Kpilala 27

1Keŋte be bakewↄ see nyi dɛɛ mo degbele dinaa na dee gyu Romantena gyoo dinaa ŋon gyaŋ Itali tɛɛle man. Te ba moo Pↄↄl na balaŋ baŋ bↄↄ kyam tↄ deni nɛ baale do yoonↄↄtena kegyia ŋon bɛɛ baake e Gyuliↄse nɛ nyiŋmaa man. Gyuliↄse yɛɛ Roman gyoo dinaa ŋon yoonↄↄtena kegyia ŋolo e. 2Te da gyoo degbele dinaa keŋ kↄↄ lee Adaramitium donↄↄ man kee gyu Esia yenaŋ donↄↄse ŋan ŋe kya boo nↄↄman nɛ, te de kuluwↄ laŋ. Na Arisitakuse ŋon ↄ ba lee Tesalonika donↄↄ keŋ ke kyaa Masedonia tɛɛle man nɛ doo de man. 3Tɛɛ kena keŋ nɛ, de gyuuwↄ ka gyoo Sidↄn donↄↄ man, botↄↄ te Gyuliↄse naa Pↄↄl waraŋase te ↄ faa e gbɛɛ te ↄ gyuu ↄ tebia gyaŋ na baa fa e kpene keŋ ne hia e. 4De ka koro lee botↄↄ dee gyu keŋ nɛ, na feliŋ ne gyↄↄ kↄŋ de gyaŋ mena dↄↄ da moowↄ na Saiporↄse tɛɛlebii keŋ loŋ be kilisi ke nɛ yenaŋ, nawolo nyi na feliŋ bɛɛ gyↄↄ kↄŋ botↄↄ ya. 5Da moowↄ ɛpo dↄↄ ke laŋ Silisia na Pamfilia tɛɛlese yenaŋ te de ka gyoo Mira donↄↄ keŋ ke kyaa Lisiase tɛɛle dↄↄ nɛ. 6Botↄↄ te yoonↄↄtena kegyia ŋon naa degbele dinaa daale na ke ta lee Alɛkesanda kee gyu Itali te ↄ lese daa do ke maŋ. 7Degbele keŋ moo daa dɛɛdɛɛ te de naa diyem mↄ nideli weeya burum pɛte de ka benaa donↄↄ keŋ bɛɛ baake ke Kiniduse nɛ. Feliŋ keŋ te fa daa gbɛɛ dɛɛ mo da nyee baŋ botↄↄ keŋ nafↄ dee gyu nɛ ya, mena dↄↄ de gyuuwↄ ka mo na Kreti tɛɛle keŋ loŋ be kilisi ke nɛ, ata ata kelii Salimone donↄↄ yenaŋ dↄↄ, nawolo nyi na feliŋ keŋ bɛɛ gyↄↄ kↄŋ botↄↄ yenaŋ ya. 8Da moowↄ na ɛpo nↄↄ nↄↄ, te de kaawↄ mↄ nideli pɛte de kaa lii botↄↄ keŋ bɛɛ baake nyi Agbelese daseŋae kpaakpaa, keŋ benaa na donↄↄ keŋ bɛɛ baake nyi Lasea nɛ. 9De wↄlɛɛ debaŋ boo keŋ dↄↄ ampaŋ ampaŋ, te wee keŋ Gyudatena ne fa Wurubuarɛ kedi na waa mo ba dukum kyɛɛ wↄ nɛ kaa laŋawↄ. Mena debaŋ kenaŋ na feliŋ ne yeli loŋ dↄↄ keta ne yɛɛ gyakoloŋ nideli. Mena dↄↄ Pↄↄl kolosiwↄ fa wↄ nyi, 10"Me tebia, ma te naa nyi dɛɛ naa diyem nideli na dee di gyerebi de gbɛɛ kei man. Na degbele dinaa kei na kasolↄse ŋan ŋaageŋ ne gyae la ke wↄlɛɛ ya, mↄna balaŋ mↄ baa