Efesotena 2

1Gyaŋgba keŋ na nombiakumɛɛ keyɛɛ te tira ɛmɛɛ na Wurubuarɛ nsana, 2gyaŋgba kenaŋ na, ɛ silana tɛɛle kei dↄↄ nombiakumɛɛ. Ɛ silana ↄbↄnsam ŋon ↄ yɛɛ dukum pou nyee e nɛ. Te ŋon mↄ ne diina baŋ pou bↄↄ ne tɛɛ Wurubuarɛ gbɛɛneŋ dↄↄ ya nɛ dↄↄ. 3Nafↄ nnɛ te daa na wↄ mↄ pou kyaawↄ, na dɛɛ yɛɛ kpene keŋ dɛɛ gyae. Dee sila de dinↄↄ benɛɛ ŋan te dɛɛ yɛɛ kpene keŋ da wose na de konↄↄ man nombia na wola daa nyi dɛɛ yɛɛ nɛ. Nafↄ nnɛ yaa Wurubuarɛ baŋ keŋ ne fa deŋele kewↄŋ nɛ doo de dↄↄ, ŋgba balaŋ akaŋ baŋ nɛ. 4Mↄna Wurubuarɛ wii de waraŋase te lee ↄ kegyae dinaa keŋ ↄ ne gyae de nombia nɛ dↄↄ, 5ↄ tɛɛwↄ Kristo dↄↄ fa daa baŋ nafↄ debaŋ kenaŋ man dↄↄ yem de dukum man nɛ nyeedoŋ. Mena dↄↄ ɛ tↄↄse nyi Wurubuarɛ bɛrɛɛ keŋ ↄ ba mo boele daa dↄↄ te ɛ nyiŋa nyeedoŋ. 6Te mena keŋ Wurubuarɛ be gyuusu Kristo lee yeŋ man nɛ, mena mↄ yaa ↄ gyuusu daa mↄ lee mena yeŋ kei man, te ↄ moo daa kekyaa Yesu Kristo gyaŋ adido na daa na e kaa di gyoori. 7Ↄ yɛɛ nnɛ kei na debaŋ kamasɛ keŋ kɛŋa pou gyae kekↄŋ na, kenyiŋ lese ↄ bɛrɛɛ na ↄ wↄe keŋ doo Kristo man te ka kela kpene kamasɛ nɛ wola. 8Nawolo nyi, bɛrɛɛ keŋ ↄ ba moo boele daa, na da kelɛɛdi keŋ dↄↄ lɛɛdi dↄↄ te ↄ fa daa nyeedoŋ. Kɛŋa pou ta lee daa gbagba gyaŋ ya, ke yɛɛ kpene keŋ Wurubuarɛ ba mo fa daa. 9Ta lee tomse ŋan dↄↄ yɛɛ dↄↄ ya, mena dↄↄ ŋolo na wola ↄ wose ŋe dↄↄ ya. 10Nawolo nyi Wurubuarɛ yɛɛ na daa mena keŋ gyɛŋ de doo nɛ. Keŋ daa na Kristo be yɛɛ dokoloŋ dↄↄ, te ↄ lese daa nyi dɛɛ yɛɛ tomse kpaakpaa ŋan ↄ be wulaa desina see nyi dɛɛ yɛɛ nɛ. 11Mena dↄↄ ɛ tↄↄse mena keŋ nafↄ lolo man na, ɛ te yɛɛ Gyudatenawↄ ya nɛ. Ɛmɛɛ te Gyudatena ne baake nyi, baŋ ba te kara be baala wose ya nɛ. Be wui baala wose keŋ bↄↄ kare nɛ, nyiŋmaa te ba moowↄ kara. 12Ɛ tↄↄse nyi debaŋ kenaŋ na, ɛmɛɛ na Kristo betaŋ loŋtoro ya. Na ɛ yɛɛ yenaasetenawↄ, ɛ te yɛɛ baŋ Wurubuarɛ ba lese nɛ ya. Na ɛ yɛɛ ŋↄↄla baŋ ɛ be