Kpilala 6

1Weeya ala ŋenaŋ man na baŋ bↄↄ lɛɛ Yesu di nɛ korowↄ bee wuku te kekolosi kaa gyoo Gyudatena baŋ bɛɛ kolosi Giriki dei, na Gyudatena akaŋ baŋ man. Gyudatena baŋ bɛɛ kolosi Giriki dei nɛ, kpa Gyudatena akaŋ baŋ ne wuritii wↄ weenɛɛ kekpala man, nawolo nyi be kpa wee kamasɛ weenɛɛ ŋan bɛɛ kpɛlɛɛ nɛ, bee tuŋ baŋ wui liala baŋ ya. 2Keŋte Yesu kpilala kufu bala baŋ baake baŋ pou bↄↄ lɛɛ Yesu di nɛ gyaŋee, te be yako wↄ nyiaa, "Tekaboena nyi daa dɛɛ bese tina Wurubuarɛ nombia ŋan keyako yela, na dɛɛ kↄŋ kaa kɛɛ abↄↄ kekpɛlɛɛ dↄↄ bela ya. 3Mena dↄↄ de tebia, ɛ kɛɛ ɛ man na ɛ ka lese baala nyetooro baŋ ba wose man dana obuo, te Wurubuarɛ feliŋ ŋon doo be man nideli te be sia be kare mↄ nɛ, na dɛɛ mo mena tom kei do be nyiŋmaa man. 4Na daa ke nyiŋ mo de doŋ pou do kefane, na Wurubuarɛ nombia ŋan keyako man." 5Nombia naŋ Yesu kaseela baŋ be yako nɛ, seŋa balaŋ baŋ pou nideli. Te ba lese Sitifin ŋon ↄ ne lɛɛ Wurubuarɛ di nideli te Wurubuarɛ feliŋ doo ↄ man nideli nɛ. Te ba besewↄ lese Filipo na Prokoro na Nikanↄ na Timↄn na Pamena na Nikolase ŋon ↄ ba lee Antiↄke te ↄ ba mo ↄ wose kpu Gyuda ↄsom keŋ man nɛ. 6Keŋte ba moo balaŋ nyetooro kɛwↄ kaa seŋ Yesu kpilala baŋ siaman. Te ba moo be nyiŋmaase gyakaa be dↄↄ te be fanewↄ fa wↄ. 7Mena dↄↄ Wurubuarɛ nombia ŋan yaaseewↄ bileŋbileŋ, te baŋ bↄↄ lɛɛ Yesu di nɛ wukuwↄ burum Gyerusalɛm donↄↄ keŋ man. Te Wurubuarɛ saese burum baale mↄ lɛɛ Yesu di. 8Te Sitifin ŋon Wurubuarɛ ba mo ↄ bɛrɛɛ boele e nideli, te ↄ doŋ doo ↄ man nɛ yɛɛ gyakoloŋ nombia na nombia dinaana balaŋ baŋ man. 9Mↄna Gyudatena baale baŋ bɛɛ gyaŋee Gyudatena ↄsom deni keŋ bɛɛ baake ke nyi gbeŋa baŋ bↄↄ tina wↄ yela nɛ ↄsom deni man nɛ, fiasɛɛ bɛɛ lɛɛ aŋmaareŋ na Sitifin. Balaŋ benaŋ baale lee Kirene na Alɛkesanderia na Silisia na Esia tɛɛlese man. 10Mↄna Wurubuarɛ feliŋ ŋon faa Sitifin nyansa te ↄ kolosiwↄ nideli mena dↄↄ be te nyiŋ keŋ baa yako bela ya. 11Keŋ dↄↄ be gyuuwↄ ke feefu do balaŋ baale nyi baa di dekara gyakaa ↄ dↄↄ nyi, "De nyiiwↄ ↄ ne kolosi mmusuo nombia gyakaa de naana Mosesi na Wurubuarɛ dↄↄ." 12Nnɛ te be wↄlɛɛ e fa balaŋ baŋ na ↄsom kegyiise na mmaraa wolala baŋ pou, te ba korowↄ seŋ ↄ dↄↄ te ba kyaŋa e gyu donↄↄ kegyiise siaman. 13Mena dↄↄ be gyae balaŋ baale kↄŋ, te be kaa dii akɛrɛɛ gyakaa ↄ dↄↄ nyi, "Debaŋ kamasɛ na balee kei ne kolosi bo tia de Wurubuarɛ ↄsom deni dinaa keŋ, na Wurubuarɛ mmaraase ŋan Mosesi ba wola daa nɛ." 14Nawolo nyi de nyiiwↄ ŋgba ↄ ne yako nyi, "Yesu ŋon ↄ ba lee Nasarɛte nɛ, waa yɛlɛɛ Wurubuarɛ ↄsom deni dinaa kei lↄ, na waa kyɛɛkee abↄↄ ŋan pou Mosesi ba mo see daa nɛ." 15Te nombiadiira baŋ be kyaa deni keŋ man nɛ, kɛɛ Sitifin nɛ yididi te be naawↄ ŋgba ↄ sia gbɛɛ te kyɛɛkee yɛɛ ŋgba Wurubuarɛ kpilale sia gbɛɛ nɛ.

will be added

X\