1 Keŋte Wurubuarɛ sae kegyia ŋon bↄↄse Sitifin nyi, "Mena dↄↄ nombia ba ayakoŋ kɛŋa pou yɛɛ ampaŋ?" 2 Botↄↄ te Sitifin tiranↄↄ nyi, "Me tebia na me kyaↄ, ɛ tei me gyaŋ. Wurubuarɛ ŋon ↄ ne di gyoori nɛ lese na ↄ wose wola de naana Aberaham, debaŋ keŋ ↄ kyaa Mesopotamia tɛɛle man nɛ, kenaŋ wↄle pɛte ↄ korowↄ gyu kekyaa Haran donↄↄ man, 3 botↄↄ te Wurubuarɛ yako e nyi, 'Koro lee n tɛɛle man na n loŋtona gyaŋ, na n ke tu gyu ke kyaa tɛɛle keŋ maa wola neŋ nɛ dↄↄ.' 4 Mena dↄↄ Aberaham korowↄ lee Kaldea tɛɛle man, te ↄ gyuuwↄ kekyaa Haran donↄↄ man. Ↄ kya yeŋ wↄle nɛ, Wurubuarɛ moo e kaa see tɛɛle ya akyaŋ ke dↄↄ kei dↄↄ. 5 Tɛɛle naetↄↄ dokoloŋ koraŋ ↄ te fa e botↄↄ nyi dɛɛ bese ŋon gbagba ↄ wui ya. Mↄna Wurubuarɛ yakowↄ see nyi, waa mo tɛɛle kenaŋ fa ŋon na ↄ duuluŋ man balaŋ. Debaŋ kenaŋ mↄ na Aberaham be dana bu koraŋ gba ya. 6 Keŋte Wurubuarɛ yako e nyi, 'N duuluŋ man balaŋ baa kyaa dei wↄle daale tɛɛle dↄↄ bese ŋↄↄla. Baa moo wↄ yɛɛ gbeŋa, na baa yɛɛ wↄ nyeemandoŋ na akpanyaŋnyaŋ kulutooneŋ sↄŋonoŋ akpeŋ anaara (400). 7 Mↄna maa wↄŋ tɛɛle kenaŋ mantena baŋ baa mo n duuluŋ man balaŋ baŋ yɛɛ gbeŋa nɛ deŋele. Kenaŋ wↄle na, n duuluŋ man balaŋ baŋ baa lee tɛɛle kenaŋ man, na be kaa som maŋ kɛbo kei.' 8 Te Wurubuarɛ na Aberaham bakewↄ see nyi, ŋon na ↄ duuluŋ man balaŋ pou baa kara ba baala wose. Mena dↄↄ Aberaham ka lola ↄ bu Asiki weeya gyanaarate nɛ te ↄ kara ↄ baala wose. Kenaŋ wↄle Asiki mↄ kaa lola Gyekↄpo, te Gyekↄpo mↄ lola de naanaↄ kufu bala baŋ. 9 Gyosɛfo mↄ yɛɛ de naanaↄ kufu bala baŋ man ŋolo e. Keŋ ↄ kegyiise ne kↄla e dↄↄ nɛ te ba mo e yↄↄ te ↄ ka bese gbeŋi Igyipite tɛɛle man, mↄna Wurubuarɛ seŋawↄ ↄ wↄle, 10 te ↄ lese e lee ↄ diyem pou man. Te ↄ fa e nyansa, te ↄ yela Igyipitetena gyoo Faaro gyae ↄ nombia, mena dↄↄ gyoo ŋon moo ↄ dekpaŋalaŋ na Igyipite tɛɛle keŋ pou do ŋon Gyosɛfo nyiŋmaa man nyi waa kɛɛ ŋe dↄↄ. 11 Debaŋ kenaŋ te tanam dinaa daale kaa yalawↄ Igyipite na Kaanan tɛɛlese pou dↄↄ, te ka moo kaale dinaa mↄ kaa lↄ be dↄↄ. Mena dↄↄ de naanaↄ baŋ te nyiŋ weenɛɛ baa di ya. 12 Debaŋ keŋ Gyekↄpo be nyii nyi weenɛɛ kyaa Igyipite nɛ, te ↄ kpila ↄ bia de naanaↄ baŋ botↄↄ. 13 Be ka bese gyu Igyipite bolate nɛ, Gyosɛfo lese ↄ wose wola ↄ kegyiise baŋ, te gyoo Faaro mↄ kaa gyeŋa Gyosɛfo ↄ loŋtona baŋ. 14 Mena dↄↄ Gyosɛfo doo ↄ kya Gyekↄpo tiila nyi ŋon na ↄ balaŋ pou baa tu kↄŋ Igyipite. Be yaanↄↄle pou yɛɛ balaŋ sↄŋotooro na kufu banoŋ (75). 