Galatiatena 2

1Kulutooneŋ kufu anaara wↄle nɛ, ma besewↄ gyu Gyerusalɛm donↄↄ man. Me ke gyu kei na, daa na Banabase na Tituse gyuu la. 2Wurubuarɛ lese la wola maŋ nyi maa gyu Gyerusalɛm donↄↄ man botↄↄ mena dↄↄ te me gyuuwↄ. De ke gyu botↄↄ na, dɛɛ kyaa gyaŋee na Kristotena kegyiise baŋ baageŋ bo. De gyaŋee na, mɛɛ lese Kristo nombia kpaakpaa ŋan me dↄŋ mee kolosi fa balaŋ baŋ ba te yɛɛ Gyudatenawↄ ya nɛ man wola wↄ, na daa na wↄ ke yɛɛ nↄↄdokoloŋ. Nawolo nyi ma te gyae nyi tom keŋ mↄↄ yɛɛ kaalaŋ, na keŋ me gyakaa mɛɛ yɛɛ nɛ ke yɛɛ yakaa ya. 3Me dↄↄ Tituse ŋon ↄ silana maŋ nɛ, na ↄ yɛɛ Giriki baale e. Mↄna ŋolo na ŋolo ta ŋere e nyi waa kara ↄ baala wose pɛna baa lɛɛ e do nyi ↄ yɛɛ Kristo tobaale e ya. 4Balaŋ baale beo la mo ba wose nyi be yɛɛ Kristotenawↄ te be kaa kpuuwↄ de man. Baŋ gyae la nyi nafↄ baa kara e ↄ baala wose. Mena balaŋ benaŋ wɛɛlee la kaa gyoo de man, te bɛɛ gyae nyi baa wↄlɛɛ da wosekenyiŋ keŋ dↄↄ nyim lee de Gbeŋgyoo Kristo man nɛ. Bɛɛ gyae nyi dɛɛ bese gyu ke doo Gyudatena mmaraase ŋan tɛɛ na dee di ŋe dↄↄ, na baa mo daa besena ba mmaraase ŋan gbeŋa. 5Mↄna da te fa wↄ gbɛɛ korakora ya. Nawolo nyi dɛɛ gyae nyi ɛ ke kyaŋ Kristo anokoare nombia ŋan dↄↄ wola ŋon nɛ man nideli. 6Balaŋ baŋ balaŋ ne kɛɛ wↄ nyi baŋ yɛna siamantena yaa kegyiise Kristo ↄsom keŋ man nɛ koraŋ ta mo kolo kpu na Kristo nombia ŋan mↄↄ kolosi fa balaŋ baŋ ba te yɛɛ Gyudatenawↄ nɛ ya. Mena balaŋ benaŋ kegyiiri kedi keŋ te yɛɛ kolo ke me gyaŋ ya. Nawolo nyi Wurubuarɛ bɛɛ kɛɛ ŋolo siaman pɛna waa yɛɛ ↄ kolo ŋgba mena keŋ balaŋ ne yɛɛ nɛ ya. 7Mↄna mena balaŋ kɛwↄ naawↄ nyi Wurubuarɛ lese na maŋ nyi maa kolosi ↄ nombia kpaakpaa ŋan fa balaŋ baŋ ba te yɛɛ Gyudatenawↄ ya nɛ, ŋgba mena keŋ ↄ ba lese Pita nyi waa kolosi nombia kpaakpaa ŋenaŋ fa Gyudatena nɛ. 8Nawolo nyi Wurubuarɛ ŋon ↄ be baake Pita te ↄ be fa e doŋ nyi waa kolosi ↄ nombia kpaakpaa ŋan fa Gyudatena nɛ, ŋon ke baake na maŋ te ↄ faa maŋ mↄ doŋ nyi maa kolosi ↄ nombia kpaakpaa ŋenaŋ fa balaŋ baŋ ba te yɛɛ Gyudatenawↄ ya nɛ. 9Gyemisi na Pita na Gyↄn baŋ balaŋ ne kɛɛ wↄ nyi be yɛɛ kegyiisewↄ Kristo ↄsom keŋ man kena nyi Wurubuarɛ ta mo ↄ bɛrɛɛ keŋ boele daa nɛ, be gbaa daa do daa nↄↄ na ke yela walaŋ kamasɛ kena nyi daa na wↄ pou yɛɛ dokoloŋ tom keŋ dɛɛ yɛɛ nɛ man. Mena dↄↄ daa na wↄ yakowↄ sɛɛ dↄŋa nyiaa, daa na Banabase dee kolosi Kristo nombia kpaakpaa ŋan fa balaŋ baŋ ba te Gyudatenawↄ ya nɛ, na baŋ mↄ kekolosi ŋa fa Gyudatena. 