Kpilala 5

1Balee ŋolo kyaawↄ keŋ bɛɛ baake e nyi Ananiase, na ↄ wɛɛle mↄ yele yɛna Safira. Baŋ mↄ gyuuwↄ ka mo ba agyapadɛɛ daale yↄↄ. 2Ŋon na ↄ wɛɛle yɛɛ nↄↄ te ba moo kↄba keŋ bↄↄ nyim nɛ man ŋaale weese, te baale ŋon moo akaŋ keŋ gyu kefa Yesu kpilala baŋ. 3Botↄↄ te Pita bↄↄse e nyi, "Ananiase, weera dↄↄ te n yela ↄbↄnsam dii n dↄↄ mena, te ↄ yela n dii dekara fa Wurubuarɛ feliŋ ŋon, te n moo n kↄba keŋ n be nyim lee agyapadɛɛ keŋ n be yↄↄ nɛ man ŋaale weese? 4Agyapadɛɛ keŋ te yɛɛ n wui pɛte n yↄↄ ke yee? N yↄↄ ke taŋ mↄna kↄba keŋ n be nyim nɛ te yɛɛ n wui yee? Nɛnɛɛ weera n bakewↄ n konↄↄ man te n yɛɛ nombiikum kei mena? Na denibalaŋ te n dii dekara fa ya, Wurubuarɛ te n dii dekara fa." 5Ananiase ka betaa nyii nombia kɛŋa pɛ, te kara e lↄ te ↄ yeŋawↄ. Mena dↄↄ gyakoloŋ gyoo baŋ pou bↄↄ nyii nombia ŋenaŋ nɛ. 6Keŋte tewulɛɛ kↄŋawↄ kaa mo kolo milii e, te be gate e lee gyu kewuu. 7Te kyare ya te ↄ wɛɛle ŋon mↄ kaa gyoowↄ botↄↄ mↄna ŋon ba gyeŋ kpene keŋ be kↄŋ ya. 8Te Pita bↄↄse alo ŋon nyiaa, "Yako maŋ, kↄba keŋ ɛmɛɛ na n baale Ananiase be nyim lee agyapadɛɛ keŋ keyↄↄ man pou yaa ↄ moowↄ kↄŋ nɛ?" Te ↄ tiranↄↄ nyi ayi, mena te de yↄↄ ke. 9Botↄↄ te Pita bↄↄse e nyi, "Weera te ɛmɛɛ na n baale yɛɛ nↄↄ nyi ɛ kekɛɛse de Gbeŋgyoo feliŋ ŋon kɛɛ! Kɛɛ, balaŋ baŋ bↄↄ moo n baale kewuu nɛ, baŋ seŋɛɛ la denanↄↄ man nɛ, baa seele nyaŋ mↄ lee." 10Karatetee dokoloŋ te kara ŋon mↄ lↄ Pita nawↄↄ tɛɛ te ↄ yeŋawↄ. Tewulɛɛ baŋ kekↄŋ kaa gyoo te ba kena nyi ŋon mↄ ta yem nɛ, te ba mo e lee gyu kewuu ↄ baale yenaŋ. 11Mena dↄↄ gyakoloŋ dinaa daale gyoo Kristotena dikpii keŋ pou, na baŋ pou bↄↄ nyii nombia kɛŋa nɛ. 12Yesu kpilala baŋ yɛɛ gyakoloŋ nombia na nombia dinaana burum balaŋ baŋ man. Te baŋ pou bↄↄ lɛɛ Yesu Kristo di nɛ, ne gyu ke yilaa Solomↄn poto keŋ man. 13Na balaŋ ne bu wↄ nideli, mↄna balaŋ yenaasetena baŋ yee mena keŋ baa kaa kpu na wↄ. 14Mↄna ala na baala burum lɛɛ de Gbeŋgyoo Yesu di, te Wurubuarɛ moo wↄ kaa kpu na Kristotena baŋ. 15Lee gyakoloŋ nombia ŋan Yesu kpilala baŋ ne yɛɛ dↄↄ, balaŋ na mo be kaweesetena kaa doosi afoŋoŋse na mpase dↄↄ gbɛɛnaa nↄↄman, na akpaa Pita de kↄŋ ↄ ne lam na ↄ wↄŋtaa ke yala be man baale dↄↄ, na baa nyiŋ kawee kekyↄ. 