Kpilala 28

1De ka lee ɛpo man kaa seŋ dekeŋkeŋ dↄↄ nɛ te balaŋ baŋ be kyaa botↄↄ tɛɛlebii kei keŋ loŋ be kilisi ke nɛ dↄↄ yako daa nyi, bɛɛ baake botↄↄ nyi Maleta. 2Donↄↄsetena benaŋ kɛɛ de dↄↄ nideli. Na ↄga te fiasɛɛ ↄ ne ŋɛɛ, mena dↄↄ ba doo boalaŋ fa daa nyi dee woli nawolo nyi, na waare kyaa. 3Pↄↄl ke kuu daase ŋaale waa do boalaŋ keŋ man nɛ, te boalaŋ ogyefeliŋ keŋ yela dom keŋkeŋteŋte ŋolo leewↄ daase ŋan man kaa milii ↄ nyiŋmaa. 4Donↄↄsetena baŋ kena mena nɛ be yako dↄŋa nyi, "Balee kei waa yɛɛ awudiini e. Nawolo nyi, nyi ↄ yɛɛ nyeebam ŋgba ↄ te dↄↄ ɛpo man koraŋ ya nɛ, ↄ nombiakumɛɛ be gyae ke yela waa nyiŋ nyeedoŋ ya." 5Mↄna Pↄↄl ŋmanyaŋ dom ŋon do boalaŋ man, keŋ kolo te yɛɛ e ya. 6Balaŋ baŋ gyueŋwↄ nyi waa bokee, yaa gyae ke kara e lↄ karatetee dokoloŋ na waa yeŋ. Mↄna ba ke daa gyu siaman te ba kena nyi kolo te yɛɛ e ya nɛ, be kyɛɛkee ba agyueŋ nyi balee kei waa yɛɛ bane ŋolo e. 7Botↄↄ gyoo yele yɛna Pubiliyuse. Na ↄ tɛɛle benaa na botↄↄ keŋ de kyaa nɛ. Ↄ kɛɛ de dↄↄ nideli te de kyaawↄ ↄ dɛɛ weeya kpaakpaa atooro. 8Gyoo Pubiliyuse ŋonaŋ ↄ kya kaa wee kpaŋalaŋ, na ↄ na kyeree. Keŋte Pↄↄl gyuuwↄ ka mo ↄ nyiŋmaa gyakaa ↄ dↄↄ fane fa Wurubuarɛ fa e, te ↄ kyↄↄ e kawee. 9Ke kↄŋ mena nɛ, kaweesetena akaŋ baŋ pou be kyaa Maleta tɛɛle keŋ dↄↄ nɛ kↄŋawↄ, te Pↄↄl kyↄↄ wↄ be kaweese pou. 10Balaŋ benaŋ moo obuo dinaa fa daa, te be fa daa abↄↄ burum, te de ka koro lee botↄↄ dee gyuu nɛ, be fa daa abↄↄ ŋan gyae ke hia daa gbɛɛnaa man nɛ. 11De dii gyaalaŋna batooro tɛɛlebii keŋ dↄↄ pɛte da leewↄ botↄↄ. Keŋte da moo degbele dinaa keŋ kↄↄ lee Alɛkesanda donↄↄ man kaa seŋ botↄↄ dugbutu tɛɛ nɛ. Ba te yɛɛ banɛɛ atawaase gyakaa degbele dinaa keŋ dↄↄ, te da gyoo ke laŋ. 12De gyuuwↄ ka gyoo Sirakuse donↄↄ man, te de kyaawↄ botↄↄ weeya atooro. 13Da leewↄ botↄↄ ka gyoo Regium donↄↄ man. Tɛɛ kena keŋ nɛ, feliŋ daale lee ata yenaŋ kaa gyↄ, mena dↄↄ ka weeya alate man te de gyuuwↄ ka gyoo Puteyoli donↄↄ man. 14Botↄↄ te de naa Kristotena baale te ba sola daa nyi dee di weeya gyanaara be gyaŋ. Nnɛ te de tɛɛwↄ menɛɛ ka gyoo Roman donↄↄ man. 15Kristotena baŋ be kyaa Roman kenyii da nkaŋ nɛ, be man baale kↄŋawↄ kaa gyaŋee na daa naŋ Apiuse donↄↄ man, te baale mↄ kaa gyaŋee na daa ŋↄↄla dɛɛsoe denɛɛ atooro ŋan man. Pↄↄl kena wↄ nɛ, doo e kakyeŋ te ↄ faa Wurubuarɛ karaŋ. 