Galatiatena 5

1Kristo te lɛɛ da nyeeya yela de te nyiŋ da wose bese gyoorobia. Mena dↄↄ kaboena nyi yaa seŋ ɛ kelɛɛdi keŋ man keŋkeŋ. Ɛ na fa ŋolo gbɛɛ na waa besena ŋon yɛɛ ↄ gbeŋa bela ya. 2Ɛ tei me nↄↄwoya nideli. Maŋ Pↄↄl ne yako na ŋon nombia kɛŋa nɛ nyiaa, akpaa ɛ fa gbɛɛ nyi baa kara ŋon ɛ baala wose ŋgba mena keŋ Mosesi mmaraase ŋan nawolo nɛ, na nawolo baa nyi kpene keŋ Kristo be yɛɛ nɛ be taŋ tↄnↄↄ fa ŋon korakora ya. 3Mɛɛ yako ŋon ɛ ke nyii nideli bela nyiaa, akpaa ɛ man ŋolo de fa gbɛɛ nyi baa kara e ↄ baala wose nɛ, kenaŋ na kaboena nyi ↄtenate dee di Mosesi mmaraase ŋan pou dↄↄ. 4Akpaa ɛ man ŋolo de yɛɛ kakyeŋ nyi ↄ ne di Mosesi mmaraase ŋan dↄↄ na Wurubuarɛ ke nyiŋ lɛɛ e do nɛ, kenaŋ na nawolo baa nyi ↄtenate te tira ↄ wose lee Kristo man. Mena ke mↄ yaa ↄtenate te tira ↄ wose lee Wurubuarɛ bɛrɛɛ keŋ ↄ na mo boele balaŋ nɛ man. 5Daa dↄↄ, Wurubuarɛ feliŋ ŋon doŋ man dↄↄ de loo gyakaa nyi Wurubuarɛ waa lɛɛ daa do nyi de gbɛɛneŋ tenee ↄ siaman, nawolo nyi dɛɛ lɛɛ Kristo di. 6Yesu Kristo kelɛɛdi be famenɛ nyi ŋolo kara ↄ baala wose yaa ↄ te kare ya. Mↄna kpene keŋ ne hia yɛna nyi dɛɛ lɛɛ Yesu Kristo di, na dɛɛ gyae Wurubuarɛ na de tebia. 7Kewalaŋ keŋ na, nafↄ ɛ ne yɛɛ nombia kpaakpaa lee ɛ kelɛɛdi keŋ man. Nɛnɛɛ amↄte beo na ŋon te ɛ tinaa anokoare keŋ kesila yela? 8Ma gyeŋ nyi mena kabeo kei ta lee Wurubuarɛ gyaŋ ya. Nawolo nyi ŋon baake na ŋon nyi ɛ kaa bese ↄ bia. 9Mena keŋ bɛɛ mo bodobodo tee kyomii do bodobodo biliŋ man te ne yeli kɛɛ koro nɛ, mena ke mↄ te nombiikum bii gyae ke tale beo balaŋ burum. 10Mↄna mɛɛ lɛɛ de Gbeŋgyoo Yesu di nyiaa, ɛ be gyae ɛ ka lee me wↄle ke lɛɛ nombii wↄle daale di bela ya. Walaŋ kamasɛ ŋon waa yela ɛ ka lee me wↄle ke lɛɛ nombii wↄle daale di na, ↄtenate yɛɛ woŋ e o, ↄ te yɛɛ woŋ e ya o nɛ, Wurubuarɛ waa wↄŋ ↄ deŋele. 11Me tebia, nyi akpaa me gyakaa mee kolosi nyi yaa kara ɛ baala wose pɛte Wurubuarɛ ke lɛɛ ŋon do ŋgba mena keŋ Gyudatena mmaraase ŋan nawolo na, woŋ dↄↄ te bɛɛ naase maŋ diyem? Nyi meŋ ne kolosi baa nyi, kaboena nyi walaŋ waa kara ↄ baala wose pɛna Wurubuarɛ ke lɛɛ e do nɛ, nafↄ Gyudatena be gyae baa naase maŋ diyem nyi mee kolosi Kristo yeŋ keŋ ↄ ba yem ↄpaŋdaŋ dↄↄ nɛ nombia ya. 12Balaŋ baŋ be dana baala wose kekara nombia bɛɛ naase ŋon diyem nɛ, nafↄ maŋ kegyaebii yɛna nyi baa gyeŋ gyu ka lese ba wose saayɛ gba. 13Me tebia, ɛmɛɛ dↄↄ Wurubuarɛ baake ŋon bo nyi ɛ kaa bese gyooro bia. Mↄna ɛ na yeli ɛ gyoorobiiri keŋ ke fa ŋon gbɛɛ na ɛ ke yela ɛ lookum ke di ɛ dↄↄ ya. Ɛ mo balaŋ kegyae gyae dↄŋa na ɛ ke kyↄ dↄŋa. 14Mosesi mmaraase ŋan pou seŋɛɛ bo nombii dokoloŋ dↄↄ. Keŋ yɛna nyiaa, "Gyae n dↄↄ ŋgba nyaŋ gbagba n wose nɛ." 15Mↄna nyi akpaa ɛ sɛɛ ɛ ne yoo na dↄŋa ŋgba wonembia kumɛɛ na, kenaŋ na ɛ kɛɛ ɛ wose nideli. Na mena ya na, ɛ ka koe dↄŋa munu. 16Mena dↄↄ mɛɛ yako ŋon baa nyiaa, ɛ yela Wurubuarɛ feliŋ ŋon ke ta ɛ siaman lee kpene kamasɛ keŋ ɛ ne yɛɛ nɛ man. Akpaa ɛ yɛɛ mena na, ɛ ba tekaa sila ɛmɛɛ gbagba nombiakumɛɛ ŋan ɛ ne gyae nɛ ya. 17Nawolo nyiaa, abↄↄ ŋan deniwalaŋ kegyaebii keŋ ne gyae waa yɛɛ nɛ, na ŋan te Wurubuarɛ feliŋ ŋon ne gyae nyi waa yɛɛ ya. Wurubuarɛ feliŋ ŋon na deniwalaŋ kegyaebii keŋ bɛɛ gyoo ya. Lee mena dↄↄ ɛmɛɛ be gyae ɛ ke tale yɛɛ ɛ kegyaebii ya. 18Mↄna akpaa ɛ yɛɛ kpene keŋ Wurubuarɛ feliŋ ŋon ne gyae nyi yaa yɛɛ na, kenaŋ na ɛ ba tekaa doo Gyudatena mmaraase ŋan tɛɛ bela ya. 19Abↄↄ ŋan deniwalaŋ kegyaebii ne gyae nyi waa yɛɛ nɛ, ŋe bɛɛ weese ya. Ŋan yɛna nyi n ka lee n wɛɛle yaa n baale wↄle, yaa n ka mo ayimɛɛ wuu n wose, yaa desɛŋ nombia keyɛɛ. 20Ŋaale mↄ yɛna bane ↄsom, na yolo nombia, na balaŋ kekↄla, na kale kegyae, na daaworo nombia, na baŋ kagyeŋ, na kedikum, na aŋmaareŋ nombia, na dↄŋa wↄle kalee. 21Ŋaale mↄ yɛna sibii, na soloŋ kenyↄↄ dɛɛse, na nↄↄkedi keŋ ayoi kumɛɛ doo ke man, na nombia nkaraŋkaraŋ keyɛɛ, na nombiakumɛɛ ŋan pou ŋe yɛɛ ŋgba kɛŋa dinↄↄ nɛ. Mɛɛ faree ŋon baa bela ŋgba mena keŋ mↄↄ wulaa faree ŋon kaalaŋ nɛ nyiaa, walaŋ kamasɛ ŋon ↄ ne yɛɛ mena abↄↄ kɛŋa na, ↄ be gyae waa nyiŋ gbɛɛ gyu Wurubuarɛ gyoorobiiri keŋ man ya. 22Mↄna nyi Wurubuarɛ feliŋ ŋon de kↄŋ kaa doo n man na, abↄↄ ŋan ↄ ne yeli n ne nyim yɛna, balaŋ kegyae, na kenyaŋee, na wosefɛɛreŋ, na konↄↄ kenyiŋ, na wↄe keyɛɛ, na deeli keyɛɛ, na anokoare kedi, 23na wose keyↄkↄse, na wose dↄↄ kedi. Mmaraa kamasɛ be kyaa keŋ ne tↄ mena abↄↄ kↄŋa keyɛɛ ya. 24Baŋ pou be yɛɛ Yesu Kristo balaŋwↄ nɛ, be te tina be nombiakumɛɛ na lookum keŋ pou doo be man nɛ yela. 25Wurubuarɛ feliŋ ŋon te fa daa nyeedoŋ wↄle. Mena dↄↄ kaboena nyi dɛɛ yela feliŋ ŋonaŋ ka wola daa gbɛɛ keŋ man dɛɛ kyaa de dinↄↄ wↄle kenaŋ man. 26Mena dↄↄ ɛ na yeli dɛɛ gate da wose adido, yaa dɛɛ do dↄŋa baŋ yaa de sia keyɛɛ dↄŋa abↄↄ ya.

will be added

X\