Kolosetena 2

1Mɛɛ gyae ɛ ka gyeŋ mena keŋ mɛɛ ko ma wose Kristotena baŋ be kyaa Laodisia donↄↄ man, na baŋ pou ba te naa ta maŋ see ya nɛ dↄↄ. 2Kpene keŋ dↄↄ te mɛɛ yɛɛ mena yɛna nyi, mɛɛ gyae nyi maa do ŋon kakyeŋ na ɛ ka seŋ ɛ kelɛɛdi man nideli na ɛ ke gyae dↄŋa na ɛ ke yɛɛ nↄↄdokoloŋ. Kei gyae ke yela ɛ ke nyiŋ nyii Wurubuarɛ nombia ŋan nafↄ ŋa weesɛɛ nɛ man nideli, na ɛ ke nyiŋ abↄↄ kpaakpaa ŋan pou na lee Wurubuarɛ nombia ŋenaŋ man nɛ. Yesu Kristo gbagba yɛna nombii aweeseŋ kei, te mɛɛ gyae ɛ ka gyeŋ e nideli 3Wurubuarɛ ta mo ↄ nyansa na ↄ nombia man kagyeŋ pou weese Yesu Kristo man, na dee nyiŋ ta ŋon Yesu dↄↄ gyeŋ Wurubuarɛ nombia kpaakpaa ŋan ŋe dana tↄnↄↄ nɛ man nideli. 4Mee wulaa yako ŋon nombia kɛŋa pou baa, na ŋolo be nyiŋ mo nↄↄman yeliŋ mo nombia wↄlɛɛ ŋaale kaa beo ŋon ya. 5Doo nyi maŋ gbagba be kyaa ɛ gyaŋ botↄↄ koraŋ ya nɛ, me konↄↄ man na ma gyeŋ nyi me kpuɛ na ŋon. Mena dↄↄ me ke nyii nyi ɛ ne yɛɛ kpene kamasɛ ke gbɛɛ dↄↄ, na mena keŋ ɛ be lɛɛ Kristo di te ɛ seŋɛɛ nombia ŋan man keŋkeŋ nɛ yɛɛ maŋ gyoŋ nideli. 6Mena dↄↄ mena keŋ ɛ be lɛɛ Yesu Kristo di nyi ŋon yɛna ɛ gbeŋgyoo nɛ, ɛ betaa kyaa na e mena. 7Ɛ mo ɛ wose teeli na e na ɛ ke kasee ↄ nombia kpu, na ɛ ka seŋ ɛ kelɛɛdi keŋ man keŋkeŋ ŋgba mena keŋ bↄↄ wulaa wola ŋon nɛ, na ɛ ka do Wurubuarɛ nↄↄ nideli debaŋ kamasɛ. 8Ɛ kɛɛ ɛ wose dↄↄ nideli na ŋolo be nyiŋ mo tɛɛle kei dↄↄ nyansa nombia ŋan ŋↄↄ taŋ tↄnↄↄ ya nɛ kaa beo ŋon ya. Mena nombia ŋenaŋ yɛɛ denibalaŋ beneŋ nombia na tɛɛle kei dↄↄ nombia ayɛɛsa ŋa. Mena nombia ŋenaŋ bɛɛ wola kolo lee Kristo wose man ya. 9Ɛ na yeli baa beo ŋon ya, nawolo nyi debaŋ keŋ Yesu Kristo be kↄŋ tɛɛle kei dↄↄ koraŋ na, Wurubuarɛ dinↄↄ na ↄ doŋ pou doo bo ↄ man. 10Nɛnɛɛ keŋ ɛmɛɛ na Kristo be kaa yɛɛ dokoloŋ dↄↄ, ɛ te nyiŋ ↄ dinↄↄ keŋ pou. Ɛ tↄↄse nyi Kristo yɛna kpene kamasɛ keŋ ne di doŋ nɛ nyee. 11Lee mena keŋ ɛmɛɛ na Kristo be yɛɛ dokoloŋ dↄↄ, yɛɛ yaa ŋgba ↄ kara ɛ baala wose baa te ɛ kaa bese ↄ balaŋ nɛ. Mena baala wose kekara kei, te yɛɛ denibalaŋ wui keŋ bɛɛ mo nyiŋmaase kara nɛ ya. Mↄna baala wose kekara kei yɛɛ kpene keŋ ↄ ba mo lese ŋon lee ɛ nombiakumɛɛ man. 12Ba ke sↄ ŋon Wurubuarɛ loŋ keŋ nɛ, yɛɛ yaa ŋgba be wuu ŋon baa na Kristo te ba besewↄ gyuusu ɛmɛɛ na e nɛ. Nawolo nyi ɛ te lɛɛ Wurubuarɛ ŋon ↄ ba mo ↄ doŋ dinaa gyuusu Kristo lee yeŋ man nɛ di. 13Gyaŋgba keŋ na nafↄ ɛ yɛɛ ŋgba balaŋ baŋ bↄↄ yem nɛ Wurubuarɛ siaman, lee ɛ nombiakumɛɛ na mena keŋ ɛ be bɛɛ nyi ɛ be di Wurubuarɛ mmaraase ŋan dↄↄ ya nɛ dↄↄ. Mↄna nɛnɛɛ ɛ ke lɛɛ Yesu Kristo di dↄↄ nɛ, Wurubuarɛ ta mo ɛ nombiakumɛɛ kyɛɛ ŋon te ↄ faa ŋon nyeedoŋ wↄle, ŋgba mena keŋ ↄ be gyuusu Yesu Kristo lee yeŋ man te ↄ be fa e nyeedoŋ nɛ. 14Ɛ yela dɛɛ mo kpene keŋ Wurubuarɛ be yɛɛ fa daa nɛ maa na nombii kei. Yɛɛ yaa ŋgba Wurubuarɛ te ŋmarase de nombiakumɛɛ ŋan pou dↄↄ yɛɛ nɛ see, te ↄ buu daa fↄↄ nyi waa wↄŋ da deŋele nawolo nyi de bee di ↄ mmaraase ŋan dↄↄ ya nɛ. Mↄna ↄ ta feefo mena abↄↄ ŋan ↄ be ŋmarase see nɛ pou lee tↄne keŋ man. Mena dↄↄ Kristo ka yeŋ ↄpaŋdaŋ keŋ dↄↄ nɛ, yɛɛ yaa ŋgba Wurubuarɛ moo tↄne kenaŋ baa mataa ↄpaŋdaŋ kenaŋ dↄↄ gyↄ ke wↄlɛɛ nɛ. 15Wurubuarɛ te tɛɛ Yesu Kristo yeŋ keŋ dↄↄ yↄkↄse feliŋkumɛɛ, na kpene kamasɛ keŋ ne di doŋ nɛ. Ↄ yɛɛ kɛŋa pou do wↄ desɛŋ na walaŋ kamasɛ ke nyiŋ naa nyi, Yesu Kristo te di doŋ feliŋkumɛɛ ŋan pou dↄↄ. 16Mena dↄↄ ɛ na yeli ŋolo ke bu ŋon fↄↄ lee mmaraase ŋan ŋɛɛ tↄ ɛ kedi na ɛ kenyↄↄ gbɛɛ, yaa ɛ weeya dinaana kedi yaa gyaalaŋ wↄle weeya kedi yaa ɛ kefɛɛfoweeya kedi mmaraase dↄↄ ya. 17Nawolo nyi mena nombia kɛŋa pou doe, na kawola nyi abↄↄ kpaakpaa ŋaale dↄŋ wↄle ne kↄŋ. Te nombia kɛŋa pou seŋɛɛ bo fa Kristo. 