Hiburutena 11

1Woŋ yɛna Wurubuarɛ kelɛɛdi? Keŋ yɛna nyi deniwalaŋ ka gyeŋ ↄ konↄↄ man nideli nyi, abↄↄ ŋan ↄ loo gyakaa ŋe dↄↄ nɛ waa nyiŋ ŋa. Doo nyi ↄ bɛɛ naa mena abↄↄ ŋenaŋ na ↄ sia ya, mↄna ↄ gyeŋ ↄ konↄↄ man nideli nyi mena abↄↄ ŋenaŋ kyaa, te wee daale waa kaa nyiŋ ŋa. 2Mena ke te beneŋtena baŋ mↄ lɛɛ Wurubuarɛ di, te lee ba kelɛɛdi dↄↄ Wurubuarɛ kɛlɛɛ wↄ. 3Lee mena keŋ dↄↄ lɛɛ Wurubuarɛ di dↄↄ te da gyeŋ nyi nↄↄwoya ŋaageŋ te ↄ kolosiwↄ, te abↄↄ ŋan pou ŋe kyaa adido na ateta nɛ kↄŋawↄ. Kei nawolo baa nyi abↄↄ ŋan pou deniwalaŋ bɛɛ naa ŋa ↄ sia ya nɛ, ŋan te Wurubuarɛ moowↄ yɛɛ abↄↄ ŋan dɛɛ naa na de sia nɛ. 4Abɛle kelɛɛ keŋ ↄ be lɛɛ Wurubuarɛ di dↄↄ, abↄↄ ŋan ↄ ba mo deesi fa Wurubuarɛ nɛ gyoo Wurubuarɛ sia kela ↄ kegyia Kani wui. Mena dↄↄ Wurubuarɛ mↄ lɛɛ e do nyi ↄ gbɛɛneŋ tenɛɛ ŋon Wurubuarɛ siaman. Abɛle wulaa yeŋawↄ mↄna ↄ kelɛɛdi nombia ŋan ↄ be yɛɛ nɛ, ŋe sɛɛ ŋe doo fa daa. 5Enↄke mↄ kelɛɛ keŋ ↄ be lɛɛ Wurubuarɛ di dↄↄ te Wurubuarɛ gate e gyu adido na ↄ sia fonɛɛ. Ŋolo te naa e ya nawolo nyi Wurubuarɛ moo e gyu adido. Pɛ Wurubuarɛ ka mo Enↄke gyu adido nɛ, Wurubuarɛ dii adansɛɛ lee ↄ wose man nyi ↄ nombia na gyoo ŋon Wurubuarɛ sia. 6Nyi akpaa ŋolo bɛɛ lɛɛ Wurubuarɛ di ya nɛ, ↄtenate nombia be gyae ka gyoo Wurubuarɛ sia korakora ya. Walaŋ kamasɛ ŋon ↄ ne gyae nyi waa kↄŋ Wurubuarɛ gyaŋ nɛ, kaboena nyi ↄtenate dɛɛ lɛɛ di nyi Wurubuarɛ kyaa, te waa mo abↄↄ kpaakpaa tↄ balaŋ baŋ pou bɛɛ yase be sia kɛo ↄ gbɛɛneŋ man nideli nɛ kom. 7Nowa mↄ kelɛɛ keŋ ↄ be lɛɛ Wurubuarɛ di dↄↄ, debaŋ keŋ Wurubuarɛ be faree e lee kayeyɛɛ dinaa keŋ gyae ke kↄŋ tɛɛle dↄↄ nɛ, doo nyi na ↄ ba gyeŋ kayeyɛɛ kenaŋ dinↄↄ ya, mↄna ↄ lɛɛ Wurubuarɛ di te ↄ yae adakaa dinaa. Keŋte ŋon na ↄ dekpaŋalaŋmantena pou gyoowↄ ke man, te be nyiŋa nyeedoŋ debaŋ keŋ loŋ be waale tɛɛle pou nɛ. Ↄ kelɛɛdi kei te yeli ↄ te bu balaŋ akaŋ baŋ pou fↄↄ nyi be yɛɛ nombiakumɛɛyɛɛrawↄ, keŋ kaboena nyi Wurubuarɛ waa wↄlɛɛ wↄ. Lee Nowa kelɛɛdi kei dↄↄ te Wurubuarɛ lɛɛ e do nyi ↄ gbɛɛneŋ tenɛɛ ↄ siaman. 