yekee. Mena dↄↄ ɛ yela dɛɛ kyaa kɛbo." 11Mↄna yoonↄↄtena kegyia ŋon bɛɛ Pↄↄl nↄↄwoya bo, te ↄ moo degbele dinaa keŋ gbeŋgyoo na saare ŋon wui. 12Keŋte be kpa agbelese dɛɛseŋae kenaŋ be dei na kekyaa kyeŋgbelelee debaŋ kenaŋ man ya. Mena dↄↄ be man dekpeŋ dinaa gyaewↄ nyi baa kyaŋ ba wose na be kaa lii donↄↄ keŋ bɛɛ baake ke nyi Fonisi nɛ, na baa kyaa botↄↄ kyeŋgbelelee debaŋ kenaŋ man. Fonisi yɛɛ agbelese dɛɛseŋae keŋ ke kyaa Kreti tɛɛle man te ke sia tee bo weese dɛɛlee na weese dɛɛyalae nsana. 13Feliŋbii daale kɛɛ gyↄↄ lee ata yenaŋ nɛ, balaŋ baŋ gyueŋwↄ nyi baa nyiŋ gbɛɛ ta ba kegyaebii, mena dↄↄ be wↄŋee nyeele keŋ ne kyaŋ degbele dinaa seŋ debodokoloŋ dekeŋkeŋ dↄↄ nɛ, kaa do degbele dinaa keŋ man te be kuluwↄ ta na Kreti ɛpo nↄↄ nↄↄ. 14Te kyare ya te feliŋ dinaa daale gyↄↄwↄ lee weese dɛɛlee man demena dↄↄ, lee Kreti tɛɛlebii keŋ loŋ be kilisi ke nɛ yenaŋ kↄŋ. 15Feliŋ keŋ gyↄↄwↄ gyaŋee na degbele dinaa keŋ mena dↄↄ ka te tale gyu ke siaman bela ya. Mena dↄↄ de yela feliŋ keŋ wↄŋee daa gyu botↄↄ keŋ kɛɛ gyae. 16Te de gyuuwↄ ka mo na Kauda tɛɛlebii keŋ loŋ be kilisi ke nɛ yenaŋ, na feliŋ bɛɛ gyↄↄ botↄↄ nideli ya, mↄna de kaawↄ pɛte de talewↄ lese degbele bii keŋ bɛɛ mo lɛɛ balaŋ nyeeya nɛ lee degbele dinaa keŋ man. 17Balaŋ baŋ wↄŋee degbelebii keŋ do degbele dinaa keŋ man te ba moo ŋmeeseŋ bake degbele dinaa keŋ na feliŋ be nyiŋ gyↄ ke tekerii ya. Be yeewↄ nyi degbele dinaa keŋ kaa ta dↄↄ Libia boo nↄↄ aŋasa man ya, mena dↄↄ be tisinaa degbele dinaa keŋ kanyaŋse te be tinaa degbele keŋ yela, te feliŋ moo ke ke dↄŋ dɛɛ dɛɛ. 18Feliŋkum keŋ moo daa kyeŋgbeŋ kyeŋgbeŋ boo keŋ dↄↄ, mena dↄↄ tɛɛ kena nɛ te be fiasɛɛ bɛɛ lese kasolↄse lee degbele dinaa keŋ man do loŋ man. 19Ke tɛɛ kena nɛ, ba lese degbele keŋ gbagba abↄↄ ŋan ŋaale fuŋii leki do ɛpo man. 20Dii weeya burum na de bɛɛ tekaa naa weese yaa kyolobiise ya, na feliŋ keŋ mↄ gyakaa ne gyↄↄ akpanyaŋnyaŋ man, mena dↄↄ de ta teka gyakaa loo nyi dee nyiŋ nyeedoŋ bela ya. 21Balaŋ baŋ kyaawↄ weeya burum keŋ be bee di weenɛɛ ya, keŋte