Kpilala 4

1Debaŋ keŋ Pita na Gyↄn sɛɛ bɛɛ kolosi fa balaŋ baŋ nɛ, te Wurubuarɛ saese na kegyia ŋon ↄ ne kɛɛ balaŋ baŋ bɛɛ gyee Wurubuarɛ ↄsom deni dinaa keŋ nɛ, na balaŋ baŋ bɛɛ baake wↄ nyi Sadukiitena nɛ baale kↄŋawↄ be gyaŋ. 2Ba gyeŋa baŋ nideli nawolo nyi, Pita na Gyↄn na wola balaŋ baŋ nyi, Yesu te fom lee yeŋ man, keŋ nawolo nyi balaŋ pou baa foŋ lee yeŋ man bela. 3Mena dↄↄ be kyaŋa Pita na Gyↄn ka do deni man, na tɛɛ te lam dↄↄ, be yela be doowↄ kelii tɛɛ kena. 4Mↄna balaŋ baŋ bↄↄ nyii nombia ŋan Pita na Gyↄn be yako nɛ, be man burum lɛɛ ŋa di, mena dↄↄ balaŋ baŋ pou bↄↄ lɛɛ Yesu di nɛ, be man baala wukuwↄ kelii balaŋ kakpoŋse banoŋ (5000). 5Tɛɛ kena keŋ nɛ, Gyudatena kegyiise na be siamantena na ba mmaraa wolala baŋ gyaŋeewↄ Gyerusalɛm donↄↄ man. 6Be gyaŋeewↄ na saese pou kegyia Anase na Kaifase na Gyↄn na Alɛkesanda na baala baale baŋ bↄↄ lee saese pou kegyia ŋon dekpaŋalaŋ man nɛ. 7Be yela ba moo Pita na Gyↄn kaa seŋ be siaman te be bↄↄse wↄ nyi, "Woŋ wↄↄle yaa amↄte yele man yaa ɛ kyↄↄ balee ŋon?" 8Te Pita ŋon Wurubuarɛ feliŋ ŋon doo ↄ man nideli nɛ, tiranↄↄ fa wↄ nyi, "Kegyiise na siamantena, 9akpaa gyɛŋ ɛ te baake daa kaa seŋ ɛ siaman ɛ ne bↄↄse daa lee kolo kpaakpaa keŋ dↄↄ yɛɛ, te ↄtakase ŋon be nyiŋ doŋ koro seŋ nɛ dↄↄ na, 10kenaŋ na mɛɛ gyae ɛmɛɛ na Iseraetena pou ka gyeŋ nyi, Yesu Kristo ŋon ↄ ba lee Nasarɛte nɛ yele man yaa balee aseŋaŋ ɛ siaman kei nyiŋa doŋ nɛ. Ŋon te ɛ gyↄↄwↄ sakaa ↄpaŋdaŋ dↄↄ ko, te Wurubuarɛ gyuusu e lee yeŋ man. 11Yesu yɛna walaŋ ŋon Wurubuarɛ nombia tↄne be yako nyi, 'Boe keŋ ɛmɛɛ deni maara baŋ be bɛɛ ke nɛ, keŋ kaa bese na deni mokↄↄ kasee boe keŋ ne yeli deni keŋ ne yɛɛ doŋ nideli.' 12Yesu waageŋ kooŋ yɛna nyeelɛɛre, ŋon waageŋ kooŋ te Wurubuarɛ lesewↄ tɛɛle kei dↄↄ nyi de baake ↄ yele na waa lɛɛ da nyee." 13Mena keŋ Pita na Gyↄn be kolosi nideli te ba te yee gyakoloŋ ya, te kegyiise baŋ kenyii nyi be yɛɛ balaŋ yakaa nyibaŋwↄ keŋ be te gyu sukuu ya nɛ, ba wose yeŋa wↄ. Botↄↄ te be naawↄ nyi baŋ na Yesu tɛɛ la. 14Mↄna ba kena balee ŋon bↄↄ kyↄ e seŋɛɛ Pita na Gyↄn gyaŋ botↄↄ nɛ, ba te tale nyiŋ nombiikum daale yako lee ba wose man ya. 15Mena dↄↄ be yako wↄ nyi baa lee nombia dedii deni keŋ man, botↄↄ te kegyiise baŋ moo ba nyeeya baŋ na dↄŋa. 16Bɛɛ bↄↄse dↄŋa nyi, "Woŋ yaa dɛɛ yɛɛ balaŋ kɛwↄ? Walaŋ kamasɛ ŋon ↄ kyaa Gyerusalɛm donↄↄ man nɛ, gyeŋ nyi baŋ yɛɛna gyakoloŋ nombii kei, te dↄↄ gyae dɛɛ tale lɛɛ ka aŋmaareŋ ya. 17Mena keŋ dↄↄ ne gyae nyi baa mo nombia kɛŋa kpeŋkpeleŋ dↄↄ ya nɛ, ɛ yela dɛɛ tↄ wↄ nideli nyi be na tekaa kolosi Yesu kei nombia fa walaŋ na walaŋ ya." 18Mena dↄↄ be baake wↄ gyoo be gyaŋ bela, te be tↄↄ wↄ nyi be na tekaa kolosi Yesu nombia, yaa baa wola balaŋ kolo lee ↄ yele man korakora bela ya. 19Keŋte Pita na Gyↄn tiranↄↄ nyi, "Ɛmɛɛ gbagba ɛ kɛɛ nombia kɛŋa