15 Mena dↄↄ Gyekↄpo gyuuwↄ ke kyaa Igyipite, te ŋon na ↄ bia pou yekeewↄ botↄↄ. 16 Ba besena ba woya baŋ kↄŋ Sekyɛm donↄↄ man, te be kaa wuu wↄ boe bↄↄ keŋ Aberaham be kala kↄba lɛɛ lee Hamↄ bia gyaŋ nɛ man. 17 Debaŋ keŋ Wurubuarɛ nombii ayakoŋ see fa Aberaham keŋ na benaa kekↄŋ ampaŋ nɛ, te de balaŋ baŋ be kyaa Igyipite nɛ wukuwↄ nideli. 18 Kenaŋ wↄle nɛ, gyoo wↄle ŋolo ŋon ↄ ba gyeŋ kolo lee Gyosɛfo wose man ya nɛ, kaa dii gyoori Igyipite tɛɛle keŋ dↄↄ. 19 Mena dↄↄ ↄ yɛɛ de naanaↄ baŋ nyeemandoŋ na akpanyaŋnyaŋ, te ↄ ŋere wↄ dekpaŋkpasare man nyi baa tirii be bia wↄlɛɛ leki na baa nyiŋ yeŋ. 20 Mena debaŋ kenaŋ man mↄ te ba lola Mosesi, mↄna ↄ te yɛɛ bu yakaate e Wurubuarɛ siaman ya. Ba weese e ↄ kya deni man te be kɛɛle e botↄↄ gyaalaŋna batooro. 21 Lii debaŋ daale na, be tira e leki debↄↄ man, te gyoo Faaro bu alebu naa e mo ke kɛɛle ŋgba ŋon gbagba ↄ bu nɛ. 22 Ba wola e Igyipitetena nyansa pou. Te ↄ kaa bese walaŋ dinaa ↄ kekolosi na ↄ tom keyɛɛ pou man. 23 Mosesi kedi kulutooneŋ sↄŋola nɛ, te kↄŋawↄ ↄ nyeeman nyi waa koro gyu ke kɛɛ ↄ tebia Iseraetena kekyaa man. 24 Ↄ ke gyu keŋ nɛ, ↄ ke naawↄ ŋgba Igyipite baale ŋolo ne naase Iserae baale ŋolo diyem na, te ↄ gyuuwↄ ke lɛɛ ↄ dɛɛ baale ŋon nↄↄ te ↄ koo Igyipite baale ŋon. 25 Mosesi agyueŋ man na, ŋon gyeŋ nyi ↄ balaŋ baŋ baa nyii asɛɛ nyi Wurubuarɛ waa ta ↄ dↄↄ bo lese wↄ lee be kaale man, mↄna be te nyii asɛɛ mena ya. 26 Ke tɛɛ naa nɛ, ↄ ke naa Iseraetena wolɛɛwolɛɛ bala mↄ ne yoo, te ↄ gyuuwↄ ↄ kaa pataa wↄ te ↄ yako wↄ nyiaa, 'Me tebia ɛ kɛɛ, ɛ wolɛɛwolɛɛ. Weera dↄↄ te ɛ ne yɛɛ dↄŋa akpanyaŋnyaŋ mena?' 27 Mↄna ŋon ↄ ne yɛɛ ↄ dↄↄ akpanyaŋnyaŋ nɛ tɛɛse Mosesi lee yenaŋ te ↄ bↄↄse e nyiaa, 'Amↄte moona neŋ yɛɛ de siamante na de nombiadiiri?' 28 'N ne gyae baa n ka ko maŋ ŋgba mena keŋ dana n ba ko Igyipite baale ŋon nɛ?' 29 Mosesi kenyii nombii kei nɛ te ↄ korowↄ yeu gyu ke kyaa Midian tɛɛle man bese ŋↄↄle botↄↄ. Botↄↄ te ↄ yalawↄ te ↄ lola bia baala bala. 30 Kulutooneŋ sↄŋola wↄle nɛ, Wurubuarɛ kpilale ŋolo kaa lese ↄ wose wola Mosesi, boalaŋ daale keŋ ne kpaa depoŋfa daale man depampaa nsana Sinai bula keŋ gyaŋ nɛ. 31 Mosesi naa ke na, gyakoloŋ kyaŋa e. Te ↄ tuuwↄ benaa ke na waa nyiŋ naa ke nideli. Botↄↄ te ↄ nyii de Gbeŋgyoo Wurubuarɛ woya nyiaa, 32 'Maŋ yɛna n naanaↄ Aberaham na Asiki na Gyekↄpo