Kolosetena 1

1Tↄne kei lee maŋ Pↄↄl ŋon Wurubuarɛ ba lese maŋ lee ↄ kegyaebii man nyi maa yɛɛ Yesu Kristo kpilale nɛ, na de dↄↄ Kristobaale Timoti gyaŋ. 2Dɛɛ ŋmarase ke dee yelee ɛmɛɛ de tebia Wurubuarɛ balaŋ baŋ ɛ be lɛɛ Yesu Kristo di, te ɛ silana anokoare keŋ te ɛ kyaa Kolose donↄↄ man nɛ. De kya Wurubuarɛ waa mo ↄ bɛrɛɛ boele ŋon na waa fa ŋon wosefɛɛreŋ. 3Debaŋ kamasɛ keŋ dɛɛ fane na dɛɛ fa Wurubuarɛ de Gbeŋgyoo Yesu Kristo ↄ kya ŋon karaŋ lee ɛmɛɛ dↄↄ. 4Nawolo nyi de te nyii mena keŋ ɛ be lɛɛ Yesu Kristo di, na mena keŋ ɛ ne gyae Wurubuarɛ balaŋ baŋ pou nɛ. 5Ɛ ne yɛɛ kɛŋa pou nawolo nyi, ɛ sia gyakaa abↄↄ kpaakpaa ŋan Wurubuarɛ be desina see ŋon adido nɛ dↄↄ. Wurubuarɛ nombia ŋan ɛ be taŋgbɛɛ nyii nɛ, yele la te ɛ gyeŋawↄ nyi abↄↄ kpaakpaa ŋaale doo adido fa ŋon. Wurubuarɛ nombia kɛŋa yɛna anokoare nombia ŋan. 6Nombia kpaakpaa ŋan bↄↄ yako ŋon nɛ te lɛɛ tɛɛle kei pou dↄↄ. Te ŋa te yeli balaŋ burum ne kyɛɛkee lee be gbɛɛneŋ kumɛɛ man kↄŋ Wurubuarɛ gyaŋ, ŋgba mena keŋ ŋa be kyɛɛkee ŋon lee wee gyaŋgbate keŋ ɛ be nyii nombia ŋenaŋ, te ɛ be nyii Wurubuarɛ bɛrɛɛ keŋ man nideli nɛ. 7De dↄↄ gyaagyi Epafirase ŋon ↄ yɛɛ Yesu Kristo tobaale e te ↄ ne yɛɛ ↄ tom na anokoare, te daa na e pou ne yɛɛ tom dokoloŋ nɛ yako na ŋon bɛrɛɛ nombia kɛŋa. Ŋon kaa seŋala de nawↄↄ man te ↄ kyↄↄ ŋon. 8Ŋon mↄ kaa yako na daa mena keŋ Wurubuarɛ feliŋ ŋon be yeli ɛ ne gyae Wurubuarɛ balaŋ nideli nɛ. 9Mena dↄↄ lee wee keŋ dↄↄ nyii ɛ wose man nombia nɛ, dɛɛ fane fa ŋon wee kamasɛ nyi Wurubuarɛ waa fa ŋon nyansa na waa yela ɛ ka gyeŋ ↄ kegyaebii na ɛ ke nyii ↄ nombia ŋan pou man nideli. 10Kei ne gyae la ke yela ɛ ke tale kyaa ŋgba mena keŋ de Gbeŋgyoo Wurubuarɛ ne gyae nɛ, na ɛ ke yɛɛ abↄↄ kpaakpaa ŋan kaboena nɛ gbɛɛ kamasɛ man, na ɛ ka gyeŋ ↄ nombia ŋan mↄ kpu. 11Dɛɛ fane nyi Wurubuarɛ waa mo ↄ gyoorobiiri doŋ keŋ ka dokoso be kyaa ya nɛ do ɛ man, na waa yela ɛ kenyiŋ konↄↄ seŋ keŋkeŋ kpene kamasɛ keŋ gyae ke kↄŋ ɛ dↄↄ nɛ man. 12Dɛɛ fane nyi gyoŋ dee doo ɛ man na ɛ ke fa Wurubuarɛ karaŋ debaŋ kamasɛ, nawolo nyi ŋon yele la te ɛ kaboewↄ nyi yaa nyiŋ abↄↄ kpaakpaa ŋan ↄ be desina see ↄ gyoorobiiri keŋ man fa ↄ balaŋ nɛ. 13Nawolo nyi ŋon Wurubuarɛ lese na daa lee ↄbↄnsam ditiŋtɛɛ keŋ man, te ↄ moo daa kↄŋ ↄ bu Yesu ŋon ↄ ne gyae ↄ nombia nɛ gyoorobiiri man. 14Ↄ bu Yesu Kristo kei te ↄ moowↄ tↄ de nombiakumɛɛ pou kom. Ŋon Yesu yele la te de nyiŋa da wose te Wurubuarɛ moo de nombiakumɛɛ pou kyɛɛ daa. 15Wurubuarɛ bu Yesu Kristo ŋon ↄ kyaa pɛte Wurubuarɛ be yɛɛ kpene kamasɛ nɛ, ŋon yɛna Wurubuarɛ ŋon walaŋ bɛɛ mo ↄ sibii naa e ya nɛ dinↄↄ. Ŋon kela na abↄↄ ŋan pou Wurubuarɛ be yɛɛ nɛ. 16Ŋon Yesu dↄↄ te Wurubuarɛ tɛɛwↄ yɛɛ abↄↄ pou. Abↄↄ ŋan ŋe kyaa adido na ŋan ŋe kyaa tɛɛle man, ŋan dɛɛ mo de sia fonɛɛ naa ŋa na ŋan de bɛɛ naa