man nideli nyi woŋti dei la Wurubuarɛ siaman? Dee nyii ɛ wui yaa dee nyii Wurubuarɛ wui? 20Nawolo nyi daa dↄↄ, dↄↄ tale tina kpene keŋ dↄↄ naa, na keŋ dↄↄ nyii nɛ kekolosi yela ya." 21Mena dↄↄ kegyiise baŋ tↄↄ wↄ nideli bela, te be tina wↄ yela. Be te nyiŋ gbɛɛ keŋ baa mo wↄŋ ba deŋela ya, nawolo nyi balaŋ baŋ pou na lese Wurubuarɛ yele lee kpene keŋ ↄ be yɛɛ nɛ dↄↄ. 22Balee ŋon bↄↄ kyↄ e kawee kei nɛ, kela kulutooneŋ sↄŋola (40). 23Be ke tina Pita na Gyↄn yela nɛ, te ba besewↄ gyu be tebia gyaŋ keyako wↄ kpene kamasɛ keŋ saese kegyiise na donↄↄ kegyiise baŋ be yako wↄ nɛ. 24Kristotena baŋ kenyii nombia ŋenaŋ nɛ, be popou moo nↄↄdokoloŋ fane fa Wurubuarɛ nyi, "De Gbeŋgyoo, nyaŋ ŋon n be yɛɛ adido na ateta, na ɛpo na kpene kamasɛ keŋ doo ŋe man. 25Nyaŋ tɛɛ la n feliŋ ŋon dↄↄ te n yela de naana Defidi ŋon ↄ yɛɛ n tobaale e nɛ yakowↄ nyi, 'Weera dↄↄ te tɛɛle kei dↄↄ balaŋ na gyeŋee baŋse, te bɛɛ bake nombiakumɛɛ yakaa yakaa, mↄna ŋe bee dee ya nɛ? 26Tɛɛle kei dↄↄ gyooneŋ ne desina ba wose fa yoo, te siamantena baŋ mↄ na koro seŋ tia de Gbeŋgyoo Wurubuarɛ na nyeelɛɛre ŋon ↄ be yako see nyi waa kↄŋ nɛ.' 27Ampaŋ te gyoo Herode na Pↄntiↄse Pilato na Iseraetena na baŋ mↄ ba te yɛɛ Iseraetenawↄ ya nɛ, gyaŋeewↄ donↄↄ kei man te be bakewↄ tia n tobaale Yesu ŋon ayimɛɛ be doo ↄ wose man ya, te nyaŋ Wurubuarɛ ba mo e yɛɛ nyeelɛɛre na gyoo nɛ. 28Be gyaŋeewↄ te be yɛɛ kpene keŋ nyaŋ Wurubuarɛ n be wula yako see nyi gyae kekↄŋ nɛ, lee n doŋ na n kegyaebii man. 29Nɛnɛɛ de Gbeŋgyoo Wurubuarɛ, kɛɛ mena keŋ bɛɛ ŋmaase daa na n ka do daa n tewulɛɛ kakyeŋ na dɛɛ tale gyↄ de konↄↄ kolosi n nombia ŋan. 30Wurubuarɛ koro seŋ na n kekyↄ kaweese, na n ke ta de dↄↄ yɛɛ gyakoloŋ nombia lese n wↄↄle wola lee n tobaale Yesu ŋon ayimɛɛ be doo ↄ wose man ya nɛ yele man." 31Ba ke fane taŋ keŋ nɛ, te botↄↄ keŋ bↄↄ gyaŋee nɛ wosiwↄ te Wurubuarɛ feliŋ ŋon kaa gyoowↄ be popou man nideli te be gyↄↄ be konↄↄ kolosi Wurubuarɛ nombia ŋan. 32Balaŋ baŋ pou bↄↄ lɛɛ Kristo Yesu di nɛ, kyaawↄ nↄↄdokoloŋ man te ba agyueŋ mↄ yɛɛ dokoloŋ. Ŋolo bɛɛ yako nyi ↄ kolo yɛɛ waageŋ wui ya, mↄna be kpɛlɛɛ ba abↄↄ pou fa dↄŋa. 33Yesu kpilala baŋ moo Wurubuarɛ doŋ dinaa keŋ di adansɛɛ nyi, de Gbeŋgyoo Yesu te fom lee yeŋ man, te Wurubuarɛ moo ↄ bɛrɛɛ boele baŋ pou bↄↄ lɛɛ Yesu di nɛ. 34Kolo te hia be man ŋolo ya, nawolo nyi baŋ be dana denɛɛ na tɛɛlese nɛ yↄↄ ŋa na bɛɛ mo kↄba keŋ bↄↄ nyim nɛ, 35kↄna Yesu kpilala baŋ na be ta mo kpala fa wↄ. Bɛɛ fa walaŋ kamasɛ ŋgba mena keŋ ne hia e nɛ. 36Mena ke te Lewi baale ŋolo ŋon ↄ ba lee Saiporↄse tɛɛle man, te ↄ yele yɛna Gyosɛfo nɛ yɛɛwↄ. Yesu kpilala baŋ doo e yele nyi Banabase, keŋ nawolo nyi walaŋ ŋon ↄ na do balaŋ kakyeŋ. 37Ŋon mↄ ka moo ↄ tɛɛle keŋ ↄ dana nɛ yↄↄ, te ↄ moo kↄba keŋ ↄ be nyim nɛ kaa fa Yesu kpilala baŋ.

will be added

X\