Galatiatena 4

1Ɛ yela maa mo me nombii ma aneyakoŋ kei maa na nombia kɛŋa wola ŋon kpene keŋ mɛɛ gyae maa yako nɛ. Nyi abↄↄ diiri sɛɛ ↄ yɛɛ biikyaa e nɛ, na yɛɛ yaa ŋgba ↄ yɛɛ gbeŋi e nɛ. Be famenɛ nyi abↄↄ ŋan pou yɛɛ ↄ wui ya. 2Nawolo nyi debaŋ keŋ ↄ sɛɛ ↄ yɛɛ biikyaa e nɛ, ↄ doe kegyiise baale nyiŋmaa man. Baŋ ne gyae la baa kɛɛ ŋon na abↄↄ ŋan pou dↄↄ, kelii debaŋ keŋ ↄ kya ba see nyi baa mo abↄↄ ŋan do e ↄ nyiŋmaa man nɛ. 3Nafↄ mena ke te daa mↄ doo. Nawolo nyi debaŋ keŋ da te lɛɛ ta Yesu nombia ŋan di ya nɛ, na tɛɛle kei dↄↄ nombia ne diina de dↄↄ lee da kekyaabii man ŋgba gbeŋa nɛ. 4Mↄna debaŋ keŋ Wurubuarɛ ba see nɛ kelii na, ↄ kpila ŋon gbagba bu kↄŋ tɛɛle kei dↄↄ te ↄ yela alo lola e. Mena debaŋ kenaŋ na, balaŋ doo bo Gyudatena mmaraase ŋan tɛɛ. 5Wurubuarɛ kpila ↄ bu kei bo nyi waa kↄŋ kaa tↄ de nombiakumɛɛ pou kom, na waa lese daa lee mmaraa keŋ doŋ tɛɛ, na dee nyiŋ bese Wurubuarɛ bia gbagba. 6Nɛnɛɛ keŋ dↄↄ bese Wurubuarɛ bia dↄↄ nɛ, ↄ te yeli ↄ bu ŋon feliŋ ŋon te kaa kyaa de konↄↄse man. Feliŋ ŋonaŋ ne yele la te dɛɛ tale baake Wurubuarɛ nyi "De kya" nɛ. 7Lee mena dↄↄ ɛ te yɛɛ gbeŋawↄ bela ya, mↄna nɛnɛɛ dↄↄ ɛ ta bese Wurubuarɛ bia. Te lee mena keŋ ɛ ba bese Wurubuarɛ bia dↄↄ, ɛ ke nyiŋ abↄↄ ŋan pou waa mo fa ↄ bia nɛ. 8Gyaŋgba keŋ ɛ ta gyeŋa ta Wurubuarɛ ya nɛ, na ɛ na som bɛɛneŋ ŋan nafↄ tekaboena nyi yaa som ŋa ya nɛ te ɛ bese ŋe gbeŋa. Bane mↄ te yɛɛ Wurubuarɛ e keŋ kaboena nyi yaa som e ya. 9Mↄna nɛnɛɛ keŋ ɛ be kaa gyeŋ Wurubuarɛ, yaa maa yako nyi nɛnɛɛ keŋ ŋon Wurubuarɛ ba gyeŋ ŋon nɛ, woŋ dↄↄ te ɛ ne gyae ɛ ka bese ke sila tɛɛle kei dↄↄ waraŋase abↄↄ ŋan ŋↄↄ taŋ doŋ ya nɛ? Ɛ ne gyae baa nyi ɛ ka bese ke doo mena abↄↄ ŋenaŋ tɛɛ ŋgba gbeŋa nɛ bela? 10Me te nyii nyi ɛ ne di Gyudatena ↄsom weeya na gyaalaŋna na debaŋse na kulutooneŋ kpaakpaa ŋaale ŋgba mena keŋ ba mmaraase na wolo nɛ. Ɛ ne yɛɛ kɛŋa pou nɛ, na ɛmɛɛ gyeŋ nyi Wurubuarɛ kegyaebii yaa ɛ ne yɛɛ nɛ. 11Ɛ nombia ayɛɛsa dana maŋ gyakoloŋ. Ne yɛɛ maŋ nyi diyem keŋ mↄↄ naa yɛɛ tom ɛ gyaŋ nɛ pou te yɛɛ yakaa. 