Efesotena 3

1Mena dↄↄ mɛɛ fane fa Wurubuarɛ. Maŋ Pↄↄl ŋon bↄↄ kyaŋ maŋ tↄ deni lee mena keŋ mɛɛ yako Yesu Kristo nombia ŋan mɛɛ fa ɛmɛɛ baŋ ɛ te yɛɛ Gyudatenawↄ ya nɛ dↄↄ. 2Ma gyeŋ nyi ɛ te nyii nyi ɛmɛɛ dↄↄ te Wurubuarɛ moo ↄ bɛrɛɛ keŋ boele maŋ, na maa nyiŋ tale yako Yesu Kristo nombia ŋan fa ŋon lee ɛ deeli dↄↄ. 3Wurubuarɛ ta lese nombia ŋan weesɛɛ nɛ wola maŋ, ŋgba mena keŋ mↄↄ taŋgbɛɛ ŋmarase fa ŋon nɛ. 4Akpaa ɛ kala ke na, ɛ kena mena keŋ mↄↄ nyii Kristo nombia ŋan nafↄ ŋa weesɛɛ nɛ man. 5Gyaŋgba keŋ na, ↄ ta lese mena nombia aweeseŋ kɛŋa wola deniwalaŋ ya, mↄna Wurubuarɛ te tɛɛ ↄ feliŋ ŋon dↄↄ lese ŋa wola Yesu Kristo kpilala na Wurubuarɛ akpeŋkpeŋgyↄↄra baŋ ayimɛɛ be doo be man ya nɛ. 6Mena nombia aweeseŋ kɛŋa yɛna nyi; lee Wurubuarɛ nombia ŋan dↄↄ balaŋ baŋ ba te yɛɛ Gyudatenawↄ ya nɛ, ta bese Wurubuarɛ wui ŋgba Gyudatena nɛ. Be popou ta bese walaŋ dokoloŋ na baŋ baa di abↄↄ ŋan Wurubuarɛ be yako see nyi waa ta Yesu Kristo dↄↄ fa wↄ nɛ. 7Keŋ dↄↄ te ↄ moo ↄ bɛrɛɛ boele maŋ, te ↄ moo maŋ yɛɛ Yesu Kristo nombia ŋan kegbetibii, lee ŋon gbagba ↄ doŋ keŋ dↄↄ. 8N kɛɛ na, maŋ yɛna Wurubuarɛ balaŋ baŋ man pou kemaasa, mↄna maŋ mↄ te ↄ moo ↄ bɛrɛɛ keŋ boele, nyi maa yako Kristo wose man nombia ŋan ŋɛɛ lee koya te ŋa betaŋ ↄto ya nɛ fa baŋ ba te yɛɛ Gyudatenawↄ ya nɛ. 9Na maa yela balaŋ pou kena Wurubuarɛ ŋon ↄ be yɛɛ kpene kamasɛ nɛ, gbɛɛ keŋ ↄ ba weese lee kewalaŋ keŋ nɛ. 10Te ↄ kegyae yɛna nyi, debaŋ kei man nɛ waa ta Kristotena dikpii keŋ dↄↄ yela feliŋ man gyooneŋ na doŋse ŋan pou ŋe kyaa adido nɛ ka gyeŋ Wurubuarɛ sia kekara keŋ betaŋ ↄto ya nɛ kpene kamasɛ man. 11Wurubuarɛ yɛɛ kei, lee kebake keŋ ↄ be bake see ↄ nyeeman, te betaŋ ↄto ya nɛ dↄↄ. Ↄ tɛe de Gbeŋgyoo Yesu Kristo dↄↄ te ↄ yɛɛ kei. 12Keŋ dↄↄ lɛɛ e di te daa na e be yɛɛ dokoloŋ dↄↄ, te dɛɛ tale gyↄ de konↄↄ gyu ŋon Wurubuarɛ gyaŋ keŋ dↄↄ ne yee ya. 13Mena dↄↄ mɛɛ waase ŋon nyi, ɛ na yela ɛ wose ke tekerii ŋon lee diyem keŋ mɛɛ naa fa ŋon nɛ dↄↄ ya. Kɛŋa pou yɛɛ fa ɛ deeli dↄↄ. 14Kei dↄↄ te mee buŋ ma doona dↄↄ de kya Wurubuarɛ siaman. 15Lee ŋon dↄↄ te loŋtoro kamasɛ keŋ kyaa adido na tɛɛle kei dↄↄ nɛ ne nyiŋ ka yele. 16Mɛɛ sola Wurubuarɛ nyi, waa mo ↄ gyooro wose deeli keŋ na waa ta ↄ feliŋ ŋon dↄↄ, na waa fa ŋon doŋ, na waa do ŋon kakyeŋ. 17Waa yela Kristo kekyaa ɛ konↄↄ man ɛ kelɛɛdi dↄↄ, na kegyae keŋ ɛ ne gyae Wurubuarɛ na balaŋ nɛ kefa ŋon doŋ na ɛ ka seŋ keŋkeŋ. 18Na ɛmɛɛ na Kristotena akaŋ baŋ pou kenyiŋ gyeŋ nyi Wurubuarɛ kegyae keŋ ↄ ne gyae daa nɛ boe nideli te ka betaŋ ↄto ya. 19Na ɛ ka gyeŋ nyi kegyae keŋ Wurubuarɛ ne gyae daa nɛ boe, keŋ dↄↄ dↄↄ gyae dɛɛ tale naa ke man taŋ ya. Na Wurubuarɛ ka mo ↄ dinↄↄ pou do ɛ man. 20Ɛ yela dɛɛ ta Yesu Kristo na Kristotena dikpii keŋ dↄↄ lese de Wurubuarɛ gyoorobiiri keŋ yele debaŋ kamasɛ. Nawolo nyi ŋon ne tale la yɛɛ abↄↄ burum kela mena keŋ dɛɛ bↄↄse yaa dɛɛ gyueŋ lee ↄ doŋ keŋ ne yɛɛ tom de man nɛ dↄↄ. Daa balaŋ baŋ pou dↄↄ lɛɛ e di te daa na e yɛɛ dokoloŋ nɛ, ɛ yela dɛɛ lese ↄ yele kekpaakekpaa. Amɛn.

will be added

X\