Kpilala 8

1Lee wee kenaŋ te be fiasɛɛ bɛɛ naase Kristotena dikpii keŋ diyem nideli Gyerusalɛm donↄↄ man. Mena dↄↄ Kristotena baŋ pou yaaseewↄ laŋ Gyudia na Samaria tɛɛlese man, kaase kpilala baŋ baageŋ Gyerusalɛm donↄↄ man. 2Keŋte balaŋ baŋ bee yee Wurubuarɛ nɛ, baale gyuuwↄ kewuu Sitifin te be wii ↄ lia nideli. 3Mↄna Sↄↄl korowↄ seŋ ↄ ne naase Kristotena baŋ diyem nideli. Ↄ na gyoo akpaŋalaŋse man ke wↄŋee Kristotena ala na baala gyu ketↄ deni. 4Yenaŋ kamasɛ keŋ Kristotena baŋ be yaasee gyu nɛ, be kolosi Wurubuarɛ nombia ŋan fa balaŋ. 5Te Filipo gyuu Samariatena donↄↄ dinaa daale man keyako Wurubuarɛ nombia nyi, Yesu Kristo yɛna nyeelɛɛre ŋon Wurubuarɛ be yako see nyi waa kↄŋ nɛ. 6Debaŋ keŋ balaŋ burum baŋ be nyii nombia ŋan Filipo be yako, te bↄↄ naa gyakoloŋ nombia ŋan ↄ be yɛɛ nɛ dↄↄ, be tei ↄ nombia ŋan nideli. 7Filipo kekolosi keŋ nɛ, balaŋ baŋ feliŋkumɛɛ doo be man nɛ fae yeesa keŋkeŋ, te feliŋkumɛɛ ŋan leewↄ be man. Te baŋ mↄ be baamense ba yekee, na ↄtakasese burum mↄ wose yɛɛ wↄ doŋ. 8Mena dↄↄ yɛɛ donↄↄ kenaŋ mantena baŋ pou gyoŋ nideli. 9Donↄↄ kenaŋ man na balee ŋolo kyaa botↄↄ keŋ bɛɛ baake e nyi Simↄn. Ↄ ne yɛɛ baalabiiri nombia wola Samariatena, keŋ nyi ba wose na gbirisi wↄ. Ↄ ne gyina ↄ wose adido wola ↄ wose nyi ↄ yɛɛ walaŋ dinaa ŋolo e. 10Mena dↄↄ walaŋ kamasɛ, bia na kegyiise pou ne tei e te bɛɛ yako nyi, "Ŋon yɛna Wurubuarɛ doŋ keŋ bɛɛ baake nyi doŋ dinaa nɛ." 11Ↄ ta mo ↄ baalabiiri nombia kɛŋa wola wↄ yela ba wose te gbirisi wↄ kyare, mena dↄↄ bɛɛ lɛɛ e di nideli. 12Mↄna Filipo ke yako wↄ Wurubuarɛ gyoori na Yesu Kristo wose man nombia ŋan nɛ be lɛɛwↄ di, te be sↄↄ ala na baala pou Wurubuarɛ loŋ. 13Simↄn gbagba mↄ lɛɛ nombia ŋan di te be sↄↄ e Wurubuarɛ loŋ, te ↄ moo ↄ wose do na Filipo nideli. Te gyakoloŋ nombia na nombia dinaana ŋan ↄ be naa Filipo ne yɛɛ dↄↄ, ↄ wose gbirisi e. 14Debaŋ keŋ Yesu kpilala baŋ be kyaa Gyerusalɛm be nyii nyi Samariatena te lɛɛ Wurubuarɛ nombia ŋan di nɛ, be kpila Pita na Gyↄn be gyaŋ. 15Ba kekↄŋ kaa gyoo na, be fanewↄ fa wↄ nyi Wurubuarɛ waa mo ↄ feliŋ ŋon do be man. 16Nawolo nyi na Wurubuarɛ ta moo ta ↄ feliŋ ŋon do baŋ Samariatena benaŋ man ŋolo man ya. Be sↄↄ wↄ Wurubuarɛ loŋ bo lee de Gbeŋgyoo Yesu waageŋ yele man. 17Te Pita na Gyↄn moo be nyiŋmaase gyakaa be dↄↄ te be fanewↄ fa wↄ, te Wurubuarɛ moo ↄ feliŋ ŋon do be man. 18Simↄn naawↄ nyi Yesu kpilala baŋ ka mo be nyiŋmaase gyakaa balaŋ baŋ dↄↄ fane fa wↄ nɛ, Wurubuarɛ moo ↄ feliŋ ŋon do be man keŋte ↄ lese kↄba waa fa wↄ, 19te ↄ yako wↄ nyiaa, "Ɛ mo mena doŋ kei fa maŋ mↄ, na walaŋ kamasɛ ŋon maa mo me nyiŋmaa gyakaa ↄ dↄↄ na, Wurubuarɛ ka mo ↄ feliŋ ŋon do ↄ man." 20Te Pita yako e nyi, "Wurubuarɛ waa yela ɛmɛɛ na n kↄba pou ka gyoo boalaŋ man. Nawolo nyi n te yɛɛ nya agyueŋ nyi n ka mo kↄba lɛɛ Wurubuarɛ kolo anefaŋ. 