Kpilala 24

1Weeya anoŋ wↄle nɛ, Wurubuarɛ sae kegyia Ananiase na donↄↄ kegyiise baale na Lↄya ŋon bɛɛ baake e Tɛtulↄse nɛ gyuu Kaesaria ke tↄlɛɛ be nↄↄwoya fa gyoo Felisi lee Pↄↄl wose man. 2Botↄↄ te be baake Pↄↄl kↄŋ. Keŋte Tɛtulↄse tↄlɛɛ ↄ nↄↄwoya lee Pↄↄl wose man nyi, Gyoo kpaakpaa, de te nyiŋ wosefɛɛreŋ kyare n gyoori kedi kei man. Nawolo nyi nyansa keŋ n ba mo di gyoori nɛ, te desina abↄↄ burum de tɛɛle kei dↄↄ. 3Gyoo kpaakpaa Felisi, yenaŋ kamasɛ na gbɛɛ kamasɛ man na, de sia ta gye abↄↄ nya ayɛɛŋ fa daa kɛŋa dↄↄ, mena dↄↄ dɛɛ do neŋ nↄↄ nideli. 4Mↄna me bɛɛ gyae maa wↄlɛɛ n debaŋ bela ya, mena dↄↄ mɛɛ sola neŋ bo, nyiŋ konↄↄ na n ke tei daa kyomii. 5"Da gyeŋ nyi balee kei yɛɛ tɛɛle yɛlɛɛre e. Ↄ te loo nombia do Gyudatena baŋ be kyaa tɛɛle kei dↄↄ pou nɛ, te ↄ yɛɛ Nasarɛtena ↄsom siamante mↄ e. 6Nafↄ ↄ gyaewↄ waa mo ayimɛɛ tina Wurubuarɛ ↄsom deni dinaa keŋ mↄ, te de kyaŋa e. Daa gyaewↄ nyi nafↄ dee di ↄ nombia daa gbagba da mmaraa gbɛɛ, mↄna yoonↄↄtena kegyia Lisia kaa lɛo e doŋ man lee de nyiŋmaa man, te ↄ yako daa nyi daa baŋ daa na Pↄↄl dana nombia nɛ, dɛɛ mo kↄŋ n gyaŋ. 8Akpaa n bↄↄse e ↄ nↄↄwoya na, nyaŋ gbagba n kena nyi ŋan pou dↄↄ yako lee ↄ wose man nɛ, doo na ke gbɛɛ." 9Te Gyudatena mↄ moo be nↄↄ do nyi mena nombia ŋan dↄↄ yako lee ↄ wose man nɛ, doo na ŋe gbɛɛ. 10Gyoo Felisi ke fa Pↄↄl gbɛɛ nyi waa kolosi nɛ, Pↄↄl tↄlɛɛ ↄ nↄↄwoya nyi, "Ma gyeŋ nyi n ne di nombia tɛɛle kei dↄↄ te yɛɛ gyɛŋ ya. Mena dↄↄ dana maŋ gyoŋ ŋgba mɛɛ kolosi maa lese me nↄↄse fa neŋ nɛ. 11Nyaŋ gbagba n gyoo ke man na, n kena nyi weeya kufu ala yaa ŋgba mↄↄ gyu Gyerusalɛm me kaa som nɛ. 12Te balaŋ baŋ daa na wↄ be nyim nɛ, te naa daa na ŋolo ke lɛɛ aŋmaareŋ Wurubuarɛ ↄsom deni dinaa keŋ man ya. Ba te naa maŋ nyi maa loo nombia do balaŋ Gyudatena ↄsom deni man, yaa yenaŋ daale ya. 13Te bↄↄ gyae baa tale gyↄ be konↄↄ na baa seŋ kolo dↄↄ wola nyi nombia ŋan bɛɛ mo gyakaa me dↄↄ nɛ yɛɛ ampaŋ ya. 14Mↄna ma te sɛɛ nyi, mɛɛ som de naanaↄ Wurubuarɛ lee de Gbeŋgyoo Yesu gbɛɛ keŋ baŋ ne yako nyi ke yɛɛ ↄsom kum ke nɛ man. Te mɛɛ lɛɛ kpene kamasɛ keŋ bↄↄ ŋmarase do Wurubuarɛ mmaraase ŋan ↄ be yeli Mosesi be ŋmarase see nɛ, na Wurubuarɛ akpeŋkpeŋgyↄↄra tↄna man nɛ di. 15Me loo gyakaa