Kpilala 26

1Gyoo Agiripa yako Pↄↄl nyi, "Nɛnɛɛ gbɛɛ doo, nyaŋ gbagba tↄlɛɛ n nↄↄwoya." Te Pↄↄl gyinaa ↄ nyiŋmaa adido te ↄ kolosiwↄ lese ↄ nↄↄse nyi, 2"Gyoo Agiripa, ma te yɛɛ nyeebam ŋgba gyɛŋ wee kei ma seŋɛɛ n siaman mɛɛ lese me nↄↄse lee nombia ŋan pou Gyudatena ba moo gyakaa me dↄↄ nɛ. 3Gbagbaagba na te yɛɛ maŋ gyoŋ nideli nawolo nyi n gyeŋ Gyudatena mmaraase na kewↄŋee keŋ doo ŋe man nɛ pou. Mena dↄↄ mɛɛ sola neŋ nyi, nya nyiŋ konↄↄ na n ke tei man. 4Gyudatena pou gyeŋ mena keŋ mↄↄ kyaa lee me biatɛɛ. Ba gyeŋ mena keŋ mↄↄ kyaa maŋ gbagba me balaŋ man na Gyerusalɛm donↄↄ man. 5Ba gyeŋ maŋ te yɛɛ gyɛŋ ya, te akpaa nyi baa sɛɛ yako nombii na ke gbɛɛ na, baa tale di adansɛɛ nyi me kyaŋa dↄ ↄsom mmaraase ŋan nyiŋmaase ala ŋgba Farasii baale nɛ. 6Keŋ dↄↄ gyɛŋ ma seŋɛɛ kɛbo bee di me nombia yɛna nyi, me sia gyakaa kpene keŋ de Gbeŋgyoo Wurubuarɛ be yako see nyi waa yɛɛ fa de naanaↄ nɛ dↄↄ. 7Mena nombii kei dↄↄ te daa Gyudatena akpaŋalaŋ kufu ala ŋan pou sia gyakaa nyi Wurubuarɛ waa yɛɛ fa daa. Mena dↄↄ te dɛɛ som Wurubuarɛ na sibiiyam debaŋ kamasɛ. Gyoo kpaakpaa, me sia gyakaa mena nombii kei dↄↄ nyi Wurubuarɛ waa yɛɛ fa daa, keŋ dↄↄ te Gyudatena moo nombia gyakaa me dↄↄ. 8Weera te dana doŋ fa ŋon nyi ya lɛɛ di nyi Wurubuarɛ waa gyuusu baŋ bↄↄ yem nɛ? 9Maŋ gbagba me lɛɛwↄ di me konↄↄ man nyi, kaboena nyi maa mo gbɛɛ kamasɛ man na maa wↄlɛɛ Yesu ŋon ↄ ba lee Nasarɛte nɛ yele. 10Mena mↄ te me yɛɛwↄ Gyerusalɛm donↄↄ man. Saese kegyiise faa maŋ gbɛɛ te me kyaŋa Kristotena burum tↄ deni, te akpaa bɛɛ gyae baa ko wↄ mↄ na, mɛɛ seŋ be wↄle nyi ke gbɛɛ kenaŋ, baa ko wↄ. 11Debaŋ kamasɛ na me dↄŋɛɛ Gyudatena ↄsom denɛɛ man mɛɛ naase Kristotena diyem, na baa nyiŋ tina ba kelɛɛdi keŋ yela. Me baŋ ka koro be dↄↄ nideli nɛ, me sila wↄ gyu tɛɛlese wↄlɛɛ dↄↄ ke naase wↄ diyem nideli. 12Lee kei dↄↄ te Wurubuarɛ saese kegyiise faa maŋ be nyiŋmaa man tↄne keŋ ne fa maŋ doŋ, te ma moo ma nyee baŋ Damasekuse gbɛɛ. 13Gyoo kpaakpaa, weeseteŋteŋ me ka koro mee gyu keŋ nɛ, karatetee dokoloŋ te keŋmaŋee daale keŋ ne naa kela weese nɛ, leewↄ adido kaa ŋmaale kilisi daa na me tebia baŋ de dↄŋɛɛ nɛ. 14De popou leewↄ yala tɛɛle man te me nyii nↄↄwoya ŋaale yako maŋ Hiburu dei man nyi, 'Sↄↄl, Sↄↄl, weera te n ne naase man diyem? N ne naase n wose diyem bo ŋgba mena keŋ bɛɛ wↄŋee wonembu te ŋon mↄ ne wↄŋee ↄ wose lee wↄle naase ↄ wose diyem nɛ.' 15Te me bↄↄsewↄ nyi, 'Nyaŋ amↄte ŋonaŋ me Gbeŋgyoo?' Te de Gbeŋgyoo tiranↄↄ nyi, 'Maŋ yɛna Yesu ŋon n ne naase diyem nɛ. 16Mↄna koro seŋ ma lese ma wose baa wola neŋ, na maa mo neŋ yɛɛ me tobaale na n ke di adansɛɛ lee kpene keŋ n be naa lee ma wose man na ŋan maa kaa wola neŋ nɛ. 17Maa lɛɛ neŋ lee nyaŋ gbagba n balaŋ, na baŋ ba te yɛɛ Gyudatenawↄ ya te mee kpila neŋ be gyaŋ nɛ nyiŋmaa man. 18Mee kpila neŋ baa na n kaa gyuusu be sia, na baa tale lee ditiŋtɛɛ man kↄŋ keŋmaŋee man, na baa tale lee ↄbↄnsam nyiŋmaa man kↄŋ Wurubuarɛ gyaŋ. Na baa lɛɛ maŋ di na Wurubuarɛ ka mo be nombiakumɛɛ kyɛɛ wↄ na baa nyiŋ dekyae kpu na baŋ Wurubuarɛ ba lese see fa ↄ wose nɛ.' 19Mena dↄↄ gyoo Agiripa, ma te yɛɛ deŋele doŋ lee kpene keŋ Wurubuarɛ ba lese wola maŋ lee adido, te mↄↄ naa ke na me sia ŋgba dosɛɛ man nɛ ya. 20Me taŋgbɛɛwↄ yako Wurubuarɛ nombia Damasekuse te me gyuu Gyerusalɛm na Gyudia tɛɛle dↄↄ pou. Kenaŋ wↄle te me kaa kolosi ŋa fa baŋ ba te yɛɛ Gyudatenawↄ ya nɛ. Me yako wↄ nyi baa kyɛɛkee lee be gbɛɛneŋ kumɛɛ man na baa kↄŋ Wurubuarɛ gyaŋ, na baa yɛɛ abↄↄ ŋan gyae kawola nyi ba te kyɛɛkee lee be gbɛɛneŋ kumɛɛ man kↄŋ Wurubuarɛ gyaŋ nɛ. 21Kei dↄↄ te Gyudatena kyaŋa maŋ Wurubuarɛ ↄsom deni dinaa keŋ man te bɛɛ gyae gbɛɛ baa ko maŋ nɛ. 22Mↄna Wurubuarɛ ta seŋ me wↄle kaa lii gyɛŋ, mena dↄↄ te me talewↄ seŋ kɛbo keŋkeŋ mɛɛ di nombia kɛŋa adansɛɛ fa bia na kegyiise pou nyi, kpene keŋ mɛɛ yako nɛ na keŋ Wurubuarɛ akpeŋkpeŋgyↄↄra na Mosesi be yako see nyi gyae ke kↄŋ nɛ, yɛɛ dokoloŋ. 23Nombii keŋ bↄↄ yako see yɛna nyi, nyeelɛɛre ŋon Wurubuarɛ be yako see nyi waa kↄŋ nɛ, waa naa diyem te ŋon ne gyaela waa taŋgbɛɛ foŋ lee yeŋ man, na waa wola ↄ balaŋ Gyudatena na baŋ ba te yɛɛ Gyudatenawↄ ya nɛ pou nyi, keŋmaŋee keŋ man baa ta na baa nyiŋ nyeedoŋ nɛ te kↄŋ." 24Botↄↄ te gyoo Fesituse gyↄↄ Pↄↄl nↄↄ dↄↄ fae e nyi, "Pↄↄl, n nyee ne wↄlɛɛ do? N tↄne kagyeŋ beiŋ na doo na neŋ diteŋ nɛ." 25Keŋte Pↄↄl tiranↄↄ nyi, "Gyoo kpaakpaa! Ma nyee bɛɛ wↄlɛɛ ya, me sia ala kaeŋ. Nombia ŋan mee kolosi nɛ yɛɛ nombia kpaakpaa ŋa, te ŋe doo na ŋe gbɛɛ mↄ. 26Gyoo Agiripa, n gyeŋ nombia kɛŋa pou man mena dↄↄ maa tale gyↄ me konↄↄ kolosi na neŋ lee me konↄↄ man. Mɛɛ lɛɛ di nyi n gyeŋ nombia kɛŋa man keŋ dokoloŋ koraŋ te lam n dↄↄ ya, nawolo nyi ba te yɛɛ ŋa weese ya. 27Gyoo Agiripa, n ne lɛɛ Wurubuarɛ akpeŋkpeŋgyↄↄra baŋ nↄↄwoya di? Ma gyeŋ nyi n ne lɛɛ ŋa di." 28Keŋte gyoo Agiripa mↄ bↄↄse Pↄↄl nyi, "N gyeŋ nyi nyaŋ ke tale yela maa bese Kristobaale debokeiman?" 29Te Pↄↄl tiranↄↄ nyi, "Gyɛŋ bo o kyoo bo o, maŋ ne fane bo nyi Wurubuarɛ waa yela ɛmɛɛ na balaŋ akaŋ baŋ pou ɛ be tei maŋ gyɛŋ wee kei nɛ, ɛ ka bese Kristotena ŋgba maŋ Pↄↄl nɛ. Mↄna be na do ŋon akyakaase bo ya!" 30Keŋte gyoo Agiripa na Fesituse ŋon ↄ seŋɛɛ Romantena gyoo dinaa nawↄↄ man nɛ, na Bɛɛnise na balaŋ akaŋ baŋ korowↄ lee deni keŋ man. 31Be ka koro nɛ be kolosiwↄ na dↄŋa nyiaa, "Balee kei te yɛɛ dukum keŋ kaboena nyi baa ko e yaa baa do e deni ya." 32Keŋte gyoo Agiripa yako Fesituse nyi, "Nyi balee kei deŋ te yako nyi dɛɛ mo ↄ nombia gyina gyoo dinaa Kaesa ya na, nafↄ dɛɛ tale tina e yela."

will be added

X\