Efesotena 6

1Bia, keŋ ɛ yɛɛ Kristotenawↄ dↄↄ kaboena nyi yaa tei ɛ kya na ɛ naa dei. Nawolo nyi ɛ ne yɛɛ kei na, ɛ ne yɛɛ kpene keŋ dei. 2Tei n kya na n naa dei, nawolo nyi kei yɛna Wurubuarɛ mmaraa gyaŋgbate keŋ Wurubuarɛ be yako nyi n di ke dↄↄ na, nyaŋ kenyiŋ ke tↄnↄↄ. 3Tↄnↄↄ kenaŋ yɛna nyi akpaa n di mmaraa kei dↄↄ na, kpene kamasɛ gyae ke de fa neŋ na n kenyiŋ kyaa tɛɛle kei dↄↄ kyare. 4Kyaↄ, ɛ na do ɛ bia baŋ lee kpene keŋ ɛ ne yɛɛ wↄ nɛ dↄↄ ya. Mↄna kaboena nyi yaa kɛɛ be dↄↄ na ɛ ka wola wↄ Wurubuarɛ nombia na baa di ŋe dↄↄ. 5Mee kolosi mɛɛ fa ɛmɛɛ gbeŋa mↄ nyi, ɛ tei ɛ gbeŋgyoona baŋ ɛ kyaa be gyaŋ nɛ dei lee ɛ konↄↄse man, ŋgba mena keŋ ɛ ne tei Kristo nɛ. 6Ɛ na yako nyi, debaŋ keŋ be kyaa ɛ gyaŋ te bɛɛ kɛɛ ŋon dↄↄ te ɛ ke yɛɛ tom ka gyoo be sia na baa kɛlɛɛ ŋon ya. 7Ɛ na yɛɛ ɛ tomse ŋgba denibalaŋ yaa ɛ ne yɛɛ fa nɛ ya, mↄna ɛ yɛɛ ŋa na gyoŋ ŋgba ɛ Gbeŋgyoo Yesu yaa ɛ ne yɛɛ fa nɛ. 8Nyi n yɛɛ gbeŋi o, n yɛɛ gyooro bu e o, ampaŋ yaa mɛɛ yako ŋon nyi, Wurubuarɛ waa tↄ walaŋ kamasɛ kom, lee ↄ tom kpaakpaa keŋ ↄ ne yɛɛ nɛ dↄↄ. 9Ɛmɛɛ gbeŋgyoona baŋ mↄ, ɛ tela ɛ gbeŋa ŋgba mena keŋ kaboena nɛ, ɛ naa ŋmaase wↄ ya. Ɛ tↄↄse nyi, ɛmɛɛ na ɛ gbeŋa baŋ pou yɛɛ ɛ Gbeŋgyoo ŋon ↄ kyaa adido nɛ wui. Ŋon ne diina nombia keŋ ↄ bɛɛ kɛɛ ŋolo siaman ya. 10Pɛ me nↄↄwoya kesi na, me nↄↄwoya akaŋ yɛna nyi, ɛ seŋ de Gbeŋgyoo wↄↄle dinaa keŋ man keŋkeŋ. 11Ɛ mo Wurubuarɛ yoo abↄↄ ŋan pou do ŋgba yoo kegbase nɛ, na ɛ ke tale di ↄbↄnsam ŋon adao gbɛɛneŋ kumɛɛ ŋan pou dↄↄ. 12Nawolo nyi de yoo keŋ dee yoo nɛ, te yɛɛ denibalaŋ yaa dɛɛ yoo na ya. Mↄna dee yoo bo na feliŋkumɛɛ ŋan ŋee di doŋ ŋↄma man nɛ, na feliŋkumɛɛ ŋan ŋee di doŋ balaŋ dↄↄ, te bɛɛ som ŋa tɛɛle kei dↄↄ nɛ. Feliŋkumɛɛ kɛŋa ŋaale yɛna ŋgba woya, na bɛɛneŋ, na yola na ŋmeeseŋ, na gyabunise na gaose na doŋse ŋan pou ŋe yɛɛ feliŋkumɛɛ ŋa, te ŋe kyaa ditiŋtɛɛ man adido na tɛɛle kei dↄↄ keŋ de bɛɛ mo de sia fonɛɛ naa ŋa ya nɛ. 13Mena dↄↄ ɛ do Wurubuarɛ yoo abↄↄ ŋan pou, na ɛ kenyiŋ tale seŋ keŋkeŋ ŋmanyaŋ ↄbↄnsam ŋon nombiakumɛɛ keyɛɛ debaŋ kei man. Te akpaa ɛ yoo keŋ de taŋ na, baa naa nyi ɛ sɛɛ ɛ seŋɛɛ ɛ da seŋae keŋ man. 14Keŋ dↄↄ ɛ desina ɛ wose na ɛ ka seŋ keŋkeŋ. Ɛ yela anokoare keŋ ɛ ne dii fa Wurubuarɛ nɛ ke yɛɛ ŋgba abↄsↄↄ nɛ, na ɛ ka mo kpaŋ ɛ teŋase man, na ɛ gbɛɛneŋ katenee mↄ ke yɛɛ ŋgba nyeele pampasaŋ keŋ yoonↄↄtena na mo gyee be konↄↄ nɛ. 15Te kegyae keŋ ɛ ne gyae nyi ɛ ke yako Wurubuarɛ nombia ŋan ne fa balaŋ wosefɛɛreŋ nɛ, ke yɛɛ ŋgba nkyokotase ŋan ɛ na doo nɛ. 16Kɛŋa pou wↄle nɛ, ɛ yela ɛ kelɛɛdi ke yɛɛ ŋgba nyeele pampasaŋ keŋ nɛ. Kei te ɛ ke tale mo lɛɛ ↄbↄnsam ŋon apiase ŋan ŋe nↄↄse dana boalaŋ nɛ. 17Ɛ yela nyeekelɛɛ keŋ Kristo be lɛɛ ŋon nɛ, ke yɛɛ ŋgba nyeele kotↄtↄↄ keŋ yoonↄↄtena na mo wuu lɛɛ ba nyeeya nɛ. Na ɛ ke yela Wurubuarɛ nombia ŋan, ke yɛɛ ŋgba yoosila keŋ Wurubuarɛ feliŋ ne fa ŋon nyi yaa mo tela gyu yoo nɛ. 18Ɛ mo kefane yɛɛ abↄↄ kɛŋa pou. Ɛ sola Wurubuarɛ na waa fa ŋon doŋ. Ɛ fane debaŋ kamasɛ, ŋgba mena keŋ Wurubuarɛ feliŋ ŋon na wola ŋon nɛ. Lee nnɛ dↄↄ ɛ doo ɛ wose dↄↄ nideli, ɛ na yeli ɛ wose keyↄkↄse ŋon ya. Na ɛ ke fane debaŋ kamasɛ fa Wurubuarɛ balaŋ pou. 19Ɛ fane fa maŋ mↄ, nyi me na yee ya. Te me gyu mɛɛ yako Wurubuarɛ nombia ŋan na, Wurubuarɛ gbagba ka mo ↄ nↄↄwoya ŋan do me nↄↄman, na maa tale lese nombia aweeseŋ ŋan doo Wurubuarɛ nombia man nɛ wola. 20Lee mena keŋ ma seŋɛɛ fa nombia kɛŋa dↄↄ, te be kyaŋa maŋ do deni man. Ɛ fane fa maŋ, na maa gyↄ me konↄↄ yako nombia ŋan ŋgba mena keŋ kaboena nyi maa yako nɛ. 21Mee kpila Tikikuse, de gyoo ŋon dɛɛ gyae ↄ nombia te ↄ ne yɛɛ de Gbeŋgyoo Kristo tom keŋ ke gbɛɛ dↄↄ nɛ ɛ gyaŋ. Ↄ kↄŋ na waa yako ŋon ma wose man nombia pou, na ɛ ka gyeŋ ma kekyaabii man. 22Lee mena dↄↄ te mee kpila e ɛ gyaŋ, na waa yako ŋon da kekyaabii man, na waa do ŋon kakyeŋ mↄ. 23De kya Wurubuarɛ na de Gbeŋgyoo Yesu Kristo baa fa ɛmɛɛ de tebia baŋ ɛ silana Kristo nɛ wosefɛɛreŋ. Na baa yela ɛ ke gyae dↄŋa na ɛ ke lɛɛ Kristo di nideli. 24Wurubuarɛ waa mo ↄ bɛrɛɛ boele baŋ pou bɛɛ gyae de Gbeŋgyoo Yesu Kristo kegyae keŋ betaŋ ↄto ya nɛ.

will be added

X\