Kpilala 22

1Keŋte Pↄↄl kolosiwↄ lese ↄ nↄↄse nyiaa, "Me tebia na me kyaↄ, ɛ tei maŋ." 2Be kenyii ↄ kekolosi na wↄ Hiburu dei man nɛ, be wuu be nↄↄse te botↄↄ yɛɛwↄ diiŋ. Te Pↄↄl yakowↄ nyi, 3"Me yɛɛ Gyuda baale e te ba lola maŋ bo Tasuse Silisia tɛɛle dↄↄ mↄna be kɛɛle maŋ bo Gyerusalɛm donↄↄ man kɛbo, Na me yɛɛ Gamaleli tobaale e. Ↄ kɛɛle maŋ nideli de naanaↄ ↄsom amanberɛ gbɛɛ man te me yase me sia mo ma wose lↄ Wurubuarɛ dↄↄ ŋgba mena keŋ ɛ man walaŋ kamasɛ ne yɛɛ gyɛŋ nɛ. 4Me naase baŋ be dↄŋ de Gbeŋgyoo Yesu nyeedoŋ gbɛɛ kei dↄↄ nɛ diyem nideli keŋ nyi be baale koraŋ yekeewↄ, te me kyaŋa be man ala na baala pou ketↄ deni. 5Sae kegyia na nombiadiira kegyiise baa di adansɛɛ nyi kpene keŋ mɛɛ yako nɛ yɛɛ anokoare. Nawolo nyi me lɛɛ tↄna koraŋ lee be gyaŋ, ŋan bↄↄ ŋmarase fa be tebia Gyudatena baŋ be kyaa Damasekuse nɛ, te me gyuuwↄ me kaa kyaŋ Kristotena baŋ be kyaa botↄↄ nɛ, na maa do wↄ akyakaase kↄŋ Gyerusalɛm na baa wↄŋ ba deŋela. 6Keŋte Pↄↄl yakowↄ nyi, ma keta gyu ka benaa Damasekuse donↄↄ keŋ na weese ta seŋ dɛɛ. Karatetee dokoloŋ te keŋmaŋee dinaa daale lee adido kaa ŋmaale polɛ kilisi maŋ. 7Kara maŋ lↄ tɛɛle man te me nyii nↄↄwoya ŋaale ne bↄↄse maŋ nyi, 'Sↄↄl! Sↄↄl! Weera te n ne naase man diyem?' 8Te me bↄↄse e nyi, 'Nyaŋ amↄte ŋonaŋ me Gbeŋgyoo?' Te ↄ tiranↄↄ nyi 'Maŋ Yesu Nasarɛte baale ŋon n ne naase diyem nɛ.' 9Balaŋ baŋ daa na wↄ dↄŋɛɛ nɛ naa keŋmaŋee keŋ, mↄna be te nyii nↄↄwoya ŋan be kolosi na maŋ nɛ man ya. 10Me bↄↄsewↄ nyi, 'Woŋ te maa yɛɛ me Gbeŋgyoo?' Te de Gbeŋgyoo yako maŋ nyi, 'Koro gyu Damasekuse. Botↄↄ te baa yako neŋ kpene kamasɛ keŋ Wurubuarɛ ne gyae nyi n ke yɛɛ.' 11Keŋmaŋee dinaa keŋ yela me sia yɛlɛɛwↄ, mena dↄↄ balaŋ baŋ daa na wↄ dↄŋ nɛ, kyaŋa na maŋ me nyiŋmaa man gyu ka gyoo Damasekuse donↄↄ man. 12Balee ŋolo ŋon bɛɛ baake e nyi Ananiase nɛ kↄŋawↄ kaa kɛɛ maŋ. Ↄ yɛɛ walaŋ ŋon ↄ ne yee Wurubuarɛ, te ↄ ne di Wurubuarɛ mmaraase ŋan dↄↄ nideli, te Gyudatena baŋ pou be kyaa Damasekuse nɛ ne bu e nideli. 13Ↄ kↄŋawↄ kaa seŋ me gyaŋ te ↄ yakowↄ nyi, 'Me dↄↄ Sↄↄl, gyuusu n sia na n kena.' Debokenaŋ man te me sia gyuusuwↄ te me naa e. 14Te Ananiase yako maŋ nyi, 'De naanaↄ Wurubuarɛ lese na neŋ nyi nya gyeŋ kpene keŋ ↄ ne gyae nyi nya yɛɛ, na n kena ↄ walaŋ ŋon ↄ gbɛɛneŋ tenɛɛ Wurubuarɛ siaman nɛ, na n ke nyii ↄ nↄↄwoya. 