ŋa ya nɛ, mo kpu na kpene kamasɛ keŋ ne di doŋ yenaŋ kamasɛ ŋgba gbeŋgyoona na gyooneŋ pou. Ŋon Yesu dↄↄ te Wurubuarɛ tɛɛwↄ yɛɛ abↄↄ pou, te ŋe popou mↄ kyae fa e. 17Ŋon Yesu Kristo kei wulaa ↄ kyaa pɛte Wurubuarɛ yɛɛ kpene kamasɛ, te ↄ doŋ man dↄↄ te kpene kamasɛ mↄ kyaa. 18Ŋon yɛna ↄ balaŋ Kristotena dikpii keŋ pou nyee, te ↄ na wola wↄ gbɛɛ ŋgba mena keŋ deniwalaŋ nyee na wola na ↄ wose pou gbɛɛ nɛ. Ŋon ke yɛna be nyeedoŋ pou nyee, na walaŋ ŋon Wurubuarɛ be taŋgbɛɛ gyuusu lee yeŋ man, na ke yela waa bese abↄↄ pou man siamante. 19Ke yɛɛ ŋon Wurubuarɛ gbagba kegyaebii ke nyi, ↄ dinↄↄ pou de kaa doo ↄ bu ŋon man. 20Yesu yeŋ keŋ ↄ ba yem ↄpaŋdaŋ dↄↄ na ↄ fatabo keŋ be kyɛɛkee leki nɛ, keŋ kaa desina na kpene kamasɛ na Wurubuarɛ nsana. Keŋ moona wosefɛɛreŋ kↄŋ adido na ateta abↄↄ pou na ŋon Wurubuarɛ nsana. 21Gyaŋgba keŋ na nafↄ ɛmɛɛ na Wurubuarɛ nsana be dana gyoŋ ya, te ɛ nombiakumɛɛ dↄↄ ɛ kↄla e lee ɛ konↄↄse man. 22Mↄna nɛnɛɛ dↄↄ Wurubuarɛ te tɛɛ Kristo ŋon ↄ be kaa bese deniwalaŋ te ↄ ba yem ↄpaŋdaŋ dↄↄ nɛ dↄↄ desina ɛmɛɛ na ŋon Wurubuarɛ nsana. Wurubuarɛ yɛɛ kei na ɛ ke tale kaa seŋ ↄ siaman keŋ dukum kamasɛ be doo ɛ man na ke yela waa bu ŋon fↄↄ ya. 23Mↄna kaboena nyi yaa seŋ ɛ kelɛɛdi keŋ man keŋkeŋ, keŋ nyi ɛ ba lese ɛ loo lee abↄↄ ŋan Wurubuarɛ be yako see ↄ nombia kpaakpaa ŋan man nyi waa yɛɛ fa ŋon nɛ dↄↄ ya. Wurubuarɛ nombia ŋan ɛ be wulaa nyii nɛ, ŋan ke te be dↄŋɛɛ bee kolosi fa balaŋ yenaŋ kamasɛ. Wurubuarɛ yele la te maŋ Pↄↄl mↄ kaa bese nombia ŋenaŋ tomyɛɛre te me dↄŋ mee kolosi ŋa fa balaŋ nɛ. 24Dana maŋ gyoŋ ŋgba ɛmɛɛ dↄↄ mɛɛ naa diyem debaŋ kei nɛ. Kei nawolo nyi mena keŋ Yesu be naa diyem ↄ balaŋ dↄↄ nɛ, mena diyem kenaŋ ke yaa ma seŋɛɛ ↄ nawↄↄ man mɛɛ naa ŋgba mena keŋ kaboena nyi Kristo walaŋ waa naa diyem Kristotena dikpii keŋ dↄↄ nɛ. 25Wurubuarɛ gbagba lese na maŋ nyi maa bese Kristotena pou tobaale. Tom keŋ ↄ ba mo do me nyiŋmaa man yɛna nyi maa lese ŋon Wurubuarɛ nombia ŋan man pou wola ŋon. 26Gyaŋgba keŋ na Wurubuarɛ moo nombia kɛŋa weese beneŋtena baŋ, mↄna nɛnɛɛ dↄↄ ↄ ta lese ŋa debↄↄ wola ↄ balaŋ Kristotena baŋ. 27Ke yɛɛ ŋon Wurubuarɛ gbagba kegyaebii ke nyi waa lese ↄ nombia aweeseŋ ŋan ŋe yɛɛ nombia dinaana ŋa, te ŋe dana tↄnↄↄ nɛ wola ↄ balaŋ pou. Nombia ŋenaŋ yɛna nyi, keŋ Kristo doo ɛ konↄↄse man dↄↄ ɛ loo gyakaa nyi wee daale ɛ ka bese gyoorobia. 28Mena dↄↄ te dee kolosi Yesu Kristo kei wose man nombia fa walaŋ kamasɛ nɛ. Dɛɛ mo de nyansa keŋ pou de dana nɛ wola walaŋ kamasɛ Yesu Kristo nombia ŋan te dɛɛ mo faree wↄ, na ke yela baa lɛɛ nombia ŋan di na baa seŋ ŋe man keŋkeŋ, na wee daale baa tale seŋ Wurubuarɛ siaman keŋ dukum kamasɛ be doo be man ya. 29Kei dↄↄ te me yase me sia mɛɛ mo Kristo doŋ keŋ ↄ ba mo do me man nɛ mo yɛɛ ↄ tom keŋ nɛ.

will be added

X\