Kpilala 23

1Pↄↄl kɛɛ kegyiise baŋ bↄↄ gyaŋee nɛ sia gbɛɛ te ↄ yakowↄ nyi, "Me tebia Iseraetena, me konↄↄ bee bu maŋ fↄↄ gbɛɛ kamasɛ man ya, nawolo nyi me kyaawↄ nideli Wurubuarɛ siaman kaa lii naŋ gyɛŋ." 2Botↄↄ te Wurubuarɛ sae kegyia Ananiase faewↄ do baŋ ba seŋɛɛ benaa na Pↄↄl nɛ nyi, baa gyↄ e ↄ nↄↄ gbɛɛ. 3Keŋte Pↄↄl mↄ yako e nyi, "Wurubuarɛ waa gyↄ nyaŋ mↄ. Kɛɛ ↄ ke kyaa botↄↄ ŋgba deni dekyaŋ keŋ bↄↄ gyilaa ke wↄle wolom nɛ. N kyaa botↄↄ n na mo mmaraa di me nombia, mↄna nyaŋ gbagba mↄ n ta fom Wurubuarɛ mmaraa, ŋgba n be fae do wↄ nyi baa gyↄ maŋ nɛ." 4Botↄↄ te balaŋ baŋ ba seŋɛɛ benaa na Pↄↄl nɛ yakowↄ nyi, "Wurubuarɛ sae kegyia yaa n na tee nɛ!" 5Keŋte Pↄↄl tiranↄↄ nyi, "O me tebia, me ta gyem nyi ŋon yɛna Wurubuarɛ sae kegyia ŋon ya. Nawolo nyi Wurubuarɛ nombia aŋmaraseŋ see ne yako nyi, 'Ɛ na kolosi walaŋ ŋon ↄ ne di balaŋ dↄↄ nɛ wose man nombiikum ya.' " 6Te Pↄↄl kena nyi balaŋ baŋ baale yɛɛ Sadukiitenawↄ te baale mↄ yɛɛ Farasiitenawↄ nɛ ↄ fae yeesa nyi, "Me tebia, me yɛɛ Farasii baale e, te me kya mↄ yɛɛ Farasii baale e. Keŋ dↄↄ bee di me nombia yɛna nyi, me sia gyakaa nyi baŋ bↄↄ yem nɛ baa foŋ lee yeŋ man." 7Ↄ ke yako mena nɛ, kale gyoo Sadukiitena na Farasiitena baŋ man te dikpii keŋ kpasewↄ akpeŋ ala. 8Nawolo nyi Sadukiitena ne yako nyi yeŋ wↄle kefoŋ be kyaa bela ya, yaa Wurubuarɛ kpilala na feliŋkumɛɛ be kyaa ya, mↄna Farasiitena ne lɛɛ kɛŋa pou di nyi ŋe kyaa. 9Kale dinaa daale gyoo wↄ, keŋte Gyudatena mmaraa wolala baŋ be yɛɛ Farasiitenawↄ nɛ, man baale korowↄ seŋ keŋkeŋ nyi, "Da te naa dukum keŋ balee kei be yɛɛ ya! Mberem Wurubuarɛ feliŋ yaa Wurubuarɛ kpilale ŋolo kolosila na e." 10Kale keŋ nↄↄ ke yɛɛ doŋ nɛ, yoonↄↄtena siamante ŋon yeewↄ nyi mberem baa tirii Pↄↄl kpetekpetekpete. Mena dↄↄ ↄ faewↄ do ↄ yoonↄↄtena baŋ nyi baa lɛo Pↄↄl doŋ man lee balaŋ baŋ gyaŋ, na baa mo e gyu ba dekyae man. 11Wee kenaŋ nelim nɛ, de Gbeŋgyoo Yesu kↄŋawↄ kaa seŋ Pↄↄl gyaŋ yako e nyi, "Nyiŋ konↄↄ! Na yee ya! Mena keŋ n be di ma wose man adansɛɛ Gyerusalɛm kɛbo nɛ, mena mↄ te kaboena nyi nya di ma wose man adansɛɛ Roman donↄↄ man." 12Tɛɛ kena nebo nɛ, Gyudatena baale gyaŋeewↄ mo agyueŋ. Be kaŋa ntam nyi be nↄↄ be gyae ke daa weenɛɛ yaa loŋ ya kelii debaŋ keŋ baa ko Pↄↄl. 13Balaŋ baŋ bↄↄ mo Pↄↄl wose man agyueŋ kum kei kela balaŋ sↄŋola (40). 14Te be gyuu Wurubuarɛ saese kegyiise na donↄↄ kegyiise baŋ gyaŋ ke yako wↄ nyi, "Da te kaŋ ntam nyi, de nↄↄ be gyae ke daa kolo ya, kelii debaŋ keŋ dɛɛ ko Pↄↄl. 15Mena dↄↄ ɛmɛɛ na nombiadiira baŋ ɛ kpila gyu Romantena yoonↄↄtena siamante ŋon gyaŋ ka sola e na waa mo Pↄↄl kↄŋ ɛ gyaŋ. Ɛ gyu ka beo e nyi ɛ ne gyae ɛ ka gyoo Pↄↄl nombia ŋan man nideli, mↄna nyi ↄ fa gbɛɛ nyi baa mo e kↄŋ na, da te desina da wose nyi dɛɛ koe e gbɛɛnaa man." 16Pↄↄl wa agbelebii nyii nombii kei na, te ↄ korowↄ gyu yoonↄↄtena baŋ dekyae man ke bↄ Pↄↄl amandɛɛ. 