Efesotena 1

1Tↄne kei lee maŋ Pↄↄl ŋon Wurubuarɛ be gyae nyi maa bese Yesu Kristo kpilale nɛ gyaŋ. Mɛɛ ŋmarase ke mee yelee ɛmɛɛ Kristotena baŋ ɛ kyaa Efeso donↄↄ man, te Wurubuarɛ ba mo ↄ nyiŋmaa gyakaa ɛ dↄↄ te ɛ ne di anokoare ɛ gbɛɛneŋ man fa Yesu Kristo nɛ. 2Wurubuarɛ ŋon ↄ yɛɛ de kya e, na de Gbeŋgyoo Yesu Kristo baa mo be bɛrɛɛ boele ŋon, na baa fa ŋon wosefɛɛreŋ. 3Ɛ yela dɛɛ lese de kya Wurubuarɛ ŋon ↄ yɛɛ de Gbeŋgyoo Yesu Kristo Wurubuarɛ na ↄ kya e nɛ yele. Nawolo nyi keŋ daa na de Gbeŋgyoo Yesu Kristo yɛɛ dokoloŋ dↄↄ, ↄ ta mo abↄↄ ŋan pou kyaa adido nɛ boele daa. 4Yesu Kristo dↄↄ te ↄ lese daa pɛte ↄ yɛɛ tɛɛle kei na abↄↄ pou, nyi dɛɛ yɛɛ balaŋ baŋ de yɛɛ ŋon gbagba wui ↄ siaman keŋ ayimɛɛ be doo de man ya, lee mena keŋ daa na Kristo yɛɛ dokoloŋ dↄↄ. 5Lee kegyae keŋ ↄ ne gyae daa dↄↄ ↄ taŋgbɛɛwↄ yako see nyi waa ta Yesu Kristo dↄↄ mo daa yɛɛ ↄ bia lee ŋon gbagba kegyaebii man. 6Ↄ lese daa mena na dee nyiŋ lese ↄ gyooro bɛrɛɛ yele keŋ ↄ ba moo fa daa, nawolo nyi de yɛɛ Wurubuarɛ bu ŋon ↄ ne gyae daa nɛ wui. 7Keŋ Kristo ba yem kyɛɛkee ↄ fatabo leki dↄↄ, Wurubuarɛ lɛɛ da nyee te ↄ moo de dukum kyɛɛ daa. Kei ne yele la dɛɛ naa nyi Wurubuarɛ bɛrɛɛ keŋ ↄ ba mo boele daa nɛ boe nideli. Wurubuarɛ gbagba nyansa na ↄ nombia kagyeŋ man te ↄ moowↄ yɛɛ mena. 9Te kpene keŋ ↄ be wulaa yako see nyi waa yɛɛ nɛ, ↄ tɛɛwↄ Kristo dↄↄ lese ↄ nombia ŋan weesɛɛ nɛ wola daa ŋgba mena keŋ ↄ ne gyae nɛ. 10Kpene keŋ Wurubuarɛ be yako see nyi waa yɛɛ nɛ yɛna nyi, debaŋ keŋ de lii nɛ waa yilaa kpene kamasɛ keŋ kyaa adido na keŋ kyaa tɛɛle kei dↄↄ nɛ pou do Kristo tɛɛ. 11Te keŋ de doo Kristo man dↄↄ, Wurubuarɛ ta mo daa yɛɛ ↄ balaŋ mↄ, ŋgba mena keŋ ŋon ↄ be yɛɛ abↄↄ pou be yako ↄ nyeeman see nyi waa yɛɛ daa nɛ. 12Wurubuarɛ yɛɛ kɛŋa pou na daa baŋ dↄↄ taŋgbɛɛ lɛɛ Kristo nɛ, ka lese ↄ gyoorobiiri keŋ yele. 13Mena te doo fa ɛmɛɛ mↄ. Ɛ ke nyii Wurubuarɛ nombia ŋan ŋe doo ŋe gbɛɛ dↄↄ te ŋɛɛ fa nyeedoŋ nɛ, ɛ lɛɛwↄ di. Lee mena dↄↄ Wurubuarɛ moo ŋon yɛɛ ↄ wui, te ↄ moo ↄ feliŋ ŋon ↄ be yako see nyi waa mo do ɛ man tↄ nↄↄ nɛ see ŋon. Kei nawola la nyi ↄ ta mo ↄ nyiŋmaa gyakaa ɛ dↄↄ nyi ɛ yɛɛ ↄ wui. 14Wurubuarɛ feliŋ kei yɛna kpene keŋ doo ɛ man, ŋgba kpene keŋ ↄ ba mo see ateta nɛ. Kei nawolo nyi dee nyiŋ abↄↄ ŋan pou Wurubuarɛ be yako see nyi waa mo fa ↄ balaŋ nɛ. Kei ne yele la dɛɛ gyem nyi Wurubuarɛ waa lese balaŋ baŋ pou be yɛɛ ↄ wui nɛ lee be gbɛɛneŋ kumɛɛ man. Mena dↄↄ ɛ yela dɛɛ lese Wurubuarɛ gyoorobiiri keŋ yele. 15Lee mena dↄↄ me ke nyii mena keŋ ɛ be lɛɛ Wurubuarɛ di, na mena keŋ ɛ ne gyae balaŋ baŋ pou bↄↄ lɛɛ Kristo nombia ŋan di nɛ, 16me bee tina Wurubuarɛ nↄↄ ka do yela ya. Mɛɛ tↄↄse ɛ yela debaŋ kamasɛ keŋ mɛɛ fane fa Wurubuarɛ nɛ. 17Mɛɛ fane mↄ nyi Wurubuarɛ ŋon ↄ yɛɛ de Gbeŋgyoo Yesu Kristo na gyoorobia pou be kya e nɛ, waa mo ↄ feliŋ ŋon do ɛ man na waa yela ɛ sia kekara, na ↄ feliŋ ŋon ka lese Wurubuarɛ ŋon wola ŋon na ɛ ka gyeŋ e nideli. 18Mɛɛ solo nyi waa gyuusu ɛ konↄↄse, na ɛ ke nyiŋ gyeŋ kpene keŋ dↄↄ ↄ ba lese ŋon na kpene keŋ dↄↄ ɛ loo gyakaa nɛ, na ɛ ke nyiŋ gyeŋ abↄↄ ŋan Wurubuarɛ be yako see nyi waa mo fa baŋ bↄↄ mo ba wose fa Kristo nɛ. Ŋe yɛɛ abↄↄ ŋan ŋa koya dana doŋ nideli. 19Dɛɛ fane nyi yaa gyeŋ ↄ doŋ dinaa keŋ ka dokoso be kyaa ya nɛ. Ↄ ta mo mena doŋ kei fa daa baŋ dɛɛ lɛɛ e di nɛ. Mena doŋ kei te ↄ moowↄ gyuusu Kristo lee yeŋ man, te ↄ moo e kyaase ↄ dunoluŋ dↄↄ Wurubuarɛ man. 21Wurubuarɛ te yeli Kristo te di doŋ kela yela pou na gyoorise pou na bɛɛneŋ pou na yola pou na woya pou na ŋmeeseŋ pou na kpene kamasɛ keŋ ne di doŋ deniwalaŋ dↄↄ nɛ. 22Wurubuarɛ ta mo kpene kamasɛ do Kristo tɛɛ, te ↄ moo e yɛɛ kpene kamasɛ nyee fa Kristo balaŋ baŋ pou. 23Kristo balaŋ kɛwↄ yɛna Kristotena dikpii keŋ. Te wose kei man te Wurubuarɛ ŋon ↄ be yɛɛ kpene kamasɛ, te ↄ kyaa yenaŋ kamasɛ te ↄ ne yeli abↄↄ kamasɛ na sem nideli gbɛɛ kamasɛ man nɛ kyaa.

will be added

X\