Kpilala 9

1Weeya ŋenaŋ pou man na Sↄↄl sɛɛ ↄ ne ŋmaase de Gbeŋgyoo Yesu silala baŋ nyi waa ko wↄ. Mena dↄↄ ↄ gyuu Wurubuarɛ sae kegyia ŋon gyaŋ, 2ka sola e lɛɛ ↄ nyiŋmaa man tↄne keŋ gyae ke fa e doŋ na waa mo gyu Damasekuse donↄↄ man kefa Gyudatena ↄsom denɛɛ man kegyiise baŋ. Na baa fa e gbɛɛ waa kyaŋ walaŋ kamasɛ, ala na baala baŋ pou ↄ naa nyi be silana Yesu kawola wↄle kei nɛ. Na waa nyiŋ kyaŋ wↄ kↄŋ Gyerusalɛm donↄↄ man kaa tↄ deni. 3Ↄ ke gyu ka benaa Damasekuse donↄↄ nɛ, debokenaŋ man te boalaŋ daale lee adido kaa ŋmaale polɛ kilisi e. 4Mena dↄↄ ↄ leewↄ yala te ↄ nyii woya ŋaale baake e bↄↄse nyi, "Sↄↄl, Sↄↄl, weera dↄↄ te n ne naase maŋ diyem mena?" 5Botↄↄ te Sↄↄl tiranↄↄ bↄↄse e nyiaa, "Nyaŋ amↄte ŋonaŋ me Gbeŋgyoo?" Te ŋon mↄ yako e nyiaa, "Maŋ yɛna Yesu ŋon n ne naase diyem nɛ. 6Mↄna koro na n ke gyu donↄↄ keŋ man, na baa yako neŋ kpene keŋ kaboena nyi nya yɛɛ." 7Balaŋ baŋ baŋ na Sↄↄl dↄŋɛɛ nɛ, ba woya yeuwↄ lee be gyaŋ keŋ ba te tale gyuusu be nↄↄ ya. Baŋ mↄ nyii nↄↄwoya ŋan, mↄna ba te naa ŋolo ya. 8Sↄↄl korowↄ seŋ te ↄ gyuusu ↄ sia mↄna ↄ te tale naa kolo ya, mena dↄↄ be kyaŋa e ↄ nyiŋmaa man, te ba moo e gyu Damasekuse donↄↄ man. 9Ↄ kyaawↄ botↄↄ weeya kpaakpaa atooro keŋ nyi ↄ bɛɛ naa ya, te ↄ bee dii ya, te ↄ bɛɛ nyↄↄ mↄ ya. 10Na Yesu silale ŋolo kyaa Damasekuse botↄↄ keŋ bɛɛ baake e nyi Ananiase. Ↄ nyiiwↄ de Gbeŋgyoo baake e ŋgba dosɛɛ man nɛ nyi, "Ananiase." Te ↄ kpaawↄ nyi, "Me Gbeŋgyoo maŋ yaa!" 11Te de Gbeŋgyoo Yesu yako e nyi, "Koro gyu Gyuda dɛɛ, ke kyaa gbɛɛnaa keŋ bɛɛ baake ke nyi gbɛɛnaa keŋ ka Tenɛɛ nɛ nↄↄman, na n ke bↄↄse Sↄↄl ŋon ↄ ba lee Tasuse nɛ dↄↄ. Ↄ kyaa botↄↄ ↄ ne fane. 12Wurubuarɛ ta lese wola ŋon Sↄↄl mↄ ŋgba dosɛɛ man nɛ nyi, balee ŋon bɛɛ baake e nyi Ananiase nɛ, te kↄŋ ↄ kaa mo ↄ nyiŋmaase gyakaa ↄ dↄↄ, na waa bese naa bela." 13Ananiase tiranↄↄ nyiaa, "Me Gbeŋgyoo, balaŋ burum te yako maŋ balee kei wose man nombia, na mena keŋ ↄ be yɛɛ n balaŋ baŋ be kyaa Gyerusalɛm donↄↄ man nɛ akpanyaŋnyaŋ. 