8Aberaham mↄ kelɛɛ keŋ ↄ be lɛɛ Wurubuarɛ di dↄↄ, debaŋ keŋ Wurubuarɛ be baake e yako e nyi waa koro lee ↄ tɛɛle man, na waa gyu tɛɛle wↄle daale keŋ ↄ be yako see nyi wee daale ke gyae kaa bese ŋon na ↄ duuluŋ man balaŋ pou wui dↄↄ nɛ ↄ nyii Wurubuarɛ dei. Debaŋ kenaŋ na Aberaham ba gyeŋ tɛɛle keŋ Wurubuarɛ ne yako nɛ wose man kolo ya, mↄna ↄ korowↄ tina ↄ donↄↄ yela gyu botↄↄ. 9Lee Aberaham kelɛɛdi dↄↄ ↄ gyuuwↄ kekyaa tɛɛle keŋ Wurubuarɛ be yako see nyi ke gyae kaa bese ↄ wui nɛ dↄↄ ŋgba ŋↄↄle nɛ. Ↄ ke kyaawↄ kanyaŋ denɛɛ man ŋgba mena keŋ ↄ bu Asiki na ↄ naanabii Gyekↄpo mↄ ba ke kyaa nɛ. Wurubuarɛ yakowↄ see fa Asiki na Gyekↄpo mↄ nyi wee daale mena tɛɛle kenaŋ gyae kaa bese be wui, ŋgba mena keŋ ↄ be yako see fa Aberaham nɛ. 10Na Aberaham dↄↄ, ŋon sia gyakaa bo donↄↄ keŋ Wurubuarɛ gbagba ba mo adao lese ke, te ka seŋɛɛ nideli te ke dana doŋ te ke kyaa kekpaakekpaa nɛ dↄↄ. 11Doo nyi na Aberaham te ŋmɛɛ gbaa lolo te ↄ wɛɛle Saara mↄ yɛɛ ↄlamanbo e, mↄna lee kelɛɛ keŋ ↄ be lɛɛ Wurubuarɛ di dↄↄ Wurubuarɛ yela ↄ lola bu. Nawolo nyi debaŋ keŋ Wurubuarɛ be yako see nyi waa fa wↄ bu nɛ, ↄ lɛɛwↄ di nyi Wurubuarɛ waa di ↄ nombia ŋan ↄ be yako see nɛ dↄↄ. 12Lee mena dↄↄ Aberaham ŋon ↄ be ŋmɛɛ gbaa lolo te ↄ loo be gyakaa nyi nafↄ waa tale lola bela ya nɛ, ↄ kaa lola bu te ↄ duuluŋ man balaŋ kaa wukuwↄ ŋgba kyolobiise ŋan ŋe kyaa adido, yaa ɛpo nↄↄman aŋasa nɛ. 13Mena balaŋ kɛwↄ pou te nyiŋ kpene keŋ Wurubuarɛ be yako see nyi waa fa wↄ nɛ ya, mↄna be gyakaa bɛɛ lɛɛ Wurubuarɛ di pɛte ba yekeewↄ. Nawolo nyi lee ba kelɛɛdi dↄↄ yɛɛ yaa ŋgba be wulaa naa abↄↄ ŋan na lem keŋ wee daale baa kaa nyiŋ ŋa nɛ. Mena dↄↄ be nyaŋeewↄ do Wurubuarɛ nↄↄ, te be lɛɛwↄ do nyi be yɛɛ ŋↄↄlawↄ tɛɛle kei dↄↄ. 14Balaŋ baŋ bↄↄ gyuusu be nↄↄ yako mena nombia kɛŋa nɛ, na bɛɛ wolo baa nyi bɛɛ kɛo baŋ gbagba be tɛɛle na baa kyaa ke dↄↄ. 15Kei nawolo baa nyi na be loo be gyakaa tɛɛle keŋ bↄↄ koro tina ke yela nɛ dↄↄ ya. Nawolo nyi, nyi be loo deŋ gyakaa ke dↄↄ nɛ, nafↄ be dana gbɛɛ nyi baa bese gyu botↄↄ. 16Mↄna ba moo be loo bo gyakaa tɛɛle keŋ ke dei kela keŋ bↄↄ koro yela ke nɛ dↄↄ. Mena tɛɛle kenaŋ yɛna Wurubuarɛ gyaŋ adido. Mena dↄↄ be dana Wurubuarɛ desɛŋ nyi mena balaŋ benaŋ baa baake e nyi be Wurubuarɛ ya. Nawolo nyi ↄ te desina tɛɛle kpaakpaa daale see wↄ. 17Wurubuarɛ nombia aŋmaraseŋ see ne yako nyiaa, Wurubuarɛ yako Aberaham nyi, "N bu Asiki dↄↄ te maa ta na maa yela n duuluŋ man balaŋ ke wuku." Mↄna Wurubuarɛ kɛɛse Aberaham kelɛɛdi kɛɛ te ↄ yako e nyi waa mo ↄ bu Asiki ŋonaŋ deesi fa e. Te lee kelɛɛ keŋ Aberaham be lɛɛ Wurubuarɛ di dↄↄ, ↄ desina ↄ wose nyi waa mo ↄ bu Asiki deesi fa Wurubuarɛ. 19Aberaham sɛɛwↄ nyi waa mo ↄ bu Asiki deesi fa Wurubuarɛ, nawolo nyi wa agyueŋ man na ↄ gyeŋ nyi ↄ bu ŋon da yem koraŋ na, Wurubuarɛ waa tale gyuusu e lee yeŋ man. N kɛɛ gba na, na yɛɛ yaa ŋgba ↄ moo e baa deesi fa Wurubuarɛ ampaŋ, te Wurubuarɛ gyuusu e lee yeŋ man nɛ. 20Asiki mↄ kelɛɛ keŋ ↄ be lɛɛ Wurubuarɛ di dↄↄ, te ↄ talewↄ yako ↄ bia Gyekↄpo na Esawu abↄↄ ŋan Wurubuarɛ waa yɛɛ fa wↄ wee daale nɛ. 21Gyekↄpo mↄ kelɛɛ keŋ ↄ be lɛɛ Wurubuarɛ di dↄↄ debaŋ keŋ ↄ yeŋ ba benaa nɛ, ↄ seŋawↄ teeli na ↄ gbutu te ↄ doo Wurubuarɛ nↄↄ, te ↄ sola e nyi waa hiraa ↄ naanasebia Gyosɛfo bia baala bala baŋ. 22Gyosɛfo mↄ kelɛɛ keŋ ↄ be lɛɛ Wurubuarɛ di dↄↄ pɛ waa yeŋ nɛ, ↄ yako ↄ balaŋ Iseraetena nyi wee daale baa kaa lee Igyipite tɛɛle man. Keŋte ↄ wola wↄ mena keŋ baa yɛɛ ↄ ŋↄↄ. 23Mosesi ↄ kya na ↄ naa mↄ kelɛɛ keŋ bↄↄ lɛɛ Wurubuarɛ di dↄↄ be ka lola be bu Mosesi nɛ, be talewↄ weese e deni man gyaalaŋna batooro, keŋ ba te yee Igyipite gyoo mmaraa keŋ ↄ ba see nyi baa koe bia baala baŋ bↄↄ lola wↄ kewalaŋ nɛ ya. Nawolo nyi be naawↄ nyi bu ŋon te yɛɛ walaŋ yakaate e ya. 24Mosesi mↄ kelɛɛ keŋ ↄ be lɛɛ Wurubuarɛ di dↄↄ debaŋ keŋ ↄ ba bee nɛ, ↄ bɛɛwↄ nyi be na tekaa baake e nyi Igyipite gyoo bu alebu ŋon bu bela ya. 25Nawolo nyi ↄ kegyaebii yɛna nyi waa kaa kpu na ↄ tebia Wurubuarɛ balaŋ baŋ na baa naa diyem, kela keŋ waa kyaa gyoo Faaro dɛɛ di gyoŋ weeya akalansɛɛ ŋaale, na waa wↄlɛɛ na dukum man kedoo. 