Kpilala 19

1Debaŋ keŋ Apolo kyaa Korinto nɛ, Pↄↄl besewↄ kila menɛɛ kelii Efeso donↄↄ man. Botↄↄ te ↄ ke naa Yesu silala baale, 2te ↄ bↄↄse wↄ nyi, "Debaŋ keŋ ɛ be lɛɛ Yesu di na, Wurubuarɛ moo ↄ feliŋ ŋon do ɛ man?" Te be tiranↄↄ fa e nyi, "De te nyii ta gba nyi Wurubuarɛ feliŋ daale kyaa ya." 3Te Pↄↄl bↄↄse wↄ bela nyi, "Kenaŋ na Wurubuarɛ loŋ woŋti yaa be sↄↄ ŋon?" Te be tiranↄↄ fa e nyiaa, "Gyↄn Wurubuarɛ loŋkesↄ te be sↄↄ daa." 4Botↄↄ te Pↄↄl yako wↄ nyi, "Baŋ bↄↄ kyɛɛkee lee be gbɛɛneŋ kumɛɛ man nɛ, baŋ te Gyↄn sↄↄ wↄ Wurubuarɛ loŋ. Keŋte ↄ yako Iseraetena nyi, baa lɛɛ ŋon waa kↄŋ ŋon Gyↄn wↄle nɛ di. Ŋon yɛna Yesu." 5Be ke nyii nombia kɛŋa nɛ, be yela be sↄↄ wↄ Wurubuarɛ loŋ lee de gbeŋgyoo Yesu yele man. 6Pↄↄl moo ↄ nyiŋmaa gyakaa be dↄↄ, te Wurubuarɛ moo ↄ feliŋ do be man. Botↄↄ te be kolosi deise wↄlɛɛ, te Wurubuarɛ tɛɛwↄ be dↄↄ kolosi nombia. 7Na be yɛɛ ŋgba baala kufu bala (12) nɛ. 8Gyaalaŋna batooro sↄↄŋ na, Pↄↄl ne gyu Gyudatena ↄsom deni man, na ↄ ne gyↄ ↄ konↄↄ kolosi Wurubuarɛ nombia ŋan fa wↄ. Ŋon na wↄ na gyoo Wurubuarɛ nombia ŋan man, te ↄ ne wↄŋee ba agyueŋ kↄŋ Wurubuarɛ gyoori deedii keŋ wose man nombia man, na baa nyiŋ lɛɛ Yesu di. 9Mↄna be man baale yɛɛ konↄↄyuŋ te be bɛɛwↄ bↄↄ lɛɛ Yesu nombia ŋan di ya, te be yako nombiakumɛɛ lee de Gbeŋgyoo Yesu nyeedoŋ gbɛɛ keŋ ↄ ba wolo nɛ wose man balaŋ nsana. Mena dↄↄ Pↄↄl moo silala baŋ kpu na ↄ wose, te ba korowↄ tina balaŋ baŋ yela. Wee kamasɛ na bɛɛ gyaŋee Tiranuse deni dinaa keŋ ↄ na wola abↄↄ nɛ man gyoo Wurubuarɛ nombia ŋan man. 10Ↄ yɛɛ kei menɛɛ kulutooneŋ ala mena dↄↄ walaŋ kamasɛ ŋon ↄ kyaa Esia tɛɛle keŋ man nɛ, na baŋ ba te yɛɛ Gyudatenawↄ ya nɛ pou nyii de Gbeŋgyoo Yesu nombia ŋan. 11Wurubuarɛ tɛɛwↄ Pↄↄl dↄↄ yɛɛ gyakoloŋ nombia na nombia dinaana. 12Keŋ nyi balaŋ moo adukuse na kanyaŋsebia ke tina Pↄↄl, na be ta mo ke tina be kaweesetena na ba wose te yɛɛ wↄ doŋ, te baŋ mↄ feliŋkumɛɛ doo be man na, ŋɛɛ lee be man. 13Na Gyudatena baale mↄ dↄŋɛɛ bee kili gegi feliŋkumɛɛ lee balaŋ wose man. Be gyↄↄ be konↄↄ mo de Gbeŋgyoo Yesu yele nyi baa gegi feliŋkumɛɛ. Bɛɛ gyae baa gegi feliŋkumɛɛ lee balaŋ wose man na bɛɛ yako nyi, "Lee Yesu ŋon Pↄↄl ne yako ↄ nombia nɛ yele man, mɛɛ faree ŋon nyi 'Ɛ lee ↄ man.' " 14Na Gyudatena saese kegyia