14Ↄ lɛɛ tↄne keŋ ne fa e doŋ baa lee Gyudatena saese kegyiise gyaŋ kↄŋ Damasekuse kɛbo, na ↄ kaa kyaŋ baŋ pou bɛɛ som neŋ nɛ." 15Keŋte de Gbeŋgyoo Yesu tiranↄↄ fa Ananiase nyiaa, "Gyu ↄ gyaŋ, nawolo nyi maŋ lese na e nyi waa som maŋ, na waa yela baŋ pou ba te yɛɛ Gyudatenawↄ ya, na be gyooneŋ na Iseraetena pou ke nyii ma yele. 16Maŋ ne gyae la maa wola e mena keŋ kaboena nyi waa naa diyem nideli lee ma yele dↄↄ." 17Keŋte Ananiase gyuuwↄ ka gyoo dekpaŋalaŋ keŋ man. Te ↄ moo ↄ nyiŋmaase gyakaa Sↄↄl nyee dↄ fane nyiaa, "Me dↄↄ Sↄↄl, de Gbeŋgyoo Yesu ŋon ↄ ba lese ↄ wose wola neŋ gbɛɛnaa man debaŋ keŋ ne kↄŋ kɛbo nɛ, ŋon kpila na maŋ n gyaŋ nyi me kaa fane fa neŋ na n kabese naa. Na Wurubuarɛ kenyiŋ mo ↄ feliŋ ŋon do n man." 18Debokenaŋ man te kolo leewↄ ↄ sia ŋan man yala ŋgba kpebii bↄↄlɛɛ bia nɛ, te Sↄↄl sia ŋan gyuusuwↄ, te ↄ besewↄ ↄ ne naa bela. Ↄ korowↄ seŋ te ba ke sↄↄ e Wurubuarɛ loŋ. 19Kenaŋ wↄle te be faa e weenɛɛ. Ↄ ke di taŋ nɛ, ↄ wose besewↄ yɛɛ e doŋ. Te ↄ dii weeya akalansɛɛ ŋaale Yesu silala baŋ gyaŋ Damasekuse donↄↄ man botↄↄ. 20Debokenaŋ man te Sↄↄl fiasɛɛ ↄ ne kolosi Yesu nombia Gyudatena ↄsom denɛɛ man nyi, Yesu yɛna Wurubuarɛ bu ŋon. 21Baŋ pou bↄↄ nyii e nɛ wose gbirisi wↄ, te be bↄↄse dↄŋa nyi, "Na balee kei kyaa la Gyerusalɛm donↄↄ man ↄ ne naase baŋ bɛɛ som Yesu nɛ diyem yee? Na keŋ dↄↄ te ↄ kↄŋawↄ kɛbo ↄ kaa kyaŋ wↄ na waa mo wↄ gyina saese kegyiise baŋ yee?" 22Te Sↄↄl besewↄ nyiŋ doŋ kpu te ↄ kolosiwↄ lese ŋe man nideli fa Gyudatena baŋ nyi, Yesu yɛna nyeelɛɛre ŋon Wurubuarɛ be yako see nyi waa kↄŋ nɛ. Ↄ kolosiwↄ nideli keŋ nyi Gyudatena baŋ be kyaa Damasekuse donↄↄ man nɛ, te tale gyuusu be nↄↄ bela ya. 23Weeya ala ŋaale wↄle nɛ, Gyudatena kegyiise gyaŋeewↄ yɛɛ nↄↄ nyi baa ko Sↄↄl. 24Mↄna Sↄↄl nyii be nombiakumɛɛ ŋan bↄↄ bake ↄ nyeeman nɛ. Nelim na ka weese pou na, bɛɛ deke donↄↄ keŋ anaanↄↄse ŋan na baa nyiŋ ko e. 25Mↄna nelim daale nɛ, ↄ kaseela baŋ moo e do dokyoŋoloŋ man, te be tisinaa e mo nfansere man gbaa dekyaŋ keŋ bↄↄ maa kilisi donↄↄ keŋ nɛ, te ↄ yeuwↄ laŋ Gyerusalɛm. 26Sↄↄl ka bese gyu Gyerusalɛm donↄↄ man nɛ, ↄ gyaewↄ nyi waa mo ↄ wose kpu na Yesu silala baŋ. Mↄna be popou ne yee nawolo nyi na ba te lɛɛ ta di nyi, ŋon mↄ ta bese Yesu silale gbagba ya. 27Keŋte Banabase moo e gyu Kristo kpilala baŋ gyaŋ. Te ↄ yako wↄ mena keŋ Sↄↄl be naa de Gbeŋgyoo Yesu Damasekuse gbɛɛnaa man, na mena keŋ de Gbeŋgyoo Yesu be kolosi na e, na mena keŋ ↄ be gyↄ ↄ konↄↄ mo Yesu yele keyako Wurubuarɛ nombia ŋan Damasekuse donↄↄ man nɛ. 28Mena dↄↄ Sↄↄl kpuuwↄ na Yesu silala baŋ. Ↄ kyaawↄ be gyaŋ te be gyↄↄ be konↄↄ ta na Gyerusalɛm donↄↄ kolosi Wurubuarɛ nombia ŋan lee de Gbeŋgyoo Yesu yele man. 29Sↄↄl kolosiwↄ nideli te ŋon na Gyudatena baŋ bee kolosi Giriki dei nɛ, lɛɛ aŋmaareŋ nideli. Te be gyae gbɛɛ keŋ baa mo ko e. 30Mena dↄↄ Yesu silala baŋ ka gyeŋ mena nɛ, ba moo e gyu Kaesaria donↄↄ man te be yela ↄ laŋa Tasuse. 