12Me tebia, mɛɛ waase ŋon bo nyi ɛ kasee maŋ. Nawolo nyi keŋ na ma keyɛɛ Gyuda baale koraŋ nɛ, ma moo ma wose ŋgba ɛ man ŋolo nɛ keŋ nyi mↄↄ na tekaa di Gyudatena mmaraase ŋan dↄↄ ya. Ɛ te yɛɛ ta kolo kum mↄ tia maŋ ya. 13Ɛ tↄↄse nyi ma kekↄŋ ɛ gyaŋ gyaŋgbate keŋ nɛ, kawee yele la te me nyiŋa gbɛɛ kolosi Kristo nombia kpaakpaa ŋan fa ŋon. 14Doo nyi na me kawee kenaŋ yɛɛ kateesa ke fa ŋon, mↄna ɛ te ŋmanyaŋ maŋ ya te ɛ te bɛɛ maŋ mↄ ya. Ɛ lɛɛ maŋ ŋgba Wurubuarɛ kpilale ŋolo lee la adido kↄŋ nɛ, yaa ŋgba maŋ yɛna Yesu Kristo ŋon gbagba nɛ. 15Mena debaŋ kenaŋ na me naawↄ nyi gyoŋ daale doo ɛ man keŋ nyi nafↄ yeŋ nyiŋa gbɛɛ koraŋ na, yeŋ kulii ɛmɛɛ gbagba ɛ siabia do maŋ. Nɛnɛɛ mena gyoŋ kenaŋ laŋa aleŋ? 16Keŋ mↄↄ yako ŋon anokoare keŋ dↄↄ na, me ta bese ɛ kↄlare? 17Balaŋ baŋ bɛɛ beo yɛɛ ba wose nyi be yɛɛ Kristotenawↄ nɛ, bɛɛ gyae bo nyi baa beo ŋon na ɛ kaa di Gyudatena mmaraase ŋan dↄↄ, mↄna ŋa be gyae ke yɛɛ tↄnↄↄ kamasɛ fa ŋon ya. Bɛɛ gyae bo nyi baa tira daa na ŋon nsana, na ɛ ke nyiŋ mo ɛ loo pou gyakaa be dↄↄ. 18Akpaa ɛ yase ɛ sia te ɛ ne yɛɛ kolo kpaakpaate na ke dei. Mↄna kaboena nyi yaa yɛɛ ke debaŋ kamasɛ. Te yɛɛ nyi me kyaa ɛ gyaŋ kaageŋ te ɛ ke yɛɛ ke ya. 19Me bia kpaakpaa, mena keŋ alo na doŋee te ↄ ne naa diyem nɛ, mena yaa mɛɛ naa diyem lee ɛmɛɛ dↄↄ. Te maa naa mena diyem kei kelii debaŋ keŋ ɛ ke nyiŋ Kristo dinↄↄ keŋ. 20Ma kegyaebii yɛna nyi nafↄ na me kyaa ɛ gyaŋ, na maa kyɛɛkee ma kekolosi na ke kyaa na ɛ kegyaebii. Nawolo nyi ɛ nombia ayɛɛsa dana maŋ gyakoloŋ. 