Kpilala 3

1Wee daale balinↄↄ weese ŋgba debaŋ atoorote man nɛ, Pita na Gyↄn korowↄ gyu Wurubuarɛ ↄsom deni dinaa keŋ man nyi be kaa fane. Debaŋ kenaŋ yɛna kefane debaŋ. 2Na balee ŋolo kyaa keŋ ↄ yɛɛ ↄtakase e leenaŋ ↄ biatɛɛ. Wee kamasɛ nɛ bɛɛ mo e kaa see Wurubuarɛ ↄsom deni dinaa denanↄↄ keŋ bɛɛ baake ke nyi Denanↄↄ Kyeote nɛ man, na waa sola kↄba lee balaŋ baŋ bɛɛ gyoo deni kenaŋ man nɛ gyaŋ. 3Debaŋ keŋ ↄ be naa nyi Pita na Gyↄn ne kↄŋ be kaa gyoo deni dinaa keŋ man nɛ, te ↄ sola wↄ nyi baa fa e kↄba. 4Keŋte be kɛɛ e yididi te Pita yako e nyiaa, "Kɛɛ daa." 5Te balee ŋon mↄ kɛɛ wↄ gyakaa loo nyi, waa nyiŋ kolo lee be gyaŋ. 6Te Pita yako e nyi, "Nyi kↄba na, mↄↄ dana ŋaale maa fa neŋ ya, mↄna kpene keŋ me dana nɛ te maa fa neŋ. Lee Yesu Kristo Nasarɛte baale ŋon yele man nɛ, koro seŋ na n ke ta," 7Te Pita kyaŋa ↄ dunoluŋ nyiŋmaa man kyↄ e te ↄ korowↄ seŋ. Debokenaŋ man te ↄ doona na ↄ nawↄↄ pou yɛɛ e doŋ. 8Karatetee dokoloŋ te ↄ toŋawↄ seŋ ↄ nawↄↄ dↄↄ, te ↄ fiasɛɛ ↄ ne tɛɛ. Keŋte ↄ sila wↄ gyoo Wurubuarɛ ↄsom deni dinaa keŋ man ↄ dↄŋɛɛ na ↄ na toŋee na ↄ na lese Wurubuarɛ yele. 9Balaŋ baŋ pou be kyaa botↄↄ nɛ, naa e na ↄ dↄŋɛɛ ↄ na lese Wurubuarɛ yele. 10Te be ka gyeŋ e nyi ŋon yɛna walaŋ ŋon nafↄ ↄ ne kyaa Denanↄↄ Kyeote keŋ man solee abↄↄ nɛ, ba wose yeŋa wↄ gbaa, te gyakoloŋ gyoo wↄ lee kpene keŋ bↄↄ naa ↄ man nɛ dↄↄ. 11Balaŋ baŋ kena balee ŋon mataa na Pita na Gyↄn botↄↄ keŋ bɛɛ baake nyi Solomↄn poto man nɛ, doo be popou nↄↄ te be yeuwↄ gyu be gyaŋ botↄↄ. 12Pita kena balaŋ baŋ nɛ ↄ bↄↄse wↄ nyiaa, "Iseraetena, weera dↄↄ te kei ne doo ɛ nↄↄ? Yaa weera dↄↄ te ɛ ne kɛɛ daa fee mena? Ɛ fɛɛ ɛ sia baa ɛ ne kɛɛ daa nyi mberem daa gbagba de doŋ na de Wurubuarɛ keyee dↄↄ te de yela balee kei tɛɛwↄ? 13De naanaↄ Aberaham na Asiki na Gyekↄpo Wurubuarɛ ŋon ↄ yɛɛ de naanaↄ pou Wurubuarɛ e nɛ, lesena ↄ tobaale Yesu gyoorobiiri wola. Ɛmɛɛ moona e do Romantena kegyiise nyiŋmaa man, te ɛ bɛɛ e Pilato siaman nyi baa ko e, mↄna nafↄ ↄ yɛɛ wa agyueŋ koraŋ nyi waa tina e yela, nyi ↄ te naa dukum ↄ man ya. 14Ɛ bɛɛ Yesu ŋon ayimɛɛ be doo ↄ man ya te ↄ gbɛɛneŋ tenɛɛ Wurubuarɛ siaman man nɛ, te ɛ sola Pilato nyi waa tina awudiini Barabase ŋon bↄↄ kyaŋ tↄ deni nɛ yela fa ŋon. 15Te ɛ koo Yesu ŋon ↄ ne fa balaŋ nyeedoŋ kekpaa nɛ. Mↄna Wurubuarɛ gyuusu e lee yeŋ man keŋ de popou ne di ka wose man adansɛɛ. 