Kpilala 20

1Basabasa keŋ wↄle nɛ, Pↄↄl baake Kristotena baŋ pou yilaa te ↄ kolosiwↄ fa wↄ do wↄ kakyeŋ te ↄ kalaa wↄ, te ↄ lee botↄↄ laŋ Masedonia. 2Ↄ tɛɛwↄ kila botↄↄ yenaŋ pou, na ↄ ne kolosi do balaŋ baŋ pou kakyeŋ te ↄ leewↄ botↄↄ kↄŋ Giriki tɛɛle man. 3Ↄ kyaawↄ botↄↄ gyaalaŋna batooro. Ↄ kɛɛ desina ↄ wose waa gyu Siria tɛɛle man na te ↄ naawↄ nyi Gyudatena ne bake ↄ nyeeman. Mena dↄↄ ↄ yɛɛ wa agyueŋ nyi waa bese ka mo na Masedonia tɛɛle man. 4Balaŋ baŋ bↄↄ sila e gyu nɛ yɛna Piruse ŋon ↄ ba lee Beria nɛ bu Sopata, na Arisitakuse na Sekunduse baŋ bↄↄ lee Tesalonika nɛ, na Gayose ŋon ↄ ba lee Dɛbi nɛ, na Timoti na Tikikuse na Tirofimuse baŋ bↄↄ lee Esia tɛɛle man nɛ. 5Mena balaŋ kɛwↄ kyaŋa gbɛɛ te ba ke kyaawↄ Torase donↄↄ man daa daa. 6Gyudatena bodobodo keŋ tee be doo ke man ya kedi wee dinaa keŋ wↄle nɛ, da moo degbele dinaa lee Filipi. Weeya anoŋ wↄle nɛ te de ka tuŋa baŋ bↄↄ kyaŋ gbɛɛ laŋ nɛ Torase donↄↄ man te de dii weeya nyetooro botↄↄ. 7Gyudatena kefɛɛfowee keŋ wↄle nɛ de popou kaa gyaŋeewↄ dee di weenɛɛ ŋan de Gbeŋgyoo Yesu ba wola daa nyi dee di na dɛɛ mo tↄↄse e nɛ. Lee keŋ tɛɛ de naa na Pↄↄl waa bese dↄↄ, ↄ kolosi Wurubuarɛ nombia ŋan menɛɛ kelii tɛɛ nsana. 8Na kanease burum doo abansoro deni keŋ man dↄↄ gyaŋee nɛ. 9Pↄↄl kɛɛ kolosi keŋ nɛ, na tobaale ŋon bɛɛ baake e nyi Yutikuse baŋɛɛ abansoro deni kebaŋ gyakaa atoorote keŋ nfansere dↄↄ ↄ ne deŋeli. Lee Pↄↄl kekolosi kyare dↄↄ dosoroŋ moo tobaale ŋon, te tira e lee botↄↄ kaa lↄ tɛɛle man. Be gyuuwↄ ke gate e na ↄ ta yem. 10Keŋte Pↄↄl tisiwↄ gyu ke buŋ tobaale ŋon dↄↄ te ↄ pukaa e te ↄ gyuusu e lee yeŋ man. Keŋte ↄ yako wↄ nyi, "Ɛ na yeli ɛ wↄe ke lↄ ŋon ya, ↄ delena." 11Keŋte Pↄↄl besewↄ gyu ba dekyae keŋ man adido botↄↄ te be ke dii weenɛɛ ŋan de Gbeŋgyoo Yesu kpa baa di na baa mo tↄↄse e nɛ. Ↄ besewↄ kolosi menɛɛ kelii tɛɛ kɛɛ yɛɛ maa na te ↄ laŋawↄ. 12Te balaŋ baŋ moo tobaale ŋon ↄ ba yem te Pↄↄl be gyuusu e nɛ, gyu ↄ dekpaŋalaŋ man te be popou wↄe fɛɛ wↄ. 13Keŋte da gyoowↄ degbele dinaa keŋ man gyu Asose donↄↄ man, na de kaa mo Pↄↄl kpu na da wose. Nawolo nyi ↄ yako daa nyi waa kyaŋ gbɛɛ na ↄ naawↄ, na de kaa mo e botↄↄ. 