ŋolo ŋon bɛɛ baake e nyi Siifa nɛ bia baala nyetooro baale ne yɛɛ na mena nombia kɛŋa. 15Be kɛɛ yɛɛ mena nɛ, wee daale feliŋkum daale bↄↄse wↄ nyi, "Ma gyeŋ Yesu te ma gyeŋ Pↄↄl mↄ, te ɛmɛɛ yɛna bomↄ?" 16Mena dↄↄ balee ŋon feliŋkum keŋ doo ↄ man nɛ yeuwↄ gyoo wↄ ketuku. Ↄ tuku wↄ tirii ba kegbase, te ba moo fatabose yekii lee dekpaŋalaŋ keŋ man diteŋteli. 17Te Gyudatena na baŋ ba te yɛɛ Gyudatenawↄ ya te be kyaa Efeso donↄↄ man nɛ, nyii nombia kɛŋa na, gyakoloŋ gyoo wↄ. Mena dↄↄ ba moo obuo fa de Gbeŋgyoo Yesu, te be ta mo ↄ yele do nsendee ya. 18Te baŋ bↄↄ lɛɛ Yesu di nɛ, be man balaŋ burum leewↄ balaŋ nsana tↄlɛɛ be nↄↄwoya lese be nombiakumɛɛ ŋan bↄↄ yɛɛ nɛ debↄↄ. 19Be man ŋmeeseŋtena burum mↄ moo ba ŋmeeseŋ tↄna ŋan bɛɛ ŋmarase ba ŋmeeseŋ nombia do ŋe man nɛ kↄŋ, te Pↄↄl na ↄ tebia too ŋa balaŋ baŋ pou siaman. Ba mo tↄna ŋan bↄↄ too nɛ pou koya bom na, te yɛɛ kↄba nsendee ya. 20Lee mena dↄↄ de Gbeŋgyoo Yesu nombia ŋan yaaseewↄ gyu lem te balaŋ lɛɛ ŋa do nideli. 21Nombia kɛŋa pou wↄle nɛ, Pↄↄl yɛɛ wa agyueŋ nyi waa mo na Masedonia na Giriki tɛɛlese man, na waa gyu Gyerusalɛm donↄↄ man. Botↄↄ te ↄ yakowↄ nyi, "Akpaa me gyu kelii botↄↄ na, kaboena nyi maa gyu Roman donↄↄ man mↄ." 22Mena dↄↄ ↄ kpila balaŋ baŋ bɛɛ kyↄ e nɛ man balaŋ bala, baŋ yɛna Timoti na Erasituse nyi baa gyu Masedonia, na ŋon Pↄↄl kekyaa Esia tɛɛle man kyomii. 23Debaŋ kenaŋ man te aŋmaareŋ dinaa daale gyoo Efesotena man lee de Gbeŋgyoo Yesu nyeedoŋ gbɛɛ keŋ ↄ silala baŋ na wolo nɛ dↄↄ. 24Na nyeele wolom luure ŋolo kyaa ŋon bɛɛ baake e nyi Demetiriyu. Ↄ na mo nyeele wolom luu be bane Atemise denɛɛbia yↄↄ. Mena dↄↄ balaŋ baŋ bɛɛ yɛɛ mena tom kei nɛ nyiŋa kↄba nideli. 25Keŋte Demetiriyu ŋon baake ↄ tomyɛɛra, na baŋ pou bɛɛ yɛɛ mena tom kenaŋ dinↄↄ nɛ te ↄ yako wↄ nyiaa, "Me tebia ŋgba ɛ gyeŋ nyi dee nyiŋ kↄba lee da tom kei man. 26Ɛmɛɛ gbagba ɛ ne naa te ɛ ne nyii mena keŋ Pↄↄl kei ne wↄlɛɛ balaŋ nyeeya, te ↄ na wola balaŋ nyi kpene keŋ bɛɛ mo nyiŋmaase yɛɛ nɛ, te yɛɛ kpene keŋ kaboena nyi baa som ya. Na Efeso kɛbo kaageŋ te ↄ ne wↄlɛɛ balaŋ nyeeya ya, mↄna ↄ ta mo ↄ nombia ŋenaŋ kila Esia tɛɛle kei pou. 27Te yɛɛ nyi da tom kei kaageŋ ne gyae la ke wↄlɛɛ ya, mↄna de bane alo Atemise deni dinaa keŋ Esia na tɛɛle kei dↄↄ balaŋ pou ne