Hiburutena 10

1Mosesi mmaraase ŋan seŋɛɛ bo fa abↄↄ kpaakpaa ŋan dↄŋ wↄle kaa kↄŋ nɛ, ŋa te yɛɛ abↄↄ kpaakpaa ŋenaŋ gbagba ya. Lee kei dↄↄ kedeesase ŋan balaŋ ne deesi kulutoo kamasɛ ŋgba mena keŋ mmaraase ŋan ba wola wↄ nɛ, be gyae ke tale yela walaŋ gbɛɛneŋ ka tenee Wurubuarɛ siaman ya. 2Nyi ba kedeesase ŋenaŋ deŋ talewↄ yela be gbɛɛneŋ deŋ teneewↄ Wurubuarɛ siaman nɛ, nafↄ beŋ wulaa tinaa kedeesase ŋenaŋ yela. Nyi ŋe deŋ talewↄ lɛɛ wↄ nɛ, nafↄ bↄↄ tekaa wↄlɛɛ nyi Wurubuarɛ waa kaa wↄŋ ba deŋele lee be nombiakumɛɛ ŋenaŋ dↄↄ ya. 3Mↄna anokoare keŋ doo nombii kei man yɛna nyiaa, kulutoo kamasɛ na mena kedeesase ŋan bee deesi agbaatee agbaatee nɛ, na bese bo yela bɛɛ tↄↄse be nombiakumɛɛ ŋan bↄↄ yɛɛ kaalaŋ nɛ. 4Nawolo nyi nunkyuese na asoose fatabo, be gyae ke tale faafo dukum lee deniwalaŋ wose man ya. 5Lee mena dↄↄ debaŋ keŋ Kristo ne gyae waa kↄŋ tɛɛle kei dↄↄ nɛ, ↄ yako ↄ kya Wurubuarɛ nyiaa, "Na kedeesa na abↄↄ ŋan bɛɛ mo sola neŋ nɛ na gyoo na n sia ya. Wonembia katoo kedeesa, na dukum kasola kedeesa koraŋ bɛɛ gyoo n sia ya. Mↄna n te desina ma wosenaane na maa mo ke deesi fa neŋ. 7Mena dↄↄ, 'Me Gbeŋgyoo maŋ yaa. Me kↄŋae me kaa yɛɛ n kegyaebii, ŋgba mena keŋ bↄↄ ŋmarase ma wose man nombia do n nombia aŋmaraseŋ see ŋan man nɛ.' " 8Kristo taŋ wulaa yako kaalaŋ nyiaa, "Wurubuarɛ bɛɛ gyae kedeesa na abↄↄ ŋan bɛɛ mo sola e na wonembia katoo kedeesa na dukum kasola kedeesa ya, te ŋe bɛɛ gyoo ↄ sia mↄ ya." Mↄna kɛŋa pou yɛɛ kpene keŋ Mosesi mmaraase ŋan na wolo nyi baa yɛɛ. 9Botↄↄ te Kristo besewↄ yako nyiaa, "Me Gbeŋgyoo maŋ yaa. Me kↄŋae me kaa yɛɛ n kegyaebii." Kei nawolo baa nyi Wurubuarɛ te bɛɛ kedeesa gyaŋgbate keŋ, te ↄ moo Kristo wui keŋ ↄ ba mo ↄ wose deesi nɛ kaa see ke nawↄↄ man. 10Wurubuarɛ kegyaebii keŋ Kristo be kↄŋ kaa yɛɛ mo ↄ wose deesi karatetee dokoloŋ kekpaakekpaa nɛ, keŋ lese na da ayimɛɛ desina daa see fa Wurubuarɛ. 11Wee na wee na, Gyudatena saese baŋ gyakaa bee deesi kedeesa dokoloŋ kenaŋ agbaatee agbaatee. Mↄna ŋe bɛɛ tale lese dukum lee deniwalaŋ wose man ya. 12Mↄ Kristo dↄↄ ŋon moo ↄ wose deesi fa Wurubuarɛ karatetee dokoloŋ kekpaakekpaa, na waa mo lese de nombiakumɛɛ. Kenaŋ wↄle na te ↄ ke kyaawↄ Wurubuarɛ dunoluŋ dↄↄ adido. 