Galatiatena 3

1Ɛmɛɛ Kristotena baŋ ɛ kyaa Galatia donↄↄ man nɛ, weera te ɛ ne yɛɛ abↄↄ ŋgba ayiŋtena nɛ? Amↄ tulii na ɛ nyeeya te ɛ bɛɛ naa anokoare keŋ ya nɛ? Na ɛ popou siaman te me kolosi Yesu Kristo wose man nombia fa ŋon nideli nyi, ɛmɛɛ dↄↄ te be gyↄↄ e ↄpaŋdaŋ dↄↄ te ↄ yeŋawↄ yee? 2Ɛ tira nombii kei nↄↄ fa maŋ. Mmaraase ŋan kedi yele la te ɛ nyiŋa Wurubuarɛ feliŋ ŋon yaa, nyeekelɛɛ nombia ŋan dↄↄ kolosi fa ŋon te ɛ be lɛɛ ŋa di nɛ dↄↄ? 3Sena yaa ɛ gyimwↄ mena? Ɛ fiasɛɛ nideli ɛ ne sila Wurubuarɛ feliŋ ŋon gbɛɛneŋ. Nɛnɛɛ weera dↄↄ te ɛ ne gyae ɛ ka mo denibalaŋ gbɛɛneŋ tↄↄle ke? 4Kenaŋ na nawolo baa nyi ɛ diyem keŋ ɛ be naa lee ɛ Wurubuarɛ ↄsom man nɛ yɛɛ yakaa baa? Koa, mↄↄ ne lɛɛ di nyi ke yɛɛ yakaa ya. 5Mosesi mmaraase ŋan ɛ be di ŋe dↄↄ nɛ dↄↄ te Wurubuarɛ moo ↄ feliŋ ŋon do ɛ man te ↄ yɛɛ gyakoloŋ nombia ɛ man? Yaa keŋ ɛ be nyii nyeekelɛɛ nombia ŋan te ɛ be lɛɛ ŋa di nɛ dↄↄ? 6Ɛ tↄↄse balee ŋon bɛɛ baake nyi Aberaham nɛ wose man nombia. Wurubuarɛ nombia aŋmaraseŋ see ne yako yenaŋ daale lee Aberaham wose man nyiaa, "Aberaham lɛɛ Wurubuarɛ bo di, mena dↄↄ te Wurubuarɛ lɛɛ e do nyi ↄ gbɛɛneŋ tenɛɛ ŋon Wurubuarɛ siaman." 7Mena dↄↄ kaboena nyi yaa gyeŋ nyiaa, balaŋ baŋ bↄↄ lɛɛ Wurubuarɛ di ŋgba mena keŋ Aberaham be lɛɛ Wurubuarɛ di nɛ, baŋ yɛna Aberaham duuluŋ man balaŋ gbagba. 8Wurubuarɛ nombia aŋmaraseŋ see ŋan wulaa yakowↄ see lee gyaŋgba gyaŋgba keŋ pɛte nombia ŋenaŋ kↄŋawↄ mena nyiaa, akpaa balaŋ baŋ ba te yɛɛ Gyudatenawↄ ya nɛ de lɛɛ ŋon Wurubuarɛ di na, ŋon mↄ waa lɛɛ wↄ do nyi be gbɛɛneŋ tenɛɛ ↄ siaman. Wurubuarɛ wulaa yakowↄ see fa Aberaham nyiaa, "Lee nyaŋ dↄↄ te maa hiraa tɛɛle kei dↄↄ balaŋ pou." 9Lee mena dↄↄ balaŋ baŋ pou baa lɛɛ Wurubuarɛ di ŋgba mena keŋ Aberaham be lɛɛ e di nɛ, Wurubuarɛ waa hiraa wↄ ŋgba mena keŋ ↄ be hiraa Aberaham nɛ. 10Walaŋ kamasɛ ŋon ↄ yako nyi ↄ ne di Mosesi mmaraase ŋan dↄↄ na ↄ gbɛɛneŋ ke nyiŋ tenee Wurubuarɛ siaman na, Wurubuarɛ waa falaa ↄtenate. Nawolo nyi Wurubuarɛ nombia aŋmaraseŋ see ŋan ne yako nyiaa, "Walaŋ kamasɛ ŋon ↄ te di kpene kamasɛ keŋ bↄↄ ŋmarase do Mosesi mmaraa tↄne keŋ man nɛ dↄↄ kelii ↄto ya na, Wurubuarɛ waa falaa e" 11Nombii na anokoare yɛna nyiaa, Wurubuarɛ bɛɛ lɛɛ ŋolo do nyi ↄ gbɛɛneŋ tenɛɛ ŋon Wurubuarɛ siaman nyi keŋ ↄtenate ne di Mosesi mmaraase ŋan dↄↄ nɛ dↄↄ ya. Nawolo nyi Wurubuarɛ nombia aŋmaraseŋ see ne yako nyiaa, "Walaŋ kamasɛ ŋon lee ↄ kelɛɛdi dↄↄ te ↄ gbɛɛneŋ da tenee Wurubuarɛ siaman na, Wurubuarɛ waa lɛɛ ↄtenate nyee." 12Nyi akpaa ŋolo da mo ↄ wose lↄ Mosesi mmaraase ŋan dↄↄ te ↄ yase ↄ sia ↄ ne di ŋe dↄↄ na, kenaŋ na bɛɛ tekaa hia nyi ↄtenate dɛɛ lɛɛ Wurubuarɛ di pɛna waa nyiŋ nyeekelɛɛ ya. Nawolo nyi Wurubuarɛ nombia aŋmaraseŋ see ne yako nyiaa, "Walaŋ ŋon ↄ ne di Mosesi mmaraase ŋan dↄↄ nideli na, waa nyiŋ nyeedoŋ kekpaa bo lee mmaraase ŋan kedi dↄↄ" 13Mosesi mmaraase ŋan te yeli Wurubuarɛ te falaa daa, nawolo nyi de bɛɛ tale di ŋe dↄↄ kelii ↄto ya. Mↄna Kristo ta lese daa lee mmaraa kenaŋ kefaala tɛɛ. Ŋon moona kefaala kenaŋ gyakaa ↄ wose dↄↄ debaŋ keŋ ↄ be lɛɛ da yeŋ yeŋ ↄpaŋdaŋ dↄↄ nɛ. Nawolo nyi Wurubuarɛ nombia aŋmaraseŋ see ŋan ne yako yenaŋ daale nyiaa, "Ba te falaa walaŋ kamasɛ ŋon waa yeŋ ↄpaŋdaŋ dↄↄ nɛ" 14Kristo yeŋa la tↄ de nombiakumɛɛ pou kom na Wurubuarɛ ke ta ↄ dↄↄ hiraa balaŋ baŋ ba te yɛɛ Gyudatenawↄ ya nɛ, ŋgba mena keŋ ↄ be hiraa Aberaham nɛ. Na lee da ke lɛɛ Yesu di dↄↄ Wurubuarɛ ke fa daa ↄ feliŋ ŋon ↄ be yako see nyi waa fa daa nɛ. 15Me tebia, ɛ yela maa mo nombia ŋan ɛ wulaa ɛ gyeŋ nɛ mo lese nombia kɛŋa man wola ŋon. Nyi balaŋ bala de yako nombii see na, ŋolo be kyaa keŋ waa tale wↄlɛɛ ke yaa waa kyɛɛkee ke ya. Mena yaa Wurubuarɛ nombia ayakoŋ see kɛŋa mↄ doo. 16De naana Aberaham na ↄ duuluŋ man walaŋ te Wurubuarɛ yako mena nombia kɛŋa see fa. Wurubuarɛ nombia aŋmaraseŋ see ŋan te yako nyi, "Aberaham na ↄ duuluŋ man balaŋ" na kawola nyi ba boe ya. Mↄna ↄ yako e nyi, "Aberaham na ↄ duuluŋ man walaŋ" na kawola nyi walaŋ dokoloŋ kooŋ nombia te Wurubuarɛ ne yako. Walaŋ ŋonaŋ yɛna Yesu Kristo. 17Nombii keŋ mɛɛ yako nɛ ka asɛɛ yɛna nyiaa, Wurubuarɛ wulaa yakowↄ see fa Aberaham kulutooneŋ sↄŋonoŋse akpeŋ anaara na sao na kufu (430) wↄle pɛte ↄ kaa moo mmaraase ŋan fa Mosesi. Mena dↄↄ mmaraase ŋan ↄ ba mo fa Mosesi nɛ be gyae ke tale wↄlɛɛ keyako see keŋ ↄ be yako see fa Aberaham nɛ ya. 18Mena dↄↄ Wurubuarɛ be gyae waa mo ↄ nhira keŋ fa ŋon nyi keŋ ɛ ne di Mosesi mmaraase ŋan dↄↄ nɛ dↄↄ ya, mↄna lee keŋ ↄ be wulaa kaŋ ntam yako see nyi waa mo fa ŋon dↄↄ. Mena ke mↄ te Wurubuarɛ moo ↄ nhira keŋ fa Aberaham yakaa, nawolo nyi ↄ wulaa yakowↄ see nyi waa mo ke fa e. 19Nyi akpaa mena na, woŋ dↄↄ te Wurubuarɛ faa mmaraase