16Balaŋ lee donↄↄse ŋan benaa na Gyerusalɛm nɛ kↄŋ Gyerusalɛm donↄↄ keŋ man, te ba moo be kaweesetena na baŋ feliŋkumɛɛ ne naase wↄ diyem nɛ kↄŋ te be kyↄↄ wↄ pou. 17Mena dↄↄ Wurubuarɛ sae kegyia ŋon, na ↄ kegyiise na baŋ bↄↄ lee Sadukiitena dikpii man nɛ sia yɛɛwↄ Yesu kpilala baŋ dↄↄ, te be bakewↄ see nyi baa gyae kolo yɛɛ wↄ. 18Mena dↄↄ be kyaŋa Yesu kpilala baŋ te ba moo wↄ ketↄ deni. 19Mↄna ke nelim nɛ, de Gbeŋgyoo Wurubuarɛ kpilale kↄŋawↄ kaa toro deni keŋ fa wↄ, te ↄ moo wↄ lee deni keŋ man, te ↄ yako wↄ nyi, 20"Ɛ gyu ka seŋ Wurubuarɛ ↄsom deni dinaa keŋ man na ɛ kekolosi nyeedoŋ wↄle kei wose man nombia fa balaŋ baŋ pou." 21Yesu Kristo kpilala baŋ yɛɛwↄ ŋgba mena keŋ Wurubuarɛ kpilale ŋon be yako nɛ, mena dↄↄ nebo nebo fuu te be gyuuwↄ Wurubuarɛ ↄsom deni dinaa keŋ man, te be fiasɛɛ bɛɛ wola balaŋ baŋ. Wurubuarɛ Sae kegyia ŋon na ↄ kegyiise baake Gyudatena kegyiise baŋ pou, te be gyaŋeewↄ te be kpilawↄ nyi be ka mo Yesu kpilala baŋ lee deni keŋ man kↄŋ. 22Mↄna balaŋ baŋ bↄↄ kpili nɛ gyuuwↄ kelii botↄↄ na, ba te naa Yesu kpilala baŋ deni keŋ man ya. Mena dↄↄ ba besewↄ kↄŋ kaa yako kegyiise baŋ nyi, 23"De gyuu botↄↄ keŋ bↄↄ kyaŋ wↄ do nɛ na disim keŋ tↄɛ kiiŋ, na baŋ mↄ bee gyee ke nɛ seŋɛɛ be daseŋae man. Mↄna da toro disim keŋ na, da te naa Yesu kpilala baŋ deni keŋ man ya." 24Debaŋ keŋ kegyia ŋon ↄ ne kɛɛ balaŋ baŋ bɛɛ gyee Wurubuarɛ ↄsom deni dinaa keŋ dↄↄ nɛ, na saese kegyiise baŋ be nyii nombia kɛŋa nɛ, ta seŋ wↄ nideli ya. Te be bↄↄse dↄŋa nyi, "Na woŋ yɛna tewulɛɛ kɛwↄ baa?" 25Botↄↄ te balee ŋolo kↄŋawↄ kaa yako wↄ nyi, "Ɛ nyii, balaŋ baŋ ɛ be kyam do deni man nɛ, seŋɛɛ Wurubuarɛ ↄsom deni dinaa keŋ man bɛɛ wola balaŋ Wurubuarɛ nombia." 26Mena dↄↄ kegyia ŋon ↄ ne kɛɛ balaŋ baŋ bee gyee Wurubuarɛ ↄsom deni dinaa keŋ dↄↄ nɛ, na ↄ tewulɛɛ gyuuwↄ ka moo wↄ kↄŋ kegyiise baŋ gyaŋ, mↄna be ta mo wↄ doŋ man ya, nawolo nyi bee yee nyi balaŋ baŋ baa fuŋii wↄ boya. 27Be ka mo wↄ kↄŋ nombiadiira baŋ siaman nɛ, te sae kegyia ŋon yako wↄ 28nyi, "De faree ŋon nyi ɛ na wola kolo lee Yesu yele man ya, mↄna ɛ kɛɛ ya aneyɛɛŋ, ɛ ta mo ↄ nombia ŋan ɛ na wolo nɛ wulu Gyerusalɛm donↄↄ pou, te ɛ ne gyae ɛ ka mo ↄ yeŋ seele daa." 29Botↄↄ te Pita na Yesu kpilala akaŋ baŋ tiranↄↄ nyi, "Kaboena nyi dee nyii Wurubuarɛ dei kela balaŋ wui." 30De naanaↄ Wurubuarɛ ŋon gyuusu na