Kpilala 25

1Fesituse ke kↄŋ tɛɛle keŋ dↄↄ ↄ ne di gyoori nɛ, ka weeya atooro wↄle na ↄ leewↄ Kaesaria gyu Gyerusalɛm. 2Botↄↄ te Wurubuarɛ saese kegyiise na Gyudatena ↄsom kegyiise moo Pↄↄl nombia ŋan baŋ kpa ↄ be yɛɛ nɛ kaa see ↄ siaman. 3Ba sola Fesituse nyi waa wii wↄ na waa yela baa lese Pↄↄl kↄŋ Gyerusalɛm nawolo nyi, na ba te bake ba nyeeman nyi de kↄŋ mena na baa yo gbɛɛnaa man na baa deke e ko. 4Keŋte Fesituse tiranↄↄ nyi, "Pↄↄl waa doo deni man Kaesaria botↄↄ, nawolo nyi maŋ gbagba maa gyu botↄↄ weeya ala kɛŋa man. 5Akpaa nyi ↄ te yɛɛ nombiikum daale na ɛ yela ɛ kegyiise baale ke sila maŋ gyu Kaesaria na be kaa wola dukum keŋ ↄ be yɛɛ." 6Ↄ ke kyaa be gyaŋ weeya gyanaara yaa kufu nɛ, ↄ korowↄ gyu Kaesaria. Ke tɛɛ kena nɛ, ↄ baake nombia ŋan te ↄ yela ba moo Pↄↄl kↄŋ be siaman. 7Pↄↄl ka betaa bɛɛ lee pɛ, te Gyudatena baŋ bↄↄ lee Gyerusalɛm nɛ kaa seŋawↄ kilisi e te be fiasɛɛ bɛɛ mo nombiakumɛɛ dinaana gyakaa ↄ dↄↄ, mↄna be te nyiŋ nombii keŋ baa seŋ ke dↄↄ wola nyi ŋe yɛɛ ampaŋ ya. 8Pↄↄl kolosiwↄ lese ↄ nↄↄse nyi, "Ma te yɛɛ nombiikum kamasɛ tia Gyudatena mmaraase yaa Wurubuarɛ ↄsom deni dinaa keŋ ya. Ma te yɛɛ nombiikum tia Romantena gyoo dinaa mↄ ya." 9Fesituse gyaewↄ waa yɛɛ Gyudatena deeli mena dↄↄ, ↄ bↄↄse Pↄↄl nyi, "N ne gyae n ke sila maŋ gyu Gyerusalɛm na me kaa di n nombia ŋan botↄↄ?" 10Keŋte Pↄↄl tiranↄↄ nyi, "Gyoo dinaa Kaesa nombia dedii dekpaŋalaŋ man yaa ma seŋɛɛ nɛ. Mena dↄↄ kɛbo te kaboena nyi baa di me nombia. Nyaŋ gbagba n gyeŋ nideli nyi ma te yɛɛ Gyudatena dukum kamasɛ ya. 11Akpaa ma te yɛɛ dukum keŋ kaboena nyi baa ko man na, baa tale ko maŋ, mↄↄ ne bɛɛ ya. Mↄna akpaa nyi nombia ŋan bɛɛ mo gyakaa me dↄↄ yɛɛ akɛrɛɛ ŋa na, ŋolo be gyae waa tale mo maŋ do be nyiŋmaa man nyi baa ko man ya. Akpaa nnɛ te doo na mɛɛ sola neŋ bo, mo maŋ gyu Roman gyoo dinaa ŋon gyaŋ." 12Gyoo Fesituse na ↄ kegyiise baŋ ka lee yenaŋ kolosi na dↄŋa taŋ nɛ ↄ kaa tiranↄↄ nyiaa, "Gyoo dinaa Kaesaria gyaŋ te n ne gyae baa di n nombia, mena dↄↄ ↄ gyaŋ te n ke gyu." 13Ke di weeya ala nɛ, gyoo Agiripa na ↄ deesi Bɛɛnise kↄŋawↄ Kaesaria kaa do Fesituse nↄↄ. 14Be ke di weeya ala ŋaale botↄↄ nɛ, te Fesituse moo Pↄↄl nombia ŋan see gyoo Agiripa siaman e nyiaa, "Tobaale ŋolo kyaa kɛbo kei ŋon gyoo Felisi be