ŋan? Kpene keŋ dↄↄ ↄ ba mo ŋa kpu na keyako see keŋ fa wↄ yɛna nyiaa, ↄ ne gyae nyi balaŋ ka gyeŋ kpene keŋ yɛɛ dukum ke. Wurubuarɛ faa mmaraase ŋan bo na ŋa ke doo kelii debaŋ keŋ Aberaham duuluŋ man walaŋ ŋon Wurubuarɛ be yako see nyi waa kↄŋ nɛ ke kↄŋ. Wurubuarɛ tɛe ↄ kpilala dↄↄ mo ↄ mmaraase ŋan fa Mosesi, te ŋon mↄ moowↄ fa balaŋ baŋ. Nawolo nyi ŋon doo la Wurubuarɛ na balaŋ baŋ nsana. 20Walaŋ ŋon ↄ doo balaŋ bala nsana nɛ, ↄ ba seŋɛɛ fa dikpii dokoloŋ ya. Mↄna Wurubuarɛ ŋon dana doŋ nyi waa yɛɛ kpene kamasɛ ↄ baam dↄↄ. Mena dↄↄ ↄ bee hia nyi ŋolo waa doo ŋon na balaŋ nsana ya. 21Na kei nawolo baa nyi Wurubuarɛ mmaraase ŋan, na keyako see keŋ ↄ be yako see nɛ bɛɛ kyaa na dↄŋa baa ya yaa? Korakora, be doo mena ya. Akpaa nyi mmaraase ŋaale kyaa keŋ gyae ke tale fa walaŋ nyeedoŋ na, kenaŋ na nafↄ walaŋ de di ŋe dↄↄ na, ↄtenate gbɛɛneŋ gyae ka tenee Wurubuarɛ siaman. 22Mↄna Wurubuarɛ nombia aŋmaraseŋ see ne yako nyiaa, dukum te di tɛɛle kei balaŋ pou dↄↄ mena dↄↄ bↄↄ ne tale baa di mmaraase ŋan dↄↄ ya. Lee mena dↄↄ Wurubuarɛ yakowↄ see nyiaa, balaŋ baŋ pou baa lɛɛ Yesu Kristo di na, baa nyiŋ nyeedoŋ kekpaa keŋ ↄ be yako see nyi waa fa balaŋ nɛ. 23Pɛte Yesu Kristo ke kↄŋ na, Mosesi mmaraase ŋan te tↄ daa do ŋgba mena keŋ bɛɛ tↄ walaŋ do deni man nɛ. Kenaŋ wↄle na te Wurubuarɛ kaa lesewↄ wola daa nyiaa, nyi walaŋ de lɛɛ Yesu Kristo di na waa tale nyiŋ ↄ wose lee mmaraase ŋan tɛɛ. 24Kei nawolo baa nyi, na Mosesi mmaraase ŋan ne diina de dↄↄ pɛte Kristo kↄŋawↄ. Kristo ke kↄŋ wↄle na, lee ŋon Kristo kelɛɛdi man te walaŋ gbɛɛneŋ na tenee Wurubuarɛ siaman. 25Nɛnɛɛ keŋ dↄↄ lɛɛ Kristo di dↄↄ, mmaraase ŋan ba tekaa dana doŋ de dↄↄ bela ya. 26Lee mena keŋ ɛ be lɛɛ Yesu Kristo di dↄↄ, te ɛ popou bese Wurubuarɛ bia gbagba nɛ. 27Nawolo nyi ɛmɛɛ baŋ pou bↄↄ sↄ ŋon Wurubuarɛ loŋ Kristo man nɛ, te yeli ɛmɛɛ na Kristo ta bese walaŋ dokoloŋ. Lee mena dↄↄ Kristo dinↄↄ keŋ te kaa doo ɛ man. 28Lee mena dↄↄ n yɛɛ Gyuda baale o, n te yɛɛ Gyuda baale ya o, n yɛɛ gbeŋi o yaa n yɛɛ gyooro bu e, n yɛɛ alo e yaa n yɛɛ baale o nɛ, keŋ be famenɛ bela ya. Nawolo nyi ɛ popou te yɛɛ dokoloŋ Kristo man. 29Nyi akpaa ɛ yɛɛ Kristo balaŋwↄ na, kenaŋ na ɛ yɛɛ Aberaham duuluŋ man balaŋwↄ. Mena ke mↄ te Wurubuarɛ waa hiraa ŋon, ŋgba mena keŋ ↄ be yako see nyi waa hiraa Aberaham nɛ.

will be added

X\