13Lee mena debaŋ kenaŋ pou nɛ, ↄ sɛɛ ↄ kyaa botↄↄ ↄ ne daa wee keŋ Wurubuarɛ waa mo ↄ kↄlala pou do e ↄ nawↄↄ tɛɛ nɛ. 14Kristo kedeesa keŋ ↄ ba mo ↄ wose deesi fa Wurubuarɛ dↄↄ nɛ, te yeli balaŋ baŋ pou ↄ be baake wↄ te ↄ be desina wↄ see fa ↄ wose nɛ, ta bese balaŋ baŋ ayimɛɛ be doo be man ya nɛ kekpaakekpaa. 15Wurubuarɛ feliŋ ŋon gbagba mↄ ne di adansɛɛ lee mena nombia kɛŋa wose man, ŋgba mena keŋ bↄↄ ŋmarase Wurubuarɛ nombia aŋmaraseŋ see man nɛ nyiaa. 16Wurubuarɛ kpa, "Nↄↄkebakesee keŋ maŋ ɛ Gbeŋgyoo Wurubuarɛ na me balaŋ be bake see yɛna nyiaa, Debaŋ daale de lii na, maa mo ma mmaraase ŋan do be konↄↄse na ba nyeeya man." 17Keŋte ↄ besewↄ yako nyiaa, "Mↄↄ gyae maa tↄↄse be nombiakumɛɛ na be nombia nkaraŋkaraŋ ŋan bↄↄ yɛɛ nɛ bela ya." 18Te nyi akpaa Wurubuarɛ ta mo de nombiakumɛɛ kyɛɛ daa na, ta tekaa kaboena nyi dɛɛ bese deesi fa e lee de nombiakumɛɛ dↄↄ bela ya. 19Me tebia, lee Yesu yeŋ keŋ dↄↄ de te nyiŋ gbɛɛ keŋ dɛɛ tale gyoo Wurubuarɛ ↄsom deni dinaa tↄↄmante keŋ man yakaa. 20Nɛnɛɛ dɛɛ tale gbaa kanyaŋ keŋ bↄↄ mo kpase deni dinaa keŋ man nɛ. Nawolo nyi Yesu ta mo ↄ wose deesi mo toro gbɛɛ wↄle keŋ na mo daa gyu nyeedoŋ wↄle keŋ man nɛ fa daa. 21Nɛnɛɛ de te nyiŋ Wurubuarɛ sae kegyia dekpatakpere ŋon daa Wurubuarɛ balaŋ pou doo ↄ nyiŋmaa man. 22Mena dↄↄ ɛ yela dɛɛ mo konↄↄ kpaakpaa tuu benaa Wurubuarɛ, na dɛɛ kyaŋ kelɛɛdi keŋ dↄↄ lɛɛdi nɛ man keŋkeŋ. Ɛ yela dɛɛ yɛɛ balaŋ baŋ bↄↄ gberaa be nombiakumɛɛ lee ba wose man keŋ bↄↄ tekaa wↄlɛɛ na ŋa bela ya, na dɛɛ yɛɛ balaŋ baŋ bↄↄ mo Wurubuarɛ loŋ faafo da ayimɛɛ pou leki nɛ. 23Ɛ yela dɛɛ kyaŋ nombia ŋan dↄↄ lɛɛdi te de loo gyakaa ŋe dↄↄ nɛ man keŋkeŋ keŋ dↄↄ lee de wↄle ya. Nawolo nyi Wurubuarɛ de yako nombii see na, ↄ bɛɛ lee ke wↄle ya. Mena dↄↄ abↄↄ ŋan ↄ be yako see nyi waa yɛɛ fa daa nɛ, waa yɛɛ ŋa fa daa. 24Mena dↄↄ ɛ yela dɛɛ gyueŋ mena keŋ dɛɛ do dↄŋa kakyeŋ, na dɛɛ gyae dↄŋa na dɛɛ yɛɛ nombia kpaakpaa fa dↄŋa. 25Ɛ na yeli dee tina kegyaŋee som ŋgba Kristotena nɛ yela, ŋgba mena keŋ baale ba mo ke yɛɛ be dinↄↄ nɛ ya. Mↄna ɛ yela dɛɛ kyaa gyaŋee na dɛɛ do dↄŋa kakyeŋ nideli, tuturu na nɛnɛɛ keŋ dↄↄ naa nyi de Gbeŋgyoo Yesu wee dinaa keŋ ↄ be yako see nyi waa bese kↄŋ na benaa nɛ. 26Akpaa nyi ŋolo gyeŋ nyeedoŋ nombia gbagba ŋan te ↄ bese naa na sia yɛɛ nombiakumɛɛ nɛ, kenaŋ na kedeesa daale be kyaa keŋ ↄtenate waa deesi fa Wurubuarɛ, na Wurubuarɛ ka mo ↄ nombiakumɛɛ kyɛɛ e bela ya. 27Mↄna ↄtenate waa kyaa bo na wↄe kelↄ ↄ ne daa nombia kedi wee, na boalaŋ degyapaa