Yesu ŋon ɛ be gyↄↄ e sakaa ↄpaŋdaŋ dↄↄ ko e nɛ lee yeŋ man. 31Wurubuarɛ gyina e adido te ↄ mo e see ↄ dunoluŋ dↄↄ, te ↄ moo e yɛɛ siamante na nyeelɛɛre, na waa yela Iseraetena ke nyiŋ gbɛɛ kyɛɛkee lee be nombiakumɛɛ man na baa kↄŋ Wurubuarɛ gyaŋ, na waa mo be nombiakumɛɛ kyɛɛ wↄ. 32Daa ne diina nombia kɛŋa adansɛɛ. Wurubuarɛ feliŋ ŋon ↄ ba mo do baŋ bee nyii ↄ dei man nɛ, mↄ ne di nombia kɛŋa adansɛɛ. 33Kegyiise baŋ bↄↄ gyaŋee nɛ nyii nombia kɛŋa na ba gyeŋa baŋ nideli, mena dↄↄ be gyaewↄ nyi baa ko Yesu kpilala baŋ. 34Mↄna be man ŋolo, ŋon ↄ doo Farasiitena dikpii keŋ man te bɛɛ baake e nyi Gamaleli, te ↄ yɛɛ Wurubuarɛ mmaraa keŋ wolale e, te ↄ wose man dana obuo donↄↄ keŋ man nɛ, korowↄ seŋ be man. Botↄↄ te ↄ yela ba lese Yesu kpilala baŋ yenaŋ. 35Te ↄ yako kegyiise baŋ nyi, "Me tebia Iseraetena, ɛ kɛɛ kpene keŋ ɛ ne gyae ɛ ke yɛɛ balaŋ kɛwↄ nɛ nideli. 36Debaŋ duguŋ daale kaa laŋawↄ na, balee ŋon bɛɛ baake e nyi Teudase nɛ korowↄ seŋ te ↄ yɛɛ ↄ wose ŋgba walaŋ dinaa ŋolo nɛ, te balaŋ sↄŋonoŋ akpeŋ anaara (400) korowↄ sila e. Mↄna be ka ko e na ↄ balaŋ baŋ pou mↄ yaaseewↄ, keŋte ↄ kawola keŋ pou mↄ kaa yɛɛwↄ yakaa. 37Kei mↄ wↄle debaŋ keŋ bɛɛ kala balaŋ nɛ, te Galelia baale Gyuda korowↄ seŋ, te ŋon mↄ kaa beo balaŋ burum sila ↄ wose. Be ka ko ŋon mↄ nɛ, ↄ balaŋ baŋ pou bↄↄ sila e nɛ yaaseewↄ. 38Mena dↄↄ nombia kɛŋa man nɛ, mɛɛ yako ŋon nyi ɛ na yɛɛ balaŋ kɛwↄ kolo ya. Ɛ yela baa ta, nawolo nyi akpaa kpene keŋ bɛɛ wolo te bɛɛ yɛɛ nɛ, lee deniwalaŋ gyaŋ na, keŋ mↄ gyae ke yɛɛ yakaa bo mena. 39Mↄna akpaa ka lee Wurubuarɛ gyaŋ na, ɛ be gyae ɛ ke tale tↄ wↄ gbɛɛ ya. Ɛ kena bo nyi ɛ ne yoo bo na Wurubuarɛ." Mena dↄↄ kegyiise baŋ mↄ yɛɛwↄ ŋgba mena keŋ Gamaleli be yako wↄ nɛ. 40Mena dↄↄ be baake Yesu kpilala baŋ kↄŋ te be yela be tuku wↄ, te be tↄↄ wↄ nyi be na kolosi kolo lee Yesu yele man bela ya. Te be tina wↄ yela. 41Yesu kpilala baŋ ka lee kegyiise baŋ gyaŋ nɛ na be sia ta gye, nawolo nyi Wurubuarɛ te kɛɛ wↄ nyi baŋ mↄ kaboena nyi baa do wↄ desɛŋ lee Yesu dↄↄ. 42Te wee kamasɛ na, bee gyu Wurubuarɛ ↄsom deni dinaa man na balaŋ akpaŋalaŋse man. Bɛɛ wola nombia kpaakpaa ŋan nyi Yesu yɛna Kristo, nyeelɛɛre ŋon Wurubuarɛ be yako see nyi waa kↄŋ nɛ. Te be te tina nombia kɛŋa kawola yela ya.

will be added

X\