ nyefale dokoloŋ dↄↄ, ↄ ba mo ↄ kegyiiri yↄↄ fa ↄ naabu nɛ ya. 17Kenaŋ wↄle nɛ ɛmɛɛ gbagba gyeŋ nyi nafↄ ↄ gyaewↄ nyi ↄ kya ke hiraa e ŋgba ↄ bu kegyia nɛ mↄna ↄ te nyim ya. Ↄ moo siasaraŋ gyae gbɛɛ keŋ nafↄ waa mo kyɛɛkee ↄ kya agyueŋ na waa hiraa e, mↄna te dee ↄ kya ke kyɛɛkee wa agyueŋ ya. 18Wurubuarɛ gyaŋ yaa ɛ kↄŋawↄ. Mↄna ɛ te kↄŋ ↄ gyaŋ bula keŋ ɛ ke tale tina ke ŋgba mena keŋ Iseraetena be kↄŋ ↄ gyaŋ Sinai bula keŋ teŋa man nɛ ya. Debaŋ keŋ bↄↄ kↄŋ ↄ gyaŋ bula keŋ teŋa man nɛ, be naawↄ nyi boalaŋbii daale ne kpaa te botↄↄ biriwↄ tuum te feliŋ dinaa mↄ gyↄↄwↄ. 19Be nyii kaberɛ kewii botↄↄ na woya ŋaale mↄ. Balaŋ baŋ kenyii woya ŋan nɛ, gyakoloŋ gyoo wↄ te ba solawↄ nyi woya ŋan na tekaa kolosi fa wↄ ya, nawolo nyi nombia ŋan bↄↄ nyii nɛ ŋe yɛɛ nombia dinaana ŋa. 20Nombia ŋenaŋ yɛna nyi, "Nyi wonembu yaa kpene kamasɛ de tina bula keŋ na, baa fuŋii e boya ko." 21Kpene keŋ be kↄŋ botↄↄ nɛ dana gyakoloŋ nideli. Lee mena dↄↄ te Mosesi gbagba yakowↄ nyiaa, "Gyakoloŋ dana maŋ, te ma wose pou mↄ ta yeŋ maŋ." 22Mↄna ɛmɛɛ baŋ ɛ be lɛɛ Yesu di nɛ dↄↄ, ɛ te kↄŋ kaa lii bula keŋ bɛɛ baake nyi Siyↄn nɛ tɛɛ. Ɛ te kↄŋ kaa lii Wurubuarɛ ŋon ↄ kyaa kekpaakekpaa nɛ dɛɛ. Botↄↄ yɛna Gyerusalɛm donↄↄ keŋ ke kyaa Wurubuarɛ gyaŋ adido nɛ. Botↄↄ te Wurubuarɛ kpilala baŋ ŋolo na ŋolo be tale kala wↄ ya nɛ gyaŋeewↄ bɛɛ nyaŋee. 23Ɛ te kↄŋ Wurubuarɛ bia gyaŋgbatena baŋ bↄↄ ŋmarase ba yela adido te bↄↄ gyaŋee bɛɛ nyaŋee nɛ gyaŋ. Ɛ te kↄŋ Wurubuarɛ ŋon waa di balaŋ pou nombia nɛ gyaŋ. Ɛ te kↄŋ gyaŋgba balaŋ baŋ Wurubuarɛ be desinawↄ see fa ↄ wose nɛ gyaŋ. 24Nɛnɛɛ dↄↄ Yesu gyaŋ yaa ɛ kↄŋawↄ. Ŋon yɛna walaŋ ŋon Wurubuarɛ be tɛɛ ↄ dↄↄ, te ↄ be bake nↄↄkebakesee wↄle keŋ fa denibalaŋ nɛ. Ŋon yeŋala fa walaŋ kamasɛ, te ↄ fatabo keŋ ba lee ↄ man leki nɛ ne gyae la ka mo abↄↄ kpaakpaa kↄna daa kela Abɛle wui fatabo keŋ. 25Mena dↄↄ ɛ see deŋele nideli na ɛ ke tei walaŋ ŋon ↄ ne kolosi fa ŋon nɛ. Nawolo nyi gyaŋgba balaŋ baŋ bↄↄ bɛɛ be te nyii Wurubuarɛ nombia ŋan Mosesi be yako fa wↄ tɛɛle kei dↄↄ ya nɛ, Wurubuarɛ wↄŋa ba deŋele. Nyi akpaa mena te doo nɛ, kenaŋ na nyi de bɛɛ de te nyii walaŋ ŋon ↄ ne kolosi lee adido dei ya nɛ kenaŋ na Wurubuarɛ waa wↄŋ da deŋele nideli kela wↄ. 26Mena debaŋ kenaŋ man nɛ, Wurubuarɛ woya yela tɛɛle wosiwↄ. Mↄna nɛnɛɛ ↄ te yako see bela nyiaa, "Maa bese yela tɛɛle ke wosi bela. Na tɛɛle kaageŋ te maa yela ka ke wosi ya, mↄna maa yela adido mↄ ke wosi kpu." 27Keŋ Wurubuarɛ be yako nyi "Waa bese yela tɛɛle ke wosi nɛ, ke dana ka asɛɛ." Kei nawolo baa nyi, abↄↄ ŋan pou ↄ be yɛɛ te baa tale wosi ŋa nɛ, waa lese ŋa pou leki na ke ka abↄↄ ŋan bↄↄ tale wosi ŋa ya nɛ. 28Mena dↄↄ ɛ yela dɛɛ do Wurubuarɛ nↄↄ, nawolo nyi dɛɛ kaa di gyoori ↄ gyoorobiiri keŋ ke bɛɛ wosi ya te ke kyaa kekpaakekpaa nɛ man. Ɛ yela dɛɛ do e nↄↄ na dɛɛ som e gbɛɛ kpaakpaa keŋ ↄ ne gyae nɛ man, na dɛɛ mo keyee na obuo fa e nideli. 29Nawolo nyi Wurubuarɛ deŋele kewↄŋ yɛɛ ŋgba boalaŋ keŋ ne kpaa wↄlɛɛ abↄↄ nɛ.

will be added

X\