17Keŋte Pↄↄl baake yoonↄↄtena baŋ man kegyia ŋolo te ↄ yako e nyi, "Mo tobaalebii kei gyu yoonↄↄtena siamante ŋon gyaŋ, nawolo nyi ↄ dana nombii daale waa yako e." 18Te ↄ moo tobaalebii ŋon gyu yoonↄↄtena siamante ŋon gyaŋ te yoonↄↄtena kegyia ŋon yako e nyi, "Pↄↄl ŋon ↄ doo deni man nɛ kpila la baake maŋ te ↄ yako maŋ nyi maa mo tobaalebii kei kↄŋ n gyaŋ, nawolo nyi ↄ dana nombii daale waa yako neŋ." 19Yoonↄↄtena siamante ŋon kyaŋa bu ŋon nyiŋmaa man te ↄ mo e lee yenaŋ bↄↄse e nyi, "Woŋ te n dana n ke yako maŋ?" 20Keŋte bu ŋon tiranↄↄ nyiaa, "Gyudatena kegyiise te yɛɛ nↄↄdokoloŋ nyi baa sola neŋ na n ke yela Pↄↄl ke gyu kena wↄ kyoo. Baa beo neŋ nyi bɛɛ gyae baa gyoo ↄ nombia ŋan man nideli. 21Na sɛɛ ya nawolo nyi balaŋ kela sↄŋola keŋ ba yoɛ gbɛɛnaa man bɛɛ daa Pↄↄl. Ba te kaŋ ntam nyi be nↄↄse be gyae ke daa kolo ya kelii debaŋ keŋ baa ko Pↄↄl. Baŋ taŋ desina ba wose taŋ, nyaŋ yaa bee gyeki." 22Te yoonↄↄtena siamante ŋon lↄↄ tobaalebii ŋon gbɛɛ te ↄ faree e nyi, "Na yeli ŋolo ke nyii nyi, n te kaa yako maŋ mena nombia kɛŋa ya." 23Mena dↄↄ yoonↄↄtena siamante ŋon baake ↄ yoonↄↄtena kegyiise baŋ man balaŋ bala te ↄ yako wↄ nyi, "Ɛ gyae yoonↄↄtena sↄŋonoŋ akpeŋ ala (200) na yoonↄↄtena baŋ bɛɛ kyaa dɛɛkyↄŋse nɛ sↄŋotooro na kufu (70), na yoonↄↄtena baŋ bɛɛ mo apiase yokii nɛ sↄŋonoŋ akpeŋ ala (200). Baa desina ba wose na baa koro nelim debaŋ kadaalete man gyu Kaesaria. 24Ɛ gyae dɛɛkyↄŋ fa Pↄↄl na ɛ ka mo e ka do gyoo Felisi ŋon ↄ ne kɛɛ botↄↄ tɛɛle dↄↄ nɛ nyiŋmaa man wosefɛɛreŋ man." 25Te yoonↄↄtena siamante ŋon ŋmarase tↄne fa wↄ nyi. 26"Maŋ Klaudiuse Lisiase ne ŋmarasena tↄne kei mee yelee nyaŋ gyoo kpaakpaa Felisi. Mɛɛ do neŋ nↄↄ. 27Gyudatena kyaŋana balee kei nyi baa ko e, te ma moo me yoonↄↄtena te de gyuuwↄ ke lɛɛ e, nawolo nyi me naawↄ nyi ↄ yɛɛ Roman bu dalolasa e. 28Me gyaewↄ maa gyeŋ kpene keŋ dↄↄ bↄↄ mo nombiakumɛɛ gyakaa ↄ dↄↄ, mena dↄↄ ma moo e gyu baŋ gbagba be kegyiise siaman. 29Botↄↄ te me naawↄ nyi, nombia ŋan bↄↄ mo gyakaa ↄ dↄↄ nɛ, yɛɛ ba mmaraase nombia ŋa, mↄna ma te naa kpene keŋ ↄ be yɛɛ keŋ kaboena nyi baa ko e yaa baa kyaŋ e tↄ deni ya. 30Te ba ke yako man nyi Gyudatena baale te bake ↄ nyee man nyi baa ko e nɛ, debokenaŋ man te me yɛɛ ma agyueŋ nyi maa mo e kↄŋ n gyaŋ. Te me yako baŋ baŋ na e dana nombia nɛ nyi baa mo be nombia kↄŋ n gyaŋ na be kaa gyoo ŋe man. Me nↄↄ te si." 31Mena dↄↄ yoonↄↄtena baŋ yɛɛwↄ ŋgba mena keŋ be kegyia ŋon be faree wↄ nyi baa yɛɛ nɛ. Ba moo Pↄↄl nelim kenaŋ menɛɛ te be keliiwↄ Antipatirise donↄↄ man. 32Tɛɛ kena nɛ, yoonↄↄtena baŋ be dↄŋ na be nawↄↄ nɛ, besewↄ gyu be dalee man, te baŋ bɛɛ kyaa dɛɛkyↄŋse nɛ moo e laŋ. 33Be ka gyoo Kaesaria donↄↄ man nɛ, ba moo tↄne keŋ fa gyoo Felisi te ba moo Pↄↄl do ↄ nyiŋmaa man. 34Gyoo ŋon kala tↄne keŋ te ↄ bↄↄse Pↄↄl nyi, tɛɛle kei yenaŋ woŋti man yaa n leewↄ. Gyoo ŋon ke nyii nyi ↄ lee Silisia tɛɛle man nɛ, 35ↄ yakowↄ nyi, "Debaŋ keŋ balaŋ baŋ ɛmɛɛ na wↄ be nyiŋ nombia de kↄŋ nɛ, na maa nyii n nↄↄwoya." Te ↄ yakowↄ nyi baa mo Pↄↄl gyu gyoo Herode dekpaŋalaŋ dinaa keŋ man na baa gyee e.

will be added

X\