15Nawolo nyi nyaŋ ne gyae la n ke di ↄ wose man adansɛɛ fa balaŋ pou lee kpene keŋ n be naa, na kpene keŋ n be nyii lee ↄ wose man nɛ. 16Nɛnɛɛ woŋ yaa n ne daa? Koro seŋ na n ke yela baa sↄ neŋ Wurubuarɛ loŋ na n ke fane de Gbeŋgyoo Yesu yele man, na Wurubuarɛ ke gberaa nya ayimɛɛ lee n wose man.' 17Keŋte Pↄↄl besewↄ gyina ↄ kekolosi dↄↄ nyi, debaŋ keŋ mↄↄ bese gyu Gyerusalɛm te mↄↄ gyu Wurubuarɛ ↄsom deni dinaa keŋ man me kaa fane nɛ, me naa kolo na me sia ŋgba dosɛɛ man nɛ. 18Keman te me naa de Gbeŋgyoo Yesu te ↄ yako maŋ nyi, 'Yɛɛ bileŋ na n ka lee Gyerusalɛm debokeiman! Nawolo nyi, balaŋ kɛwↄ be gyae baa lɛɛ nya adansɛɛ keŋ n ne dii lee ma wose maŋ nɛ di ya.' 19Keŋte me tiranↄↄ nyi, 'Me Gbeŋgyoo, balaŋ kɛwↄ gyeŋ nyi me gyuu Gyudatena ↄsom denɛɛ man donↄↄ kamasɛ man, ke kyaŋee balaŋ baŋ bɛɛ lɛɛ neŋ di nɛ, te me tuku wↄ. 20Te debaŋ keŋ bɛɛ ko Sitifin ŋon ↄ be di n wose man adansɛɛ nideli nɛ, na ma seŋɛɛ botↄↄ mɛɛ do wↄ kakyeŋ, te maŋ koraŋ kɛɛ na ba kegbase dↄↄ.' 21Te de Gbeŋgyoo yako maŋ nyi, 'Ta! Maa kpila neŋ lemlem, balaŋ baŋ ba te yɛɛ Gyudatenawↄ ya nɛ gyaŋ.' " 22Balaŋ baŋ tei e kelii debaŋ keŋ ↄ be kolosi nombia kɛŋa pou taŋ nɛ. Botↄↄ te be fae yeesa nyi, "Ɛ ko e! Ɛ ko e! Ↄ tekaboena nyi waa kyaa tɛɛle kei dↄↄ ya." 23Na bɛɛ fae yeesa, te ba kpee ba kegbase na bee fiili ŋa adido na be fuŋii aŋasa gyu adido. 24Mena dↄↄ yoonↄↄtena siamante ŋon faree ↄ tewulɛɛ baŋ nyi, baa mo Pↄↄl gyu yoonↄↄtena dekyae keŋ man na baa kebii e dambiise na baa bↄↄse e kpene keŋ dↄↄ balaŋ ne fae yeesa ↄ dↄↄ mena. 25Ba ke bake e baa tuku e nɛ te Pↄↄl bↄↄse yoonↄↄtena kegyia ŋon ↄ seŋɛɛ botↄↄ nɛ nyi, "Gbɛɛ doo nyi ya tuku Roman bu dalolasa ŋon ɛ te di ↄ nombia na ɛ ke bu e fↄↄ yee?" 26Yoonↄↄtena kegyia ŋon ke nyii nombia kɛŋa nɛ, ↄ korowↄ gyu yoonↄↄtena siamante ŋon gyaŋ ke yako e nyi, "Woŋ yaa ɛ ne gyae ɛ ke yɛɛ nɛ? Balee kei yɛɛ Roman bu dalolasa e o!" 27Yoonↄↄtena siamante ŋon gyuu Pↄↄl gyaŋ ke bↄↄse e nyi, "Yako maŋ, n yɛɛ Roman bu dalolasa e?" Keŋte Pↄↄl tiranↄↄ nyi, "Ayi me yɛɛ Roman bu dalolasa e." 28Botↄↄ te yoonↄↄtena siamante ŋon yakowↄ nyi, "Maŋ tↄↄ kom dinaa pɛte ma bese Roman baale." Te Pↄↄl mↄ yako e nyi, "Maŋ dↄↄ me yɛɛ Roman bu dalolasa e." 29Mena dↄↄ baŋ nafↄ bↄↄ yeli baa bↄↄse e nombia nɛ, tuuwↄ lee ↄ gyaŋ bileŋ. Debaŋ keŋ yoonↄↄtena siamante ŋon gbagba be naa nyi Pↄↄl yɛɛ Roman bu dalolasa e te bↄↄ do e akyakaase nɛ, gyakoloŋ gyoo e. 30Yoonↄↄtena siamante ŋon gyaewↄ waa gyeŋ kpene keŋ kitii dↄↄ Gyudatena ne kara Pↄↄl nↄↄse nɛ nideli, mena dↄↄ tɛɛ kena nɛ ↄ yela ba lese Pↄↄl akyakaase ŋan, te ↄ yela Wurubuarɛ saese kegyiise na donↄↄ kegyiise pou gyaŋeewↄ, te ↄ moo Pↄↄl kaa seŋ be siaman.

will be added

X\