21N be dana dedii yaa daseŋae da tom kei man ya, nawolo nyi n konↄↄ man nombia ba tenɛɛ Wurubuarɛ siaman ya. 22Kyɛɛkee nya agyueŋ lee n nombiikum kei man, na n kefane fa de Gbeŋgyoo Wurubuarɛ na waa mo ke kyɛɛ neŋ. 23Nawolo nyi ma te naa nyi n dana sibiikum, te nombiakumɛɛ te di n dↄↄ." 24Te Simↄn yako wↄ nyi, "Mɛɛ waase ŋon bo ɛ fane fa de Gbeŋgyoo Wurubuarɛ fa maŋ, na ŋan pou ɛ be yako nɛ man dokoloŋ gba be kↄŋ me dↄↄ ya." 25Pita na Gyↄn kekolosi Wurubuarɛ nombia ŋan di adansɛɛ lee Yesu Kristo wose man taŋ nɛ, te ba besewↄ laŋ Gyerusalɛm donↄↄ man. Be ka bese bee gyu keŋ nɛ, be kolosi Kristo nombia kpaakpaa ŋan Samariatena akuraase burum man. 26De Gbeŋgyoo Wurubuarɛ kpilale ŋolo lee adido kaa yako Filipo nyiaa, "Koro desina n wose na n ka mo ata yenaŋ gbɛɛ bene keŋ ba lee Gyerusalɛm ne gyu Gasa donↄↄ man nɛ." 27Keŋte Filipo korowↄ desina ↄ wose moo gbɛɛ. Ↄ kee gyu keŋ na te ↄ ke gyaŋee na Itiopia baale saayɛte ŋolo. Ↄ yɛɛ Itiopia ala gyoo ŋon bɛɛ baake e nyi Kandase nɛ wose man walaŋ kegyia ŋolo e. Ŋon ne kɛɛ na ala gyoo ŋon kↄba pou dↄↄ. Balee kei gyuu Gyerusalɛm bo ka som Wurubuarɛ, 28te ↄ besewↄ kaa laŋ ↄ ne gyu ↄ dɛɛ. Na ↄ kyaa anebiliŋinbii daale man keŋ dɛɛkyↄŋse ne wↄŋee na ke. Ↄ kyaa ↄ ne kala Wurubuarɛ dekpeŋkpeŋgyↄↄre Yesaya tↄne. 29Te Wurubuarɛ feliŋ ŋon yako Filipo nyi, "Tuu benaa anebiliŋinbii keŋ." 30Keŋte Filipo yeuwↄ gyu botↄↄ, te ↄ ke nyiiwↄ ŋgba balee ŋon ne kala kolo lee Wurubuarɛ dekpeŋkpeŋgyↄↄre Yesaya tↄne keŋ man nɛ te Filipo bↄↄse e nyi, "Mena dↄↄ n ne nyii kpene keŋ n ne kale nɛ man?" 31Te balee ŋon tiranↄↄ fa Filipo nyi, "Sena te maa tale nyii ke man, keŋ ŋolo ta lese ke man fa maŋ ya?" Te ↄ baake Filipo nyi waa gyeŋ kaa kyaa ↄ gyaŋ. 32Na Wurubuarɛ nombia ŋan bↄↄ ŋmarase see te ↄ ne kale yɛna nyi, "Ba te kparaa e laŋ ŋgba nam ŋon bee gyu be kaa ko e nɛ. Ↄ yɛɛ ŋgba nambu ŋon bɛɛ kɛrɛɛ ↄ wona te ↄ seŋɛɛ yididi nɛ. Ↄ te wii koraŋ gba ya. 33Be tisinaa e tɛɛle man, do e desɛŋ, te be sukutii ↄ nombia do. Amↄ ne gyae la waa tale yako kolo lee ↄ duuluŋ man balaŋ wose man, ŋgba bↄↄ ko e bileŋ nɛ." 34Botↄↄ te Itiopia baale kegyia ŋon bↄↄse Filipo nyiaa, "Kegyia waaseda, amↄte wose man nombia yaa Wurubuarɛ dekpeŋkpeŋgyↄↄre kei ne yako nɛ, ŋon gbagba yaa walaŋ wↄle ŋolo bo?" 35Te Filipo seŋawↄ Wurubuarɛ nombia ŋan bↄↄ kale nɛ dↄↄ yako e Yesu wose man nombia ŋan. 36Be kee gyu keŋ nɛ, te be ka leewↄ loŋ daale dↄↄ. Botↄↄ te balee ŋon bↄↄse Filipo nyiaa, "Kɛɛ loŋ daale yaa kei, woŋ ne tↄↄ na maŋ gbɛɛ na Wurubuarɛ loŋkesↄ?" 37Te Filipo yako e nyi, "Akpaa n mo n konↄↄ pou lɛɛ Kristo di na, gbɛɛ doo nyi maa sↄ neŋ Wurubuarɛ loŋ." Balee ŋon mↄ yakowↄ nyiaa, "Mɛɛ lɛɛdi nyi Yesu Kristo yɛna Wurubuarɛ bu ŋon." 38Mena dↄↄ balee ŋon yela anebiliŋinbii keŋ seŋawↄ, te ŋon na Filipo pou tisiwↄ ka gyoo loŋ keŋ man te Filipo sↄↄ e Wurubuarɛ loŋ. 39Be ka lee loŋ keŋ man nɛ, te de Gbeŋgyoo Wurubuarɛ feliŋ ŋon moo Filipo laŋ debokenaŋ man, mena dↄↄ balee ŋon te naa e bela ya. Mↄna balee ŋon besewↄ mo ↄ gbɛɛ ↄ ne gyu gyoŋ man. 40Filipo kɛɛwↄ na, ↄ kyaa Asotuse donↄↄ man. Ↄ tɛɛwↄ donↄↄse ŋan man kolosi Kristo nombia ŋan, kaboena ↄ gyuuwↄ ka lee Kaesaria donↄↄ man.

will be added

X\