Kpilala 18

1Kei wↄle nɛ, Pↄↄl korowↄ lee Atɛnse donↄↄ keŋ man laŋ Korinto. 2Botↄↄ te ↄ ke naa Gyuda baale ŋolo ŋon bɛɛ baake e nyi Akuila nɛ. Ↄ yɛɛ Pↄntuse baale e, te ŋon na ↄ wɛɛle Pirisila ka lee Itali kↄŋ Korinto donↄↄ man te kyare ta ya. Nawolo nyi gyoo dinaa Klaudiuse ta see mmaraa nyi, Gyudatena pou baa lee Roman donↄↄ keŋ man. Pↄↄl gyuuwↄ Akuila na ↄ wɛɛle gyaŋ Korinto botↄↄ. 3Te keŋ ŋon na wↄ pou tom yɛɛ dokoloŋ dↄↄ, ↄ kyaawↄ be gyaŋ te be yɛɛ tom bom. Ba tom keŋ bɛɛ yɛɛ yɛna nyi, kanyaŋse te bɛɛ mo yɛɛ denɛɛ yↄↄ. 4Gyudatena kefɛɛfowee kamasɛ nɛ, Pↄↄl ne gyu Gyudatena ↄsom deni man, na ŋon na wↄ ta gyoo Wurubuarɛ nombia ŋan man nideli, na Gyudatena na Girikitena kenyiŋ lɛɛ Wurubuarɛ nombia ŋan di. 5Silase na Timoti ka lee Masedonia kↄŋ na, Pↄↄl te yɛɛ kolo kpu na Kristo nombia ŋan keyako ya. Ↄ na lese ŋe man wola Gyudatena baŋ nideli nyi Yesu yɛna nyeelɛɛre ŋon Wurubuarɛ be yako see nyi waa kↄŋ nɛ. 6Mↄna be bɛɛ Pↄↄl nombia ŋan te ba tee e. Mena dↄↄ ŋon mↄ kpiisi ↄ kegba ayimɛɛ woli wↄ keŋ nawolo nyi ↄ ta lese ↄ nyiŋmaase lee be nombia man te ↄ yako wↄ nyi, "Akpaa ɛ yoo Wurubuarɛ gbɛɛman na, ɛmɛɛ gbagba ɛ nombia ŋenaŋ, te yɛɛ me nombia bela ya. Nawolo nyi keŋ kaboena nyi maa yɛɛ yaa me yɛɛwↄ nɛ. Lee gyɛŋ ne gyu dↄↄ, maa gyu kekolosi Wurubuarɛ nombia bo fa baŋ ba te yɛɛ Gyudatenawↄ ya nɛ." 7Mena dↄↄ ↄ leewↄ be gyaŋ gyu kekyaa Tituse Gyustuse ŋon ↄ te yɛɛ Gyuda baale e ya te ↄ na som Wurubuarɛ nɛ dekpaŋalaŋ man. Ↄ dekpaŋalaŋ kenaŋ benaa na Gyudatena ↄsom deni keŋ. 8Bↄ ↄsom deni man kegyia ŋon bɛɛ baake e nyi Kirispuse nɛ na ↄ dekpaŋalaŋmantena pou lɛɛ de Gbeŋgyoo Wurubuarɛ nombia ŋan di. Korintotena burum mↄ nyii nombia ŋan te be lɛɛ ŋa di, te be sↄↄ wↄ Wurubuarɛ loŋ. 9Wee daale nelim nɛ, de Gbeŋgyoo Wurubuarɛ kolosiwↄ fa Pↄↄl ŋgba dosɛɛ man nɛ nyi, "Na yee ya, mↄna kolosi Wurubuarɛ nombia ŋan debaŋ kamasɛ. Na tina ŋa keyako yela ya. 10Nawolo nyi me kpuɛ na neŋ. Ŋolo be gyae waa tale yɛɛ neŋ kolo ya, nawolo nyi balaŋ burum kyaa donↄↄ kei man keŋ be yɛɛ me wui." 11Mena dↄↄ Pↄↄl kyaawↄ botↄↄ kulutoo dokoloŋ na yaale na ↄ na wola wↄ Wurubuarɛ nombia ŋan. 12Debaŋ keŋ Galio ba seŋ Romantena gyoo dinaa nawↄↄ man dii gyoori Girikitena dↄↄ nɛ, te Gyudatena yɛɛ nↄↄ te be kyaŋa Pↄↄl mo e gyu nombia dedii man. 13Te be yakowↄ nyi "Balee kei na wola balaŋ Wurubuarɛ ↄsom wↄle daale keŋ ne tia da mmaraase." 