31Mena dↄↄ Kristotena baŋ be kyaa Gyudia na Galelia na Samaria tɛɛlese man nɛ, wose fɛɛ wↄ mena debaŋ kenaŋ man. Be lɛɛ Yesu nombia ŋan di nideli, te be tɛɛwↄ Wurubuarɛ kegyaebii man, te Wurubuarɛ feliŋ ŋon doo wↄ kakyeŋ te be wukuwↄ kpu. 32Kↄŋawↄ debaŋ daale nyi Pita keta ↄ ne kila tɛɛle keŋ nɛ, ↄ gyuu Lida donↄↄ man ↄ kaa kɛɛ Kristotena baŋ be kyaa botↄↄ nɛ. 33Keŋte ↄ ke naa balee ŋolo na ↄ yele yɛna Anease ŋon ↄ wose pou ba yem nɛ. Ↄ doowↄ dofoŋoŋ dↄↄ kulutooneŋ gyanaara keŋ ↄ bɛɛ tale koro ya. 34Botↄↄ te Pita baake e nyiaa, "Anease kɛɛ, Yesu Kristo te kyↄ neŋ n kawee. Koro seŋ na n ke bↄ n dofoŋoŋ!" Debokenaŋ man te Anease korowↄ seŋ. 35Balaŋ baŋ pou be kyaa Lida na Sarↄn kena Anease dↄŋɛɛ nɛ, be lɛɛ de Gbeŋgyoo Yesu nombia ŋan di te ba bese ↄ silala. 36Na alo ŋolo mↄ kyaa Gyopa keŋ ŋon mↄ yɛɛ Yesu silale e te ↄ yele yɛna Tabita. Giriki dei man na baa baake e nyi Dↄkase keŋ nawolo nyi ŋaa. Debaŋ kamasɛ na alo kei ne yɛɛ deeli fa balaŋ, te ↄ ne kyↄ ayematena mↄ nideli. 37Debaŋ kenaŋ man nɛ, ↄ gyoo kawee te ↄ yeŋawↄ. Te be sↄↄ e teeli abansoro deni daale man. 38Lida na Gyopa donↄↄse taŋ lem na dↄŋa ya. Te kaseela baŋ be kyaa Gyopa kenyii nyi Pita kyaa Lida nɛ, be kpila tewulɛɛ bala gyu ↄ gyaŋ nyi, "Pita, waaseda, yɛɛ bileŋ na n kekↄŋ de gyaŋ." 39Mena dↄↄ Pita korowↄ sila wↄ. Be ka gyoo botↄↄ nɛ te ba moo e gyu deni adidote keŋ man. Te liala baŋ pou kaa yilaawↄ kilisi Pita bee wii, na bɛɛ mo kegbase na abↄↄ ŋan Tabita be ŋare fa wↄ pɛte ↄ ba yem nɛ wola e. 40Keŋte Pita lese be popou lee deni keŋ man, te ↄ ŋmiŋawↄ ↄ doona dↄↄ te ↄ fanewↄ. Te ↄ besenawↄ kɛɛ woo ŋon te ↄ yakowↄ nyiaa, "Tabita, koro!" Te woo ŋon gyuusu ↄ sia, te ↄ kena Pita nɛ, ↄ korowↄ kyaa. 41Keŋte Pita kyaŋa e ↄ nyiŋmaa man kyↄ e te ↄ korowↄ seŋ. Te ↄ baake Yesu silala baŋ na liala baŋ, te ↄ moo Dↄkase do wↄ be nyiŋmaa man na ↄ delena. 42Nombia kɛŋa yaaseewↄ kila Gyopa keŋ pou, te balaŋ burum kaa lɛɛ de Gbeŋgyoo Yesu di. 43Kenaŋ wↄle na Pita dii weeya burum Gyopa donↄↄ man botↄↄ. Na ↄ kyae Simↄn ŋon ↄ ne yɛɛ wonembia tↄna wose man tom nɛ gyaŋ.

will be added

X\