26Ↄ naawↄ nyi akpaa nyeelɛɛre ŋon waa kaa kↄŋ nɛ dↄↄ te ba do e desɛŋ na, dana tↄnↄↄ fa e kela abↄↄ kpaakpaa ŋan pou waa nyiŋ Igyipite tɛɛle man nɛ. Nawolo nyi kpene keŋ dↄↄ ↄ loo gyakaa nɛ, yɛna abↄↄ kpaakpaa ŋan Wurubuarɛ waa kaa fa e wee daale nɛ. 27Lee Mosesi kelɛɛ keŋ ↄ be lɛɛ Wurubuarɛ di dↄↄ, ↄ korowↄ lee Igyipite tɛɛle man keŋ ↄ te yee baŋ keŋ gyoo ŋon waa gyeŋ ↄ dↄↄ nɛ ya. Doo nyi nombia ŋan be tuŋ e gbɛɛnaa man nɛ dana doŋ, mↄna ↄ ta bese ↄ wↄle ya. Nawolo nyi yɛɛ e ŋgba ↄ naa Wurubuarɛ ŋon walaŋ bɛɛ naa e na ↄ sia ya nɛ nyi ↄ kpuɛ na e. 28Mosesi kelɛɛ keŋ ↄ be lɛɛ Wurubuarɛ di dↄↄ te ↄ baŋa ba nyeekelɛɛwee kedi keŋ daŋ, te ↄ yela ba koo wonembu te ba moo ↄ fatabo ŋmatee ba anaanↄↄse dↄↄ. Keŋ dↄↄ bɛɛ yɛɛ mena yɛna nyi, akpaa Wurubuarɛ kpilale ŋon de kↄŋ nyi ↄ kaa koe bia baala gyaŋgba nyibaŋ baŋ Igyipite tɛɛle man nɛ, na waa gbaa Iseraetena wui denɛɛ ŋan tina be bia baala baŋ yela. 29Iseraetena kelɛɛ keŋ bↄↄ lɛɛ Wurubuarɛ di dↄↄ, te be talewↄ ta Ɛpo yayam keŋ man toŋ ŋgba be dↄŋ bo tɛɛle dↄↄ nɛ. Mↄna debaŋ keŋ Igyipitetena mↄ ba gyoo nyi baa toŋ na, te boo keŋ wuuwↄ mo wↄ pou laŋ. 30Iseraetena kelɛɛ keŋ bↄↄ lɛɛ Wurubuarɛ di dↄↄ te be talewↄ ta kilisi Gyeriko donↄↄ weeya nyetooro, te dekyaŋ keŋ bↄↄ maa kilisi donↄↄ keŋ nɛ pou tekeriiwↄ yala. 31Futooli alo ŋolo kyaawↄ Gyeriko donↄↄ kenaŋ man keŋ bɛɛ baake e nyi Rahabo. Rahabo kei kelɛɛ keŋ ↄ be lɛɛ Wurubuarɛ di dↄↄ, debaŋ keŋ Mosesi be kpila tewulɛɛ nyi baa gyu ke kɛɛ Gyeriko donↄↄ keŋ kedoobii nɛ, ↄ lɛɛ tewulɛɛ benaŋ ŋↄↄlale. Mena dↄↄ debaŋ keŋ bↄↄ kaa koe balaŋ baŋ pou bↄↄ yɛɛ deŋele doŋ tia Wurubuarɛ donↄↄ kenaŋ man nɛ, be ta ko ŋon Rahabo ya lee ↄ kelɛɛdi dↄↄ. 32Nafↄ me dana nombia burum maa bese tↄlɛɛ fa ŋon. Mↄna debaŋ be doo fa maŋ na maa yako ŋon kolo lee beneŋtena ŋgba Gidiyↄn na Baraki na Samsen