Wurubuarɛ ŋon.' Te gyakoloŋ gyoo Mosesi te ↄ sereewↄ, mena dↄↄ ↄ te tale kɛɛ ke bela ya. 33 Te de Gbeŋgyoo Wurubuarɛ yako e nyiaa, 'Kpee nyaŋ nkyokotase lee n naawↄ man, nawolo nyi maŋ Wurubuarɛ gbagba kyaa botↄↄ keŋ n seŋɛɛ nɛ. 34 Ampaŋ, ma te naa me balaŋ baŋ be kyaa Igyipite nɛ kaale te me te nyii mena keŋ mↄ bɛɛ toroŋ, mena dↄↄ me te tisi lee adido kↄŋ me kaa lɛɛ wↄ. Desina n wose na maa kpila neŋ Igyipite!' 35 Mosesi kei nombia te be bɛɛwↄ, te be bↄↄse e nyi, 'Amↄte yɛɛ na neŋ de siamante, na de nombiadiiri.' Wurubuarɛ tɛɛwↄ ↄ kpilale ŋon ↄ ba lese ↄ wose wola Mosesi depoŋfa keŋ man nɛ dↄↄ, yɛɛ e siamante na nyeelɛɛre. 36 Mosesi kei yɛna gyakoloŋ nombia na nombia dinaana debaŋ keŋ ↄ ba mo Iseraetena lee Igyipite ta be siaman mo wↄ kaa toŋ ɛpo yayam keŋ, gyu ke ta depampaa dinaa keŋ man kulutooneŋ sↄŋola (40) nɛ. 37 Mosesi kei yako na Iseraetena nyiaa, 'Wurubuarɛ waa kpila ↄ dekpeŋkpeŋgyↄↄre ŋolo ɛ gyaŋ ŋgba mena keŋ ↄ be kpila maŋ nɛ. Waa lee bo ɛmɛɛ gbagba ɛ balaŋ man.' 38 Mosesi kei na Iseraetena baŋ ke kyaa depampaa keŋ man nɛ, Wurubuarɛ kpilale kaa kolosiwↄ na e Sinai bula keŋ dↄↄ te ↄ lɛɛ Wurubuarɛ nyeedoŋ nombia ŋan fa de naanaↄ, te ŋe kaa tuŋa daa mↄ. 39 Mↄna de naanaↄ yɛɛ deŋele doŋ te be bɛɛ ↄ nombia ŋan, te be tɛɛse e see yenaŋ. Te baŋ be konↄↄse man na, nafↄ be gyaewↄ nyi baa bese gyu Igyipite. 40 Mena dↄↄ be yako Aarↄn nyi, 'Yɛɛ bɛɛneŋ fa daa na baa ta de siaman, nawolo nyi dↄↄ gyeŋ kpene keŋ be yɛɛ Mosesi ŋon ↄ ba mo daa lee Igyipite nɛ ya.' 41 Weeya ŋenaŋ man te be yɛɛ nunkyue bu mo yɛɛ be bane, te be faa ke kedi te be dii be nↄↄ mo lese kpene keŋ baŋ gbagba ba mo be nyiŋmaase yɛɛ nɛ yele. 42 Mena dↄↄ Wurubuarɛ lese ↄ sia yela wↄ, te ↄ moo wↄ fa adido kyolobiise kasom, ŋgba mena keŋ bↄↄ ŋmarase do Wurubuarɛ akpeŋkpeŋgyↄↄra tↄne keŋ man nɛ. Ba ŋolo ŋmarasewↄ nyi Wurubuarɛ kpa, 'O Iseraetena, na maŋ te ɛ koo wonembia deesi fa kulutooneŋ sↄŋola (40) depampaa dinaa keŋ man ya. 43 Ɛ bane Molɛki te ɛ yɛɛ kanyaŋ deni do ke, na ɛ bane Refan wulu keŋ ke yɛɛ ŋgba kyolobii nɛ, te ɛ moowↄ sila ɛ wose. Baŋ yɛna banɛɛ baŋ ɛ be yɛɛ nyi ɛ ka som! Mena dↄↄ maa yela baa mo ŋon gyu lemlem, naŋ Babilↄn donↄↄ keŋ wↄle.' 44 Depampaa dinaa keŋ man nɛ, na de naanaↄ dana kanyaŋ deni dinaa daale keŋ ne di wↄ adansɛɛ nyi Wurubuarɛ kyaa be gyaŋ. Be yɛɛ kanyaŋ deni dinaa kei ŋgba mena keŋ Wurubuarɛ ba lese wola