kpuɛ kebakesee keŋ Wurubuarɛ na ↄ balaŋ be bake see nɛ man ya. Na ɛ sia be gyakaa kolo mↄ dↄↄ ya, te ɛ ba gyeŋ Wurubuarɛ tɛɛle kei dↄↄ ya. 13Te nɛnɛɛ keŋ ɛ doo Kristo man dↄↄ, ɛmɛɛ baŋ nafↄ ɛ kyaa lemlem, te ɛ ba benaa na Kristo ya nɛ, lee ↄ yeŋ keŋ ↄ ba yem nɛ dↄↄ, ↄ te tuu ŋon benaa na ↄ wose. 14Ŋon gbagba yɛna da wosefɛɛreŋ. Ↄ te yɛɛ Gyudatena na baŋ ba te yɛɛ Gyudatenawↄ ya nɛ walaŋ dokoloŋ. Lee ↄ yeŋ dↄↄ, ↄ tekerii dekyaŋ keŋ nafↄ ke yɛɛ kekↄla dekyaŋ te ne kpase mena balaŋ akpeŋ ala kɛwↄ nsana nɛ. 15Nawolo nyi, ↄ wose te ↄ moowↄ lese Gyudatena mmaraase, na gbɛɛneŋ, na nombia burum ŋan. Kpene keŋ dↄↄ ↄ be yɛɛ kei yɛna nyi, na waa nyiŋ mo mena balaŋ akpeŋ ala kɛwↄ yɛɛ dokoloŋ kↄŋ ŋon gbagba man. Nnɛ te ↄ yela ↄ wosefɛɛreŋ kↄŋawↄ be man. 16Ↄ tɛɛwↄ ↄpaŋdaŋ keŋ dↄↄ pataa akpiise ala kɛwↄ, kyaŋ wↄ mo do Wurubuarɛ man, yɛɛ wↄ walaŋ dokoloŋ. Nawolo nyi, ↄ ta mo ↄpaŋdaŋ keŋ dↄↄ lese kpene keŋ ne yele bɛɛ kↄla dↄŋa nɛ. 17Ↄ kↄŋawↄ kaa yako wosefɛɛreŋ nombia ŋan fa ɛmɛɛ Gyudatena baŋ ɛ benaa na Wurubuarɛ, na baŋ ba te yɛɛ Gyudatenawↄ ya nɛ. 18Ŋon dↄↄ te Gyudatena na baŋ ba te yɛɛ Gyudatenawↄ ya nɛ pou nyiŋa gbɛɛ Wurubuarɛ feliŋ dokoloŋ man, mo gyu kya ŋon gyaŋ. 19Mena dↄↄ nɛnɛɛ nafↄ ɛmɛɛ baŋ ɛ ba benaa na e ya nɛ, ɛ ta tekaa yɛɛ ŋↄↄla na balaŋ yenaasetenawↄ bela ya. Ɛ yɛɛ baŋ Wurubuarɛ be hiraa wↄ nɛ be dↄↄna na be tebia na Wurubuarɛ dekpaŋalaŋmantenawↄ. 20Ɛmɛɛ mↄ, be ta mo ŋon ŋgba deni nɛ, Wurubuarɛ akpeŋkpeŋgyↄↄra na Yesu kpilala baŋ yɛna dekyaŋ keŋ mokↄↄ kasee. Ɛmɛɛ te bɛɛ mo ma gyakaa ke dↄↄ. Yesu Kristo gbagba yɛna boe keŋ kɛɛ fa deni keŋ pou doŋ nɛ. 21Ŋon dↄↄ te deni keŋ boe kamasɛ na sem nideli, te kɛɛ bee bese Wurubuarɛ kedeesa deni keŋ bↄↄ maa see fa Wurubuarɛ ↄsom, te ayimɛɛ be doo ke man ya nɛ. 22Ɛmɛɛ na Yesu te yɛɛ dokoloŋ dↄↄ, te yela ɛmɛɛ na akaŋ baŋ pou bese dekyae keŋ Wurubuarɛ ne tɛɛ ↄ feliŋ ŋon dↄↄ kyaa.

will be added

X\