Kpilala 21

1Da ke kalaa dↄŋa taŋ keŋ nɛ, da moowↄ loŋ keŋ dↄↄ teeŋ te da toŋawↄ gyu Kosi donↄↄ man. Tɛɛ naawↄ na te de ka gyoo Rodesi donↄↄ man, te da leewↄ botↄↄ gyu Patara donↄↄ man. 2Botↄↄ te de naa degbele dinaa daale na kee gyu Fonisia tɛɛle man te da gyoo ke man laŋ. 3De sia ke gyↄ Saiporↄse tɛɛlebii keŋ loŋ be kilisi ke nɛ, te de tinaa ke yela te de kpasewↄ mo ka ata yenaŋ gyu ka seŋ Tae boo nↄↄman Siria tɛɛle keŋ dↄↄ. Botↄↄ te ba lese kasolↄse ŋan doo degbele dinaa keŋ man nɛ see. 4Botↄↄ te de naa Kristotena baale te de kyaawↄ be gyaŋ weeya nyetooro. Te Wurubuarɛ feliŋ ŋon tɛɛwↄ be dↄↄ yako Pↄↄl nyi, ↄ na fa waa gyu Gyerusalɛm ya. 5Mↄna debaŋ keŋ kelii nyi dɛɛ koro lee be gyaŋ nɛ, te da korowↄ mo de gbɛɛ bela. Keŋte baŋ na be wɛɛla na be bia pou gyuuwↄ ka tee daa donↄↄ keŋ nↄↄman. Te de popou buŋawↄ da doona dↄↄ ɛpo keŋ nↄↄman te de fanewↄ. 6De kalaa dↄŋa te de ka gyoo degbele dinaa keŋ man te baŋ mↄↄ besewↄ laŋ be dɛɛ. 7Da besewↄ mo de gbɛɛ keŋ dↄↄ lee Tae menɛɛ kelii Pitolemase te da doo Kristotena baŋ be kya botↄↄ nɛ nↄↄ te de kyaawↄ be gyaŋ wee dokoloŋ. 8Tɛɛ kena na te da korowↄ ka gyoo Kaesaria donↄↄ man, te de ka soo Filipo ŋon ↄ ne tɛɛ kolosi Kristo nombia nɛ. Ŋon Filipo mↄ kpuɛ balaŋ nyetooro baŋ bↄↄ kyaa lese Gyerusalɛm nyi baa kɛɛ weenɛɛ kekpɛlɛɛ dↄↄ nɛ man. 9Na ↄ dana bia alebia banaara baŋ ba te yala ta ya, na Wurubuarɛ ne tɛɛ be dↄↄ kolosi. 10De ke di weeya akalansɛɛ ŋaale botↄↄ nɛ, te Wurubuarɛ dekpeŋkpeŋgyↄↄre ŋolo ŋon bɛɛ baake e nyi Agabuse nɛ, lee Gyudia tɛɛle man kↄŋ. 11Ↄ kↄŋa de gyaŋ na, te ↄ moo Pↄↄl abↄsↄↄ mo baake ŋon gbagba ↄ nawↄↄ na ↄ nyiŋmaase te ↄ yakowↄ nyiaa, "Nnɛ yaa Wurubuarɛ feliŋ ŋon ne yako. Nnɛ te Gyudatena baŋ be kyaa Gyerusalɛm donↄↄ man nɛ, baa bake ŋon ↄ tee abↄsↄↄ kei nɛ, na baa lese e fa balaŋ baŋ ba te yɛɛ Gyudatenawↄ ya nɛ." 12Debaŋ keŋ dↄↄ nyii mena nombia kɛŋa nɛ, te daa na balaŋ akaŋ baŋ be kyaa botↄↄ nɛ waase Pↄↄl nyi ↄ na gyu Gyerusalɛm ya. 13Keŋte Pↄↄl tiranↄↄ fa wↄ nyi, "Weera ɛ ne wii te ɛ ne yeli dekↄkↄrↄkↄↄ ne kyaŋ maŋ mena? Na me desina ma wose bo fa kebake kaageŋ Gyerusalɛm ya, mↄna ma te desina ma wose fa yeŋ mↄ lee de Gbeŋgyoo Yesu yele man." 14Da te tale kyɛɛkee wa agyueŋ ya, mena dↄↄ de tina e yela te de yakowↄ nyi, "Wurubuarɛ gbagba waa yɛɛ ↄ kegyaebii." 15Da ke kyaa botↄↄ kyomii nɛ, da moo da wose te de laŋa Gyerusalɛm. 