yeli ↄ be dↄↄ deni man, 15te debaŋ keŋ mↄↄ gyu Gyerusalɛm nɛ, Wurubuarɛ saese kegyiise na Gyudatena ↄsom kegyiise moo nombia gyakaa ↄ dↄↄ te be yako maŋ nyi maa bu e fↄↄ. 16Mↄna me yako wↄ nyi, daa Romantena kɛɛ yɛɛ yɛna nyi, akpaa balaŋ bala de nyiŋ nombia te da te gyaŋee ta wↄ na baa lese be nↄↄse ya na, de bee bu fↄↄ ya. 17Te daa na wↄ ke kↄŋ kɛbo nɛ, ma te kyaa nombia ŋan dↄↄ kyare ya, mↄna tɛɛ kena nɛ, me baake nombia ŋan te me yela ba lese balee ŋon kↄŋ. 18Te balaŋ baŋ ŋon na wↄ be nyim nɛ korowↄ tↄlɛɛ be nↄↄwoya. Nombiakumɛɛ ŋan maŋ ba gyueŋ nyi nafↄ baa yako lee ↄ wose man nɛ, na ŋan gba te be yakowↄ ya. 19Mↄna baŋ na Pↄↄl lɛɛ dↄŋa aŋmaareŋ bo lee be Wurubuarɛ ↄsom wose man, na balee ŋon bɛɛ baake e nyi Yesu ŋon ↄ ba yem te Pↄↄl ne gyↄ ↄ konↄↄ yako nyi ↄ delena nɛ wose man. 20Na mↄↄ gyeŋ mena keŋ maa gyoo nombia kɛŋa dinↄↄ man ya, mena dↄↄ me bↄↄse Pↄↄl nyi waa sɛɛ gyu Gyerusalɛm na be kaa di ↄ nombia botↄↄ? 21Mↄna Pↄↄl solawↄ nyi baa yela waa doo be nyiŋmaa man na gyoo dinaa Kaesa kedi ↄ nombia. Mena dↄↄ me yela be gyee e kelii debaŋ keŋ maa kaa mo e gyina gyoo dinaa ŋon." 22Keŋte gyoo Agiripa yako Fesituse nyi, "Maŋ gbagba ne gyae nyi maa nyii balee kei nↄↄwoya." Te Fesituse tiranↄↄ fa e nyi, "Nyaŋ ke nyii ↄ nↄↄwoya kyoo." 23Ke tɛɛ kena nɛ, gyoo Agiripa na Bɛɛnise desinaa ba wose te yoonↄↄtena kegyiise na donↄↄ kegyiise sila wↄ kaa gyoo deni keŋ man bɛɛ gyaŋee nɛ. Be kee gyu na nↄↄneŋ na suya silana wↄ. Te Fesituse yela ba moo Pↄↄl kↄŋ. 24Te Fesituse yakowↄ nyi, "Gyoo Agiripa na baŋ pou e be yilaa kɛbo, ɛ ne naa balee kei. Gyudatena baŋ be kyaa Gyerusalɛm na Kaesaria kɛbo kaa wiiwↄ fa maŋ nyi kaboena nyi baa ko e. 25Maŋ te naa dukum keŋ ↄ be yɛɛ keŋ kaboena nyi baa koe ya. Mↄna ↄ ka sola nyi Roman gyoo dinaa waa di ↄ nombia nɛ, mena dↄↄ te me yɛɛ ma gyueŋ nyi maa mo e yelee e. 26Mↄna mↄↄ taŋ kolo kitii maa ŋmarase yelee gyoo dinaa lee ↄ wose man ya. Mena dↄↄ te ma moo e kↄŋ ɛ popou siaman tuturu na, nyaŋ gyoo Agiripa gyaŋ nyi n gyoo ↄ nombia ŋan man na, maa nyiŋ kolo ŋmarase lee ↄ wose man yelee gyoo dinaa ŋon. 27Nawolo nyi me naawↄ ma agyueŋ man nyi, tekaboena nyi maa mo walaŋ ŋon ↄ doo deni man nɛ yelee gyoo dinaa keŋ nyi, mↄↄ tale wola nombiikum keŋ ↄ be yɛɛ ya."

will be added

X\