Wurubuarɛ nombii dokoloŋ kei dↄↄ nyi, yeŋ wↄle na, balaŋ kpaakpaa na balaŋ kumɛɛ pou baa foŋ lee yeŋ man ŋgba mena keŋ baŋ mↄ loo gyakaa nɛ. 16Mena dↄↄ mɛɛ yɛɛ kakyeŋ wee kamasɛ na maa yɛɛ kpene keŋ me konↄↄ be gyae ke bu maŋ fↄↄ Wurubuarɛ na balaŋ siaman ya. 17Me ka lee Gyerusalɛm donↄↄ man kulutooneŋ burum wↄle nɛ, ma besewↄ kↄŋ botↄↄ te ma moo kↄba na abↄↄ kↄna me tebia Gyudatena baŋ na baa mo fa ayematena, te me faa Wurubuarɛ mↄ kedi. 18Debaŋ kei man te be naa maŋ Wurubuarɛ ↄsom deni dinaa keŋ man na ma te gberaa ma wose taŋ, na balaŋ dikpii mↄ be kpuɛ na maŋ ya, te gidigidi mↄ te kↄŋ botↄↄ ya. 19Mↄna Gyudatena baale baŋ bↄↄ lee Esia tɛɛle dↄↄ nɛ kↄŋawↄ botↄↄ. Baŋ te nafↄ kaboena nyi baa kↄŋ n siaman kɛbo, na nombii keŋ doo na dɛɛ gyoo ke man. 20Te n gyae mↄ na, yela baŋ ba seŋɛɛ kɛbo nɛ ke yako dukum keŋ bↄↄ naa lee ma wose man debaŋ keŋ bↄↄ kyaŋ maŋ gyu donↄↄ kegyiise baŋ gyaŋ nɛ. 21Nombii dokoloŋ keŋ mↄↄ gyↄ me konↄↄ yako be siaman yɛna nyi, baŋ bↄↄ yem nɛ baa bese foŋ lee yeŋ man bela. Mena nombii kei dↄↄ te bee di me nombia gyɛŋ nɛ." 22Botↄↄ te Felisi ŋon ↄ wulaa ↄ gyeŋ de Gbeŋgyoo Yesu nyeedoŋ gbɛɛ keŋ wose man nombia nideli nɛ, tuu nombia kedi wee keŋ see wee wↄle. Keŋte ↄ yakowↄ nyi, "Wee keŋ yoonↄↄtena kegyia Lisiase ŋon de kↄŋ na, maa di n nombia kɛŋa." 23Keŋte ↄ yako yoonↄↄtena kegyia ŋon bↄↄ mo Pↄↄl do ↄ nyiŋmaa man nɛ nyi waa kɛɛ ↄ dↄↄ nideli, be naa seŋ ↄ dↄↄ beiŋ ya. Mↄna waa fa ↄ tebia gbɛɛ baa fa e kpene kamasɛ keŋ ne hia e. 24Ke di weeya ala ŋaale nɛ, Felisi na ↄ wɛɛle Durusila ŋon ↄ yɛɛ Gyuda alo e nɛ kↄŋawↄ botↄↄ. Keŋte Felisi yela Pↄↄl kↄŋawↄ kaa kolosi fa wↄ, te Pↄↄl kolosiwↄ lee Kristo Yesu kelɛɛdi wose man. 25Pↄↄl ke gyakaa ↄ ne kolosi lee abↄↄ ŋan tenɛɛ na deeli keyɛɛ, na wose dↄↄ kedi na mena keŋ Yesu waa di balaŋ pou nombia wee daale nɛ, gyakoloŋ gyoo Felisi te ↄ yakowↄ nyi, "Tekaboe mena ta pɛ, me nyiŋ ma wose na maa baake neŋ bela." 26Na ↄ sia gyakaa nyi Pↄↄl waa fa e kↄba na waa tina e yela mena dↄↄ ↄ kyaa ↄ kyaa na, ↄ te baake Pↄↄl kolosi na e. 27Kulutooneŋse ala wↄle nɛ, Pokiuse Fesituse kaa dii gyoori gyoo Felisi nawↄↄ man. Mↄna keŋ Felisi ne gyae waa yɛɛ Gyudatena deeli dↄↄ, ↄ ta lese Pↄↄl lee deni man ya.

will be added

X\