21Ɛ yela maa bↄↄse ŋon nombii kei. Ɛmɛɛ baŋ ɛ ne gyae nyi ɛ ke doo Mosesi mmaraase ŋan tɛɛ nɛ, gbagbaagba na ɛ gyeŋ kpene keŋ mmaraase ŋan ne yako? 22Wurubuarɛ nombia aŋmaraseŋ see ne yako nyiaa, Aberaham lola bia baala bala. Be man ŋolo ↄ naa yɛɛ gbeŋi e, te ŋolo mↄ ↄ naa yɛɛ gyoorobu e. 23Aberaham bu ŋon gbeŋi ŋon ba lolo fa e nɛ, ba lola e bo ŋgba mena keŋ alo kamasɛ ne taŋ lolo nɛ. Mↄna ŋon gyooro bu ŋon ba lolo fa e nɛ dↄↄ, Wurubuarɛ wulaa yakowↄ see nyi baa lola e pɛte be kaa lola e. 24Mena nombia kɛŋa yɛɛ dudu ke keŋ na lese nombia ŋaale wola. Ala bala kɛwↄ seŋɛɛ fa nↄↄkebakesee ala ŋan Wurubuarɛ be bake see fa ↄ balaŋ nɛ. Nↄↄkebakesee keŋ ba lee Sinai bula dↄↄ nɛ, keŋ seŋɛɛ la fa alo ŋon bɛɛ baake e nyi Haga nɛ. Ↄ bia yɛna balaŋ baŋ Mosesi mmaraase ŋan ba besena wↄ yɛɛ gbeŋa nɛ. 25Haga seŋɛɛ fa Sinai bula keŋ ke kyaa Arebia tɛɛle man nɛ. Ↄ yɛɛ ŋgba gyɛŋ wee kei Gyerusalɛm nɛ. Mosesi mmaraase ŋan ta besena ke man balaŋ baŋ pou yɛɛ gbeŋa. 26Mↄna Gyerusalɛm keŋ ke kyaa adido nɛ, keŋ yɛɛ ŋgba gyooro bu ŋon bɛɛ baake e nyi Saara nɛ. Ke man bia be doo mmaraase kamasɛ tɛɛ ŋgba gbeŋa nɛ ya. Saara ŋonaŋ yɛna daa baŋ dↄↄ doo Gyudatena mmaraase tɛɛ ya nɛ de naa. 27Nawolo nyi Wurubuarɛ nombia aŋmaraseŋ see ne yako nyiaa, "Nyaŋ ↄlamanbo ŋon n ta lola ta see ya nɛ, yela ke yɛɛ neŋ gyoŋ. Nyaŋ ŋon n ta doŋee ta see ya nɛ, yela ke yɛɛ neŋ gyoŋ na n ke lↄ akelelee. Doo nyi n baale ta lese ↄ sia lee n dↄↄ, mↄna maa yela waa bese kↄŋ n gyaŋ na n bia ke wuku kela ŋon ↄ kyaa yale tɛɛ nɛ." 28Me tebia Kristotena, ɛ yɛɛ ŋgba Asiki nɛ. Nawolo nyi mena keŋ Wurubuarɛ be wulaa yako ↄ nombia see pɛte bↄↄ kaa lola e nɛ, mena yaa ↄ yakowↄ see te daa mↄ kaa bese ↄ bia nɛ. 29Debaŋ kenaŋ man na, bu ŋon bↄↄ lola e ŋgba mena keŋ bɛɛ lola walaŋ kamasɛ nɛ, naase bu ŋon bↄↄ tɛɛ Wurubuarɛ feliŋ ŋon doŋ man lola e nɛ diyem. Mena ke yaa sɛɛ doo kaa lii gyɛŋ wee kei nɛ. 30Mↄna sena te Wurubuarɛ nombia aŋmaraseŋ see ŋan ne yako? Nombia ŋan yakowↄ nyiaa, "Gegi gbeŋi ŋon na ↄ bu, nawolo nyi tekaboena nyi gbeŋi bu ŋon waa di ↄ kya abↄↄ kpu na gyooro bu ŋon ya." 31Mena dↄↄ me tebia, da te yɛɛ gbeŋi ŋon biawↄ ya. De yɛɛ gyooro bu ŋon biawↄ.

will be added

X\