na Gyɛfeta na Defidi na Samuɛle na Wurubuarɛ akpeŋkpeŋgyↄↄra baŋ bↄↄ lɛɛ Wurubuarɛ di nɛ wose man bela ya. 33Lee ba kelɛɛ keŋ bↄↄ lɛɛ Wurubuarɛ di dↄↄ, be man baale talewↄ yoo di gyooneŋ dↄↄ te baale mↄ dii gyoori ke gbɛɛ dↄↄ, te baale mↄ nyiŋa abↄↄ ŋan Wurubuarɛ be yako see nyi waa fa wↄ nɛ. Baale mↄ dii laamantese dↄↄ keŋ ba te tale kyaŋ wↄ tao ya. 34Baŋ mↄ bↄↄ mo wↄ do boalaŋ degyapaa man nɛ leewↄ ke man keŋ ba te nyakee ya, te baale mↄ leewↄ be kↄlala nyiŋmaa man keŋ ba te tale ko wↄ ya. Baŋ mↄ nafↄ bↄↄ dana doŋ ya nɛ nyiŋa doŋ nideli yoo, te be dii be kↄlala pou dↄↄ keŋ ba te tale seŋ be siaman ya. 35Lee ala baale mↄ kelɛɛ keŋ bↄↄ lɛɛ Wurubuarɛ di dↄↄ, Wurubuarɛ gyuusu be balaŋ baŋ bↄↄ yekee nɛ lee yeŋ man fa wↄ. Be naase be man baale diyem yeŋ yeŋ, mↄna be te tina ba kelɛɛdi yela lee Wurubuarɛ wↄle ya. Nawolo nyi bɛɛ gyae nyi wee daale Wurubuarɛ ke gyuusu wↄ lee yeŋ man, na waa fa wↄ dekyae kpaakpaa keŋ ka kela tɛɛle kei dↄↄ wui. 36Lee baale mↄ kelɛɛ keŋ bↄↄ lɛɛ Wurubuarɛ di dↄↄ be naase wↄ diyem fulu wↄ do wↄ desɛŋ, te ba doo be man baale mↄ agbaraagbaraase mo wↄ ketↄ deni. 37Be fuŋii be man baale boya koe, te be bɛɛse be man baale yaaleŋ ala te ba moo silase koe baale. Namense na asoose tↄna te be man baale moowↄ wu ba wose, te be tɛɛwↄ na diyem te balaŋ kↄla wↄ naase wↄ diyem. 38Tekaboena nyi nafↄ mena balaŋ kɛwↄ baa kyaa tɛɛle kei dↄↄ kpu na nombiakumɛɛyɛɛra ya. Lee ba kelɛɛdi dↄↄ be naa diyem, te be tɛɛwↄ yeyɛɛ depampaa dinaa man na bulase dↄↄ ŋgba balaŋ baŋ yoo be gegi wↄ lee baŋ gbagba be tɛɛle man nɛ, te be tɛɛwↄ dokii boya bↄↄneŋ na tɛɛle bↄↄneŋ man. 39Wurubuarɛ kɛlɛɛ mena balaŋ kɛwↄ pou nideli lee ba kelɛɛ keŋ bↄↄ lɛɛ e di dↄↄ. Mↄna be man ŋolo na ŋolo te nyiŋ kpene keŋ ↄ be yako see nyi waa fa wↄ nɛ ya. 40Nawolo nyi Wurubuarɛ te desina kolo kpaakpaa keŋ ke dei kela gyaŋgbate keŋ nɛ see daa. Te ↄ kegyaebii yɛna nyi daa na wↄ pou de dinↄↄ dɛɛ yɛɛ dinↄↄ keŋ dukum kamasɛ be doo ke man ya.

will be added

X\