14Ↄ ke kↄŋ kaa tuŋ daa Asose donↄↄ man keŋ nɛ, da moo e kpu na da wose gyu Mitilene donↄↄ keŋ man. 15Tɛɛ kena keŋ nɛ te da moo degbele dinaa keŋ bela kelii Kiyose tɛɛlebii keŋ loŋ be kilisi ke nɛ yenaŋ. Weeya alate keŋ na te de gbaawↄ gyu Samose tɛɛlebii keŋ loŋ be kilisi ke nɛ man, te ka weeya atoorote na, te da gyoo Miletuse donↄↄ man. 16Pↄↄl yɛɛ wa agyueŋ nyi, ↄ be gyae waa seŋ Efeso donↄↄ man ya, na ↄ be nyiŋ wↄlɛɛ debaŋ Esia tɛɛle man ya. Nawolo nyi ↄ ne gyae bileŋ nyi akpaa ↄ tale na, waa gyu Gyerusalɛm donↄↄ man ke tuŋ Gyudatena wee dinaa keŋ bɛɛ baake ke nyi Pentekosite nɛ. 17Ↄ ke kyaa Miletuse na, te ↄ kpilawↄ ka mo Efeso Kristotena ↄsom kegyiise baŋ. 18Ba ke kↄŋ kaa gyoo nɛ, ↄ yako wↄ nyi "Ɛmɛɛ gbagba ɛ gyeŋ nyi, leenaŋ wee gyaŋgbate keŋ mↄↄ kↄŋ ɛ gyaŋ Esia tɛɛle man nɛ, daa na ŋon kyaawↄ nideli weeya ŋenaŋ pou man. 19Ɛ gyeŋ mena keŋ mↄↄ yↄkↄse ma wose te mↄↄ mo siasaraŋ yɛɛ tom keŋ nideli ŋgba de Gbeŋgyoo Wurubuarɛ tobaale nɛ. Te ɛ naa mena keŋ Gyudatena ba koro seŋ me dↄↄ te bↄↄ do maŋ sibiiyam nɛ. 20Ɛ gyeŋ nyi debaŋ keŋ mee kolosi Wurubuarɛ nombia ŋan fa ŋon balaŋ nsana na ya akpaŋalaŋse man nɛ, me ta mo kolo weese ŋon ya. Ma lese abↄↄ ŋan gyae ke kyↄ ŋon nɛ pou wola ŋon. 21Gyudatena na Girikitena pou te me fareewↄ nyi, baa kyɛɛkee lee be nombiakumɛɛ man na baa kↄŋ Wurubuarɛ gyaŋ na baa lɛɛ de Gbeŋgyoo Yesu di. 22Te nɛnɛɛ, mɛɛ gyae maa yɛɛ kpene keŋ Wurubuarɛ feliŋ ŋon ne gyae dↄↄ mee gyu Gyerusalɛm, mↄna mↄↄ gyeŋ kpene keŋ gyae ke kↄŋ me dↄↄ botↄↄ ya. 23Nombii dokoloŋ keŋ ma gyeŋ yɛna nyi, Wurubuarɛ feliŋ ŋon ne faree maŋ donↄↄ kamasɛ man nyi, baa naase maŋ diyem na baa kyaŋ maŋ tↄ deni. 24Mↄna mↄↄ ne kɛɛ ma nyeedoŋ nyi ke yɛɛ kolo ke fa maŋ ya. Mɛɛ gyae maa yɛɛ tom keŋ de Gbeŋgyoo Yesu be fa maŋ nyi maa yɛɛ nɛ ke si kↄ ↄto. Tom kenaŋ yɛna nyi, maa yako ↄ nombia kpaakpaa ŋan fa balaŋ nyi Wurubuarɛ waa mo ↄ bɛrɛɛ boele wↄ." 