16De ka gyoo Roman donↄↄ man nɛ, yoonↄↄtena kegyia ŋon faa Pↄↄl gbɛɛ nyi waa gyu ke kyaa botↄↄ keŋ dei fa e nɛ, te ba lese yoonↄↄte ŋolo nyi waa gyee e. 17Weeya atooro wↄle nɛ, Pↄↄl baake Gyudatena kegyiise baŋ be kyaa donↄↄ kenaŋ man nɛ gyaŋee. Ba ke gyaŋee keŋ nɛ te ↄ yako wↄ nyi, "Me tebia Iseraetena, ma te yɛɛ kolo kum tia de tebia yaa tia amanberɛse ŋan de naanaↄ ba wola daa koraŋ ya, mↄna be kyaŋa maŋ Gyerusalɛm donↄↄ man te ba moo maŋ do Romantena nyiŋmaa man. 18Ba korowↄ gyoo me nombia man na, be yela baa tina maŋ yela, nawolo nyi ba te naa nombiikum keŋ mↄↄ yɛɛ keŋ kaboena nyi baa ko man ya. 19Mↄna keŋ Gyudatena be bɛɛ dↄↄ, yela ma solawↄ nyi maa mo me nombia kↄŋ gyoo dinaa gyaŋ, mↄna maŋ dↄↄ ma gyeŋ nyi daa na me tebia betaŋ daale ya. 20Kei dↄↄ te me baake ŋon na maa nyiŋ lese nombia ŋan man wola ŋon. Walaŋ ŋon Iseraetena sia gyakaa ↄ dↄↄ nyi waa kↄŋ nɛ dↄↄ te me doo akyakaase kɛŋa man nɛ." 21Keŋte kegyiise baŋ tiranↄↄ fa e nyi, "Da te lɛɛ n wose man tↄne lee Gyudia tɛɛle man ya. Te de walaŋ ŋolo mↄ ta lee botↄↄ kↄŋ kaa yako daa kolo kum lee n wose man ya. 22Mↄna dɛɛ gyae dɛɛ gyeŋ nya agyueŋ nawolo nyi da gyeŋ nyi yenaŋ kamasɛ na balaŋ ne kolosi tia dikpii keŋ man n doo nɛ." 23Te balaŋ baŋ na Pↄↄl see wee keŋ baa gyaŋee. Wee kenaŋ kelii nɛ, be man balaŋ burum kↄŋawↄ botↄↄ keŋ Pↄↄl kyaa nɛ. Lee nebo kelii balinↄↄ nɛ, ↄ kolosi Wurubuarɛ gyoori keŋ wose man nombia. Ↄ moo Wurubuarɛ mmaraase ŋan ↄ be yeli Mosesi be ŋmarase see nɛ, na Wurubuarɛ akpeŋkpeŋgyↄↄra nↄↄwoya aŋmaraseŋ see kolosi de Gbeŋgyoo Yesu wose man nombia fa wↄ na baa nyiŋ lɛɛ e di. 24Be man baale lɛɛ ↄ nombia ŋan di mↄna baale dↄↄ ba te lɛɛ ŋa di ya. 25Mↄna, pɛna Pↄↄl nↄↄ ke si na, nombii dokoloŋ te ↄ yakowↄ te aŋmaareŋ gyoo wↄ, te be popou korowↄ yaasee. Nombii keŋ ↄ be yako wↄ yɛna nyi, "Nombii keŋ Wurubuarɛ feliŋ be tɛɛ Wurubuarɛ dekpeŋkpeŋgyↄↄre Yesaya dↄↄ yako fa ɛ naanaↄ nɛ, doo na ke gbɛɛ. Ↄ yako wↄ nyi, 26'Gyu ke yako balaŋ kɛwↄ nyi, Ɛ ke tei, na ɛ ke tei, mↄna ɛ be gyae ɛ ke nyii nombia ŋenaŋ man ya. Ɛ ke kɛo, na ɛ ke kɛo, mↄna ɛ be gyae ɛ kena kolo ya. 27Nawolo nyi balaŋ kɛwↄ agyueŋ ta yem. Ba te tↄ ba deŋela te be wuu be sia, na mena ya na nafↄ be sia gyae kena, na ba deŋela ke nyii, na baa nyii nombia ŋan man, na baa bese kↄŋ me gyaŋ, na maa kyↄ wↄ be kaweese.' " 28Te Pↄↄl kolosiwↄ tↄ nↄↄ nyi, "Lee mena dↄↄ mɛɛ gyae ɛ ka gyeŋ nyi, Wurubuarɛ te yeli be ta mo nyeedoŋ nombia ŋan gyina baŋ ba te yɛɛ Gyudatenawↄ ya nɛ. Baŋ dↄↄ baa tei ŋa." 29Pↄↄl ke yako nombia kɛŋa nɛ, te baageŋ baageŋ moo aŋmaareŋ koro yaasee. 30Kulutooneŋ ala sↄↄŋ na Pↄↄl kyaa botↄↄ keŋ ↄ be hare deni ↄ kyaa nɛ, na ↄ ne lɛɛ baŋ pou bɛɛ kↄŋ ↄ gyaŋ nɛ nideli. 31Ↄ gyↄↄ ↄ konↄↄ kolosi Wurubuarɛ gyoori keŋ na de Gbeŋgyoo Yesu wose man nombia ŋan fa balaŋ keŋ ŋolo te tↄ e gbɛɛ ya.

will be added

X\