14Pↄↄl ka mo waa kolosi pɛ, te Galio yako Gyudatena baŋ nyi, "Nyi akpaa deŋ yɛɛ nyi nombiikum daale yaa balee kei yɛɛwↄ na, nafↄ maa nyiŋ konↄↄ fa ŋon. 15Mↄna kei dↄↄ, ke yɛɛ nↄↄwoya na yela, na ɛmɛɛ gbagba ya mmaraase wose man te ɛ ne wↄŋee dↄↄ, ɛmɛɛ gbagba ɛ gyu kedi ɛ nombia. Nombia kɛŋa dinↄↄ dↄↄ, maŋ be gyae maa tale di ŋa ya." 16Te ↄ yela be gegi wↄ lee nombia dedii man botↄↄ. 17Keŋte balaŋ baŋ pou korowↄ kyaŋ Sositene ŋon ↄ yɛɛ ↄsom deni keŋ kegyia e nɛ, te be tuku e nombia dedii man botↄↄ, mↄna Galio te taŋ bua wↄ ya. 18Pↄↄl kyaawↄ Kristotena baŋ be kyaa Korinto nɛ gyaŋ kelii debaŋ daale, te ↄ korowↄ lee botↄↄ mo loŋ dↄↄ gyu Siria tɛɛle man. Ↄ ne gyu na te ↄ moo Pirisila na Akuila kpu na ↄ wose. Ↄ ke gyu ka gyoo Kenkiria donↄↄ man nɛ, ↄ gbee ↄ nyee lee ntam keŋ ↄ be kam fa Wurubuarɛ nɛ dↄↄ. 19Be ke gyu ka gyoo Efeso donↄↄ man nɛ, ↄ tinaa Pirisila na Akuila yela, te waageŋ gyuu Gyudatena ↄsom deni man, te ŋon na wↄ gyoo Wurubuarɛ nombia ŋan man. 20Keŋte balaŋ baŋ yako e nyi nafↄ waa kyaa be gyaŋ kyomii te ↄ bɛɛwↄ. 21Ↄ kee gyu na te ↄ yako wↄ nyiaa, "Akpaa Wurubuarɛ de sɛɛ na, maa bese kↄŋ ɛ gyaŋ." Te ↄ moowↄ loŋ dↄↄ lee Efeso donↄↄ man laŋ. 22Ↄ kelii Kaesaria donↄↄ man nɛ, ↄ leewↄ botↄↄ gyu Gyerusalɛm donↄↄ man ka do Kristotena baŋ nↄↄ, te ↄ laŋa Antiↄke. 23Ↄ dii weeya akalansɛɛ botↄↄ, kenaŋ wↄle nɛ ↄ tɛɛwↄ Galatia na Firigia tɛɛlese man do Kristotena baŋ kakyeŋ. 24Debaŋ kenaŋ man na, Gyuda baale ŋon bɛɛ baake e nyi Apolo, ŋon bↄↄ lola e Alɛkesanda donↄↄ man nɛ, te kↄŋ ↄ kyaa Efeso donↄↄ man. Ↄ yɛɛ walaŋ ŋon ↄ gyeŋ kekolosi nideli, te ↄ gyeŋ Wurubuarɛ nombia aŋmaraseŋ see ŋan mↄ nideli. 25Na be taŋ wola e de Gbeŋgyoo Yesu nombia ŋan nideli. Ↄ moo ↄ konↄↄ pou yase sia kolosi te ↄ wola de Gbeŋgyoo Yesu wose man nombia ŋan man nideli, mↄna Gyↄn kesↄ balaŋ Wurubuarɛ loŋ keŋ kaageŋ wose man nombia te ↄ gyeŋ. 26Ↄ gyoo Gyudatena ↄsom deni man te ↄ gyↄↄ ↄ konↄↄ kolosi Wurubuarɛ nombia ŋan. Pirisila na Akuila kenyii ↄ nombia ŋan ↄ na wolo nɛ, be kaa moo e gyu be dɛɛ te be desinawↄ lese Wurubuarɛ nombia ŋan man wola e nideli. 27Debaŋ keŋ Apolo be yɛɛ wa agyueŋ nyi ↄ ne gyu Akaya Girikitena tɛɛle man nɛ, Kristotena baŋ be kyaa Efeso nɛ doo e kakyeŋ, te be faa e be nyiŋmaa man tↄne nyi waa mo gyina Kristotena baŋ be kyaa botↄↄ nɛ, nyi baa lɛɛ e nideli. Ↄ ka gyoo botↄↄ nɛ, ↄ kyↄↄ baŋ lee Wurubuarɛ bɛrɛɛ keŋ dↄↄ, bↄↄ lɛɛ de Gbeŋgyoo Yesu di nɛ nideli. 28Be gyaŋee balaŋ man bɛɛ lɛɛ aŋmaareŋ lee Wurubuarɛ nombia man na ↄ ne di Gyudatena baŋ dↄↄ, nawolo nyi ↄ na mo Wurubuarɛ nombia aŋmaraseŋ see ŋan wola wↄ nyi Yesu yɛna nyeelɛɛre ŋon Wurubuarɛ be yako see nyi waa kↄŋ nɛ.

will be added

X\