10Nombii dokoloŋ keŋ bↄↄ yako daa nyi dɛɛ kyaŋ ke keŋkeŋ yɛna nyi, de na wolee ayematena dↄↄ ya. Na mena nombii kei taŋ doo la me konↄↄ man. 11Pita ke kↄŋ de gyaŋ Antiↄke donↄↄ man nɛ, ma korowↄ seŋ tia e de tebia Kristotena baŋ siaman. Nawolo nyi kpene keŋ ↄ be yɛɛ nɛ be dei ya. 12Ↄ ke kↄŋ botↄↄ kewalaŋ keŋ nɛ, ↄ sia gyeewↄ na ↄ ne dii bom na balaŋ baŋ ba te yɛɛ Gyudatenawↄ ya nɛ. Mↄna Gyemisi ke kpila balaŋ baale lee Gyerusalɛm donↄↄ man kↄŋ na, te Pita tira ↄ wose lee ↄ tebia baŋ man keŋ ↄ bɛɛ tekaa di bom na wↄ bela ya. Nawolo nyi ↄ ne yee Gyudatena baŋ ba seŋɛɛ nyi kaboena nyi baa kara Kristotena baŋ ba te yɛɛ Gyudatenawↄ ya baala wose nɛ. 13Kpene keŋ Pita be yɛɛ nɛ, yela Gyudatena baŋ be yɛɛ Kristotenawↄ Antiↄke donↄↄ man nɛ mↄ tira ba wose keŋ be silana Pita nombiakumɛɛ ŋan ↄ be yɛɛ nɛ. Ba ke yɛɛ kenaŋ dↄↄ yela Banabase gba mↄ sila be nombiakumɛɛ ŋan bↄↄ yɛɛ nɛ. 14Ma kena nyi be nombia ayɛɛsa bɛɛ kyaa na Kristo nombia kpaakpaa ŋan ya nɛ, ma korowↄ seŋ tia Pita balaŋ baŋ pou siaman nyiaa, "Pita, n yɛɛ Gyuda baale e, mↄna n nombia ayɛɛsa bɛɛ wolo nyi n yɛɛ Gyuda baale e ya. Woŋ dↄↄ te nɛnɛɛ n na ŋere balaŋ baŋ ba te yɛɛ Gyudatenawↄ ya nɛ nyi baa di Gyudatena mmaraase dↄↄ?" 15Lolo man na daa na neŋ pou yɛɛ Gyudatenawↄ. Da te yɛɛ balaŋ baŋ ba te yɛɛ Gyudatenawↄ, te balaŋ ne baake wↄ nyi be yɛɛ nombiakumɛɛyɛɛrawↄ nɛ ya. 16Daa Gyudatena baŋ de yɛɛ Kristotenawↄ nɛ dↄↄ, da gyeŋ nyi Wurubuarɛ bɛɛ lɛɛ walaŋ do nyi ↄ gbɛɛneŋ tenɛɛ ŋon Wurubuarɛ siaman nyi keŋ ↄ ne di mmaraase ŋan dↄↄ nɛ dↄↄ ya, mↄna walaŋ ŋon ↄ ne lɛɛ de Gbeŋgyoo Yesu di na te Wurubuarɛ ne lɛɛ e do. Mena dↄↄ daa mↄ te lɛɛ Yesu di na Wurubuarɛ ke nyiŋ lɛɛ daa do nyi de gbɛɛneŋ tenɛɛ ↄ siaman. Na te yɛɛ nyi da mmaraase ŋan dↄↄ kedi dↄↄ te Wurubuarɛ lɛɛ daa do ya. Nawolo nyi da gyeŋ nyi Wurubuarɛ be gyae waa lɛɛ ŋolo do nyi ↄ gbɛɛneŋ tenɛɛ ↄ siaman, nyi keŋ ↄ be di mmaraase ŋan dↄↄ nɛ dↄↄ ya. 17Akpaa dɛɛ gyae nyi Wurubuarɛ ke lɛɛ daa do nyi de gbɛɛneŋ tenɛɛ ↄ siaman na, kenaŋ na kaboena nyi dɛɛ lɛɛ Kristo di. Kenaŋ na daa mↄ dɛɛ naa nyi daa Gyudatena mↄ yɛɛ nombiakumɛɛyɛɛrawↄ ŋgba balaŋ baŋ ba te yɛɛ Gyudatenawↄ ya nɛ. Akpaa mena te doo na, kenaŋ na nawolo baa nyi Kristo na wola na balaŋ nyi baa yɛɛ nombiakumɛɛ baa yaa? Korakora, be doo mena ya. 18Nyi akpaa ma bese lee me wↄle gyu ke di mmaraase ŋan mↄↄ wulaa bɛɛ ŋa nɛ dↄↄ na, kenaŋ na nawolo baa nyi me yɛɛ dukumyɛɛre e. 19Gyaŋgba keŋ na nafↄ me doo Mosesi mmaraa keŋ tɛɛ, mↄna nɛnɛɛ dↄↄ Yesu ta lese maŋ lee ke tɛɛ na maa nyiŋ kyaa fa Wurubuarɛ. 20Ba ke gyↄ Kristo mataa ↄpaŋdaŋ keŋ dↄↄ te ↄ ba yem nɛ, na yɛɛ yaa ŋgba daa na e yeŋa la nɛ. Mena dↄↄ mↄↄ tekaa kyaa ŋgba gyaŋgba ma kekyaabii keŋ nɛ ya, mↄna nɛnɛɛ dↄↄ Kristo kyaa la me maŋ. Lee mena dↄↄ kpene kamasɛ keŋ maa yɛɛ ma kekyaa tɛɛle kei dↄↄ na, maa mo ma wose lↄ Yesu Kristo dↄↄ bo. Nawolo nyi ↄ ne gyae maŋ, te lee maŋ dↄↄ te ↄ moo ↄ wose fa yeŋ. 21Mↄↄ ne bɛɛ Wurubuarɛ bɛrɛɛ keŋ ↄ ba mo boele maŋ nɛ ya. Nawolo nyi nafↄ akpaa Wurubuarɛ ne lɛɛ balaŋ bo do nyi be gbɛɛneŋ tenɛɛ ↄ siaman mo lee mmaraase ŋan dↄↄ kedi dↄↄ na, kenaŋ na Kristo yeŋ keŋ ↄ ba yem nɛ be dana tↄnↄↄ ya.

will be added

X\