18Mena dↄↄ ɛ na fa walaŋ kamasɛ gbɛɛ na waa beo ŋon, na waa lese ŋon lee ɛ gbɛɛ man kↄŋ ŋon wui gbɛɛ kum man nyi ɛ kaa sila e ya. Mena walaŋ ŋonaŋ na wola la nyi yaa som Wurubuarɛ kpilala baŋ be kyaa adido nɛ. Ↄ na beo yↄkↄse ↄ wose nideli ↄsom man, te ↄ ne yako nyi Wurubuarɛ ta lese nombia ŋaale wola e. Mena dↄↄ ↄ ne kɛɛ ↄ wose nyi ↄ yɛɛ walaŋ dibiliŋ ŋolo e, mↄna ↄ konↄↄ man nombia ŋan ŋↄↄ gyakaa Wurubuarɛ nombia dↄↄ ya nɛ, na beo na e te ↄ na wola ↄ wose mena nɛ. Ke gbagba mↄ na ↄ be dana kpene keŋ dↄↄ kaboena nyi waa seŋ na waa wola ↄ wose ya. 19Mena walaŋ ŋonaŋ te tira ↄ wose lee Kristo ŋon ↄ yɛɛ ↄ balaŋ pou nyee e nɛ man. Kristo man kedoo ne yele la te baŋ be silana e nɛ ne nyiŋ doŋ te bɛɛ bee ba kelɛɛdi man ŋgba mena keŋ Wurubuarɛ ne gyae nɛ. Kristo yɛɛ ŋgba deniwalaŋ nyee nɛ te ↄ balaŋ mↄ yɛɛ ŋgba ↄ wose nɛ. Mena keŋ deniwalaŋ wose man abↄↄ ne kyaŋ wosenaane keŋ towaa te kɛɛ bee nɛ, mena ke te Kristo mↄ ne fa Kristotena pou doŋ te bɛɛ bee yɛɛ nↄↄdokoloŋ ŋgba mena keŋ Wurubuarɛ ne gyae nɛ. 20Kristo ka yeŋ ↄpaŋdaŋ keŋ dↄↄ nɛ yɛɛ yaa ŋgba ɛmɛɛ na e yeŋala nɛ, mena dↄↄ tɛɛle kei dↄↄ abↄↄ ba tekaa taŋ doŋ ɛ dↄↄ bela ya. Lee mena dↄↄ tekaboena nyi yaa sila tɛɛle kei dↄↄ abↄↄ anekↄlaŋ ŋgba mena keŋ balaŋ baŋ ba te yɛɛ Kristotenawↄ ya nɛ ne yɛɛ nɛ ya. 21Ba abↄↄ anekↄlaŋ ŋenaŋ ŋaale yɛna nyi, "Ɛ na mo ɛ nyiŋmaa kyaŋ kpene kei ya. Ɛ na daa kpene kei kɛɛ ya. Ɛ na tina kpene kei ya." 22Mena abↄↄ anekↄlaŋ kɛŋa pou gyae kaa kyom, nawolo nyi ŋe yɛɛ ŋan denibalaŋ gbagba be bake see te bɛɛ wola balaŋ nyi baa di ŋe dↄↄ. 23Balaŋ burum na gyueŋ nyi mena abↄↄ anekↄlaŋ kɛŋa kesila yɛɛ nyansa nombia ŋa, mↄna nyansa kamasɛ be doo ŋe man ya. Balaŋ baŋ bee sila mena abↄↄ anekↄlaŋ kɛŋa nɛ, ne naa na sia naase ba wose diyem yɛɛ abↄↄ ŋaale na kawola nyi bɛɛ som Wurubuarɛ nideli. Bɛɛ beo yↄkↄse ba wose te bɛɛ naase ba wose diyem, mↄna mena abↄↄ anekↄlaŋ kɛŋa dↄↄ kedi nɛ, bee yeli baa tale di ba wose dↄↄ nyi bↄↄ yɛɛ dukum bela ya.

will be added

X\