keŋ gyae kaa kpa balaŋ baŋ pou bↄↄ koro seŋ tia Wurubuarɛ nɛ. 28Gyaŋgba gyaŋgba keŋ nɛ, akpaa ŋolo te di Mosesi mmaraase ŋan dↄↄ ya te balaŋ bala yaa batooro de di adansɛɛ tia e nɛ, bɛɛ ko ↄtenate keŋ bↄↄ ne wii ↄ waraŋase ya. 29Akpaa mena te doo nɛ, kenaŋ na deŋele keŋ baa wↄŋ walaŋ ŋon ↄ ta mo Wurubuarɛ bu ŋon nombia ŋan yɛɛ kolo ya nɛ, ka dokoso be kyaa ya. Baa wↄŋ ↄtenate deŋele nideli, nawolo nyi ↄ nombia ayɛɛsa nawolo baa nyiaa Yesu fatabo keŋ ↄ ba mo tↄ nↄↄkebakesee wↄle keŋ nↄↄ, te ↄ ba mo gberaa da ayimɛɛ lee da wose man nɛ be dana tↄnↄↄ fa e ya, te ↄ ta mo Wurubuarɛ feliŋ ŋon ↄ na mo ↄ bɛrɛɛ boele balaŋ mↄ nɛ yɛɛ kolo ya. 30Nawolo nyi da gyeŋ nyi Wurubuarɛ yakowↄ nyiaa, "Maŋ ne gyae la maa tↄ me balaŋ kom lee be nombiakumɛɛ dↄↄ." Wurubuarɛ nombia aŋmaraseŋ see na bese yako nyiaa, "De Gbeŋgyoo Wurubuarɛ ne gyae la waa di ↄ balaŋ nombia." 31Ke gyae ke yɛɛ gyakoloŋ, nyi ŋolo ke yala Wurubuarɛ ŋon ↄ kyaa kekpaakekpaa nɛ nyiŋmaa man. 32Ɛ tↄↄse debaŋ keŋ ɛ be taŋgbɛɛ lɛɛ Wurubuarɛ nombia ŋan di kewalaŋ nɛ. Nombia dinaana yala ŋon, mↄna ɛ kyaŋa ɛ wose seŋ keŋkeŋ di ŋe dↄↄ. 33Weeya ŋaale man na bɛɛ tee ŋon, fulu ŋon balaŋ man. Ŋaale man mↄ na, ɛ na sem ɛ tebia baŋ bɛɛ naase wↄ diyem nɛ wↄle, naa diyem ŋgba baŋ mↄ nɛ. 34Ɛ wii ɛ tebia baŋ bↄↄ kyaŋ wↄ tↄ deni nɛ waraŋase. Be lɛo ya abↄↄ koraŋ na ɛ ta ko ɛ wose ya, mↄna ke yɛɛ ŋon gyoŋ bo, nawolo nyi ɛ gyeŋ nyi ɛ dana abↄↄ kpaakpaa ŋan ŋa kela tɛɛle kei dↄↄ abↄↄ, te ŋe doo fa ŋon kekpaakekpaa nɛ. 35Mena dↄↄ ɛ na yeli ɛ wose ke yↄkↄse ŋon Wurubuarɛ ↄsom keŋ man ya. Ɛ kyaŋ nombia ŋan ɛ be lɛɛdi nɛ man keŋkeŋ, nawolo nyi wee daale Wurubuarɛ waa tↄ ŋon kom. 36Kaboena nyi yaa yɛɛ kakyeŋ seŋ keŋkeŋ na ɛ ke nyiŋ tale yɛɛ Wurubuarɛ kegyaebii. Ɛ yɛɛ mena na ɛ ke nyiŋ kpene keŋ ↄ be yako see nyi waa fa ŋon nɛ. 37Nawolo nyi Wurubuarɛ nombia aŋmaraseŋ see ŋan ne yako nyiaa, "Be gyae ke kyare ya, walaŋ ŋon kaboena nyi waa kↄŋ nɛ waa kↄŋ. Ↄ be gyae waa dↄↄ wↄle na kekↄŋ ya. 38Me balaŋ baŋ be gbɛɛneŋ tenɛɛ me siaman nɛ, lee ba kelɛɛdi dↄↄ te baa nyiŋ nyeedoŋ kyaa. Mↄna akpaa be man ŋolo ta seŋ ↄ kelɛɛdi man keŋkeŋ ya te ↄ lee ↄ wↄle na, ↄ nombia be gyae ka gyoo me sia ya." 39Daa te yɛɛ balaŋ baŋ bↄↄ lee Wurubuarɛ wↄle, te baŋ na e nsana be tiri kekpaakekpaa nɛ ya. Mↄna daa yɛna balaŋ baŋ dↄↄ lɛɛ Wurubuarɛ di, te ↄ be lɛɛ da nyee nɛ.

will be added

X\