kaa som nɛ, yele gyae ke yala te de bane Atemise ŋon mↄ be gyae waa tekaa nyiŋ obuo bela ya." 28Balaŋ dikpii keŋ ke nyii nombia kɛŋa nɛ, ba gyeŋa baŋ te ba gyoo yeesa kefae nyi, "Daa Efesotena bane Atemise ŋon yɛɛ bane dinaa e!" 29Mena dↄↄ donↄↄ keŋ siŋiiwↄ, te ba ke kyaŋa Gayose na Arisitakuse. Baŋ yɛna Masedonia tewulɛɛ bala baŋ be kpuɛ na Pↄↄl nɛ, keŋte be yɛɛ nↄↄdokoloŋ wↄŋee wↄ gyu be dɛɛgyaŋee keŋ man. 30Nafↄ Pↄↄl gyaewↄ nyi waa gyu botↄↄ, mↄna kaseela baŋ te fa e gbɛɛ ya. 31Te Esiatena kegyiise baŋ be yɛɛ Pↄↄl ↄ gyoonawↄ nɛ, kpilawↄ ka sola Pↄↄl nyi ↄ na fa waa gyu ba degyaŋee keŋ man ya. 32Debaŋ kenaŋ na donↄↄ keŋ te siŋii na bɛɛ fae yeesa. Baale kpa kei, baale mↄ ne yako ŋaale kpoo. Be man dikpii dinaa daale mↄ dↄↄ, baŋ ba gyeŋ kpene keŋ be kↄŋ dↄↄ te bↄↄ kaa gyaŋee botↄↄ ya. 33Te Gyudatena baŋ moo nombia gyakaa Alɛkesanda dↄↄ. Be tɛɛse e lee siaman kↄŋ balaŋ nsana, mena dↄↄ balaŋ baŋ baale gyueŋwↄ nyi Alɛkesanda gyae na nombia ŋan kↄŋ, keŋte Alɛkesanda gyinaa ↄ nyiŋmaa adido nyi waa kolosi lese ↄ nↄↄse. 34Mↄna balaŋ baŋ ka gyeŋ nyi ↄ yɛɛ Gyuda baale e nɛ, ba seŋawↄ nombii dokoloŋ dↄↄ bɛɛ fae yeesa ŋgba debaŋse ala nɛ nyi, "Daa Efesotena bane Atemise yɛɛ bane dinaa e!" 35Keŋte donↄↄ keŋ tↄne ŋmarasere ŋon yela balaŋ baŋ pou tinaa kekolosi yela te ↄ yako wↄ nyi, "Efesotena, amↄte kyaa la tɛɛle kei dↄↄ keŋ nyi ↄ ba gyeŋ nyi Efeso donↄↄ yɛna de bane dinaa Atemise deni na ↄ boe keŋ kɛɛ wola ↄ dinↄↄ keŋ ba lee adido kaa yala nɛ nyee ya? 36Ŋolo be kyaa keŋ nyi waa tale lɛɛ mena nombia kɛŋa aŋmaareŋ ya. Mena dↄↄ ɛ nyiŋ konↄↄ, ɛ na barase yɛɛ kolo ya. 37Balaŋ kɛwↄ baŋ ɛ ba mo wↄ kↄŋ nɛ, te ŋmɛɛle kolo lee de bane deni man ya. Te ba te yako nombiikum mↄ tia de bane kei ya. 38Akpaa Demetiriyu na ↄ tebia na ŋolo dana nombia na, nombia kedi weeya kyaa te kegyiise baŋ mↄ kyaa. Baa tale mo dↄŋa gyu botↄↄ. 39Mↄna nyi akpaa ɛ dana nombia wↄlɛɛ ŋaale na, kaboena nyi donↄↄsetena gbagba baa di ŋa ŋgba mena keŋ da mmaraa keŋ na wolo nɛ. 40Akpaa da te kɛɛ nideli ya na, dee nyiŋ nombia lee gyɛŋ basabasa kei dↄↄ. Te akpaa de nyiŋ nombia mↄ na, dↄↄ gyae dɛɛ tale tiranↄↄ lese da wose lee ŋe man ya, nawolo nyi basabasa kei be taŋ nyee na nawↄↄ ya." 41Ↄ kekolosi taŋ nɛ, te ↄ yela balaŋ baŋ pou yaaseewↄ.

will be added

X\