16Mena keŋ dↄↄ lɛɛ Yesu di dↄↄ, te Wurubuarɛ yela balee aseŋaŋ ɛ siaman kei ŋon ɛ gyeŋ e nɛ, nyiŋa kawee kekyↄ. Ke yɛɛ ampaŋ nyi mena keŋ dↄↄ lɛɛ Yesu di dↄↄ, te balee kei nyiŋa wosedoŋ, ŋgba mena keŋ ɛ ne naa e nɛ. 17Me tebia, ma gyeŋ nyi kpene keŋ ɛmɛɛ na ɛ siamantena be yɛɛ Yesu nɛ, ɛ ta gyem bo ya. 18Lee gyaŋgba gyaŋgba keŋ, te Wurubuarɛ tɛɛwↄ wa akpeŋkpeŋgyↄↄra pou dↄↄ yako see nyi, nyeelɛɛre ŋon ↄ be yako see nyi waa kↄŋ nɛ, waa naa diyem. Wurubuarɛ yele la nombia kɛŋa pou kↄŋawↄ mena. 19Mena dↄↄ ɛ kyɛɛkee lee ɛ gbɛɛneŋ kumɛɛ man, na ɛ kekↄŋ Wurubuarɛ gyaŋ, na waa gberaa ya ayimɛɛ pou lee ɛ wose man. 20Na de Gbeŋgyoo Wurubuarɛ kefa ŋon wosefɛɛreŋ na waa yela ŋon ↄ yɛɛ nyeelɛɛre ŋon ↄ be wula lese e see fa ŋon nɛ kekↄŋ. Ŋon yɛna Yesu. 21Kaboena nyi waa kyaa adido kelii debaŋ keŋ Wurubuarɛ waa yɛɛ kpene kamasɛ wↄle, ŋgba mena keŋ Wurubuarɛ be tɛɛ wa akpeŋkpeŋgyↄↄra dↄↄ yako see gyaŋgba keŋ nɛ. 22Na Mosesi mↄ yɛɛ Wurubuarɛ dekpeŋkpeŋgyↄↄre e, ↄ yakowↄ see nyi, 'Ɛ Gbeŋgyoo Wurubuarɛ waa lese dekpeŋkpeŋgyↄↄre lee ɛmɛɛ gbagba ɛ balaŋ man fa ŋon, ŋgba maŋ Mosesi nɛ. Ɛ tei kpene kamasɛ keŋ waa yako ŋon nɛ. 23Walaŋ kamasɛ ŋon ↄ te tei kpene keŋ dekpeŋkpeŋgyↄↄre kei waa yako ya nɛ, Wurubuarɛ waa lese e lee ↄ balaŋ man na waa yo.' 24Wurubuarɛ akpeŋkpeŋgyↄↄra baŋ Wurubuarɛ be tɛɛ be dↄↄ kolosi nɛ pou, lee Samuɛle dↄↄ kelii baŋ bↄↄ kↄŋ ↄ wↄle pou nɛ, be wula yako kolo see lee nombia ŋan ne kↄŋ weeya kɛŋa man nɛ man. 25Nombia ŋan pou Wurubuarɛ be tɛɛ wa akpeŋkpeŋgyↄↄra dↄↄ yako see nɛ yɛɛ ɛ wui, te ɛmɛɛ mↄ kpuɛ kebakesee keŋ Wurubuarɛ be bake na ɛ naanaↄ nɛ man. Nawolo nyi ↄ yako Aberaham nyi, 'N duuluŋ man te maa ta hiraa tɛɛle kei dↄↄ balaŋ pou.' 26Mena dↄↄ debaŋ keŋ Wurubuarɛ ba lese ↄ tobaale Yesu nɛ, ↄ yela ↄ taŋgbɛɛwↄ kↄŋ ɛ gyaŋ nyi ↄ kaa hiraa ŋon, na waa yela ɛ man walaŋ kamasɛ kekyɛɛkee lee ↄ gbɛɛneŋ kumɛɛ man."

will be added

X\