Mosesi nyi waa yɛɛ ke nɛ. 45 De naanaↄ ke lɛɛ kanyaŋ deni dinaa kei lee be kyaↄ gyaŋ nɛ, ba moo ke sila be siamante Gyosua kelii tɛɛle keŋ Wurubuarɛ be yeli bↄↄ yoo gegi ke balaŋ te ↄ be lɛo ke fa wↄ nɛ man. Kanyaŋ deni dinaa kei doowↄ botↄↄ kelii debaŋ keŋ Defidi be kaa di gyoori nɛ. 46 Defidi kei nombia gyoo Wurubuarɛ sia, te ↄ yako Wurubuarɛ nyi waa fa e gbɛɛ na waa baŋ ↄsom deni dinaa gbagba fa ↄ naana Gyekↄpo Wurubuarɛ ŋon. 47 Mↄna ↄ bu Solomↄn kaa baŋa na ↄsom deni dinaa kenaŋ. 48 Mↄna Wurubuarɛ ŋon ↄ kela kpene kamasɛ nɛ, bɛɛ kyaa deni keŋ bↄↄ mo nyiŋmaase ma ke nɛ man ya. Wurubuarɛ dekpeŋkpeŋgyↄↄre ŋolo yako mena nombii kei nyiaa, 49 De Gbeŋgyoo Wurubuarɛ kpa, 'Adido te me gyooro gbeli kyaa, te tɛɛle dↄↄ yɛna me nae dɛɛsee. Woŋ deni dinↄↄ yaa ɛ ke ma fa maŋ, yaa aleŋ te maa kyaa fɛɛfo? 50 Na maŋ gbagba yɛɛna abↄↄ kɛŋa pou yee?' " 51 Te Sitifin yako wↄ bela nyiaa, "Ɛmɛɛ konↄↄyuŋtena, ɛ dana konↄↄyuŋ ŋgba balaŋ baŋ bↄↄ ne nyii Wurubuarɛ dei ya nɛ, te ɛ ne yɛɛ deŋele doŋ ŋgba ɛ kyaↄ nɛ. Nawolo nyi debaŋ kamasɛ na ɛ na koro seŋ tia Wurubuarɛ feliŋ ŋon. 52 Wurubuarɛ dekpeŋkpeŋgyↄↄre ŋolo kyaawↄ keŋ ɛ naanaↄ te naase e diyem yee? Ba koo Wurubuarɛ kpilala baŋ bↄↄ wula yako see nyi Yesu Kristo ŋon ↄ nombia tenɛɛ nɛ waa kↄŋ nɛ, te nɛnɛɛ ɛ lese Yesu ŋonaŋ fa te ba koo e. 53 Ɛmɛɛ yɛna baŋ ɛ be nyiŋ Wurubuarɛ mmaraase ŋan lee ↄ kpilala gyaŋ, mↄna ɛ te di ŋe dↄↄ ya." 54 Debaŋ keŋ donↄↄ kegyiise baŋ be nyii nombia kɛŋa nɛ, be sia yɛɛwↄ ↄ dↄↄ te ba gyeŋa baŋ nideli. 55 Mↄna Sitifin ŋon Wurubuarɛ feliŋ ŋon doo ↄ man nideli nɛ kɛɛ adido na, te ↄ naa Wurubuarɛ gyoorobiiri keŋ, na Yesu mↄ seŋɛɛ Wurubuarɛ dunoluŋ dↄↄ. 56 Te Sitifin yakowↄ nyiaa, "Ɛ kɛɛ, mɛɛ naa ŋgba adido ta toro, na Deniwalaŋ Bu ŋon seŋɛɛ Wurubuarɛ dunoluŋ dↄↄ." 57 Ↄ keyako mena nɛ te kegyiise baŋ moo be nyiŋmaase tↄ ba deŋela, te be fae yeesa keŋkeŋ. Karatetee te be popou kaa wuuwↄ ↄ dↄↄ, 58 te be wↄŋee e lee donↄↄ keŋ man ke fuŋii e boya. Baŋ bↄↄ gyu be kaa fuŋii e boya nɛ, kpee ba kegba wurikyimse ŋan fa tobaale ŋon bɛɛ baake e nyi Sↄↄl nɛ. 59 Be kee fuŋii Sitifin boya ŋan nɛ, na ↄ ne fane nyi, "Me Gbeŋgyoo Yesu, lɛɛ ma woo." 60 Botↄↄ te ↄ ŋmiŋawↄ ↄ doona dↄↄ te ↄ fae yeesa nyiaa, "Me Gbeŋgyoo Yesu, na mo nombiakumɛɛ kɛŋa tↄ wↄ kom ya." Ↄ kekolosi nombia kɛŋa taŋ pɛ, te ↄ kara weesi. Be kɛɛ ko Sitifin na Sↄↄl mↄ seŋɛɛ botↄↄ ↄ na do wↄ kakyeŋ.