16Kristotena baŋ bↄↄ lee Kaesaria nɛ man baale sila daa, te ba moo daa gyu Masↄne ŋon ↄ ba lee Saiporↄse donↄↄ man nɛ dɛɛ. Masↄne kei yɛɛ walaŋ ŋon ↄ be wulaa lɛɛ Kristo di leenaŋ kewalaŋ keŋ. 17De ka gyoo Gyerusalɛm donↄↄ man nɛ, Kristotena baŋ be kyaa botↄↄ nɛ lɛɛ daa nideli. 18Ke tɛɛ naa keŋ nɛ, daa na Pↄↄl gyuuwↄ ka do Gyemisi nↄↄ. De ke gyu keŋ na ↄsom kegyiise baŋ pou kyaa botↄↄ. 19Pↄↄl doo wↄ nↄↄ te ↄ yako wↄ kpene kamasɛ keŋ Wurubuarɛ be tɛɛ ↄ dↄↄ yɛɛ balaŋ baŋ ba te yɛɛ Gyudatenawↄ ya man nɛ. 20Be ke nyii nombia ŋan taŋ nɛ, be popou lese Wurubuarɛ yele. Te be yako e nyi, "Kegyia Pↄↄl, ŋgba n naa mena keŋ Gyudatena burum be lɛɛ Kristo nombia ŋan di, mↄna be sɛɛ be dana Wurubuarɛ mmaraase ŋan ↄ be yeli Mosesi be ŋmarase see nɛ man nideli. 21Be te nyii n nombia nyi, n na wola Gyudatena baŋ pou be kyaa balaŋ baŋ ba te yɛɛ Gyudatenawↄ ya nɛ tɛɛle dↄↄ nyi, baa tina Wurubuarɛ mmaraase ŋan ↄ be yeli Mosesi be ŋmarase see nɛ dↄↄ kedi yela. Be na kara ba bia baala wose ya, te be na sila de naanaↄ beneŋ nombia ŋan bela ya. 22Kei na sena yaa dɛɛ yɛɛ baa, de yɛɛ senaa baa nyii nyi n te kↄŋ kɛbo. 23Mena dↄↄ yɛɛ kpene keŋ dɛɛ yako neŋ nɛ. Balaŋ banaara baale kyaa de gyaŋ kɛbo keŋ bↄↄ kaŋ ntam. 24Gyu ke kpu na balaŋ banaara kɛwↄ na ɛ ka gberaa ɛ wose, na n ke tↄ kom keŋ baa gyoo nɛ, na baa nyiŋ tale tisi ba nyeeya. N yɛɛ mena na, walaŋ kamasɛ waa naa nyi nombia ŋan pou bↄↄ yako lee n wose man nɛ te yɛɛ ampaŋ ya. Mↄna baa naa nyi nyaŋ gbagba mↄ n ne di Wurubuarɛ mmaraase ŋan ↄ be yeli Mosesi be ŋmarase see nɛ dↄↄ nideli. 25Balaŋ baŋ ba te yɛɛ Gyudatenawↄ ya te bↄↄ lɛɛ Yesu di nɛ dↄↄ, da te ŋmarase tↄne yelee wↄ te de yako wↄ kpene keŋ dↄↄ bake see nɛ nyi be na di bane dɛɛ weenɛɛ ya. Be na di fatabo ya te be na di wonembu ŋon ba te kara ↄ nyee pɛte ↄ ba yem nɛ ya. Nɛnɛɛ baa lese ba wose lee kafoŋ nombia man." 26Mena dↄↄ tɛɛ kena keŋ na, te Pↄↄl moo balaŋ banaara baŋ, te be gyuuwↄ kegberaa ba wose. Te ↄ gyuu Wurubuarɛ ↄsom deni dinaa keŋ man ka see wee keŋ ba wose kegberaa keŋ gyae ke taŋ, na wee keŋ be man walaŋ kamasɛ waa fa Wurubuarɛ kedi. 27Weeya nyetooro ŋan kɛɛ benaa keŋ nɛ, Gyudatena baale baŋ bↄↄ lee Esia tɛɛle man nɛ naa Pↄↄl Wurubuarɛ ↄsom deni dinaa keŋ man. Te be feefuwↄ do balaŋ dikpii keŋ bↄↄ gyaŋee botↄↄ nɛ te be kyaŋa e, 28te be fae yeesa nyi, "Iseraetena ɛ kaa kyↄ daa, balee kei yɛna walaŋ ŋon ↄ dↄŋ yenaŋ kamasɛ ↄ na wola balaŋ pou nombia tia de balaŋ na Wurubuarɛ mmaraase ŋan ↄ be yeli Mosesi be ŋmarase see fa daa nɛ, na Wurubuarɛ ↄsom deni dinaa keŋ. Lee kenaŋ wↄle koraŋ na, ↄ ta mo balaŋ baŋ ba te yɛɛ Gyudatenawↄ ya nɛ kↄŋ Wurubuarɛ ↄsom deni dinaa keŋ man mo ayimɛɛ kaa buraa ke." 29Keŋ dↄↄ bↄↄ yako mena yɛna nyi, na be wulaa naa Efeso baale ŋon bɛɛ baake e nyi Tirofimuse nɛ, na Pↄↄl dↄŋɛɛ donↄↄ keŋ man, mena dↄↄ na baŋ gyeŋ nyi Pↄↄl ta mo e gyu Wurubuarɛ ↄsom deni dinaa keŋ man. 30Botↄↄ te donↄↄ keŋ pou siŋiiwↄ te balaŋ yeuwↄ lee yenaŋ kamasɛ kↄŋ kaa kyaŋ Pↄↄl te be wↄŋee e lee Wurubuarɛ ↄsom deni dinaa keŋ man. Karatetee dokoloŋ te be kyaŋa ka asima ŋan pou tↄ. 31Be kɛɛ gyae baa ko e nɛ, te tiila ke tuŋa Romantena yoonↄↄtena siamante ŋon nyi, Gyerusalɛm donↄↄ keŋ pou te siŋii. 32Debokenaŋ man te ↄ moo yoonↄↄtena kegyiise na yoonↄↄtena baale, te be yeuwↄ gyu balaŋ dikpii keŋ gyaŋ. Balaŋ baŋ kena siamante ŋon na yoonↄↄtena baŋ nɛ, te be tinaa Pↄↄl ketuku yela. 33Be siamante ŋon gyuu Pↄↄl gyaŋ te ↄ ke kyaŋa e te ↄ yakowↄ nyi baa mo agbaraagbaraase ala bake e. Keŋte ↄ bↄↄse wↄ nyi, "Amↄte yɛna balee kei, te woŋ yaa ↄ yɛɛwↄ?" 34Balaŋ baŋ baale ne yako nombii dokoloŋ na baale mↄ ne yako ŋaale kpoo. Botↄↄ kee wosi dↄↄ, yoonↄↄtena siamante ŋon ta gyeŋ nombia ŋan nyee na ŋe nawↄↄ ya, mena dↄↄ ↄ yako ↄ tewulɛɛ baŋ nyi baa mo e gyu ba dekyae man. 35Be ka mo e kelii botↄↄ keŋ bɛɛ mo gyeŋ gyoo deni keŋ man nɛ, balaŋ baŋ sia keyɛɛ dↄↄ yoonↄↄtena baŋ gate Pↄↄl seele adido. 36Na balaŋ baŋ be silana wↄ nɛ, ne fae yeesa nyii, "Ɛ ko e." 37Be kɛɛ gyae baa mo Pↄↄl gyoo yoonↄↄtena baŋ dekyae keŋ man nɛ, ↄ yako yoonↄↄtena siamante ŋon nyi, "Mɛɛ gyae maa yako neŋ nombii daale." Te ↄ bↄↄse Pↄↄl nyi, "N ne nyii Giriki dei?" 38"Na nyaŋ yɛna Igyipite baale ŋon n be kyaa koro seŋ tia kegyiise te n ba mo awudiina kakpoŋse banaara (4,000) sila n wose gyu kefula man nɛ yee?" 39Te Pↄↄl tiranↄↄ fa e nyi, "Koa, me yɛɛ Gyuda baale e te ba lola maŋ bo Silisia tɛɛle man. Ma lee Tasuse donↄↄ keŋ ke dana yele nɛ man. Waaseda, fa maŋ gbɛɛ na maa kolosi fa balaŋ baŋ." 40Te yoonↄↄtena siamante ŋon faa e gbɛɛ nyi waa kolosi. Mena dↄↄ Pↄↄl seŋawↄ botↄↄ keŋ bɛɛ mo gyeŋ gyoo deni keŋ man nɛ, te ↄ gyinaa ↄ nyiŋmaa adido nyi baa wu be nↄↄ na baa tei e. Balaŋ baŋ ke wu be nↄↄse nɛ, te Pↄↄl kolosiwↄ Hiburu dei man fa wↄ.

will be added

X\