Pↄↄl korowↄ seŋ be siaman yako wↄ nyi, "Me tebia, nyi yeŋ nyii kpene keŋ mↄↄ yako ŋon nyi ɛ na kulu degbele dinaa keŋ lee Kreti ya nɛ, nafↄ deŋ te naa diyem kei na dee di gyerebi kei mↄ ya. 22Nɛnɛɛ mɛɛ sola ŋon bo nyi ɛ nyiŋ konↄↄ, ɛ man ŋolo be gyae waa yeŋ ya mↄna degbele dinaa keŋ kaageŋ ne gyae la ke wↄlɛɛ. 23Nawolo nyi dana nelim me Wurubuarɛ ŋon me yɛɛ ↄ wui te mɛɛ som e nɛ, kpila ↄ kpilale kↄŋ me gyaŋ, 24kaa yako maŋ nyi, 'Pↄↄl na yee ya, kaboena nyi nya gyu ka seŋ gyoo dinaa Kaesa siaman, na baa di n nombia ŋan. Lee nyaŋ dↄↄ, Wurubuarɛ waa gyee baŋ pou be doo degbele dinaa keŋ man nɛ.' 25Mena dↄↄ me tebia, ɛ nyiŋ konↄↄ, nawolo nyi mɛɛ lɛɛ di nyi ŋan pou Wurubuarɛ be yako nɛ gyae ke kↄŋ ŋgba mena keŋ ↄ be yako maŋ nɛ. 26Mↄna dɛɛ kaa lee tɛɛlebii daale keŋ loŋ be kilisi nɛ dↄↄ." 27Weeya kufu anaarate keŋ man nelim nɛ, na feliŋkum keŋ sɛɛ kɛɛ wↄŋee daa Aderia ɛpo dↄↄ. Tɛɛ nsana nɛ, baŋ bɛɛ saa degbele dinaa keŋ nɛ naawↄ nyi be ta benaa tɛɛlebii daale. 28Te ba moo kpene keŋ bɛɛ mo maa loŋ siiliŋ nɛ mo do loŋ keŋ man te be naawↄ nyi ke siiliŋ man yɛɛ nawↄↄ tↄↄse sↄŋonoŋ na sao(120). Be ke gyu be siaman kyomii nɛ, ba besewↄ maa loŋ keŋ te be naawↄ nyi yɛɛ nawↄↄ tↄↄse sↄŋonaara na kufu (90). 29Be yeewↄ nyi degbele dinaa keŋ gyae ka too na boe, mena dↄↄ ba lese nyeela anaara ŋan ne kyaŋ agbelese seŋ debodokoloŋ nɛ do loŋ man degbele keŋ wↄle. Te be fanewↄ nyi tɛɛ dɛɛ naa bileŋ. 30Baŋ bɛɛ saa degbele dinaa keŋ nɛ yela baa yeu tina daa yela, mena dↄↄ ba lese degbelebii keŋ ke gyakaa degbele dinaa keŋ dↄↄ nɛ gyakaa loŋ dↄↄ. Te ba beowↄ yɛɛ ŋgba bee gyu be kaa fuŋ nyeela ŋan ne kyaŋ degbele dinaa seŋ debodokoloŋ nɛ do loŋ man degbele keŋ siaman. 31Te Pↄↄl yako yoonↄↄtena kegyia ŋon na yoonↄↄtena baŋ nyi, "Akpaa balaŋ kɛwↄ te kyaa degbele dinaa kei man ya na, ɛ be gyae ɛ ke nyiŋ nyeedoŋ ya." 32Mena dↄↄ yoonↄↄtena baŋ tirii ŋmeeseŋ ŋan bↄↄ mo kpaŋ na degbelebii keŋ nɛ te loŋ wↄŋee ke laŋ. 33Tɛɛ kɛɛ ŋmaŋee maa keŋ nɛ, Pↄↄl doo wↄ kakyeŋ nyi baa di weenɛɛ. Te ↄ yako wↄ nyi, "Gyɛŋ weeya kpaakpaa kufu anaara yaa ŋgba ɛ wↄe ne lↄ ŋon, te ɛ nↄↄ mↄ te daa ta kolo ya. 34Mena dↄↄ mɛɛ waase ŋon bo nyi yaa di na ɛ ke nyiŋ nyiŋ nyeedoŋ, nawolo nyi kolo na kolo be kyaa keŋ gyae ke yɛɛ ɛ man ŋolo ya." 35Ↄ kekolosi nↄↄwoya kɛŋa taŋ nɛ, ↄ moo bodobodo te ↄ fanewↄ fa Wurubuarɛ karaŋ be popou siaman, te ↄ kara ke te ↄ diiwↄ. 36Botↄↄ te be popou wↄe fɛɛ wↄ te ba moo weenɛɛ do be nↄↄman. 37Daa baŋ pou de doo degbele dinaa keŋ man nɛ, yɛɛ balaŋ sↄŋonoŋ akpeŋ ala na sↄŋotooro na kufu looro (276). 38Be popou kedi baa nɛ, ba lese weenɛɛ ŋan doo degbele keŋ man nɛ fuŋ do ɛpo man, na debgele dinaa keŋ ke nyiŋ koro yuŋ. 39Tɛɛ kɛɛ naa keŋ nɛ, be naawↄ ŋgba ɛpo keŋ yenaŋ daale te sↄↄ gyoo tɛɛle daale man, na aŋasa doo botↄↄ mↄna be ta gyeŋ tɛɛle dokoloŋ kenaŋ ya. Mena dↄↄ be yɛɛ ba gyueŋ nyi akpaa baa tale na, baa besena degbele dinaa keŋ gyu ka seŋ botↄↄ. 40Te be kɛrɛɛ ŋmeeseŋ ŋan bↄↄ mo kpaŋ na nyeela ŋan ne kyaŋ degbele dinaa seŋ debodokoloŋ nɛ do loŋ man, te be booli ŋmeeseŋ ŋan bↄↄ mo bake na woni keŋ ne kii degbele dinaa nɛ. Te be gyinaa degbele dinaa keŋ kanyaŋ adido degbele keŋ siaman te feliŋ gyↄↄwↄ, te tuu degbele dinaa keŋ sia tee dekeŋkeŋ dↄↄ gbɛɛ. 41Mↄna degbele dinaa keŋ siagbɛɛ gyuuwↄ ka gyoo aŋasa man te ke dↄↄwↄ debodokoloŋ, te ka ateta keŋ ŋerewↄ gyoo aŋasa ŋan man te ke dↄↄwↄ keŋ ke bee wosi gba ya. Te feliŋ dinaa keŋ ne gyↄↄ nɛ yela ɛpo loŋ keŋ gyↄↄ degbele dinaa keŋ wↄle gbɛɛ aguŋ kpetekpetekpete. 42Yoonↄↄtena baŋ yɛɛ ba agyueŋ nyi baa ko balaŋ baŋ bↄↄ kyam do deni nɛ pou, na be man ŋolo be nyiŋ yɛlɛɛ toŋ yeu ya. 43Mↄna yoonↄↄtena kegyia ŋon gyaewↄ waa lɛɛ Pↄↄl nyee mena dↄↄ ↄ tↄↄ wↄ nyi be na yɛɛ ŋgba mena keŋ bↄↄ bake see nɛ ya. Mena dↄↄ ↄ yako balaŋ baŋ pou nyi baŋ baa tale yɛlɛɛ na, baa taŋgbɛɛ toŋ gyoo loŋ man na baa yɛlɛɛ toŋ gyu dekeŋkeŋ dↄↄ. 44Te baŋ bↄↄ kaa nɛ baa gↄtaa degbele dinaa keŋ be yɛlɛɛ nɛ daase pampasaŋse ŋan be kyakaree nɛ, na baa toŋ gyu dekeŋkeŋ dↄↄ. Nnɛ te de popou yɛɛwↄ toŋ gyu dekeŋkeŋ dↄↄ keŋ ŋolo te dↄↄ ya.

will be added

X\