25Nɛnɛɛ ma gyeŋ nyi ɛmɛɛ baŋ pou mↄↄ kili ɛ dↄↄ yako ŋon Wurubuarɛ gyoori keŋ wose man nombia ŋan nɛ, ɛ man ŋolo be gyae waa tekaa naa maŋ bela ya. 26Mena dↄↄ gyɛŋ wee kei mɛɛ yako ŋon baa nyi, akpaa ɛ man ŋolo da yoo lee Wurubuarɛ gbɛɛ man na, me nↄↄ be doo ya. 27Nawolo nyi ma te yako ŋon Wurubuarɛ nyeeman nombia ŋan pou. 28Ɛ kɛɛ ɛ wose dↄↄ nideli, na ɛ ke kɛɛ balaŋ baŋ Wurubuarɛ feliŋ ŋon ba mo wↄ do ɛ nyiŋmaa man nɛ mↄ dↄↄ nideli. Ɛ kɛɛ Kristotena dikpii keŋ dↄↄ nideli ŋgba mena keŋ wonembu kɛɛlere ne kɛɛ ↄ wonembia dↄↄ nɛ. Baŋ yɛna baŋ Wurubuarɛ be yela ↄ bu ba yem lɛɛ ba nyeeya nɛ. 29Ma gyeŋ nyi ma ke laŋ wↄle na, balaŋ kumɛɛ baa kaa gyoo ɛ man ŋgba mena keŋ gbougbouse na gyoo wonembia man nɛ, te bↄↄ gyae baa tina ŋon yela ya. 30Te debaŋ daale gyae kelii nɛ, baale baa lee ɛmɛɛ gbagba ɛ dikpii keŋ man na baa beo ɛ tebia Kristotena baŋ baale sila ba wose. 31Mena dↄↄ ɛ doo ɛ wose dↄↄ, na ɛ ke tↄↄse nyi kulutooneŋ atooro sↄↄŋ te me faree ŋon na siasaraŋ nelim na ka weese pou. 32Te nɛnɛɛ mɛɛ mo ŋon mɛɛ do Wurubuarɛ nyiŋmaa man. Nombia ŋan na wola Wurubuarɛ bɛrɛɛ keŋ ↄ dana fa deniwalaŋ nɛ, ne gyae la ke kyↄ ŋon na ɛ ke tale seŋ nombia ŋan ɛ be lɛɛ di nɛ man nideli. Wurubuarɛ waa mo ↄ nyiŋmaa gyakaa ɛmɛɛ na ↄ balaŋ akaŋ baŋ ↄ ba lese nɛ pou dↄↄ. 33Me sia te yɛɛ ŋolo kↄba yayam yaa ↄ kↄba, yaa wa abↄↄ dↄↄ ya. 34Ɛmɛɛ gbagba ɛ gyeŋ nyi ma nyiŋmaase kɛŋa te ma moowↄ yɛɛ tom te me nyiŋa abↄↄ ŋan pou gyae ke hia daa na me tebia nɛ. 35Ma wola ŋon kpene kamasɛ man nyi, kaboena nyi walaŋ kamasɛ waa yɛɛ tom nideli mena, na waa nyiŋ kolo kyↄ baŋ bↄↄ dana doŋ ya nɛ. Na ɛ ke tↄↄse de Gbeŋgyoo Yesu kawola keŋ nyi, "Kolo kefa dana gyoŋ na wosefɛɛreŋ kela kolo kenyiŋ lee ŋolo gyaŋ." 36Ↄ kekolosi kɛŋa taŋ nɛ, be popou tisiwↄ buŋ ba doona dↄↄ te be fanewↄ. 37Keŋte be man walaŋ kamasɛ moo kewii pukaa e te be kalaa e. 38Keŋ ↄ be yako wↄ nyi bↄↄ gyae baa tekaa naa e bela ya nɛ, keŋ yɛna kpene keŋ be takaa wↄ nideli. Ba moo e ka tee, te ↄ gyoo degbele dinaa keŋ man laŋ.

will be added

X\